متحـف الطبيعـة والجمـال

Quote: دي يا مرتضى حكاية فيها ناس من ناسنا أيام زمان، إن شاء الله تعجبك، ولو عجبتك في زيها كتير يا ولد يا أحمد بدأت أمه تصيح، نعم يمة، أحمد قام جري وبسرعة وقف قدامها، في شنو يمة؟ تعال ديل (خمسة قروش)، أبو قرشين (الفريني) وده قرش وده قرش و وديل تعريفتين، أجري دكان عمك ود عجب الله جيب لي ربع رطل سكر وربع وقية شاي ونص وقية بن وجاز بتعريفة، والتعريفة التانية اشتري ليك بيها حاجة، شيل قزازة الجاز وخلي ود عجب الله يلف ليك السكر والشاي كويس وتعال بسرعة، وأوعاك تتأخر، والبن لو انكشح منك زي المرة الفاتت تلقطو واحدة واحدة أوعاك تخلي لي نصه في الواطة وتجيني منطر عيونك. كويس يمة، أحمد شال القروش ومشى التُكل يفتش في قزازة الجاز، التكل فيه قزاز كتير، أحمد عارفو كلو، قزازة السمن وقزازة الزيت كلهن بيض، بس قزازة الجاز دي لونها أخضر مرسوم عليها جمل (البيرة أم جمل الشراب اسكوب) أحمد شال القزازة وقام جري وهو يفكر ماذا سيشتري بالتعريفة بتاعتو، هو أصلو بيحب الطحنية، والطحنية بتعريفة زمان كانت كتيرة خلاص على ولد صغيِّر في عمر ه، وأحمد كان دائماً بياكل طحنيته في الطريق وهو راجع من المرسال، ، ولو شاف في عيال ولا زول جاي من بعيد يكرفسها ويدسها في جيبو وبقشقش خشمو كويس عشان ما في زول يعرف عندو طحنية ويشحدو منها. ولمن يكون شبعان شديد بياكل نصها ويدس باقيها لي بعدين. أحمد شال قزازتو ومرق من البيت، ولامن مسك الشارع شاف ليك علي ود أب راس من بعيد، واقف جنب بيتهم الفاتح في الزقاق، والزقاق واحد وضيّق، وما في سكة غيرو تودي لي دكان ود عجب الله، وعلي ود أب راس عمره 9 سنوات، أكبر من أحمد بي سنة واحدة بس لكنه ولد شراني ويحب المشاكل زي عيونو، محجَّر الشارع على العيال والبنيات، يا كتحك يا عفَّصك يا فناك بي حجر المهم لازم يعمل ليهو مليون مشكلة في اليوم وجنو وجن أحمد ده بالذات، وحاقر بيهو حقارة شديدة، وأم أحمد فترت من كترة الشكية لي أم على ود أب راس من عمايل ولدها علي، والنافع الله، لكن زمان ما في زول بمشي يشتكي في مركز البوليس والناس أهل، غايتو أحمد فكر إنو أحسن حاجة يعملها يجي بي جمبو فاكي البيرق لكن ود أب راس الفقري عمل فيها داخل على بيتهم، ولبد جنب خشم الباب، هو عارف لعبة أحمد أصلو أحمد بعملها كتير، وبجي بي جمبه قايم صوف، علي ود أب راس خلى أحمد لحدي ما بقى في نص الزقاق وظهر ليك ليهو فجأة، وحصل التصادم بين الاثنين، والقروش طارت وانبشكت في الرملة، والقزازة وقعت هناك، لكن ما انكسرت، عشان الرملة ثقيلة، والشكلة دوّرت، أحمد ماسك ود أب راس من كم العراقي ويكورك قروشي، وود أب راس ما لاقي ملكة في أحمد لكن مرة مرة يناولو ليك ويقول ليهو صادمني ليه، عميان ما بتشوف؟ الحمار الأبيض وقف، راكب فوقه عمك ود بشارة وشايل ليهو مطرق مَرِخ طويل، وبدا يكورك يا أولاد يا قليلين الأدب يا عديمين الحيا مالكم؟ كل واحد داير يتكلم ويبرر موقفو يا عمي أنا كنت مرسل الدكان . . لكن هو يا عمي جا جاري ودقشني بلا سبب. خلاص كفاية بلاش دوشة العمى اليعميكم اتو الاتنين، القروش كم؟ خمسة قروش، ووقعن وين؟ أحمد قال ليهو هنا يا عمي محل اداقشنا، يلا فتشوها، قوام قبال الشمس تغيب، أحمد وود أب راس، كل واحد قنطر ليهو كوم تراب، وبدو في التفتيش، كوس كوس يا إبليس ما حقي حق الناس، طبعاً التفتيش بكون بإزاحة التراب من الكوم بتحريك اليد من الشمال لليمين في حركة متواصلة في أسفل الكوم، وعمك ود بشارة لسع واقف وشايل مطرقو، أحمد لقى قرش وبعد شوية ود أب راس قال أنا لقيت قرش، وتاني كل واحد سوى ليهو كوم ولقو باقي القروش إلا الفريني ود الكلب أصلو أبى يتلقي،لكن تاني ما ألقاكم عاملين مشكلة مع بعض، فاهمين ولا لا؟ الاتنين حمَّرو لي بعض وجاوبو في وقت واحد وقالو ليهو سمح يا عمي ود بشارة عمك ود بشارة قال الفريني ده بكون طار بعيد لكن ما في مشكله، طلّع جزلانو وقال لي أحمد هاك ديل قرشين أمشي جيب الحاجات الرسلوك ليها .