|
|
 Re: غدا الخميس ذكري مصطفي سيد احمد علي البالتوك (Re: ateif abdoon)
|
مرثية الشاعر صلاح حاج سعيد
ما كنت قايل نفسي يوم
أرثيك يا أصدق خليل
أنا كنت بتخيّل أكون قبلك
أسافر غنوة في الوتر الجميل
زي ما عبرت معاك صروف زمن المسافة
وجينا للحزن النبيل
أنا كنت داير الدنيا تمهلنا
ونغني الفرحة لى الزمن الخُرافي .. المستحيل
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
كل المطارات والمواني
وشفع البلد الفتارى
لسة بارين القطاري
يسألوا الناس عن خبر زولاً
مسطّر إسمو في قلوب العذارى
وفى عيون كل المساكين ... الحيارى
زول بيطلع من نفس طورية ضامة الطين
تكابد طول نهارا
زول بيسكن في عيون أطفال
تأمّل ديمة يديها البشارة
يا خي والله الفرقة حارة
وفقدك أكبر من محيط الدنيا
وأكوانها ... ومدارا
طليتنا زي حلماً جميل
فجأة في غفلة أنسرق
أسطورة تحكي أماني جيل
في حب غناك كان ليهو حق
أديتو في الدنيا الأمل
وريتو كيف في الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح كما شمس النهار
صدقك ملاهو حماس .. يقين
بالخير وبالحق .. والنضار والإفتخار
إنو الحبيبة هي الأرض
والتضحيات عشان عيونا هو الفرض
والدنيا ورّاثا الصغار
وعرفنا يا زول قسوة الضنا والتعب
والإرتحال في غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك كل الشوارع في المدينة
ناحت عليك كل الفواصل
في الغنيوات الرصينة
وإنكتم نبض الغُنا
جلل سواد حزنك سنا
وإتوشح المنا بالضياع
وكان بدري يا زول الوداع
لا سكة لى درب الرجوع
بعدك أغانيك إلتياع
مسكونة بالأسى .. والخشوع
لكن بريقك ما خبا
أبداً بريقك ما هو ضاع
ساطع كما نور الشعاع
منو قال هو فات
زولاً وهب كل الحياة للأغنيات
منو قال هو فات
ما أظنو زيّك يقولوا فات
يا من وهب كل الحياة للأغنيات
يا من ترك في قلوبنا أنبل ذكريات
يا من ترك أحلامو في كل الجهات
وخلّد معاني الروعة بى كل الصفات
ما أظنو زيّك يقولوا فات
يا من وهب كل الحياة للأغنيات
****
ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول حروف الشنشنة
أمل الأغاني
كلمات: مدني النخلي
شرد الكلام مني وسكت
حس الأغاني الملهمة
لبس النغم ثوب الحداد نزف المقاطع مؤلمة
لمتنا بيك يمين ظروف في ليل رياحو ملتنا هم
أنت الأخو وبرضو الصديق والبينا كان إحساس ودم
للكل فتحت القلب دار .. ومزجت روحك بالنغم
يا حليلو زمناً كان معاك يا حليل جدارنا الأنهزم
روح الرحابة الما بتضيق
يا باهي يا دفق الرحيق
شاقي الدروب الموحشة
فارش عشم وترك طريق
دايس علي الجرح الأليم
في أحلك اللحظات رفيق
يا حليلو أملاً كان معاك
خلانا لى جرحاً عميق
نجم الحروف المرهفة
ضد الذبول والإنطفا
لكنو من بعدك رحل خلانا فات يا مصطفي
يا حليلو شدواً كان معاك
وأمل الأغاني الإنطفأ
|
|
 
|
|
|
|
|
| العنوان |
الكاتب |
Date |
| غدا الخميس ذكري مصطفي سيد احمد علي البالتوك | ateif abdoon | 01-16-08, 12:38 PM |
| Re: غدا الخميس ذكري مصطفي سيد احمد علي البالتوك | سمرية | 01-16-08, 12:47 PM |
| Re: غدا الخميس ذكري مصطفي سيد احمد علي البالتوك | ateif abdoon | 01-16-08, 01:04 PM |
| Re: غدا الخميس ذكري مصطفي سيد احمد علي البالتوك | ateif abdoon | 01-16-08, 01:34 PM |
| Re: غدا الخميس ذكري مصطفي سيد احمد علي البالتوك | ateif abdoon | 01-16-08, 09:13 PM |
| Re: غدا الخميس ذكري مصطفي سيد احمد علي البالتوك | ateif abdoon | 01-16-08, 10:33 PM |
| Re: غدا الخميس ذكري مصطفي سيد احمد علي البالتوك | ateif abdoon | 01-17-08, 00:19 AM |
| Re: غدا الخميس ذكري مصطفي سيد احمد علي البالتوك | ateif abdoon | 01-17-08, 04:27 AM |
 Re: غدا الخميس ذكري مصطفي سيد احمد علي البالتوك | Saber Abdelhadi | 01-17-08, 05:15 AM |
| Re: غدا الخميس ذكري مصطفي سيد احمد علي البالتوك | ateif abdoon | 01-17-08, 06:31 AM |
| Re: غدا الخميس ذكري مصطفي سيد احمد علي البالتوك | ateif abdoon | 01-17-08, 08:27 AM |
| Re: غدا الخميس ذكري مصطفي سيد احمد علي البالتوك | ateif abdoon | 01-17-08, 04:58 PM |
 شكررررررررررررررررررررررررا | ateif abdoon | 01-18-08, 03:36 AM |
|
| |
ateif abdoon
فيس بوك
تويتر
انستقرام
يوتيوب
بنتيريست