|
Re: (قرنق).. الموت على حافة الإنتظار والإنتصار (Re: كمال علي الزين)
|
(3)
يتوعده دائماً قائلاً وإبتسامته لا تفارق محياها:
(بكرة يابلال عمي قرنق بجي الخرطوم وبخلص منك القديم والجديد)
يرد عليه بلال ساخراً : شوف إبن الكلب أنا سويت ليك شنو ؟ بعدين ياخوي قوم (بل الفول ) باين إنتظارك لي عمك قرنق حايطول .
ويضجا ضاحكين بعد أن كانا في أشد حالات العداء والركل والرفس .
يهم (قرنق) بأداء عمله في تكاسل متعمد وهو يتمتم :
بكرة لما يجي عمو (قرنق) الخرطوم , أمانة أتعبك تعب ..!
يرد بلال بسرعة :
ياخوي لا تتعبني ولا أتعبك يجي عمك ده يسوقك وتغور كده ولا كدة من خلقتي وأرتاح منك ومن قلة أدبك دي .
إلا أن (قرنق ) سرعان ما يجد مبتغاه حين يهتف بوجهه :
يسوقني وين يالذيذ , بعدها أنا حا أبقى سيد الدكان وإنتا تشتغل شغلي ده وفوقوا تغسل هدومي إنتا قايل هو منتظروا عشان يجي يحكم البلد دي , لا والله البلد تطير أنا منتظرو عشان حاجتين .
يرد بلال :
والله يا العفين كمان بقيت تتكلم زي ناس المفاوضات وعندك شروط , أها ورينا (أجندتك) ياقول ناس السياسة ؟
يرد (قرنق ) وهو يشعل النار لينضج الفول :
الحاجة الأولي إنو أنا أعكس الآية يعني أنا أبقى بلال وإنتا تبقى قرنق وأنجضك شغل ومشاوير وقلة نوم زي مانجضتني .
يرد بلال :
دي هينا مبروك عليك (محلات هارديز دي) , طبعاً يا جاهل مابتعرف (هارديز دي شنو ) ماعلينا والحاجة التانية شنو كمان ؟؟
يرد (قرنق) :
دي كان قلتها ليك الليلة مابننوم , أحسن تخليها لما يجي عمو قرنق مفاجأة يعني ؟
يعتدل بلال في رقدته ليقول : مفاجآت شنو يا (قرنق )السجم , أوعا تكون عاوز تطردني من بيتي كمان وتستولى عليهو , ماياهو ده الفضل ؟
يرد (قرنق) في خبث وفرح مصطنع :
بس قربت والله , هو ما حا أطردك ولا حاجة لكن حا ...
يقاطعه بلال : حا شنو
يرد قرنق : حا .. حا ..
أعرس (البيضا) أختك ديك .
ويواصل جررة بلال إلى غضبته تلك التي تجعلهما يتراكضان ويتصارعان ثم يعاودا عملهما في
صمت .
(عدل بواسطة كمال علي الزين on 06-26-2007, 09:19 PM)
|
|
|
|
|
|