الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
|
 Re: حـكايـات... وروايـات... القـاص الأسـتاذ شــوقـي بـدري. (Re: بكري الصايغ)
|
الـمقالة رقـم 68 للأسـتاذ شـوقـي بـدري:
___________________________________________
رفاعه .. البطانه .. وادى عبقر السودان (1)
::::::::::::::::::::::::::::::::::::::::
[email protected]
Last Update 10 يناير, 2008
شوقي بدري
[email protected]
تفرد رفاعه لا يحتاج لنقاش . يكفى ان السودانيين الوحيدين المدفونين فى صرح علمى من رجال رفاعه . بابكر بدرى ، عبيد عبد النور , ويوسف بدرى . وليس من الغريب ان الشيخ محمد هاشم الهديه والاستاذ محمود محمد طه طيب الله ثراهم كانا من رفاعه او الشيخ المليك والمربى الشيخ لطفى وحلمى وعزمى (الشيخ محمد شبيكه ) والمربى محجوب الغوث ومولانا البشير الريح ومئات وآلاف الرجال . ولكن استطيع ان اقول ان اللهجه السودانيه الحاليه او لهجه امدرمان . تأثرت اكثر بتراث البطانه بالمقارنه بلهجه وتراث غرب ووسط السودان .
ببعض التفكير اكتشفت ان آل بدرى وآخرين كانوا فى يوم من الايام من الناطقين بغيرها . والقصه التى سمعتها وانا صغير ان احد جداتنا قد استدعيت للشهاده فى محكمه فى رفاعه . ويبدو ان جدتنا كانت قد تحصلت على اقامه واذن عمل فى رفاعه قبل فترة وجيزه .
القصه ان اثنين من نساء الشكريه كانا يتهمن بعضهن البعض بالتعدى والضرب والرباطابيه كانت الشاهد الوحيد فقالت . ( الانتا دى لزمت خيتا من زندا وجرتا على السام وقشرت عليها القشرى ودخلتا فى الخس ووقعت فيها سمكى . ) فقال ود اب سن الرباطابيه رطنت نادو ود بدرى . وعندما حضر جدنا الاكبر محمد ود بدرى قال له اب سن ترجم آ ود بدرى فقال جدنا رحمه الله عليه قالت ليكم المره دى مسكت اختها من ايدها وجرتا للحوش الذى هو السام وقشرت عليها القشرى معناها قفلت عليها القفل والخس هو الغرفه الداخليه كما كان يعرف فى امدرمان والوسط بالقاطوع او القطيع والسمكى هو الصفع او الكفيت .
يبدو ان الجميع كانت لهم لهجاتهم الخاصه . ولكن بالتمازج تكونت لغه الوسط المعروفه . وبعص اللذين شاركونا فى الدراسه تخلصوا بعد شهور او سنوات من لهجتهم المختلفه .
اذكر ان زميلنا عمر من قريه النوبه فى الجزيره كان يقول لاستاذنا الطيب بابكر حسن فى بيت الامانه يا استاذ عندى سوعال كنا نقول له ان السعال هو مرض . وزميلنا عبد الباقى كان يقول بدور اشيل السوق ابيعلى قلم . يقصد ان يمشى للسوق ليشترى قلم . والبعض كان يقول لميزان العجله القيدون . ويقولون للسروال لباس بضم اللام وكان هذا يعتبر غريباً لاننا فى امدرمان كان نستعمل كلمه لباس بكسر اللام وللقميص كانوا يقولون العراقى . واللسته تطول .
ولكن يبدو ان الشعر والادب والقصص التى تداولت فى البطانه . ولا اريد ان اغبط الوسط والغرب والشمال حقهم ولكن دور البطانه الابرز فى ابراز القيم وطريقه حياة السودان الشمالى . فانا بارغم من اننى نشأت وتربيت فى امدرمان وهى اكبر مدينه سودانيه اجد نفسى عندما اكتب الشعر القومى بدون ان احس وبالرغم من اننى لم انشاء فى البطانه او رفاعه اجد نفسى اكتب وكأننى قد نشأت هنالك . لان من تعلمت منهم اللغه او نشأت بينهم كانوا نتاج رفاعه والبطانه . وعندما نعى الشاعر صلاح احمد ابراهيم صفيه وصديقه وصهره المناضل الشفيع احمد الشيخ نعاه باقرب لهجه واحب لهجه اليه , نعاه بلهجه البطانه . وصلاح من الممكن انه لم يشاهد قوز رجب او سهل القيفى او حجاره المخشرف او يشم الدعاش فى سهل القبوب ولم يتذوق الطعام من قدح ود زايد شيخ الضبانيه فى شاشينا او السوكى الا انه كان يحس بنبضات البطانه وسنعود لهذا .
عندما استفزيت فى التسعينات فى نقاش سياسى اذكر اننى رددت بقصيده ويبدو وكأنها خرجت من عقلى الباطن . لقد كان البعض يهدد ويتسأل من هو شوقى بدرى . وكنت اقول:
يا بشر مافى حجر قوملو شدر
وعكولا متين لحقها دشر
سيف العشر ما بقتل بقتل قدر
والسنيف فى اللغد شيتاً بحير
لما الرجال تشيل المر بنرجى الامر
ما بنحمل الزل حتى اللكان عسلاً مقطر
انا ابو فقوق ما ببدا الشر
اكان حصل بنشف محل ما مطر
نحن الكوكاب الانطمر فى الزور
نحن نار الصاقعه الما بتدورلا كور
ما بننسى الاهل ولى جودنا ما حدود
رسل عجم ويهود ما بتلقى باب مسدود
كل البدق الباب بنقابلو بى ترحاب
العندنا بندى حتى اللكان ويكاب
ما بنرفع النظرات وما بنكشف الجارات
ما بنكشف الا الضيم وثباتنا فى الحارات
ديمه بنقول الحق حتى اللى كان بوجع
ما بهمنا الحاكم ومن كلمه ما بنرجع .
فجأه تذكرت كلمه عكوله ام تشر وهى الارنب البرى والدشر وهو الكلب الغير اصيل وتذكرت القنيص وتذكرت السنيف وهو غرز الاغصان فى الارض الرمليه لوقف تحرك الرمال وتذكرت اللقد وهى الارض الطينيه . ولاحظت ان هذا الكلام يشبه كلام وما تعلمناه من والدنا عبد الله البنا عندما يقول:
ننطق بالصدق اوان الخوف
ولا نخاف فيه ضرب السيف .
وكما يقول:
كل من صادقنا اخونا
وكل كبير قومه ابونا .
ونواصل
شوقى ....
|
|
 
|
|
|
|
|
| العنوان |
الكاتب |
Date |
| حـكايـات... وروايـات... القـاص الأسـتاذ شــوقـي بـدري. | بكري الصايغ | 12-28-07, 10:43 AM |
 Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 12-30-07, 11:32 PM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 12-31-07, 01:30 AM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-06-08, 01:57 AM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-11-08, 03:28 AM |
| Re: حـكايـات... وروايـات... القـاص الأسـتاذ شــوقـي بـدري. | Gaafar Ismail | 01-11-08, 07:43 AM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-11-08, 03:46 PM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-12-08, 00:23 AM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-17-08, 06:24 PM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-19-08, 11:40 PM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-23-08, 01:32 AM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-28-08, 02:21 PM |
| Re: حـكايـات... وروايـات... القـاص الأسـتاذ شــوقـي بـدري. | بكري الصايغ | 01-29-08, 01:41 PM |
|
| |
فيس بوك
تويتر
انستقرام
يوتيوب
بنتيريست