|
حسن المثقفاتي وعبده الميكانيكي..
|
حسن المثقفاتي وعبده الميكانيكي.. اصحاب فِرَد للطيش.. لكن ما بيتلاقوا الا يوم الخميس بالليل.. حسن موظف في وزارة الثقافة وعضو في حزب يساري.. يوميا بيرجع الحلة معاهو كمية جرايد وكتب.. بيقعد قدام البيت يقرأ أو يمشي للمنتديات والايام الثقافية.. عبده حياته كلها في المنطقة الصناعية.. حتى مفرداته ذاتها من نفس البيئة حتى لو شاف ليه بت سمحة وشغالة «شل، أجيب، موبيل، توتال» بيقول ليها: أحي أنا يا الرفارف.. أها يوم الخميس قريب المغربية عبدة بيجي لي حسن ويناديه: يا مثقفاتي ارحكا ياخ.. «سليلة» الليلة بتقفل بدري وما بنلقى لينا «موية مقطرة» وكدة «كربريترنا» بينفس يا ابو الثقافة وبيكون خميسنا «مبوش» ياخ.. عبدة بيرد عليه: ياخي انت جاهل ومحاولة انه الزول يرفع من قيمة الانسان جواك كلها فشلت - يا مثقفاتي خلينا من الحنك العاضي دة ياخ «السِنَة» دي زي الاسبير الاصلي بيلفحوها سريع سريع بعدين «حفصة» الليلة حا تكتل فراملنا ياخ.. - أرحكا ياخ.. انت ميؤس منك على مستوى رفع الوعي - يا مثقفاتي أن عايز ارفع موية دماغي المقطرة ياخ عشان اعيش الجو أول ما يصلوا عند «سليلة» في العشش عندهم ركن كدة براهم و«سليلة» بتكون فارزة ليهم عيشتهم براهم و«أم فتفت مع الشطوط والأقاشي» مسمياهم: بتاع الحيكومة وبتاع «أبيض ضميرك» وبتخلي حفصة تكون معاهم وهي مقابلة باقي الزباين في الاوضة والراكوبة التانية.. أها أول ما «يتصلحوا» عبدة الميكانيكي بيقعد يديها بكية كدة: حفصها يا حناني ياخ و«يغمزها» في نصها ويقول ليها: أحي أنا من دينمو النيسان دة.. - يا مغفل ياخي اتعامل مع حفصة دي ككيان.. كبني آدم.. أرقى بي مستواك شوية - يا مثقفاتي بتذكرني بي حنان حبي الابدي زي مكنة البوكسي 78 ياخ جاء ختفها مني واحد مثقف زيك ووداها السعودية... احييييي انا يا قلبي ويقعد يبكي ويحضن حفصة.. بعد يتم جوعيرتو.. ولمن يسمع أحمد احساس بيغني في الراكوبة: على النجيلة جلسنا بيقول لي حسن: كنت بوديها حديقة القرشي..
- انت يا عبده ما حصلت اطلعت علي كتب وقراية يعني.. - مطالعة قصدك - ايوة - يعني المطالعة دي بتخلي الزول مثقف - ايوة بتوسع مداركك - طيب انت قايم بينا ومثقفاتي واسبير ياباني اصلي اتاريني انا زيك واحد - كيف - ياخي انا قاري خمسة كتب «مُطالعة» في الابتدائي.. بالله هو ناس: طه القرشي ديلاك ياهم الثقافة يا فَردة.. في صحتك يا زميل الثقافة..
|
|
|
|
|
|
|
العنوان |
الكاتب |
Date |
حسن المثقفاتي وعبده الميكانيكي.. | طارق جبريل | 02-17-14, 10:49 PM |
Re: حسن المثقفاتي وعبده الميكانيكي.. | HAYDER GASIM | 02-18-14, 01:37 AM |
Re: حسن المثقفاتي وعبده الميكانيكي.. | الفاضل يسن عثمان | 02-18-14, 01:57 AM |
Re: حسن المثقفاتي وعبده الميكانيكي.. | يحي قباني | 02-18-14, 03:34 AM |
Re: حسن المثقفاتي وعبده الميكانيكي.. | عبدالحفيظ ابوسن | 02-18-14, 04:12 AM |
Re: حسن المثقفاتي وعبده الميكانيكي.. | طارق جبريل | 02-20-14, 11:22 AM |
Re: حسن المثقفاتي وعبده الميكانيكي.. | طارق جبريل | 02-18-14, 05:26 PM |
Re: حسن المثقفاتي وعبده الميكانيكي.. | طارق جبريل | 02-18-14, 05:25 PM |
Re: حسن المثقفاتي وعبده الميكانيكي.. | طارق جبريل | 02-18-14, 01:02 PM |
Re: حسن المثقفاتي وعبده الميكانيكي.. | طارق جبريل | 02-23-14, 09:25 AM |
|
|
|