الموكوكون!

Quote: ملاسي .. أسووي ليك شنو مثلاً ؟؟ يا ربي ما تمحنا يا الله .. غايتو قدرت تضحكني و تنرفزني .. و شمت فينا العدوين . ياخي قلنا ليك ما دايرين معاك و إتجاهلتك .. برضو لاصق !! عندك في راسك البمبي الجديد لنج ده حاجة .. شنو هي أنا ما عارفا !! طيب , فترت ( من شيلة السواد ) عملت بوست بإسمي عديييييييل ؟؟ أها فرصة كويسة تخليني أسوق صورتي الجد هنا ( عشان تتغلغل كويس ) . مش الصورة الفي دقنوسك البمبي الجديد ده . يا ولد يا حسين .. أنا عماد عبدالله محمد حسين . مولود في واحد من أشهر و أعرق و أجمل الأحياء الشعبية في الكون : الديم / الخرطوم , في 14 أغسطس 62 , برجي الأسد ( عاااااووووو ) .. و ناس الأسد ديل أعمل حسابك منهم , قالوا بيقودو الناس ( و إنت أضانك ماشا الله حمرا و كبيرة و فيها مَلَكة ) . خريج فنون تخصص تلوين - و ملوناتي من الختيييرين كان ما عجبك - .. بوليس سابق , و كمساري و كاتب يافطات و موظف بوستة و نقاش بوهية و جير و أحد أمهر رواد المواخير و الخانات في أزقة الديم الجميلة . و رائد سابق لكل منتديات الغنا و الشعر و الرسم و الثقافة و القراية أم دق في الخرطوم . تقلبت زي ما داير يمين شمال و سويت في الدنيا دي الدايرو من بوهيمية و قلة أدب و قراية و صياعة عدوك , عضو سابق في الجبهة ديمقراطية و عضو إتحاد الفنون و عضو إتحاد التشكيليين السابق و كاتب صحفي و مصمم و مخرج و رسام - تاني كان ما عجبك : رسام ختييييير و مخرج أختتتتتر - و بمارس أي شي يطلع في راسي بمزاج المزاج . مدمن منقة و جبنة و أغاني سودانية , و كنت مدمن كل البلاوي البتنفع الراس من نواشف على سوائل على مآرب تانية , و كمان فوق البيعة لسه بحب أدلع راسي الكعب ده بالقراية و الكتابة و الرسم و التلوين و الغنا و النقة . أي شي جميل و سمح بيغلغلني و يتعبني و أحب الله طوالي ( بما في ذلك النساء الجميلات شديد ) . ديمقراطي لليفة ( يولد المواطن منا في الديم ديمقراطياً , فرأسه و قلبه ييمنناه او ييسرانه أو يسجمانه زيك ) , عضو حركة القوى الجديدة الديمقراطية ( حق ) . تاني شنو ؟ .. عندي خمسة عيال يا حلاة الدنيا عليهم : تسنيم 19 سنة , آلاء 18 - و ديل جامعيات - بعدين يارا 13 , أحمد 10 , و عبودي اللذيذ ( عبدالله ) 6 سنوات . متزوج من زولة رايعة : حليمة عيسى و هي برضو خريجة فنون و معلمة ثانويات و فنانة تختها على الجرح يبرا . تاني شنو ؟ .. طولي 194 سم و وزني 89 كيلو و عندي نضارتين : قراية و شوف ( تاني أعمل حسابك ) . ما بحبك لله و الرسول , و ما شغال معاي لؤم نفسك الشينة و قباحة دواخلك .. و رخصة حركات الغواني ( أو ما نسميه في الديم : الفاتيات ) . تاني شنو !؟؟ يللا , حِل عن سماي الله يرضى عليك .