نجوان !

Quote: بعد مرور نصف يوم تقريبا من عمر البوست الذي كتبته عن اللوائح، وجدت نفسي بالخــور.. بكل تهذيب.. بكري قبقبنا... وطلّعونا في الكومر.. أنا والثلاثة متداخلين بالبوست.. تاج السر الحسن.. بدرالدين الأمير... وهشام آدم.. ناس لا إيدهم لا كراعهم لقوا نفسهم مضهبين بصحاري أريزونا... رغم الخُلعة... إعتذرت ليهم.. (لكن ما أدّوني وش).. الخور غريـــب...... ضلّمة... تسمع كواريك.. نبذ عجيب... تهديدات... أصوات ناس بتصفّق.. ناس هايجة... ناس داخلة وناس مارقة.. والغريبة ده كله... والزحمة الفي الخور أضعاف الفي المنبر النضيف وظريف ده .. الناس واقفة صفوف عشان تدخل.. في ناس بتبيع دورها في الصف سوق اسود.. وناس بتبيت قدّام الخور عشان تدخل أول ما الباب يفتح.. وناس بلعبوا كوشتينة منتظرين دورهم... وناس بتسترزق من المنتظرين.. بيع شاي ..قهوة... ساندوتشات... بارد.. المهم...أكون كضااابة ثمّ كضابة.. لو قلت ما خفت سألت عن الوضع والإقامة في الخور... يعني مؤقت ولا بنرجع.. ولا كيف المصير.. بكري قال إنتوا بترجعوا ..(وأحمدوا ربّكم على دي).. لكن البوست.. مكانه ما وراء الشمس... "يعني الخــور الشايفنو قدامكم ده".. قلت لبكري: " ما هاين علي.. أن يستقر البوست في جوف الخور...وسط حاجات والله ما بتشبهه ولا بشبها.. يعني زي المعتقل السياسي في سجن لامّي كده...مفروض إنه..." رفع بكري يده بتهذيب وقال: "ششش.." ثم تلى عليّ حقوقي (زي النيابة في أريزونا).. وكانت حقوقي "لاشئ..لاشئ..لاشئ".. "none".. بلعت ريقي .. ووقعّت تعهد بحسن السير والسلوك... لانه بعد الخور... لاشئ غير الحظر والإقلاع بالتونسية... قلت لبكري:"طيب ممكن أتصل بالبوست بتاعي وأطمئن عليه؟" رد:"التلفون مقطوع هنا...عايزة تقعدي تحرسي مافي مشكلة"... قلت "الله والنبي ".. لغاية هنا وكفاية... عموما الحصل حصل و يا ريس.. الراي رايك والشورة شورتك.. توووبة... وما ح أكررها تاني.. مشكلتي دلوقت..مش كيف وليه.. وإنما جرجرتي ودخولي الخور في حد ذاته.. يعني دي إتكتبت في تاريخي المنبري.. هل سأفقد إمتيازات؟ فرصة ترقية في سودانيزاونلاين؟ .. حقوق معاش وتقاعد؟ ماذا لو نزلت في إنتخابات منبرية... بجوا يطلّعوا لي القديم والجديد؟.. هل في شئ بيسوى دخول الخــور؟ (ناوية أكتب كتاب عن تجربة الخور ونصح الجميع...)