|
Re: اهتراء وجدان الذاكرة (Re: منتصر الامين)
|
مساء الخير يا أمير .. أحكي لك عماذا ؟؟ طيب .. ذكرني منتصر الأمين بالحكاية الغائبة تلك ( الذاكرة غائمة يا أمير .. لكنها تلتمع بريقا كل وين و وين ) , أذكر الأهزوجة في صوت جدتي . و المرأة السمحة مدفونة تحت الأرض .. إبنة الطير الخداري و زوجة ود النمير و والدة إبنه الوليد على يديها , يجري من تحتها البحر ( رحمة من المولى ) و بين يديها الطعام و الشراب , هي أخت القريد . و قد كان اسمها ( التُبّر ) , يناجيها أخاها القريد في نص الليل و الخلوق نايمين , مربوطا في انتظار أن يُضحى به حتى تحبل نسوة ود النمير " الكعبات " اللائي دسسن لها فحفرن حفرتهم تلك و رمينها ليخلو لهن حب ود النمير دونها هي التي استأثرت به , يناجيها أخاها القريد في حرقة المغبون : التُبر هوووووووي يا التُبر .. قالوا لحم القريد بيحمل العُقّر . فترد أخته التير من تحت الأرض في صوتٍ باكي حزين : القريد يا ود امي .. كان الشعر ملجمني .. كان البحر معقلني .. جنى ود النمير راقد علي حجري .. ووووووب أنا كيف صبري .
أو هكذا أذكر من كنزها .. تلك الحكاية الملحمية الطويلة البديعة , ما زلت تفرخ في رأسي ( من بعد الشيب ) آلاف الصور و الرؤى و الخصوبة التي ما أزال أعبيء منها سلال روحي و وجداني . فشكرا لك منتصر .. حرضتني على شيء كنت أنتوي الكتابة عنه و نسيته في جملة النسيان الكبير الذي أقام فينا . ــــ جرب الحجوة التالية يا أمير مع أطفالك .. نغم لهم صوتك و أمعن في المسرحة و إيقاع الدراما الذي تحتشد به الحكاية .. ستجد الأمر عجبا . فيا سبحان العبقرية السودانية .
حجتني الزلال بت ود حامد .. ( أمي أم أمي ) قالت : حجيتكم ما بجيتكم خيراً جانا وجاكم أكل عشاكم وراح خلاكم ، قالوا .. والله يكفينا شر قلنا وقالوا .. قالوا كان في كُدُندارة إسمها ( حَمْرَه قَرقَدانه) ، أها .. حمره قرقدانه دي راجلا كان إسمو ( أحمد ) .. يمرق أحمد من صباحات الله يلقط في رزقو .. وما يرجع إلا المغيرب ، حمره تقعد في بطن بيتا داك , تخدم خدمتها و تسوي ليهو غداهو وتقعد تنتظرو لامن يجي . ............ يداخلني الشتاء حينها .. في ( الحوش الجوّاني (ملتصقا بها ويداها حولي زنار ( يدفع عني شر الوحشة( يلة صيف .. تحت سماء الديم . نجوم , وبدر كبير ( ما زال لا يشبهه بدر ) .. و كلابٌ نابحاتٌ في البعيد ، والدوي المكتوم لطائرة في المطار القريب ( أورثني رهاب السفر إلى يومي هذا ) ، وبردٌ لذيذ .. لاسع .. لا يُدفأه إلا رائحتها .. ( أمي الزلال ) .. : رائحة هي خليط بين رائحة الطفل الرضيع .. وعبق الضريح الكبير طرف البلد. كما حكى الطيب صال. ........... قالت ( أمي الزلال ) : أها .. يوم من الأيام ( حمره قرقدانه ) إتدخنت ، وسوت غداها لي راجلا , وقالت تمرق كدي علي الجيران داب ما ( أحمد ) يرجع من شغلو ، أها .. قامت ختت غدا ( أحمد ) في المشلعيب المعلق فوق حفرة الدخان .. ومرقت . يومو داك .. ( أحمد ) علي شقاوتو يرجع البيت بدري قبال مواعيدو .. و جيعااااااااان ، مد أيدو على المشلعيب وما ختّ بالو من حفرة الدخان الموقده تحتو .. أها المسيكين من طولو داك يقع في الحفرة بردلب .. زوووول كدي جاب خبرو مافي , لامن رجعت ( حمره ) من الجيران ، لقت أحمد ميت جوه الحفره ، وقالت كدي تكورك وتسكّل وتعزي . أها في الوكت داك جَنْ طويرات زرازير .. ركّن فوق الراكوبه .. شافنها تبكي ، قالن لها : مالك يا ( حمره قرقدانه ) ؟ . قالت لهن : شِن ( حمره قرقدانه ) أم طُمبُرةً مَلانه .. عقيرب سِلي سِلي .. ( أحمد ) وقع مات . أها قامن الطويرات من بكانن داك زعلانات بالحيل علي ( أحمد ) إتنفضن و حتن ريشن عدّمنو الريشه .. قعدن جلد ساااااكت ، وفرررررر طارن بي دمعتن .. ............ : عماد ؟ : آآآي يُمّه .. : نمت ؟ : لأ .. : سمح .. غتّي كريعاتك ديل . ............ أها .. الطويرات ديك منتفات نتيفن داك طارن مشن ركن فوق الشدرات آخر الحلة ، الشدرات إستغربن .. قالن للطويرات : مالكن يا شِنقِرش بلا ريش ؟ قالن لهن : شن شنقيرش بلا ريش .. حمره قرقدانه .. أم طمبرةً ملانه ... عقيرب سلي سلي .. أحمد وقع مات . قالن كدي الشدرات من الزعل علي ( أحمد ) حتّن صفقن داك وقفن يابساااات .. عود بس .. جَن الغنيمات بعد داك يرعن تحت الشديرات ديك ، شافنو واقف حطب .. قالن لو .. : مالك يا شدرنا حيتتون ؟ قال لهن : شن شدركن حيتتون .. شِنقِرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . أها في بكانن داك .. الغنيمات قالن كدي مسكن لك قريناتن ديك ووقعن فيهن كع كع كع .. كسرنهن ما فضلن قرن فيهن من الزعل علي ( أحمد ) , و مشن البحر يشربن . البحر شافن مكسرات قريناتن , إستغرب و قال لهن : : مالكن يا بنات عِسِّي بلا قرون ؟ قالن لو : شن بنات عسي بلا قرون .. شدرنا حيتتون .. شنقرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . لبحر من الزعل علي ( أحمد ) قام شرد بقي جديول صغيرووون في النُص هنوووووك .. جات البنيه شايله برمتها واردة البحر فيشان تشيل المويه .. لقت البحر شرد مشى في النص , بقى جديول بس .. قالت لو : مالك يا بحرنا شيردون ؟ قال لها : شن بحركم شيردون بنات عسي بلا قرون .. شدرنا حيتتون .. شنقرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . إنتي يا البنية تشيلي برمتك ديك و من الزعل علي ( أحمد ) كششششش تكسريها .. ............ : عماد ؟ : آآي يُمه . : نمت ؟ : لا لأ .. : نان مالك قاطع الحركة ؟ : ساكت بس ( .. والدفء الشتوي يدغدغني ) : سمح ... ............ قالت ( أمي الزلال ) : أها .. البنيه رجعت للبيت لقاها أبوها في الدرب .. قال لها : مالك يا بنيتنا كبيرون ؟ قالت لو : شن بنيتكم كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . تقوم يا الراجل تشيلك حجر و تقع في سنيناتك ديك كج كج كج .. كسرن بقاهن نامه ، وقال كدي دخل علي مرتو ، المره شافت الراجل عدمان السنينه قالت لو : مالك يا راجلنا فليجون ؟ قال لها : - شن راجلكم فليجون بنيتنا كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . أها المره كانت قاعده تفرك لها في ملاحاً أخدر .. شالت مفراكتا ديك و ... ........... : عماد ؟ .. عماد ؟؟؟ ( دفء الشتاء و .. حزن ما .. يصمتانني ) . : يا حليلو وليدي , نام المسيكين ).. ثم ضامةً راحتي يدها متجهةً إلى السماء .. : رقدنا في أمانك وفي ضمانك وركنين من أركانك .. يا رب تغتي علينا و علي وليداتنا و أمة محمد يا حافض يا حفيض , بركة اللانام لا اكل الطعام , بركة الليل الامسى و الأوكات الخمسة , بركة من صلى و قال يا الله , تصبحنا بي خير و علي خير , بي جاه نبيك يا ربي يا سيدي , تبرد حشانا و حشا بنياتنا و وليداتنا و حشا الوالدين يا حنّان يا منّان .. آية الكرسي كُرُبْ فينا للصباح .
أعتذر عن الإطالة .. لكنك يا أمير فتحت لي باباً تمنيته طويلاً . فشكرا لك .
|
|
|
|
|
|
|
العنوان |
الكاتب |
Date |
اهتراء وجدان الذاكرة | أمير بابكر | 07-20-07, 08:33 PM |
Re: اهتراء وجدان الذاكرة | غادة عبدالعزيز خالد | 07-20-07, 08:43 PM |
Re: اهتراء وجدان الذاكرة | Emad Abdulla | 07-20-07, 09:57 PM |
Re: اهتراء وجدان الذاكرة | أمير بابكر | 07-21-07, 01:47 PM |
Re: اهتراء وجدان الذاكرة | غادة عبدالعزيز خالد | 07-22-07, 06:30 PM |
Re: اهتراء وجدان الذاكرة | أمير بابكر | 07-23-07, 01:09 PM |
Re: اهتراء وجدان الذاكرة | Emad Abdulla | 07-23-07, 02:03 PM |
Re: اهتراء وجدان الذاكرة | معتصم دفع الله | 07-23-07, 04:39 PM |
Re: اهتراء وجدان الذاكرة | أمير بابكر | 07-23-07, 07:40 PM |
Re: اهتراء وجدان الذاكرة | معتصم دفع الله | 07-25-07, 04:49 PM |
Re: اهتراء وجدان الذاكرة | غادة عبدالعزيز خالد | 07-25-07, 10:01 PM |
Re: اهتراء وجدان الذاكرة | منتصر الامين | 07-26-07, 00:07 AM |
Re: اهتراء وجدان الذاكرة | غادة عبدالعزيز خالد | 07-26-07, 00:53 AM |
Re: اهتراء وجدان الذاكرة | أمير بابكر | 07-26-07, 09:24 PM |
Re: اهتراء وجدان الذاكرة | منتصر الامين | 07-27-07, 10:26 PM |
Re: اهتراء وجدان الذاكرة | Emad Abdulla | 07-27-07, 11:26 PM |
Re: اهتراء وجدان الذاكرة | أمير بابكر | 07-28-07, 07:51 PM |
|
|
|