أديني خاطر شوقي ليك..

Quote: أنا فيك كاتلني الحنين.. لي لمة الناس العصر.. شاي المغيرب.. بشويش تهز كبايتو...شاييها يرقص في فتر أمي ليك كل العمر أديني خاطر شوقي ليك غيابك عني مامقصود..وجودك إنتي بديني العُذر مهم جداً..إعتراف عاجل.. حالي مشتاق ليك شديد أسي محتاجك شديد قاسي الشوق.. عليَّ ماساهِل غياب المطرة لو صمتك..سُّكاتك صوتو..صحّاني غيوم الفُرقة لو زعلك.. فراقكــ إنت أعياني ياكل المشاوير البتفتح طاقة لي شمس العيون الكان بتدينا النهار ياكل الدريبات الكان تودينا للممكن يكون بشبه حنينك ياديار ولسّه كاتلني الحنين لي لمة الناس والأهل خطوة الزول البريدو..وخبطة الباب بي مهل فاكر الوقفة جنب الباب؟ اللونو إلفة وحالو مَتكي.. وزولو عارفك وماهو غافل انتا شايفو وماك جاهل انو بيحبك تجي.. طَب..ماتجي.. سحاب الجيّة كان واصِل حنين ياصوته الدافي سمعو الجنبو والمافي نسيت الفات زمان جافي كفاية نفرِّح الحاضر ريدي عليك ماخافي حسّك فيني ماغايب..حسّك فيني هو الحاضِر غِرقتا في لهجك البِبرُق..شِرِقت من المطر نازِل علي مد أشواقي إتمدّد معبّية بي تفاصيلك..هناك هواك كان ماااهِل.. مسّى عليَّ شوق هاطل صِبِحت من الحلم غرقان ده ماحال المطر ..مايل حدود الإلفة مابتعرف تغيِّر محنة الحاصل غيابك..إنتا هو الحاصل. برجاك يوماتي.. وده ماحال الكلام منّك قبال تفكِّر فيهو.. تتلقَّاهو آذاني وعارف انتا انو بيحبك تجي.. طَب ماتجي.