ليله أندلسيه في الخرطوم

الفلامنكو :والله دي حكاية عجيبة ...
شكلنا حنطره في النهاية كده نكتب شُكراً لمن جعل هذا ممكنا
زمان ، زمان جداً كان في تيم -فوتبول تيم- كورة ياطلال ، في رابطة ودنوباوي للناشئين إسمو "فلامنكو"،
خطر جداً كلو اولاد نوبة وطوالي شايل كاس الرابطة ، لامن يجيبو قون بجرو كلهم الخط وبدوها عدد واحد
فلامنكو آخر حاجة وبهزو الميدان بخبط الرجلين ، وبهتفو اوليه ، اوليه ، اوليه ...
من زمان ، زمان جداً وانا مفروض احضر عرض فلامينكو وماعارف السبب بالظبط بس يمكن عشان اسبانيا وكده .
وحصل اللي حصل اتسحرت فعلاً ياعماد في الحفلة "الفعالية" بتاعه يوم الخميس في المسرح العجيب أياه " بالمناسبة
اي فعالية حضرتها في مسرح "كيكس" دي كانت اجمل من التانية ، نصير ورشا ووافر و وفلامينغو والجاي اعتي من اللي
فات ، مسرح مدرسة فعلاً ...

أول مرة يظهر لي في حياتي الفلامنكو ، عذابات ، الموضوع فيه جيتار سبينش مصاحب للمغني او المغنية وطبعاًبرضك
مع الراقص ، والموضوع كمان ظاهر انو وراهو عذابات ومظالم ومشاكل كتيرة ، معتمد بشكل اساسي علي الغُنى ،
الغُنى حجر الزاوية في الفلامنكو ، ويتميز غناء الفلامنكو بحزن شديد ، نغمات ماساوية وصرخات أقرب الي
العوييل، حتي بالامارة كنت علي اعصابي خائف علي المغني داك تنشرط فيه حاجة ولا يطق ليه عرق ، ولا عمتك
الغبسيس ديك ياطلال، تقطع حبايل القلب بصوتها، صوتها مناحة ، بس يا سبحان الله فيه حاجة جميل جمال ودار...

طبعاً الايقاع بتاع الفلمينغو بعتمد بشكل اساسي علي الصفقة وخبط الرجلين زي مابقولو الخواجات audible footwork
خبط علي الارض والراقص هو البتحكم في التيمبو بتاع الايقاع وزمنه وهو السايق والمتحكم في الجيتار والمغنين
والصفاقة والمسرح كلو علي غير عادة الرقص الذي يجاري الايقاع في بلاد الله الاخري .
المهم كركبة شديدة، شديدة بالمعنيين ، الموضوع فيه خيول طبعاً ، إتذكرت شعار الدفاع الشعبي أرد الله غربته

"عام الخيول مُسرجة" ...

مرة في ونس مع صديق مثقف فلمنغويا قالي انو غير الخيل وحركتها الحمامة مبدأ اساسي للبت البترقص الفلامنكو
يعني لازم تكون حركاتها بتشبه الحمام ، فركزت مع الحكاية دي ، لقيتها " الحلوة " فعلاً حمامة ، بس الظاهر انو
ده حمام بري ، يعني وايلد ووحشي ومُُسرج وفنان وابن ستين ...

غايتو ، هلوة و ختاماً لا يسعنا الا ان نقول شُكراً لمن جعل هذا ممكناً

(عدل بواسطة Ibrahim Algrefwi on 11-02-2008, 02:18 PM)
(عدل بواسطة Ibrahim Algrefwi on 11-02-2008, 02:24 PM)