*** طعم الغربة***

Quote: هديك الليلة شوفوا الغربه مــــــــــــاشه شوى... وأنا البتضارا من عينيها ما تشوفني وتنادى على.. وأنا البتشابا فوق للغيمه كان الغيمه تشفع لي .. كان الغيمه تختفنى.. وتحلق فوق ديارنا العامرة تسرح بي .. ولما الغربة تمشى تفوت.. أجيكم تانى بين ايديكم.. اللولتنى لما كنت دابى جنى ... ********* ولكن انتو ما عارفين . .وقسم الغربة كيف ببين .... ولماالحاره تصبح جد .. وما هو كلاما شيتاً ني... وكت اللحظة تبقى حقيقة وين بنفوت .. لا بابا بمسك الريح.. ولا قدرا بعرف الشبٌ دابو ندى... فراقكم انتو يا أهلي.... دريباً قاسى كلو شوك بطعن في القليب الحي..... وبتذكر وداعكم لي .... وكت عتبت باب بيتنا ودموعكم تجرى تصرخ وى..... بحس بجريها في ضلوعى.. وبتعصر في كبيدتى شديــــــد وما هو شوى.... بحس بالخطوة تبقى تقيله.. أريت التانيه ترجع بي.... اقول لرويحتى وين ماشه.. تسيبي الديره بالفيها . من الجد العجوز واقف .. و لي عند البيحبى حبي.... تقولي خلاص... ده ياهو قدر.. ومين بقدر يحبس السيل وكت يهدر يدوس الشتلة ويسرح تى ..... وسقت خطاي.. سقت خطاى ........ وشلت حنانكم الغالي ... وحفظتو معاى بين ايدى.. وكت اشتاق ..افرً ايدى ..... ألاقيك يمه... ألاقى الخالة.... ألاقى العمة بتقول لي .. ودعتك الله ود بطني.. قريب ترجع تانى تضوي متل الضى... دياركم انتو يا أهلي..... دياراً زين وبلد الطيبة... كست دروبا حاره.. وحاره.. سكه.. وسكه.. بي رجلي.... بيعرفنى الكبير عايش.. وبعرفني الصغير الشلتو فوق كرعى .... بتعرفنى الرمال الشاربة من موية بحرنا.. ألبيها اتعطرت لما كنت دابى صبى..... وحتى قصبنا بشهد بى بى روائع نيلنا.. ساقيه الحنان راويه عزً الري.... دى ما بلدي ...وكيف انتو .. إياكم انتو ما بلدي. .وإياكم انتو ما أهلي.... وإياكم انتو غنوه قديمه في شفتي... بشيلكم آهه في الغربة.. وبشوفكم نغمه في الفرحة.. وحنانكم يا هو نور عيني.... 0000 رضيت بالغربة يا أهلي ....... رضيت بالغربة شان عزة حروفاَ غالية فوق أحلامي تتواري وتقول لي .... ياني راجياك تانى ترجع لي. ولو عارف السنين بتهون كفاى الفات ... وكان اديتك الباقي … وبراك عارف الحنان العندى متل اللبنة صافى نقى.... صفا السمحين.. دعاء الطيبين.. مشاتل عامره بى فرح الصغير.. العبًْء من رمل الجروف... الجاريه شاقه ودى. ******** هناك في الغربة يا أهلي ... بشوف الناس غريبة وتايهه في أحزانا طاويه ألحي .... بشوف في عيونا نظرات الودار .. مليون سؤال. في جوفي تكويني وتخلف الكى.... وحتى القمرا ..ما بتشبه قمربلدى… البضوى الساحة صافى لبى.... ووين الخضرة ..وين الخضرة وين راحت ... وديــــــــــك المويه فوق للصخره…. تصرخ تبكى وووووب وأحي.... وحاتكم انتو يا أهلي ... ما فى احنً من أهلي .. منو الغيركم بعرف البى..... ويقاسمني الزمن لو جاني تارى على...... لكنى خلاص اتيمنت ... واتيقنت .... ما دام الغربة صبحت نغمه… بسمع صوتا فوق أضنى ... وطعم الغربة في لساني…. واصابعو تدور تأشر لي.... بسلم أمري للأيام.. واجيكم تانى .شان بى شوفتكم أتعطر …. .واكحل بيه ضى عيني.... واكحل بيه ضى عينى.. اسماء الجنيد / مسقط لو دايرين تبكوا صحى صحى اسمعوا القصيده دى ملحنه ومغناة بصوت الشفيف الحنين مصطفى السنى التحية ليك يا حنين بحاول انزلا ليكم بى صوتو لو قدرت التحية للجميع ورد الله غربتنا جميعا سالمين طيبين بركة رب العالمين