|
كوميديا الهوية و تراجيديا الابعاد
|
نحنا نعشق مضغ المسطلحات و الوران حول نقاط متخيلة كنار المجوس.. من ما طفحت كلمة هوية دي علي سطح الخطاب المتداول دورت رحاها لي يومي و يومك دا.. لدرجة انك تظن اننا لا نود الولوج للبها و كشف كنهها و وضع التدابير البتخلينا نحسم امرها او قول نحسم امرنا حولها و نشوف غيرها.. تسمع كلام زي : ياخي نحنا لسع ما حسمنا هويتنا عشان كدا البلد ما ممكن تتقدم،، طيب يا اخي كدي وريني هويات البلاد الامورها ظابطة و ناسها بياكلوا جاتو ماريا انطوانيت،، هي زات الشي دي شنيها و عاملة كيف لاني و الله عشت في كمين دولة منها البترتر لي ورا و البقدل لي قدام لكن ما سمعتهم بتصايحوا زي كماسرة المحطة الوسطي، الهوية الهوية الهوية،، و لا شفتها مرسومة و لا منحوتة و لا مزروعة و لا مطلوع و لا طالعة ليهم زي القدر المستعجل.. حقيقي في خلط مخل و مخجل في الشغلانة دي و للاسف المتسببين فيه و وحلانين فيه و موحلين البلد هم المتعلمين،، لانه يشهد الله ما سمعت حبوبتي و لا جدي و لا جيرانا جابوا الكلمة دي او ما يدل عليها في لسانهم ولا نص مرة. فهل يعقل مثلاَ زول زي د. عبدالله علي ابراهيم انه يعتقد جده العباس انجبه هو و خريطة السودان عشان يجي يقول انه لاهل السودان الحق في نسبة انفسهم لمن يريدون حتي و ان كذبوا في ذلك لان اليونانين برضو فكو دليبة كبيرة و زوروا نسبهم علشان يبقوا هيلينيين،، و خلي بالك السيد الدكتور فك دقشة الهيلينية دي كدلالة علي عمقة الفكري و سعة معارفه،، زمن الحركات دي ولي مع عصر المعلوماتية فاي زول بعرف الفرق بين القندول و الواو الضكر ممكن يرفح ايتها كلمة و يلسقا في محرك بحث او دائرة معارف الكترونية تطلع ليهو هيلين و معاها حصان طروادة زاتو.. زمان كانوا لاعبي اكروبات المعرفة و الثقافة يدشوك بوابل من الغرائبيات و الكلمات الزي عروس البحر نصها اجنبي و نصة بلسان نعرفة و دا زاتو يدوهو ليك مسحة لبنانية يخلوك مقهي تلاتة يوم،، الزمن دا زمن الابداع و الابتكار لانه المعلومة اصبحت مشاعة روكة للغاشي و الماشي. يا جماعة القضية الوطنية هي قضية حقوق سياسية، عدالة و تنمية و رفاه فيهو نتساوي، ما حكاية اننا نلبس البلد جلابية ولا سربادوق ولا لاوا و البني ادم المفروض يعمرها و ينعم بي خيرها ماشي ام فكو و مظلوم و مهمش و بايت القوي و محروح من الحد الادني من حاجياته الحياتية الملحة. السودان لا هو عربي و لا هو افريقي و لا مصطفي سعيد، انسان السودان هو الفيهو الكذا و الكذا و الكذا. كل كذا خليهو يكون في كذاته يمسك فيها قوي لكن كمان ما يكون لاوي ايدي غيرو و ممسكوا في مصيبته دي باي دعوة كانت.. بغيظني جداَ لمان يتكرر في تلفزيون السودان اللهو رغم انه الانغاذ ناشلاهو لكن ياهو تلفزيون البلد، يغيظني و يفقع مرارتي هدوء البال بالقرر بيهو اي مذيع او ضيف حلقة خلوص عروبة السودان اي و الله عروبة قوحة كدا مرة واحدة .. دا يسموهوا شنو،، مرض، غرض، غباء، تبلد حس، عمي بصيرة، فقدان الحس الانساني لدرجة الغاء الغير،، يا صديقي فالتكن انت ذو الاصبع العدواني ولا كنعان بن عدنان مافي اي مشكلة لكن انت البلد؟. لا و الله ما انت الا فرد و ما المجموعة التي تنتمي لها الا خلية في جسد كبير، دي ما اظن بنختلف فيها، طيب الباقين ديل ضيوف في مضاربك العربية؟.. شوفتوا الحكاية وعرة كيف؟.. و دا زقاق اصلاَ ما كان في داعي نحشر نفسن و بلدنا فيهو.. لانه تخلف و ما ليهو داعي و لا تجري من وراءه فايدة.. بالمناسبة كل التعقيدات دي هي تراكم لردود الفعل لو ما كان في فعل اخرج و بليد و غير مسؤول ما كانت حصلت.. عشية الاستقلال الاحزاب الجنوبية ثبتت خصوصية وضع الاقاليم الجنوبية و اتت بمطالب سياسية و ادارية تمثل في المطالبة بالفدرالية، الاحزاب الشمالية وعدتهم خير و بعد كسبوا تأييدهم للاستقلال من داخل البرلمان تنكروا لوعدهم بدعوي انه الفدرالية مدخل للانفصال!!! نجي الان بعد عقود نتسابق في تبنيها و التأكيد علي انها الحل السحري للمشكل السياسي السوداني.. الان حزمت العروبة مع الدين و قسمت القداسة بينهما بالتساوي و بكدا الدولة المدنية في السودان ح يستحدث ليها تعريف لنج يحدد علاقتها بالدين و العروبة و العصبيات المستحثة حالياَ من قبيلة و عشيرة و فخوذ و اوراك و كوراك زاتو ههههههههه. شر البلية. و سوف نتابع بقية البلية.. ارقدوا علي الجمبة البتريحكم
|
|
|
|
|
|
|
العنوان |
الكاتب |
Date |
كوميديا الهوية و تراجيديا الابعاد | نصار | 07-24-07, 06:12 AM |
Re: كوميديا الهوية و تراجيديا الابعاد | نصار | 07-24-07, 06:27 AM |
Re: كوميديا الهوية و تراجيديا الابعاد | ibrahim fadlalla | 07-24-07, 09:19 AM |
Re: كوميديا الهوية و تراجيديا الابعاد | نصار | 07-24-07, 10:11 PM |
Re: كوميديا الهوية و تراجيديا الابعاد | Ishraga Mustafa | 07-24-07, 10:14 PM |
Re: كوميديا الهوية و تراجيديا الابعاد | نصار | 07-24-07, 10:25 PM |
Re: كوميديا الهوية و تراجيديا الابعاد | عبدالغفار محمد سعيد | 07-25-07, 03:42 AM |
Re: كوميديا الهوية و تراجيديا الابعاد | نصار | 07-25-07, 12:03 PM |
Re: كوميديا الهوية و تراجيديا الابعاد | نصار | 07-26-07, 11:21 PM |
Re: كوميديا الهوية و تراجيديا الابعاد | sultan | 07-27-07, 02:40 AM |
Re: كوميديا الهوية و تراجيديا الابعاد | malamih | 07-27-07, 06:59 AM |
Re: كوميديا الهوية و تراجيديا الابعاد | نصار | 07-27-07, 12:01 PM |
Re: كوميديا الهوية و تراجيديا الابعاد | نصار | 07-27-07, 11:59 AM |
Re: كوميديا الهوية و تراجيديا الابعاد | نصار | 07-28-07, 07:13 AM |
Re: كوميديا الهوية و تراجيديا الابعاد | زوربا | 07-28-07, 03:26 PM |
Re: كوميديا الهوية و تراجيديا الابعاد | نصار | 07-28-07, 11:15 PM |
Re: كوميديا الهوية و تراجيديا الابعاد | زوربا | 08-15-07, 06:55 PM |
Re: كوميديا الهوية و تراجيديا الابعاد | نصار | 07-29-07, 09:44 PM |
Re: كوميديا الهوية و تراجيديا الابعاد | نصار | 09-19-07, 02:27 PM |
|
|
|