|
Re: نعيب زماننا والعيب فينا (Re: abuguta)
|
الأخ أبو قوته قنبلة الود الموقوته لك خالص ودي الكثير من أمثالنا وموروثاتنا الشعبية تنادي بالكراهية ، ففلان يقول لفلان لا بريدك لا بحمل براك وهي في تقديري أفضل من كان بريدك ألحس المكوه حااااره فالأول يعلنها صريحة أنه لا يريدك وفي ذات الوقت يمتلك الجرأة والشجاعة بأنه لا يكون بدونك أى هناك قابلية للتعايش السلمي بين الفرقاء. الرياضة بصفة عامة وكرة القدم بصفة خاصة فيها الكثير من الطرائف والمفارقات ، فلا هلال بلا مريخ عندنا ولا مريخ بلا هلال ، والدليل أنه عندما أصدر الرئيس السابق جعفر نميري مرسوماً يقضي بحل الأندية وتحويل الرياضة إلى ما عرف وقتها بالرياضه الجماهيرية - والكلام ده طبعاً أنا ودفعتي سمعناهو سمع يعني ما حضرنا هذا الزمان - تدهور مستوي الكرة وقل التشجيع وهاجر من هاجر من اللاعبين الأفذاذ وهجر الكرة من فعل منهم ويقول الكثير من الخبراء والعارفين بشأن كرة القدم أن حل الأندية كان البداية لتدهور الكرة السودانية وإنحدارها. أها الأيام دي تلقي ناس المريخ يتمنوا للهلال الموت بل يتمسح من الوجود ويصبح هلال صفيح أو هلال في لوري من لواري الشمالية أو لوري طوب حتى مرسوم بي بوهيه ، والحال كذلك بالنسبة للهلالاب ما دايرين يشوفوا المريخ ده ولو في المريخ وأى نجمه إن شاء الله نجمة ملازم بكرهوها ، تعرف من شدة التعصب صديقنا ماندي وهو من أبناء الموردة في يوم عرسو بدل الهلال البختوهو في الجرتق داك ختي هلب وفي حب يا أخوانا أكثر من كده. وأحد أصدقائي قال لي ناس المريخ في الجامع الفي ناديهم خاتين نجمة بدل الهلال في المئذنة. أنا داير أقول إنه الرياضة المفروض تقرب بين الناس لا أن تبعد ، إنتو ما شفتو التشجيع في دار الرياضه أمدرمان كان كيف أيام عبد الوهاب الجعفري والطيب والفكي والبوليس فلاش وبقية العقد الفريد يعني نعتبر الهلال خلاص هبط إلى الدرجة العاشرة أو المريخ منو حا ينافس منو خلينا نحب الهلال بس ما نكره المريخ أو نحب المريخ ونتعايش مع الهلال كمنافس لا كخصم لأنه إذا ما في دا ما في التاني عديل كده. صحيح الغلب حار وبيحرق لكين المفروض تكون عندنا روح رياضية نتقبل الفوز والخسارة أياً كانت الأسباب ، أحد أبناء حلتنا لا علاقة له بالكرة إطلاقاً فإذا إنهزم الهلال وقف في صف مشجعي المريخ وإذا فاز الهلال إنقلب على المريخاب وأوسعهم غيظاً وذات مرة قال له أحدهم إنت ما عندك مبدأ إنت بالأول قول لي إنت هلالابي ولا مريخابي قال ليهو أنا غياظابي ومع الفائز دائماً. المهم النقاش في الكرة والمجادلة قد تأخذ منحى آخر يصل إلى حد العراك والإشتباك بالأيدي والأرجل بين جمهور الفريقين.
|
|
|
|
|
|
|
|
|