ما فعلته الشرطة السودانية لعارضين الازياء السودانيين غير مقبول وغير مبرر

Quote: استغرب فعلا في الناس البيقولو ليك نحن السودانيين ماكده ونحن مجتمعنا ماكده .. والناس ديل مابيمثلونا ولا بيمثلو مجتمعنا طيب ياخوانا الشباب ديل ذاتهم ماسودانيين زينا كده ... سودانيين بي اب سوداني وام سودانية وعندهم حقوق سودانية ... سودانيين بالميلاد زيي زيك كده !! اشمعنى يعني اعتبرت طوالي انو سلوكياتهم دي غير سودانية والمفترض يتم اجتثاثهم من المجتمع الرجولي جدا حقنا ده لانهم مابيشبهوهو ؟ متين نحن حانتعلم تقبل الراي الاخر بدون اقصائية ؟ متين حانتعلم تقبل انو في مزاجات تانية وافكار تانية غير حقتنا دي ونتعامل معاها بما تستحق من احترام او علي الاقل مانقصيها ياخي نعارضها بس مانقصيها !! تصرف الشرطة غريب جدا !! اسي انا نفسي اعرف التهم الاتوجهت ليهم شنو ؟؟ او هم خالفو ياتو قانون ؟ ماممكن تكون حتي الاجهزة الرسمية بتاعتنا بتتعامل بالانطباع مامعقول اصلو بتاعين الشرطة يقبضو زول عشان استايلو ماعاجبهم او لبستو ناعمة اكثر من اللزوم او حتي عامل روج في شلوفتو !! انا ما اظن حتي قانون النظام العام سيء الذكر بتكون فيهو مواد ممكن تدين الشباب ديل رغم انو اصلا قانون غير عادل لكن برضو ماممكن يكون ظالم للدرجة دي ؟ كدي ياناس القانون ورونا المواد الخالفوها الشباب ديل شنو في القانون ؟ المفترض في حدود بينك وبين الآخرين لازم تحترمها لا انت حاتتقبل زول يتعدى علي حدودك ولا في زول حايتقبل تتعدى علي حدودو .. سلوكيات الناس وتصرفاتها وكل البيندرج تحت حرية شخصية ده حاجة المفترض الناس تحترمها في بعض وفي حالة اي احتكاك مع حريات الاخرين بيناتكم القانون وده برضو عندو اسس بيخضع ليها ... ل ازم الناس تتعلم تقبل الثقافات التانية ولازم تتعلم كيف تحترم حدود الناس التانية ولازم الناس تبطل اسلوب الوصاية الغريب ده