|
الإيميل الأثبت لى إنّى راجل ونُص وخمسة
|
إبنى الفاضل لوى أول شئ معليش ماعرفت الواو دى أسوى فيها الهمزة كيفن . وتانى شئ معليش عشان شلت عنوان الايميل حقك وكتبت ليك قبال مااسألك . المهم ياولدى انا امبارح بالليل فتحت سودانيس اونلاين وقريت الموضوع حق اعتراف انا ماراجل وقريتو وقريت كلام الناس الكتبوه ليك وكلامك ليهم اها وشلت الكلام ده وقعدت افكر فى ابو اولادى وانحنا متزوجين لينا 21 سنة حسى . الراجل ده عمرو لاغلت على ولا اتفلهم على الا شيتن واحد ممغسنى منو . المتبخ ده من يوم مابقينا تحت سقف واحد مادخلو بالغلت وكل مااجى انضم معاهو فوق شيتن مهم يقول لى سمح قومى سوى الغدا . اها المهم ماأطول عليك . قمت قريت كلامك ده ومشيت رقدت فوق سريرى ونمت .
اها ياولدى بعد ماصليت الفجر مشيت نمت . احلم اللهم اجعلو خير انا ايام شبابى وعروس جديدة . واحلم بيك ياولدى انت العرستنى فى الزمن داك . قال انا فى بيتنا فى السودان . وبى التحديد فى بيت حبوبتى . وقاعدة اقرا فى مجلة ميكى ( بس ماتضحك فوقى ) ولابسة الجلابية حقتك . اها جيت انت داخل من برة . وقلت لى حسى ده شكل واحدة منتظرة راجلها ؟؟ قمت قلت ليك ومالو حسى شكلى ؟؟ قلت لى كدى امشى عاينى لى روحك فى المراية . شكلك أرجل منّى . اها قمت انا اتنفشت واتمليت وزعلت منك . وقلت ليك اخير امشى اسوى ليك الغدا . لأنو شكلها بداية شكلة .
المهم قلت امشى من قدام وشك اخليك تروق حبة مسافة اجهز ليك الغدا واجى اشوفك مالك زهجان . المهم هو طبعاً الغدا كان كباية منقة بى اللبن . سويتها وجيت لقيتك لسع عامل ليك سبعة ( يعنى صارى وشك ) المهم سويت ليك شوية حركات ( انثوية بحتة ) وقمت انت شوية فردتَ السبعة لامن بقت تمانية . المهم قلت ليك ورينى مالك شنو المضايقك ؟ قلت لى أحمد صاحبى الليلة إستفزانى فى الشغل شديد خلاس . قلت ليك كيفن ؟ قمت قلت لى ( ودى كانت القشة القصمت ظهر البعير .. والبعير دى انا ) قلت لى قال ليك أمشى شوف مرتك العاملة زى الراجل دى . شنبها أكبر من شنبك .
اها انت سبحان الله بعد الكلام ده قمت فقعت الضحكة ( زى الضحكة البتكون فاقعها هسه ) قمت انا قلت ليك كدى ورينى وانت رديت ليهو قلت ليهو شنو ؟ قلت لى ماقلت ليهو اى شئ . لأنو بى صراحة كلامو صاح . طبعاً بعد كلامو صاح دى انا فقعت لى عدد واحد بكية مكرررررررررررربة ( من النوع البى كواريكو داك ) . قمت انت قلت لى بطلى حركات النساوين دى لأنها ماشغالة معاى وقومى سوى لينا الغدا . اها انا من حُرقتى قلت ليك ابيت ماماشة انت مش قلت انا مانسوان ؟ ومشيت رقدت فى السرير . اها جيت انت ذاتك رقدت فى السرير ودفرتنى ولزيتنى لامن وقعتنى فى الواطة . اها صحيت من النوم هسه لقيت روحى دافرة الراجل لامن رميتو فى الواطة . قال لى مالك يامرا ؟؟ قلت ليهو أسكت انتو ياالرجال كلكم ياكم واحد وحتى الوليد اللسمو لوى ده هدا طلع راجل ونص وخمسة .
اها ياولدى حلفت قلت الا احكى ليك حلمى ده وماعندى اى مانع كان داير تنشرو لكن شيل شيلتك كان نشرتو من الادارة البقت تقطع زى ناس الادارة وقطيعهم . وهسه يقولو ليك انت زاتك زى سجيمان . لكن ياولدى عشان ماادخلك فى مشاكل ساكت كان اى زول نضم معاك اديهم ايميلى ده وانا بتولى امرهم . وسلم لى على ناسكم ديل كلهم . وكان نشرتو ممكن تسميهو المرا أم شنب ..
إعتراف .. (( انا ماراجل ))
ــــــــــــــــــــــــــــــــــــــــــــ [email protected]
|
|
|
|
|
|
|
العنوان |
الكاتب |
Date |
الإيميل الأثبت لى إنّى راجل ونُص وخمسة | لؤى | 10-03-04, 07:03 AM |
Re: الإيميل الأثبت لى إنّى راجل ونُص وخمسة | عشة بت فاطنة | 10-03-04, 07:12 AM |
Re: الإيميل الأثبت لى إنّى راجل ونُص وخمسة | Rawia | 10-03-04, 07:17 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 02:04 AM |
Re: الإيميل الأثبت لى إنّى راجل ونُص وخمسة | لؤى | 10-04-04, 12:34 PM |
Re: الإيميل الأثبت لى إنّى راجل ونُص وخمسة | لؤى | 12-03-04, 07:47 AM |
Re: الإيميل الأثبت لى إنّى راجل ونُص وخمسة | Ana Zaty Omdur | 10-07-04, 05:29 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 06:27 AM |
Re: الإيميل الأثبت لى إنّى راجل ونُص وخمسة | singawi | 10-07-04, 06:00 AM |
Re: الإيميل الأثبت لى إنّى راجل ونُص وخمسة | خضر عطا المنان | 10-07-04, 06:17 AM |
Re: الإيميل الأثبت لى إنّى راجل ونُص وخمسة | Tumadir | 10-07-04, 06:49 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 08:31 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 08:13 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 07:11 AM |
Re: الإيميل الأثبت لى إنّى راجل ونُص وخمسة | عبدالله الصادق الفحل | 10-07-04, 07:03 AM |
Re: الإيميل الأثبت لى إنّى راجل ونُص وخمسة | لؤى | 10-07-04, 08:43 AM |
Re: الإيميل الأثبت لى إنّى راجل ونُص وخمسة | TahaElham | 10-08-04, 01:18 AM |
Re: الإيميل الأثبت لى إنّى راجل ونُص وخمسة | لؤى | 10-08-04, 09:20 AM |
Re: الإيميل الأثبت لى إنّى راجل ونُص وخمسة | mohammed alfadla | 10-08-04, 09:13 AM |
Re: الإيميل الأثبت لى إنّى راجل ونُص وخمسة | لؤى | 10-09-04, 08:00 AM |
Re: الإيميل الأثبت لى إنّى راجل ونُص وخمسة | لؤى | 10-18-04, 05:17 AM |
Re: الإيميل الأثبت لى إنّى راجل ونُص وخمسة | لؤى | 10-18-04, 01:01 PM |
Re: الإيميل الأثبت لى إنّى راجل ونُص وخمسة | إيمان أحمد | 10-18-04, 07:03 PM |
Re: الإيميل الأثبت لى إنّى راجل ونُص وخمسة | لؤى | 10-19-04, 10:39 AM |
|
|
|