هوامش على دفتر ذكرى الأستاذ محمود.. وثائق، صور، أحاديث مسجلة، وفيديو

Quote: أذكر حوالي الساعة اتنين ونص أو تلاتة مشينا أنا ومعاي الأخ الأستاذ عادل عبد الغني المحامي ومعانا فتح الرحمن النحاس ، زميلي في "الأيام" في المبنى بتاع المعتمدية في المركز الرئيسي بتاع امدرمان طالبنا ، زي ما بقولو الجهات المختصة ، في الكاونتر بتاع الحراسات على أساس أنو نقابل الأستاذ وكدة .. قال لينا ممكن تقابلوه لكن هو ما ممكن يطلع برة لكن ممكن يندهوا عليه ومن خلال البوابة البتأدي من الكاونتر للحراسات جوة ممكن انتوا تقابلوه وتتكلموا معاه .. فأذكر انو جانا الأستاذ محمود في زيو السوداني التقليدي والعريق – ال [كلمة غير واضحة يبدو أنها العراقي] والسروال والمركوب الأبيض .. أذكر انو كان ماسك في القضبان الحديدية بتاعة الباب واتكلم معانا .. وراه طبعا في مسجونات كانوا في الحراسة ومسجونين وباعة خمور بلدية وكده .. أذكر أنو منظره في اللحظة ديك جسد لي اذلال النظام لمعارضيه وللمفكرين ولناس في قامة الأستاذ محمود محمد طه .. منظر مؤلم يعني حقيقة .. المهم بعد التحية والسلام ، أذكر قال لي: تحياتك وصلت وكنا متوقعين ، على حسب كلامك انو بعد يوم أو يومين نلتقيك في الثورة .. اعتذرت ليهو .. اذكر انو أنا وجهت ليهو سؤال مباشر ، قلت ليهو يا أستاذ أنا آسف جدا جدا انو أنا أشوفك في المشهد ديا ، في ظل نظام انت كنت بتدافع عنو وانتهى بيك المطاف على أساس انو هذا النظام نفسو يضعك في مثل هذا الموضع .. قال لي: نحن كنا بندافع عن مايو لأنو مايو كانت ضد الهوس الديني لكن لمن مايو استحالت هي نفسها لهوس نحن رفعنا يدينا منها وبدأنا في محاربتها .. اذكر اني أنا سألته: طيب رؤيتك للبحصل شنو؟ يعني مايو مستمرة وكذا وكذا؟ قال لي: لا مايو انتهت .. يكفي أنها خرجت من قلوب الناس .. دي العبارة ..