|
|
 Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري (Re: بكري الصايغ)
|
اخـوة الاحباء الاعـزاء،
جـوك بيـونق،
سـيف النصـرمـحي الدين،
حـسين مـلاسـي،
ناصـر احـمـد،
الاخـت العـزيزة،
ديناخـالـد،
الاخ العـزيز،
الشيـخ مـحـمـد.
تحـية طيبة،
والشـكر لكـم علي تعليقاتكم ومـساهماتكـم الـمقدرة.
سـيظل الصادق الـمهدي مـحـل احتـرام وتقدير الجـميع، ولكن عليـه توسـيع
قاعـدة الـديـقراطية فـي حـزبه خـصوصـآ واننـا فـي القرن الـ 21!!
الإمام الصادق المهدي :
حزب الأمة حيكتسح الإنتخابات ..
.. ومنو القال ليكم أنا عاطل عن العمل!!؟.
------------------------------------------------------
©2004 Alsahafa.info. All rights reserved."الصحافة".
صباح أحمد:
-----------
عندما حزمت أوراقي، أنا صباح أحمد كنت اعلم ان الحوار مع الامام الصادق المهدي.. صعب وسهل.. صعب لأن الرجل مفكر ومثقف من الصعب ان تحاوره دون ان يقود دفة الحوار.. وسهل لأن طرح الاسئلة التي يكون جوابها عادة عند السياسيين (قوم اطلع بره) ممكنة مع الامام الصادق وعادة ما يقابلها بالابتسامة والحجة والمنطق.. ستجدون بعض التساؤلات وكل الاجابات هنا فأعذروني إن قاد الحوار مرة وإن كانت تساؤلاتي احياناً مُرة..
* أبو القاسم حاج حمد قال انو المهدي مات مسموم واستشهد بمذكرات بابكر بدري وقال انو الجزء ده حذف منها؟
- كثير من المحللين اتكلموا عن المسألة دي.. وعندهم تحليلات مختلفة ويمكن الكلام ده جاء من وفاة المهدي في سن مبكرة.
* المهدي اتوفى وعمرو كم سنة..؟
- (43) سنة يعني في عنفوان الشباب.. وده شجع النوع ده من الاقاويل.
* وحقيقة وفاة المهدي شنو...؟!
- المهدي مات محموم وما مات مسموم والسودان بلد فيهو أوبئة كثيرة بتهجم على الناس في أية مرحلة من مراحل حياتهم..
* في كلام انو الدعوة المهدية كانت اساساً فكرة الخليفة عبد الله التعايشي استعان لتنفيذها بالمهدي؟
- في ناس بقولوا الكلام ده ويمكن لأنهم غير مدركين لجذور العقيدة في نفوس الناس المعنيين.. الخليفة عبد الله التعايشي كان من اكثر الناس ايماناً بمهدية الشيخ محمد احمد المهدي.
* الثابت انو هاجر شرقاً بحثاً عن المهدي...؟
- ده صحيح الخليفة عبد الله كان من الناس الهاجروا شرقاً لأنه كان يبحث عن المهدي..
* ليه...؟!
- بسبب وجود شيوخ الفكرة المهدية في مناطق غرب افريقيا والسودان الغربي..
* يقال إنو التقى الزبير باشا وقال ليهو انت المهدي المنقذ والزبير رفض الكلام ده قبل لقاء التعايشي بمحمد احمد المهدي؟
- الفكرة المهدية روَّج ليها كثيراً جداً الشيخ عثمان دانفوديو القائد المجاهد النيجيري وكان اهم ما قاله لما الناس اعتقدوا إنو المهدي المنتظر.. قال ليهم أنا ما المهدي المنتظر لأنو المهدي حايظهر في المناطق الشرقية نحو النيل وحتى ابنته مريم بنت الشيخ كانت بترسم في كتاباتها مراحل الهجرة شرقاً للناس العايزين يلتحقوا بالامام المهدي..
* وإلتحقوا بيهو...؟!
- أيوه ونسبة كبيرة من الناس الشاركوا في الموقعة الاولى موقعة الجزيرة أبا كانوا من الفلاتة الإتأثروا بأقوال الشيخ عثمان دانفوديو..
* يعني عبد الله التعايشي كان مؤمن بمهدوية محمد أحمد؟
- طبعاً لأنو الشيخ عبد الله بن محمد في رحلته نحو الشرق كان بيفتش فعلاً عن المهدي لذلك كان مؤمناً بالامام المهدي ايماناً منقطع النظير حتى بعد وفاته كان مخلصاً للمهدي.
* كيف...؟!
- ما يعمل حاجة إلا بعد ما يشوف المهدي لو كان حىّ كان عمل شنو اخلاص عبد الله التعايشي للعقيدة المهدية كان اعمق من أي اعتبار سياسي أو مصلحي.
* فكرة المهدية جات من وين...؟!
- الفكرة موجودة اصلاً في التراث الاسلامي السني والشيعي والصوفي.. والشيخ محمد احمد المهدي بصفته احد شيوخ الطريقة السمانية يعلم ان مراجع الطريقة السمانية تتوقع ظهور المهدي من بين صفوفها.. ومنذ فترة كبيرة قبل أن يلتقي الامام المهدي بالشيخ عبد الله التعايشي كان بيفكر في موضوع الاصلاح الديني في السودان ونتيجة لهذا التفكير زار مناطق كثيرة في السودان وقابل القيادات الدينية بخصوص الدعوة للاصلاح الديني.
* من وين استقى الصادق المهدي المعلومات البتخليهوا واثق من صحة معلوماته بخصوص الدعوة المهدية؟
- الامام المهدي ذكر الكلام ده في منشوراته.
* قد تكون مقدمات..؟!
- ده صحيح لكن الدعوة المهدية نفسها ما ممكن تكون حيلة لا من الشيخ محمد أحمد المهدي ولا من الشيخ عبد الله التعايشي.
* دليلك شنو...؟!
- الطريقة الحصل بيها التحول في شخصية الامام المهدي كانت هائلة جداً.
* كيف...؟!
- تحوَّل من شخصية اصلاحية عادية الى شخصية ثورية... تغيير نوعي في شخصية الانسان مقرون بتجربة روحية كبيرة..
* في ناس مسألة الروحانيات دي عندهم فيها رأي.. ويتعاملوا مع حقائق وأحداث؟
- من لا يعترفون بالتجارب الروحية هم من يفكرون بمنطق التسويات والحيل وده ظاهر في عبارتك إنو الخليفة عبد الله التعايشي اقترح المهدية على الامام المهدي و... وهلمجرا...
* طيب.. محمد احمد كيف عرف إنو هو المهدي المنتظر..؟!
- الشيخ محمد أحمد مرَّ بتجربة روحية هو مقتنع بصحتها لأنها غيَّرت شخصيته تماماً.. حصلت ليهو في خلوة من خلواته.
* حصل ليهو شنو...؟!
- سمع مخاطبة غيبية بالدعوة المهدية ومافي حاجة بتفسر الانقلاب الحصل في شخصية محمد احمد المهدي إلا بحدوث تجربة روحية فيها خطاب غيبي آمن بيهو.. والتراث الاسلامي مليء بالتجارب الروحية.
* نقول أمثلة...
- إعتدل في جلسته.. الاشعري مثلاً روى كيف تلقى مباديء مذهبه عبر رؤى صادقة وكتيرين عندهم درجات متفاوتة من التجارب دي ورواها الامام الغزالي في كتابه (المنقذ من الضلال)..
* العقيدة المهدية إنطلقت من تجربة روحية؟
- أيوه تمام.. إنطلقت من تجربة روحية خاضها الشيخ محمد احمد المهدي وأدت لانقلاب في شخصيته ووسائل عمله.
* نجاح الثورة المهدية إرتبط بتهيئة الناس نفسياً لقبول المهدي...؟!
- أيوه ممكن نقول إنو الظروف الموضوعية حوله كانت فيها مؤثرات وكثير من الناس الاستقبلوا الدعوة المهدية نفوسهم كانت مهيأة للدعوة.
* بمن فيهم الخليفة عبد الله التعايشي..؟!
- الخليفة عبد الله التعايشي كان من الناس البيفتشوا عن المهدي ولما لاقى الشيخ محمد احمد اتوسم فيهو العقيدة دي.. وكثيرون إتوسموا فيهو المهدي المنتظر.
* عشان كده قال إنو المهدي...؟!
- لا الشيخ محمد أحمد قال إنو المهدي إستناداً إلى التجربة الروحية..
* المهدية جات من تراث أو مدرسة إسلامية معينة..؟!
- الحقيقة إنو المهدية في التراث الاسلامي عندها عشر مدارس، ثلاث من المدارس شيعية واربع من المدارس سنية ومدرستان من المدارس صوفية ومدرسة فلسفية عندي كتابات ممكن الناس يرجعوا ليها عشان يعرفوا مضمون عقائد المدارس دي..
* ترسم صورة قريبة..؟
- المدرسة الممكن نعتبرها مدرسة الإمام المهدي في السودان اختلفت عن مدارس الشيعة في أنها ما ربطت المهدية بسلسلة نسب معينة واختلفت عن السنية في أنها ما ربطت الدعوة بمواقيت معينة وتميزت بأنها جعلت المهدية وسيلة لاحياء الدين بصورة ما عادية..
* بصورة استثنائية..؟!
- أيوه وجعلت الدعوة وظيفتها احياء الدين بوسيلة غير عادية، وده ما مرتبط بآخر الزمان او سلسلة نسب معينة وفي الدعوة المهدية مقولات جعلت باب الاستمرار في تجديد شباب الاسلام مع الزمن مشروط بمقولة لكل وقت ومقام حال ولكل زمان وأوان رجال..
* ده قالوهوا الائمة السابقين.. الصادق المهدي الامام الحالي قال شنو..؟!
- نحن في كيانا نقول إنو الامام المهدي هو المؤسس للدولة والامام عبد الرحمن هو الداعي للدعوة بصورة تتلاءم مع ظروف المكان والزمان وتقبل التعددية الدينية والتعايش مع الآخر والعصر ونحن الآن على نفس النهج ده بنتحدث عن المرحلة الثالثة وهناك كتابات كتيرة بتحدد طبيعة المرحلة الثالثة.
* وحزب الأمة..
- الحزب ده منبر سياسي بيضم مسلمين وغير مسلمين ويضم الانصار والناس الما أنصار لخدمة برنامج سياسي مشترك..
* والأنصار...
- الأنصار عبر حزب الامة وعن طريق الديمقراطية بيعملوا على تطبيق البرنامج السياسي البيحقق مصلحة مشتركة بينهم وبين مواطنين آخرين مختلفين عنهم في العقيدة الدينية والمذهب.
* السياسي السوداني زول عاطل عن العمل.. يعني شنو وظيفتك سياسي وما بتشتغل موظف وألا.. زول منتج..؟!!
- أيوه يجوز القول إنو بعض السياسيين السودانيين اشخاص عاطلين عن العمل.
* والصادق المهدي...؟!
- أنا شغال سياسة وبعطيها وكت كتير لكن في نفس الوقت بقوم بحركة فكرية واسعة.. أنا مفكر بالاضافة لعملي السياسي.
* وده بيكفي وممكن الزول يعيش منو..؟!
- كثيرون بعيشوا من كونهم مفكرين، وأنا برضو كاتب وكثيرين بعيشوا من كونهم كُتاباً.
* ممكن نقول إنها مصادر الدخل...؟!
- أيوه أنا عندي وقت للسياسة، وقت للفكر، ووقت للكتابة، وهي مصادر دخل يعني أنا لما يدعوني في أي مكان في العالم النفقات بتاعتي بتكون مدفوعة وكتبي بتباع وعندك خطبة العيد مثلاً طُبعت بمبلغ ومبيعاتها حتى لحظة اجراء الحوار وصلت إلى خمسة ملايين جنيه وأسست شركة الصديقية وأنا رئيس مجلس ادارتها ونائب رئيس مجلس الادارة ابني عبد الرحمن. وعضو مجلس الادارة المنتدب للعمل الاداري ابني الصديق واعضاء مجلس الادارة هم رندة الصادق وزينب الصادق وطاهرة الصادق، وعندها جمعية عمومية فيها زوجتيَّ سارة وحفية وبقية ابنائي وبناتي.. شغالين في الشركة وبنكسب قوتنا.
* الشركة شغالة شنو..؟!
- أعمال تجارية..
* زي شنو...؟!
- بنصدر سمسم ونزرع ذرة وبنفكر حالياً في بنايات عقارية وصناعات ومصانع... (صمت لحظات).. لكن غريبة تعتبروني عاطلاً عن العمل... بالعكس أي انسان عندو أدنى قدر من المعرفة بالواقع بيلقاني مشغول اكثر من اللازم.
* مشغول بي شنو..؟!
- بالتخطيط والكتابة والعمل الكسبي.. ده كله غير السياسة... بعدين إنتو بتعتبروا الافندي البجي الشغل الساعة ثمانية كل يوم ده هو الوحيد الشغال..
* لم يجد عندنا ردَّاً على السؤال..
- (واصل حديثه).. ده يمكن يكون شغل بعض الناس لكن ده ما بيعني إنو ده شكل الشغل الموجود... أنا بشتغل طول ما أنا صاحي، ومرات بشتغل حتى وأنا نايم...
* ده كيف...؟!
- الرؤى جزء من النشاط البيساعد كتير جداً على تجلية كثير من الافكار..
* عندكم نسب مع قبائل كثيرة في السودان..؟!
- أسرتنا منذ المهدية عندها تراث مفتوح للمصاهرات.. ويمكن هي فكرة أساسية من أفكار المهدي.
* في أسرتكم..؟!
- عندنا دماء عربية ودماء نوباوية ودماء جمالية وبجاوية وبقارية وفوراوية ودينكاوية وشلكاوية ونوبية.. الدماء دي كلها موجودة تقليدنا في أسرتنا.. تقليد مفتوح للعشائر السودانية كلها.
* عندكم خلافات سياسية مع بعض أصهاركم.. ده ما عامل ليكم مشاكل في الإطار العائلي..؟!
- بالتأكيد.. عندنا اصهار عندهم افكار سياسية مختلفة نحن بنتخذ خط فيهو الـ.... الـ... (لا يجد ما يقوله)... يعني جات مرحلة في عهد الامام عبد الرحمن ومرحلة قبلها في عهد الامام المهدي كانت الاسرة فيها بتعنى بالالتزام الديني والسياسي والعائلي معاً لكن من فترة وأنا بفكر في فكرة مختلفة..
* فكرة مختلفة في شنو..؟!
- الاسرة حالياً وصلت لما يمكن تسميته بـ «العشيرة» أفرادها آلاف.. وما ممكن في ظل الظروف التعددية في الفكر والسياسة وهجوم الطغاة والغزاة علينا تحافظ على الالتزام الديني والسياسي والعائلي الواحد.
* حا تعمل شنو...؟!
- بديت افكر إنو الاسرة كأسرة تتماسك حول الرحم وتقيم علاقاتها الاجتماعية والشخصية حول الرحم لأعلى درجة ممكنة دون وجوب ان يؤدي هذا الالتزام الى التزام مماثل على الصعيد السياسي أو العقائدي... ده الأنحنا ماشين عليهو يكون التماسك العائلي ذو طابع واحد على اساس العلاقة دون تدخل عوامل ثانية إلا الرحم.
* والسياسة والعقيدة الدينية..؟!
- دي دخلت فيها عوامل تجديدية..
* كيف...؟!
- زي الأنصارية مثلاً نحن حالياً بنتكلم عنها بلغة تتجاوب مع تطورات الزمان والمكان عشان كده عملنا هيئة شؤون الانصار كمؤسسة لادارة الشأن الانصاري.
* الفكرة ممكن تكون ما مقبولة عند أنصار حزب الامة..؟
- أيوه الفكرة التجديدية غير مقبولة لآخرين.
* بتنفي عنهم صفة الانصار..؟
- لا ده ما بيعني بالضرورة إننا بننفي عنهم صفة الانصارية لكن بنعتبرهم مرتبطين بالمفاهيم التاريخية، أما هذه المفاهيم الجديدة فهم ما معنيين بيها.
* ليه...؟!
- لأنهم ما بقبلوها وبرضو لأننا في حزب الأمة بنتكلم عن حزب الأمة القومي وهو صيغة جديدة من حزب الامة التاريخي.. ده بيعفي بعض الناس الما بيقبلوا الكلام ده.. على أي حال هم وشأنهم (هز كتفه).. نحنا بنتحدث عن شكل جديد للانصارية في هيئة شؤون الانصار وشكل جديد لحزب الامة في حزب الامة القومي.
* أبرز السمات في كيان الانصار والامة القومي شنو..؟
- المؤسسية والشفافية والمساءلة والمشاركة دي كلها مفاهيم بعض الناس ممكن ما يقبلوها.. ونحن ما عندنا مانع.. أنفسهم وما يشاءون ويتخذون قادة ورؤساء وائمة كما يشاءون ونحن ما عندنا قاعدة مشتركة مع الناس ديل في اطار الانصارية المتجددة أو الحزب المتجدد ولا ننفي حقهم في أن تكون لهم انشطة في المسائل دي..
* الاغلبية مع التجديد..؟!
- اعتقد إنو الاغلبية مع التجديد في حزب الامة وكيان الانصار ومع الطرح الجديد.
* والرافضون..
- نحن حريصون على علاقاتنا وعلى العلاقات العائلية المتصلة ونجتهد إنو المصاهرات في الاطار الشخصي والعائلي تكون جيدة مع وجود اختلافات في الرؤى السياسية والفكرية.
* مشهد السودان في ذهنك وأنت داخل القصر رئيس وزراء لاول مرة وطالع منو وانت رئيس وزراء لآخر مرة..؟
-في المشهد الاول كان بلداً معافىً نسبياً وفيهو حركة سياسية مستقرة نسبياً وكان الاقتصاد فيهو نسبياً مجزٍ بحيث ينتج ممكن ما يغطي حاجات البلد الضرورية كلها وما يغطي فاتورة الاستيراد وميزانية التنمية وكانت علاقات السودان الخارجية متوازنة عشان كده البلد الحكمته في الستينات كان بلداً واعداً حتى الحرب الاهلية الوقت داك كانت محدودة جداً وكان بإمكاني اطوي الجنوب بالطائرات والعربات والوابورات والسكة الحديد بدون عوائق.. الحرب الاهلية كانت محدودة.
* وآخر مرة كرئيس وزراء..؟
- حكمت السودان في الثمانينات.. وكان أسوأ حالاً بسبب آثار النظام المايوي التدميري.. نظام مايو دمَّر السودان واورثنا ميزانية داخلية معجَّزة عجزاً كبيراً.. نظام مايو كان معتمداً في التنمية على الاعانات الخارجية وما عندو وفورات وفوائض لتمويل التنمية واورثنا سوداناً علاقاتو الخارجية مختلة.. مع الشرق ثم الغرب.. اورثنا حرباً أهلية أسوأ من الحرب التي امكن للنظام أن يحقق سلاماً فيها في العام 1972م، السودان الذي حكمته في الثمانينات كان سودان ما بعد التدمير المايوي.
* وحالياً...؟
- ده سودان ما بعد التدمير الانقاذي وهو على شفا حفرة من التدويل والخطر المحدق بيهو.
* تتوقع ترجع رئيس وزراء تاني..؟!
- ما بقدر أتكلم عن دوري لكن الحاجة المتأكد منها إنو حا تكون عندنا مؤسسة دينية قوية هي هيئة شؤون الانصار ومؤسسة سياسية قوية هي حزب الامة..
* ممكن تفوز في الانتخابات..؟!
- لو حصلت انتخابات نزيهة حا تكون المؤسسة دي هي الرقم الانتخابي الاول مثلما هي الآن زي الانتخابات الحصلت في جامعات السودان.. نحن بنتطلع نكون الرقم الانتخابي الاول في أول انتخابات حرة قادمة.
* ويعود الصادق المهدي رئيس وزراء..؟
- الزول الحايكون في أي موقع ده رأي سابق لأوانه بتحدده اجهزة الحزب في الوقت المناسب.. وبعدين ما ضروري الصادق المهدي يكون شغال شغل سياسي ممكن اشتغل في ملفات كثيرة دون ان يؤثر ذلك في خدمتي لوطني.
* زهجت من السياسة..؟
- قال بحزم.. أنا ما شغال سياسة بس..
* شغال شنو..؟!
- أنا إنسان مشغول بالأدب والفن وعندي مهام دينية وأدبية واجتماعية ورياضية.. حياتي متنوعة جداً.. مشكلتي الوحيدة إني ما لاقي وقت كافي يستوعب نشاطاتي... البيزهج ده زول تاني..
* زي منو..؟!
- يا آنسة البزهج ده الزول الما عندو شغلة وقاعد عشان يصطاد السلطة (قال بثورة واضحة).. ده زول ما سياسي.. ده صياد سلطة ومشغول بيحصي في سقطات الحكام واصطياد السلطة وأنا ما مشغول بالحاجات دي..
* ممكن نقول الامام الصادق المهدي أصابه الملل..؟
- العمل السياسي جزء من حياتي.. وما بيعمل لي ملل او قلق بالعكس.. بشعر بمتعة شديدة في المهام البقوم بيها لكن المشكلة زي ما قلت ليك.. ما عندي وقت يستوعب نشاطاتي.. عندك حل للمشكلة دي..
* تجاهلت السؤال.. لنقل ليست لديَّ اجابة.. نقلته لمربع آخر الصادق المهدي منو في ديل.. السياسي ولا المفكر ولا الامام...
- (ردَّ بسرعة).. الزول ما بقدر يعمل تجزئة لي نفسو.
* لا تعليق فقط هززت كتفي وقطبت وجهي..
- (واصل) أنا كل هذه الاشياء وغيرها.. وكل انسان لو كان رئيساً أو اماماً أو سياسياً.. أو مفكراً عمله بطابعه واجتهاده وفي النهاية الامر متروك للآخرين.. لتقييم ادائي وأنا مجتهد لتقديم عطاء في كل هذه الملفات.
* ثمة سؤال.. خلوه مرة ثانية..
|
|
 
|
|
|
|
|
| العنوان |
الكاتب |
Date |
 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكريـم. | بكري الصايغ | 12-21-07, 10:05 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-21-07, 10:28 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-22-07, 00:09 AM |
 Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | JOK BIONG | 12-23-07, 02:00 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-22-07, 11:18 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | سيف النصر محي الدين محمد أحمد | 12-22-07, 11:46 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Hussein Mallasi | 12-22-07, 11:54 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Nasir Ahmed Elmustafa | 12-23-07, 06:45 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | دينا خالد | 12-23-07, 07:16 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Elsheikh Mohd Aboidris | 12-23-07, 07:26 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-23-07, 11:48 AM |
 Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Abubaker Ahmed | 12-23-07, 01:29 PM |
 Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-23-07, 08:16 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بخاري عثمان الامين | 12-23-07, 08:34 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-23-07, 10:08 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | إسماعيل وراق | 12-23-07, 10:28 PM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-26-07, 00:07 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Abubaker Ahmed | 12-26-07, 00:10 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | إسماعيل وراق | 12-26-07, 00:34 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | إسماعيل وراق | 12-26-07, 00:37 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | Basheer abusalif | 12-26-07, 04:28 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | بكري الصايغ | 12-27-07, 03:11 AM |
| Re: 25 ديسمبر 1935- 2007: السيد الصـادق الـمهدي 72 عامآ،تعالوا نحتـفل ونكررالتهاني لشخصـه الكري | waw | 12-27-07, 09:49 AM |
|
| |
فيس بوك
تويتر
انستقرام
يوتيوب
بنتيريست