الصادق المهدي استضاف البشير في «عشاء عمل» بمنزله.

Quote: على صعيد آخر وللمرة الاولى منذ اكثر من 25 عاماً، يزور الإمام الصادق المهدي زعيم حزب الأمة القومي منطقة الغابة والدبة جنوب الولاية الشمالية، الخميس المقبل في زيارة تمتد ليومين

غايتو انا المغسة عايزة تشقني مما كنت صغير تحت العشر سنوات
يا كمال بشاشا طبعا نحنا اولاد عم لانه انت من كنكلاب -ام عقبة- و انا من الغابة= يعني لو عندك حمار سمح و ما داراوي خمسة و اربعين دقيقة الواحد يفطر معاكم فطور الصباح
جدي نصر محمد نصر تبيدي -الله يرحمه- كان انصاري كبير و زول عنده جناين تمر سمحة خلاس و تمرو ذاتو عينة جايب الشتول من المحس -- شيئ قنديلة و شيئ بركاوي و شيئ تمودة -- غايتو
الراجل دا كان مخصص نخلات معينة لي ناس سيدي -- النخلة الواحدة تطلع كم شوال و الشوال بي مبلغ و قدره -ده لو كان التمر في حالة الصلابة مع تضاعف السعر لو كان في حالة السيولة --
طبعا في الموسم اللواري الشايلة التمر و الفول و القمح و خلافة و ماشية ام درمان لي ناس سيدي ما تديك الدرب
انا اتذكرت الحكاية دي لانه الموسم بتاع حش التمر قرب
غايتو امي امنة نصر محمد نصر -- الانصارية بحكم تربية ابوها اللي هو جدي -- انشاء الله ماتسمع بي كلامي الكاتبو دا == بالله انا زاتي ما شليق مالي و مال الكلام دا هسي
بعدين يخيل لي الصادق دا زاتو ما انصاري اصلي -- ياخي زول يقلع منك الحكم تقوم تزمه عشاء ؟؟

و استغفر الله العظيم

(عدل بواسطة عثمان عووضة on 08-06-2004, 08:44 PM)
(عدل بواسطة عثمان عووضة on 08-06-2004, 08:46 PM)