باى منطق هؤلاء اصدقاء وهؤلاء اشقاء؟!!!!!!!!

Quote: الذين يتجاهلون كل ذلك يعملون هذا علم اليقين. ولكنهم يحاولون الالتفاف عليه بحيلة يعتقدون أنها ذكية وهي الادعاء بأننا لا ننتمي من حيث العرق إلى العروبة. وهذا تناول مبتسر لمسألة الهوية. لو مضينا بهذا المنطق إلى نهاياته سيصل الناس إلى خلاصات مضحكة. مثلاً: هل ممكن نضع سؤالك في موضع آخر مثل الولايات المتحدة مثلاً؟ هلي من المنطقي مطالبة الأمريكيين اليوم أن يعودوا إلى لغة وثقافة السكان الأصليين بالولايات المتحدة ممن يسمونهم للطرافة "الهنود الحمر"؟ الموضوع ليس هو مَن نحن اثنياً؟ إنما مَن نحن الآن؟ وإلى أين يمكن أن ينطلق التلاقح الثقافي بيننا من الآن وإلى الأمام؟

وليك إنت شخصياً قلت ليك الآتي:

Quote: الواقع الراهن إنو الناس كلهم تقريباً بيعرفوا اللغة العربية أو بيتحدثوا بيها بيانتم. حتى في جوبا والجنوب بوجه عام الناس بيتكلموا "عربي جوبا" وبيغنو بيهو كمان. نقوم نقول ليهم لأ ياخوانا نبدأ من جديد ونتعلم النوبية أو الدينكاوية أو .. أو ... ده حل غير عملي. الحل العملي نبدأ بالموجود ونطور الاندثر والمحدود بامكاناتنا المحدودة لما يبقى في طريقة تتعمم واحدة من اللغات التانية معاها ومش ازاحتها. لانو أي لغة زيادة مكسب وليس خسارة. كل اللغات الانت قلتهادي مكسب لكن مش بختو واحدة ويشيلو واحدة. حنكون عملنا شنو كده؟

ده فيهو كلام إنو أنحنا عرب؟
هل كلامي ده بيعني انو الناس البتكلمو عربي جوبا مثلاً عرب؟
ياخي لعلمك أنا متابع في المنبر ده الكثير من المداخلات من العينة بتاعة نحنا عرب ولا ما عرب. لكن أنا دي غلوتية ما حبيت أخش فيها من البداية. ولو تذكرت قلت ليك حتى مش مهم إنو أصلنا الاثني شنو حتى ولكن المهم من نحن الآن. وعايزين ثقافتنا دي نمشي بيها لي وين. زي ما شايف فوق.

بعد ده كلو تجي تقول لي كلام زي التحت ده؟

Quote: تانى انت تجى تناقض كلامك وتقول لى ليه ما دايرين تغتنعوا انو لما نتكلم العربى ما بالضرورة نكون عرب ؟ المنتاقض فينا منو حسع هنا ؟ انا والا انت؟ وانا لما قلت ليك , نحن لو لغة دولتنا انجليزية ما معناه نحنا انجليز ولا ما فى واحد حيدعى انو هو خواجة ,زى ما فى ناس ادعت للسودان العروبة ومازالوا وانت واحد منهم ! حجازى كده ورينى المنطقة العربية دى بتبدا من وين وبتنتهى وين وكيف السودان فيها؟ ومن متين خريطة المنطقة العربية اللى بتقصدها دى؟

خريطة المنطقة العربية هي المعلومة لديك للدول العربية. وكيف السودان فيها؟ زي ما مثلاً كل الأجزاء المتاخمة للتكلات الكبيرة في العالم موجودة. يعني مثلاً ممكن جداً تلقى حتى دولة واحدة وفيها أقليات اثنيه أو لغوية متعددة خليك من رابطة بتجمع مجموعة دول. وضربت ليك أنا مثل بأمريكا الفيها الهنود الحمر والاصول الاسبانية وغيرها؟ وممكن بالمناسبة تاخد أي دولة أخرى حتلقاها تقريباً نفس الشيء باستثناءات ضئيلة جدا في الدول الصغيرة.
عشان تفهم أنا بقول في شنو أنا بقول ليك حاجة أوضح وهي إنو انتماءنا للجامعة العربية ده نفسو ما مهم. يعني اليوم لو خرجنا من الجامعة العربية الناس في السودان حيتكلموا شنو؟
خليني من فرضوها وما فرضوها. قول خرجنا من الجامعة الليلة دي ودايرين نخرج من المفروض علينا ده حنتكم شنو ياخالد؟ سؤال واضح وصريح. ما تشبكني لو اتكلمنا انجليزي ما خواجات والكلام اللابودي لا يجيب ده.
أنا وإنت وأمهاتنا وأبواتنا وحبوباتنا حيتكلموا شنو مع بعض (كل قبيلة مع أختها) لحدي ما يتم التحرر بتاعكم ده؟
ياخي صحي والله انت بتلت وتعجن في كلام واضح زي عين الشمس.

كويس انك جبت سيرة الامازيغية في المغرب والجزائر. هل تركت الجزائر والمغرب اللغة العربية؟

لم أقل أن علينا أن لا نتعلم اللغات العالمية الاخرى ولكني طبعاً ضد استبدال العربي بالانجليزي أو الفرنساوي. حنكون عملنا شنو؟ نتعلم الانجليزي والفرنساوي وغيرو كمان لو ممكن.
لكن بالعربي البسيط كده ياخي لو عندك قرش في يدك وبتفتش ليك في شلن في الواطة لازم ترميهو حتى تفتش الشلن؟
(كويس إنو الناس رجعوا للجنية والقروش عشان ما تقول عمك ده دقة قديمة).

أخيراً كدي شوف في أي وجاهة في كلامك ده:

Quote: عشان كده بقول ليك خلينا نقعد كلنا مع بعض بمختلف اثنياتنا, عرب , نوبة, زغاوة , دينكا , بجا , نوير , فور , ونختار لغة دولتنا من لغة من لغات العالم المعروفة والمهمة عند العالم كله مع الاحتفاظ بلغاتنا الام.

الاثنيات الانت خاتيها دي كلها بتتكلم مع بعض بالعربي. أو ياخي قول جزء كبير منها بيتكلم ببعض بالعربي.
1/ نقوم نقول ليهم ياخوانا أنسونا من العربي ده ونشوف غيرو؟
2/ حيكلف كم الموضوع ده قروش ووقت وجهد؟
3/ حيضر شنو لو احتفظنا باللغة العربية لحدي ما نصل للغة الانت بتطلبها دي؟
4/ حيستفيد الناس شنو من نسيان العربي وتعلم الانجليزية مثلاً؟ مش أحسن يحتفظوا بيهم الاثنين؟
ولعلمك ده الاوصت بيهو اتفاقية السلام الشامل.

حاجة أخيرة أنا أتحدث العربي والانجليزي والفرنساوي. والذي خرجت به أنك عندما تتعلم اللغة فأنت لا تتعلم فقط معاني كلمات ووسيلة للتخاطب. بل أنت تتعلم ثقافة كاملة جديدة.
هل تعتقد أن من المناسب أن يخسر غير العرب في السودان ثقافة كاملة بحجم الثقافة العربية؟

بعد ده عندي ليك سؤال إنت يا ود أخوي من ناس حاكم ناس بري؟
كان بقيت منهم! إنت مش عربي وبس! إنت من العرب الطير زاتو

لو إنت منهم أنا بقول الكلام ده عشان متوقع واحد من أولاد عمك يقراهو.

لو ما منهم أنا آسف وقصدت أمزح فقط.

.