|
|
 Re: لهذا يعشق الجنوبيون الموسيقي الافريقية ؛؛؛؛؛؛ (Re: بابكر التوم)
|
سلام بتاعك يا اكوومديد اندرو كوات
واكبو سلام كتير كتير لناس الجوا لزياره فى بوست بتاع اته.
ياخى شنو طلعته تاريخنا بى بالمزيكه الجالوه-دم بلوو-دى وزكرتنى ايام المزازيك حقت الكلاكله ومايو والحاج يوسف ومره عندى واحد صحبى فردتنا من حلب بحرى من اولاد حله حمد قال عاوز يحضر ليهو حفله حقت جنوبين،سوقتو يوم لحفله كان عامله المونج الديجى واندو فى اركويت المهم خشينا الحفله وبعد ضربنا ليك العضه والببسسى -المريسه الحلال- سكرتير الحفله قام يلقى كلمتو وكدا فقام قال لناس المعزومين اسمو كلكم هنا الحفله دا حقنا وكلنا هنا ناس اخوان وكلكم عشيناكم واديناكم ببسى كمان وافتكر ماقصرنا معاكم وعشان نكون واضحين الليله يوم بتاع مزازيك وبهجه بس واى زول يحترم نفسو ويستمتع بالمزيكه زى ماداير لكن الزول البعمل حركات وعنكبه وامور تلاته بقرشين فى حفلتنا دا حيشوف دك وجر بالواطه وحاجات تانيه،المهم صحبى اشرف الحلبى قال لى يازول عرفنا الدك والجر بالواطه الحاجات التانيه دى شنو كمان قلت ليه انا ماعارفه لكن انته كان داير تعرفه قوم بعد ماتشرب الببسى حق الضيافه اعمل حركات عشان تعرف هى شنو، والمزيكه دورت ليك زى العجب والفطور فى رمضان وكل الناس اتنين اتنين وكوستى وربك والحب شبك وصحبى الحلبى خشه فى صدمه حضاريه فى زمن المشروع الحضارى حق مافى اختلاط بين مره وراجل والرقص الفاضح والخليع يازول رقصنا ليك رقيص فاضح وواضح لحدى الصباح وكت المكرفونات حقت ناس الحضاره الكان بقولو فيها(و لا نامت اعين الجبانا) والجهاد نادنا المهم مزازيقهم العجيبه ديك، وفى النهايه صبحى الحلبى من اليوم داك مسكو ليك ظار اسمو الجنوب والجنوبين ووكتو زمنو كلو مقضيهو فى الكمبونى مع المجنبه-الجنوبين- وكمان يوم الاحد اول زول بكون مجكك فى كنيسه شارع النيل وهسه مسبت-معرس-ليهو بت مورو وعندو بتين وكان لقيتو بتكلم ليك زى الترتيب لغه الجنوب المنعوته ب-عربى جوبا- وكان داير يحلف ويقسم ليك فى حاجه بقول وحيات كراع جداده فى كجرون ووحيات صاقعه والحليفه بالصاقعه فى جوبا مهمه يعنى لو بتحب ليك بت من بنات جوبا وقالت ليك بكره اشوفك جمبه الدكان الفى حى اطلع بره وحلفت قال ليك واحات ربنا انا بجى تاكد انو دا زمن فشنك وبتكون قاعد زى الجماعه البشروهم الجكس فى سعد قشره وانا كنت منهم البقولو-اغالط نفسى باصرار اقول يمكن انا الما جيت- شفته كيف ولكن كان حلفت ليك وقالت واحيات صاقعه انا بى جا-انا بجى-يازول امشى شوفليك طوالى بنطلون وقميص شده والجزمه اعمل ليها ارنيش لمعى اكتر من بوت الجيش فى طابور الصباح تقول لى شنو.
يا دسنا ياقولو يانقو،دمبو لوو دمبلو،ياخى مالو انتى جيبو لا انا مشاكل وخلى انا زكرو ايامات بتاع زمان ياجيك انت.
وتشكرا يامونج اندرو ياخ.
وبعدين الافركانو ناس مالى والسنغال ديل عندهم جنس مزازيك اسكت ساى بس والمزيكه حقت المالين والسنغالين ديل اول مره اسمع بيها لمن جيت هنا بلاد التلج وكلو صيف عندنا فى منتريال جاز فستفال-محرجانات مزازيك- من انحاء الدنيا كلها والخواجات ديل بحبو ليك ناس مالى والسنغال جنس حب وقبل اربعه شهور فنان الراب النويراوى امانول جال كان هنا فى منتريال يامونج الجن-الزول-اسمو امانول دا خطير مره واحد فى مزيكه الراب بلغه النوبر وهنا فى كميه من اذاعات الف ام ممكن تكون قاعد فى قهوه ولا اندايه-بار-تسمع غنيه لى عبد القادر سالم ياخى امباره سمعته فى الرادى ف م غنيه قديمه من السودان بتقول-ماشاء الله ماشاءالله،حاجه كولنق كولنق،انا عندى بنيه ماشاء الله)،غايتو النشوف اخرته مع الناس البعد مرات البجيهم الجن الكلكى ويمشوا يكسروا ليك الاعمال الفنيه فى كليه الفنون بعتباره اصنام ولا شنو ماعارف وهم ياريت كان يكونوا عندهم صبر الفنان العمل اللوحه والنحت بكون شالت منو كم وكت وكم سجاره وكم باقه عرقى وكم سفه تمباك وكم وكم من جهد وتفكير وخيال عشان ينجز عملو الابداعى والفنى،وفى النهايه يجى زول من خلاوى جامعه امدرمان الاسلاميه وافريقيا العالميه والقران الكريم ويكسر ليك شغل الفنان فى دقائق بس،معقوله ناس بالتفكير دا يمكن يوم من الايام يبسو لينا مزازيك افريقيه فى الرادى والتلفزيون القاطع الجمار حقهم دا-المفروض نقول حقنا- ولسه ناس قطع الخور قاعدين شغالين تش وزى العجب بفكروا يستلموا صحن السلطه-ما السلطه وحيستلموها زى الترتيب ،لو لسه ناس الديمقراطيه شغالين لى ابو حكه وابو فكيك وابو تحليه عن خطاب الهويه والشطه والدكوه والعلاقه بين الجرجير والفجل فى زمن العولمه وشنو وشنو داك من منظور الاسكافى والسماكى فى واقع بنفتكر انو متنوع، والله تانى حيقعدو ليوم القيامه والحاجات السمحه والفنيه يشموها ولا فى قدحه ملاح عدس طالما قاعدين لدس من مرافعين القرون الوسطى يااسطوات الجاهزين لحمايت الدكاكين والافران والمغالق وعشان تستلم وتاكل السلطه محتاج كنجالات والكنجالات عند ناس الدين وناس الدين ماسكين سكين بتاكل اى كادوك عملو فكى ديمقراطى وعلمانى.
وكترو من المزازيك والنقاره الافريكانو.
محسن طه
|
|
 
|
|
|
|
|
| العنوان |
الكاتب |
Date |
 لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 06:09 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 06:20 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | فيصل محمد خليل | 04-30-08, 07:01 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | Tabaldina | 04-30-08, 07:18 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 08:16 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 08:46 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | شول اشوانق دينق | 04-30-08, 07:31 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 08:51 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | شول اشوانق دينق | 04-30-08, 09:07 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 04-30-08, 09:22 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | dardiri satti | 04-30-08, 09:45 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | معاذ حسن | 04-30-08, 09:51 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | مدثر محمد عمر | 04-30-08, 10:47 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 05-01-08, 04:33 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | شول اشوانق دينق | 04-30-08, 01:04 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | Raja | 04-30-08, 01:28 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | بابكر التوم | 04-30-08, 03:57 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | محسن طه | 04-30-08, 07:12 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | محمد على النقرو | 04-30-08, 11:20 PM |
 Re: لهذا يعشق الجنوبيون الموسيقي الافريقية ؛؛؛؛؛؛ | Omer Abdalla | 04-30-08, 11:55 PM |
 Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 05-01-08, 06:28 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 05-01-08, 06:35 AM |
| Re: لهذا يعشق الجنوبيون الموسيقي الافريقية ؛؛؛؛؛؛ | اندرو كوات | 05-01-08, 05:30 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | محسن طه | 05-03-08, 06:13 PM |
| Re: لهذا يعشق الجنوبيون الموسيقي الافريقية ؛؛؛؛؛؛ | عثمان عجبين | 05-27-08, 04:29 PM |
 Re: لهذا يعشق الجنوبيون الموسيقي الافريقية ؛؛؛؛؛؛ | JOK BIONG | 05-27-08, 04:42 PM |
|
| |
فيس بوك
تويتر
انستقرام
يوتيوب
بنتيريست