لماذا يشارك الهلال في البطولات الخارجية الكبيرة .

Quote: الصحفي المتصوحف طلحة : شيلسي تتوقع شارك كم مرة في دوري الأبطال وعندو صفر دولي كبير في البطولة دي ؟ ليون الفرنسي ليهو ستة سنوات بيشيل الدوري الفرنسي وبيشارك في بطولة دوري الأبطال الأوروبية وصفرو أكبر من صلعة كوللينا ولسة بيشارك !!! مش قلت ليك إنت جاهل كروياً ما صدقتني ؟؟ يعني كدي إتخيل معاي يقوم ميشيل بلاتيني وبحكم إنو فرنسي يجي لي ناس ليون ويقول ليهم والله إنتو بالغتو ليكم ستة سنة بتفوزو بي الدوري الفرنسي وبتشاركو في الأندرية الأوربية وفي النهاية صفركم الدولي كبييير مرمطوا بي سمعة فرنسا الواااطة عشان كده نحن قررنا نكلم ناس أوكسير الفرنسي ومعاهم نانت يجو يلعبو بدلكم .. مع العلم إنو ليون الفرنسي ده في بطولة أوروبا دوري الأربعة ما بيشوفو إلا بي الحركرك والحركرك زاااتو ماف.. نديك درس تاني في الفهم الكروي والتاريخ الكروي عشان تستفيد منو للدنيا والزمان وتقول الهلالاب درسوني .. كأس العالم البادي من سنة 1930 ده ولحدي أسة سنة 2007 (ياها ال77 سنة القادننا بيها ) عارف شالوهو منتخب ؟ أحسب معاي .. أوروغواي ..إيطاليا..المانيا ..البرازيل..إنجلترا..الأرجنتين ..فرنسا.. بالمناسبة إستفيد من الترتيب ده وخلي في بالك في منتخبات شالتو أكتر من مرة يعني زي الأورغواي شالتو مرتين والمانيا تلاتة مرات وإيطاليا اربعة مرات والبرازيل خمسة مرات والأرجنتين مرتين وفرنسا مرة .. أها نجيك بي فهمك العقيم بتاع الصفر الدولي ده .. بتعرف هولندا ؟؟؟ناس كرويف العملو الكورة الشاملة والجابو الفهم للناس والعلموا الناس الخطط والنقطوها وجابو كومان وفان باستن وجوليت وريكارد لحدي ما وصلو اسي لي ناس روبن وإشنايدر ونيستلروي .. أها شوفت الناس ديل عندهم صفر كبييييييييييييييييييييييييير كبر البحر زي ما بتقول فيروز .. ياخ لو ما أبالغ ليك ولو تسعفني الذاكرة هولندا دي النهائي وصلتو مرة واحدة سنة 78 وخسرت من الأرجنتين .. يعني الهلال أحسن منهم لعب نهائي مرتين .. أها شوف كاس العالم ده هولندا شاركت فيهو كم مرة ؟؟؟ وشوف في كم منتخب يشارك في كاس العالم إلى أن وصلوا إلى 32 منتخب وبلارغم من كده الكاس محصور في 7 منتخبات كلها من أوروبا وأمريكا الجنوبية .. ياخ الإتحاد السوفيتي ده لحدي ما إتفرتق ما شال ليهو كاس .. إسبانيا دي اللحدي أسة بتلعب أجمل كورة ما شمّت الكاس ده .. وبالمناسبة كمان عشان تعرف الناس اللي زي المريخ ديل .. عارف كاس العالم 54 النهائي كان بين منو ومنو ؟؟ المانيا وهنغاريا والمانيا فازت3-2 .. هنغاريا دي والله انا ما سمعت بيها أسة إلا لمن أمشي بندة أشتري حاجات البيت المدام تقول لي جيب معاك جبنة هنغاريا !!!! شوفت الكورة دي بت كلب كيف ؟؟ وتجي تقول لي بطولة وشرف والأسد وسمعة ووطن وتاريخ .. قوم لف عليك الله .. تخريمة : نتمنى تستفيد من الدروس المجانية دي وتزيد حصيلتك المعرفية في الكورة .. المرة الجاية جيب سيرة الوصفاء عشان نديك تقارير عن أعظم الوصفاء في العالم ..