مالو منبركم ده بقى زي جلابية انصار السنة!!؟

Quote: خالص الاحترام الاستاذ الواثق يا سيدي لاني لا اعلم (ومن قال لا اعلم فقد افتي ) لذلك كتبت بافتراض، خاصة وأنني من المؤمنين بحكاية بيحكيها الاستاذ/ احمد ضؤ البيت( رد الله غربته ) انو العربي في شبه الجزيرة العربية يغز كوعه تحت الشجرة ويقول الرسول قال ... ويكون الرسول براءة من ما قاله العربي الغاذي كوعه ... والشئ المتاكدة منو انو احاديث انصار السنة 3/4 منها من احاديث غز الكوع

أما حكاية أحمد ضو البيت أحسن ليك ما تؤمني بيها لأنو في علم كااااااااااااامل اسمو الجرح و التعديل اتخيل أحمد ذاتو ما سمع بيهو و لا بعرفو عشان كده بنسف الأحاديث بالقصص الزي دي..القصص دي بتبين سطحية الزول و عجزه عن تناول قضية من منظور معين لأنو ما بقدر يعاين بيهو أو ما لاقي طريقة يعاين بيهو أو المنظار أكبر منو ذاتو فيقوم ينسف الموضوع من أولو..
يعني زي كلامك بتاع أحاديث أنصار السنة ثلاث أرباعها غز كوع دا ما بصدر من زول معرفي و ما بطلع من زول بعرف يناقش و بحترم العلم لكن ممكن عادي جداً يطلع من زول جاهل بالأحاديث شنو و بدل يعترف بجلهو طوالي طااااخ يضرب الأحاديث بإنها غز كوع ساي عشان يفحم الزول البناقشو بطريقة الجهال الكلاسيكية..
علم الحديث دا متاح لكل الناس و لو عايزه تتعلميهو ممكن عادي بس داير شويه صبر و ذهن نضيف و ممكن برضو ما تتعبي روحك لكن تمحصي الادلةو تعترفي بأهل العلم هنا لأنك ما من أهل العلم..
قال محسن خالد في هذه الجزئية بالذات :
الحق الديموقراطي لا بُدّ أن يسبقه الحق المعرفي. وأنّ الحق الديموقراطي لا يقوم إلا في حيز العدالة. أي أن تُعامل بعدالة مساوية لسقراط في الحقوق والواجبات، ولكن ليس في الحق المعرفي. وإلا لهلكت المعرفة في تولاها التي جعلتنا نتوصل لمفهوم الحقوق القانونية هذه نفسها التي يجب أن تُميَّز كامل التمييز عن الحقوق المعرفية. فالمهندس حقه الديموقراطي أن يتعالج مثله مثل الطبيب في مستشفى الدولة، ولكن ليس من حقه المعرفي أن يؤبه لكلامه بخصوص هذه المعالجة كما يؤبه بكلام الطبيب مثلاً. مثلما أنّ الطبيب يدير المستشفى في شقه الطبي، ولكن لا يؤبه بكلامه بخصوص بناء العنابر وتنميتها ومكافحة الصيف والشتاء فيها كما يؤبه بكلام المهندس المعماري أو المدني مثلاً. وهذا شيء من طبيعة وصميم الوجود نفسه..

فطالما ما عندك معرفة بعلم الحديث فلا إنتي و لا أحمد ضو البيت مؤهل للحكم على أحاديث أنصار السنة..
أحسن ليك تقيفي في حد (من قال لا أعلم فقد أفتى)..لأنو المهاترات عمرها ما غطت على جهل زول صاح الناس ممكن تضحك في وشك لكن تحت تحت بكونوا خلاص رموا طوبتك..

Quote: لانو الدين عندي مرن وتفكيري في النصوص بيكون بعيد عن اي تشدد غير مبرر ولا تعقيد فلو التفسير سابق الذكر جاء علي الهواء مباشرة فدي محسنة كون اني بحاول افسر نصوص وما بستلمها جاهزة وببداء احرم واحلل للناس يعني يا الواثق القصة قابلة عندي للنقاش والاقناع

و الحاجه الغريبة التانيه إنو أي زول و لو كان جاهل زييك ممكن يفكر في دلالات النصوص و يتجرأ عليها بحكم إنو مستنير و بشغل مخو.. ياخي شغلي مخك في الحاجات البتعرفيها لكن الشريعة دي علم لو ما عندك الأدوات ما تجي خاشه شمال و الكلام دا بالناسبة ما عندو علاقة بالاستنارة أو الظلامية دا محل اتفاق البشر (من تحدث في غير فنه أتى بالعجائب)..

Quote: لكن هاك الدليل ( رأى عمر بن الخطاب شاباُ يمس ثوبه الأرض قال له : ارفع ثوبك فإنه أتقى لربك ، وأنقى لثوبك فلقد قال صلى الله عليه وسلم : " البسوا من ثيابكم البياض ، فإنها من خير ثيابكم ، وكفنوا فيها موتاكم " [ الترمذي وبن ماجه والنسائي وهوحديث صحيح الإسناد ] ) .

طيب ليه المرة دي اعترفتي بالترمذي و ابن ماجه و النسائي؟؟؟ و كيف عرفتي إنو الحديث دا ما غز كوع ساي؟؟؟
حديث عمربن الخطاب لا يخالف ما ذهبت إليه أنا من أن علة تحريم الإسبال ليست اتساخ الأرض و الذي منه..
الدليل على ذلك أن النساء في نفس ذلك الوقت كن يلبسن ثياباً أطول في حكم الإسبال و لو كانت العلة اتساخ الأرض لمنعهن النبي صلى الله عليه و سلم خاصة و أنهن ربات الزينة و المهتمات بها و المقدمات في مضمارها..
ثانياً لا يلزم من الإسبال جر الثياب بالأرض لأن حد أزرة المؤمن إلى الكعبين على وجه الجواز فما زاد من الكعبين فلا يلزم ان يجر بالأرض و هذا واضح لكل ذي عينين..
النقاش حول الإسبال قديم و مستمر حتى في عصر العلماء البقى في زمنهم في أرصفة مافي زول جاب سيرة الوساخه دي.. اتكلموا عن الإسبال بخيلاء و بغير خيلاء لكن علتك الجبتيها دي سبق يسجل باسم في دفتر العجائب التي يأتي بها من يتكلم في غير فنه..

Quote: يا زول الجاب سيرة ثياب النسوان هنا شنو؟؟ وبعدين احنا بنتكلم عن تقصير الثوب عند الرجال لكن بالمناسبة لو مصر علي موضوع النسوان برضو حديثك بيثبت انو برضو ما مفروض يجرجرو هدومهم با معناتو تفسيري العلي الهواء مباشرة ساري المفعول هنا برضو

الجاب سيرة حديث النسوان هو وجه الاستدلال الأول الذي يبطل مفهومك المباشر على الهواء..برضو فهمك غريب.. كيف يرخينه ذراعاً و لا يجر بالأرض؟؟؟ عارفه الذراع قدر شنو؟؟


بنستدل ليك بمحسن خالد عشان ما تقولوا ظلامي ما بنفع معاكم ابن باز طبعاً
المحير فعلاً إنو زول يصدر حديثو بقوله أنه لا يعلم ثم يدلي برأيه في كل مسألة مطروحة أو تخطر على باله طيب لو كنتي بتعرفي كان عملتي شنو بالله؟؟

مرة أخيرة بحذرك من تفسير النصوص حسب هواك فالشريعة علم فاحترميه و لا تتجرأي على الفتوى بغير علم لأن القول على الله بغير علم أعظم من الشرك بالله

كالعادة تختمين مداخلتك بالسخرية من أنصار السنة و فرحك بتطورهم و نشكرك على شعورك. و يا رب تتطوري.