أسمنت اوكراني

Quote: سلام يا الامين .. أنا نصحت أي زول إنو ما يشتري إسمنت الأيامات دي ولا يبني الايامات دي ،، سوق الإسمنتفيهو لخبطة شديدة لأسباب كتيرة أهمها إنو كان في تجار عندهم كميات كبيرة مخزنة من السنة الفاتت ، يعني من قبل زيادة القيمة المضافة والدولار الجمركي وفي تجار إشترو الإسمنت السنة دي بعد الزيادة ، طيب الإشكالية وين ؟!! الإشكالية التاجر الإشترى زمان هسي بيطرح مخزونو بي سعر كتير عشان يربح ويعوض شهور التخزين لكن برضو ممكن يبيع أقل من السوق بي شوية عشان يضمن السيولة ، والتاجر الجديد ما بيقدر ينقص من سعرو نهائي وإلا حا يخسر خاصة إنو في أي وكت ممكن التاجر المخزن بالسعر القديم يطرح إنتاجو دفعة واحدة بي سعر أقل في السوق يقوم يطلع التجار الجداد من السوق لأنهم ما بيقدروا يبيعوا بالخسارة .. عشان كدة حالياً في إضطراب ولخبطة في السعر ،، تمشي لي دكان يقول ليك الطن بي تمنمية ، الدكان البعد طوالي يقول ليك الطن بي تمنمية وخمسين .. إذا من الخطورة المجازفة بشراء الإسمنت حاليا لانو الناس ما عارفة المخزن منو كم ؟ والإنتاج الجديد كم .. والحالة دي أمكن تستمر تلاتة أسابيع لي شهر ودي المدة الممكن يتعرف فيها حجم الإسمنت في السوق وبعد داك حا ينخفض تدريجياً .. يعني بإختصار وقف البنيان الأيامات دي وما تشتري لحدي ما اللخبطة دي تنتهي ..!