|
|
 Re: فضل أيوب من تاني .. يا صلاح عبدالله (فيديو) (Re: الزوول)
|
العزيز الصاحب الزوول..
ياخي كتر خيرك وبارك الله فيك ..
وأنا شاكر جداً للهدية الجميلة دي ، والله جات في وقتها تماماً
هل تصدق أنو خبر بوستيك ده جاني بمكالمة سريعة من السودان ؟
أحمد الله أن ارتبط تذكرك لنا بحاجة كويسة ، وفضل في نظري زول كويس جداً
وجاهز لأن يكون مشروع فنان خطير ، صغير في السن ، وخامة صوت قوية ، وقدرة عالية على
التطريب جاكم جاهز ، بس راجي زول يمسّكو الدرب
وكالعادة البرنامج ده ما حضرته ، وسمعي لفضل لم يتجاوز الأغنيتين النزلتهم
إنت قبل كده هنا ..
طبعاً حالة اليأس من كل حاجة في السودان (أظنها عند كل السودانيين) بتخلي الواحد متحفز
ومنتظر أي حاجة تطلعو من الحالة دي ، وده الخلاني أنبه الناس لإمكانيات فضل
لمن تسمع ليك صوت زي ده ، وانت في الحالة ديك ، بتبقى زي الغرقات اللقى ليهو قشة يتعلق بيها
أها ولدنا فضل ده قشتنا ، يا طّلعنا سالمين ، يا فكانا عكس الهوا واستقرينا في القاع
وهو على كل حال مكاننا الطبيعي والمتعودين عليه..
أخشى ما أخشاه أن يقف حيث هو ، ولا يجد من يأخذ بيده ، ويكتفى بالغنا في الحفلات
ويطلقوا عليه فضل الفنان ، ويبقى زيو وزي أي زول (حامل) هذا اللقب ولا يملك منه
شيئاً(الضمير راجع للقب)
فضل ده ، على الرغم من أنو ما عندو غنا حقو ، لكن صوتو بديع ، أنا بسمعو ضمن عدد محدد جداً
من الفنانين الشباب الأصواتهم فعلاً ممكن تكون إضافة حقيقية لمسيرة الغنا السوداني
وأسمع لآخرين (منسيين) والغريبة عايشين!!
واحد اسمو سبت عثمان ، وده من النيل الأزرق ، صوتو غريب ، شخصياً بيريحيني راحة السنين
بيغني غنا منطقة الانقسنا ، والنيل الازرق، الناس ديل عندهم ايقاعات والحان ما طبيعية
والتاني محمد البدري بتاع الشرق ، وده كمان قصة تانية ، يريحك جوه الجوه
رغم عدم فهمي لكلام أهلنا البجة ، لكن بكون لاصق له في المكرفون لغاية ما يتنفض ويتخارج
وأسمع كل الغنا القديم بلا استثناء ، وده كلو خوفاً من أن يلحق بأذني فيروس غنا الايامات دي
وبيني وبينك أهلنا قالو مدارة المؤمن على نفسو حسنة ، وأنا بصراحة خايف على (العدة)
أحمد الله أن لم يخب ظني في فضل ، وقد أحرز المركز الأول في المسابقة (بي حقو) ..
أرجو أن لا يخبو نجمه ، مثل كثيرين ، وأن لا تصيبه لعنة (الغرور) التي عادة تصيب
صغار الفنانين ، والذين يتقمصون شخصيات (الكبار) ويعتبروا نفسهم وصلوا (الميس)
هذه الآفة التي بدأت تتسرب رويداً رويداً لبعض الموهوبين/ات ..
والله يكضب الشينة..
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست