يا زول ماااا عندك أيّ مشكلة !!!!

Quote: ترررن ترررن ترررن -الوو .. اهلييييييييين محمود كيف الاخبار؟ - والله تمام كيفك انت يا سلمون.. ياخي اها موضوعنا كيف؟ ما بتقدر تجيني الليلة؟ - يا زول ماااا عندك اي مشكلة!! عندي مشيوير كده صغير بمشيهو ومن ستة لي ستة ونص بكون معاك .. جهز الشاي واللقيمات .. هههههها! ترررن ترررن ترررن - الو يا شيخ عباس كيف احوالك واخبارك واخبار الوليدات ؟ - تمام الحمد لله كيفك يا ابوداؤود .. بالله ما تنسى الليلة .. المرة الفاتت شريتني عليك الله الليلة جيب لي البتاعات وتعال لي وللا لو ما بتقدر تجي انا بمر عليك انت قاعد ؟! - لالا والله الليلة بجيك ماااااعندك اي مشكلة!! بس عندي غشوة صغيرة كده وتاني ما عندي اي حاجة انا بطلع من البيت ستة ستة وربع كده وبالكتير ستة ونص سبعة الا ربع تلقاني قدام الباب.. كو كو كو .. كو كو كو - اقيفي يا بت هوي ما تفتحي ، جارية كدة عاملة شعرك المنكوش ده .. قولي مين ، ما يكون ده الزول المرض ده داير يفاجئني ويجيني قبل مواعيدي ليهو ، قولي مين . - مييييييييييين - انا الفاضل يا آلاء .. - تعالي تعالي خلاص انا بفتح امشي يللا خلي نوال تسرح ليك شعرك المكلفت ده وخليني اجي راجع القاك كده عشان اشحطك بي سير الكهرباء لمن تـ (....) .. امشي يللا. - يا فضولي وينك ياخي انا من قبيل اعصابي بايظة قلت الزول ده الليلة باعني ومشى الكورة براهو وللا شنو؟ .. وبعدين مالك ما ضربت لي بوري !! جننتني ياخ انا قايلك عباس ريكس ! - ياخي البوري من امبارح ما عارفو مالو فجأة كده بقى كاتم وكلما ادوسو يديني صوت ضعيف زي الزول البقنت .. - ياخي بالغت يا فاضل ياخ طيب الليلة لو غالبين كيف نعمل ثورات فرح في الشوارع ياخ .. ومالك ما وديتو للطيب مقنيتة !! -ياخي هو غير مقنيتة مافي زول لخبطو لي ، اول امبارح وديت ليهو العربية عشان يصلح لي الكتاوت قعد يمعط لي في الاسلاك باسنانو ويبزق زي المرة الحامل وطوالي تاني يوم لقيت البوري تقول عندو وجع ضهر . - طيب خلاص اتخارج اسي ما يجي زول يقفلنا . ترررن ترررن ترررن - دينااااااك ده محمود ... وطّي وطّي الصوت ده كمان فنانك الجواط ده جايبو من وين انت .. الو يا حودة كيفك معليش ياخ والله عندنا بت خالتنا كده تعبانة شوية فبنمشي عليها وبحاول ازوغ منهم بدري واجيكم بي هناك والله حتى عباس مفروض امر عليهو بعديك .. فحاول عليك الله اضرب ليهو معاك وكلمو وقول ليهو بجي عليكم بعدين .. - سلامتها بالله وطمنّا عليها .. ولو ما لقيت طريقة خلي مواعيدنا بكرة . يا زول ما عندك اي مشكلة انا كان ما لقيت طريقة زغت من الجماعة ديل الليلة .. اكييييييييد بكرة انا معاكم بس ما تنسى اضرب لي عباس معاك .. عشان انا رصيدي ده مصفّر .... احححححححح كده اتفكيت منهم الاتنين يللا ركب لينا شريط البنسلين يا تمرجي . ترررن ترررن ترررن - اللييييييييلة ده عباس .. والله الزول ده ثقيل خلاص وبعدين مكناتي دي ما قاعد تمشي فيهو ما زي محمود الطيبان داك .. شوف رنة الجوال ذاته زعلانة. - ياخي اعمل نائم ما ترد ليهو .. وانت ذاتك الزول المسيخ ده اللماك فيهو شنو !! تررن تررن تررن - ايوة عارفو ما حا يخليني لايوق خلاص .. الووو يا عباس ، معليش ياخ والله حصلت لي ظروف واسي كنت بتكلم مع محمود ، هو ما ضرب ليك ! - ضرب لي .. سلامتها بت خالتك .. وهي وين في البيت وللا في المستشفى عشان اصلا انا طالع وبمر عليك في الحتة الهي فيها منها اشوفها ومنها نجي مع بعض .. انت معاك عربية ؟ - لا ما معاي عربية انا في المواصلات وهم اسي في البيت ومن هناك حا نمشي نوديها المستشفى . - ياتو مستشفى ؟ - والله ما عارف لكن اول ما نوصل بديك خبر .. ما عندك ايّ مشكلة . - هههههههههههههههههههههاي .. ختاك في خانة اليك يا معلم !!!