الفكي اب تلفون...........علي وزن الفكي اب جردل
القصة دي حصلت في الدمازين سنة 1995 كنا في مامورية تفتيش لفرع البنك وكانت اول مرة اشوف المناطق دي والحقيقة الاخوة موظفي الفرع ما قصروا معانا فرجونا في المنطقة كلها وودونا كم مرة كدة رحلة صيد وفي يوم العصر كدة كنا معزومين شاي مغرب في بيت المدير الخال محمد ياسين وهو بالنسبة لي خال لانو صاحب السر خالي وفي نفس الوقت هو ولد جيرانا في عطبرة.المهم الونسة تجولت بين الكورة الي السياسة والغلاء في الاسعار والوقت داك كان غلاء الاسعار في اشدة وكان كل يوم نصحي الصباح تلقي سعر الحاجات زايد ،المهم ولاننا في الدمازين كان لازم ينحني الحوار لموضوع الفقراء والشيوخ لانو الدمازين من الاماكن المشهورة بالحاجات دي.محمد ياسين قال في فكي قريب من هنا اسمو الفكي ابوتلفون والناس بتجية من وين ووين،وبقي يحكي لينا عن كراماتو وعمل شنو لفلان وكيف عالج فرتكان واصبح الفكي ابو تلفون محور كل الحديث حتي نهاية الجلسة . تاني يوم ونحن في الفرع بعد الظهر كدة جاء المدير وقال لينا يلا يا جماعة نوديكم للفكي ولكن زملائي المراجعين خافوا وابوا وقالوا لية يا ريس احنا ما عندنا مشكلة نمشي لية بيها خليها مرة تانية وقعد يحنس فيهم يا جماعة ما بتخسروا حاجة لكن يبدو انهم حزمو امرهم بالرفض التام وقام المدير اتلفت علي وقال لي يلا نمشي نحنا وللعلاقة البيني وبينة ولانو الجماعة كسفوة قلت حاضر وطلعت مشيت برة علي العربية. في الطريق بديت افكر امشي هسي اعمل شنو واقول للفكي دة شنو ما كان عندي حاجة معينة في بالي وقام محمد ياسين يحكي لي عن الفكي وانو موجود في حتة اسمها غابة القرود(علي ما اذكر) قريب من الروصيرص وانو قاعد لية تحت شجرة قونقليز وخاتي تلفون مغزز سلكو في ساق الشجرة وانو زول كارب وبيحل مشكلتك وكدة ووصاني طبعا انو اخت بياضي عشان الامور تمشي كويس والعمل يجيب فعلوا واثرو وفجاءة سالني انت عاوز تقول لية شنو .وفي اللحظة ديك اتذكرت لي موضوع محرقني من كم سنة وقلت في نفسي الراجل لو زي ما بيقولوا علية كارب كدة اقول لية الحكاية دي واشوفو بيعمل لي شنو. عندنا بيت في الحلة الجديدة بالخرطوم ساكن فية مهندس في شركة ومرتو شغالة محاسبة في نفس الشركة المشكلة انو المستاجر دة لو قلت لية عاوز موية بالله يقول ليك دقيقة النشاور المرة ،المهم يوم مشيت لية وقلت لية يا باشمهندس انا عاوز اتزوج ومحتاج للبيت وكدة ولازم تفضية لي قام قال لي ما في مشكلة يا اخي ولكنو من غير عادتة ما شاور المرة وقال لي احنا زاتنا بيتنا خلاص كمل في الجريف وممكن نطلع ليك بعد شهر كدة ولمن جيتو راجع بعد شهر لقيت ليك المرة تقول لي احنا ما بنقدر هسة نطلع لازم تدينا ستة شهور ولمن قلت ليها لكن راجلك اداني كلمة وانا رتبت مواضيعي علي كدة قالت لي لا هو ما فاهم حاجة المهم هسة احنا دايرين ستة شهور .المهم مشيت وجيت راجع بعد ستة شهور مشبت لية في البيت قام قال لي يا زول احنا ما طالعين وامشي المحكمة لو ما عاجبك قلت لية يا اخوي البيت حقنا وانت مستاجر وهسة بيتك كمل فضي لينا ولو قايلنا حاناجرو لزول تاني ممكن نكتب ليك ورقة انو تاني ما بناجرو يا اخي انا قلت ليك عاوز اعرس واسكن فية.وما طلعت منو بفايدة قمت مشيت البيت وتاني يوم مشيت لية في المكتب قلت احنسو اول ما شافني قام هايج وقال لي انا تاني لو شفتك هنا ولا في بيتي بجيب ليك البوليس والايجار تستلمو اول كل شهر من المحكمة، فرج فيني خلق الله ،وبعد داك رحت اوسط الناس جيرانو في الحلة وزملائة في الشغل وكلهم يجمعون الراجل ما عندو مشكلة بس المرة ما عاوزة تمشي الجريف لية ما عارف قمت قلت ليهم خلاص يخلوني اسكن انا في الجريف ما عندي مشكلة ولكن برضوا رفضوا. اتذكرت كل المواضيع دي ومحمد ياسين بيسالني انت عاوز منو شنو الفكي دة قلت لية عندي مشكلة ولو راجل يحلها لي وفعلا مشينا لي غابة القرود لقينا ليك الفكي قاعد فوق برش تحت شجرة غليدة كدة وعروقها طالعة من الارض وفي حتة كدة بعيدة شوية من البرش شفت ليك التلفون،تلفون اسود من النوع القديم بتاع الانجلز ديك. محمد ياسين قال لي اقعد هنا في العربية لغاية ما اجيك وفعلا مشي قعد معاة زي نص ساعة كدة وانا اعاين لية من بعيد ولمن رجع قال خلاص امشي لية ومشيت. الراجل كان لابس لية جلابية لونها كدة ما بتقدر تميزو لكن قدرت انها كانت جلابية سمنية في الاصل لكن بهتت واتحول لونها كدة زي لون التراب،قعدت قدامة وختيت لي حبة قروش تحت طرف البرش القاعد علية زي ما وصاني محمد ياسين وقام الفكي سالني -اهلا بيك محمد قال لي انت جاي من بعيد -اي انا جاي من الخرطوم -دة مشكلة صعبة الظاهر لي البتجيبك مشوار قدر دة الظاهر لي محمد ياسين عشان يرضي غرور الراجل قال لية انا جاي مخصوص لية المهم قلت لية -اي والله يا شيخنا المشكلة ليها كم سنة ما قدرت احلها. -خير المشكلة شنو قمت حكيت لية الموضوع ولمن جيت حتة انو طردني دي وقال لي بجيب ليك البوليس لو جيت هنا تاني قال لي يطردك في حقك والله دة زول كلب وانا بورية واتبسم كدة وقام علي تلفونة. الحقيقة لمن اتبسم شفت ليك سنونة القدام ديك مكسرات او بالاصح مافيشات وبين حتة سنونة القدام وطرف لسانة شفت لي حاجة كدة شكلها بالضبط زي المخدة الصغير وكانت فيها نقطة كدة سوداء زي السوسة في الضرس وبتشبة حجارة حصي مربعة كدة لونها ابيض كانت موجودة بكثرة في الحتة الاسمها الامتداد الشرقي الهسة دة في عطبرة كنت بلقطها لمن امشي ناس حبوبتي هناك. الراجل سمعتو بيهمهم في التلفون بكلام ما فهمتة وما وعيتة وقعد يتكلم زي عشر دقائق وكان بيشخت في الواطا بطرف عصاية صغيرونة كدة. الراجل جاني راجع مبسوط يتبسم وعاينت لي خشمة شفت سنونة المكسرات لكن الشي الزي الحجر داك ما كان موجود في مكانو -خلاص يا زول المشكلة اتحلت قوم مشي - امشي وين الحصل شنو ما تسال بس هو مش طردك احنا برضو طردناة وقام اشر لي بيدة وقال انت جوة وهو برة المهم قمت مشيت علي العربية وانا افكر واقول يا اخي مش كنت تقول للفكي دة انو الموضوع في يد المرة واخلية يكتفها لي لانو الراجل ما عندة (سنعة) زي ما بيقولو اخوانا الخليجيين وفكرت ارجع لية عشان اورية واتلفت للمكان الكان قاعد فية ما لقيتة لا هو لا البرش لكن التلفون كان قاعد في مكانة. رجعنا للبنك وكانت الدوام خلص والجماعة منتظرنا نمشي لانو متغدين في بيت المدير ومشينا في البيت الجماعة قعدوا يسالو فيني اها الحصل شنو قلت ليهم الحصل بالضبط واساس المشكلة وهم كان في بعضهم عارفين مشكلة البيت دي. خلصنا شغلنا بعد كم يوم ورجعنا الخرطوم عربية البنك وصلتني البيت في الشجرة ولمن دخلت لقيت ليك حبوبتي بتقول لي المهندس بتاع بيت الحلة دة لية كم يوم كل يوم العصر بيجي يسال منك وقال دايرك ضروري في الحقيقة انا كرعيني ما شالوني وقعدت في اقرب سرير جات خالتي تحزرني ما تمشي لية في البيت الراجل ممكن يعمل ليك مشكلة ولا حاجة قلت ليها ما ظنيت ومشيت لية في البيت دقيت الجرس ما في حد جاني وقعدت ادق في الباب لمن فترت وجاء جار عاوز يدخل بيتة قال لي الجماعة ديل رحلوا ليهم كم يوم فجاءة كدة وبدون مقدمات جابو ليهم لوري وقالو بيتهم تم في الجريف وراحلين، طوالي قلت في نفسي يا سيدي الحسن.تاني يوم دغش مشيت لية في الشركة الراجل اول ما شافني نط جاني وينك انت يا اخي انا مشيت ليك البيت كم مرة وبيقولوا لي انت في مامورية حمد الله علي السلامة علي العموم احنا خلاص فضينا ليك بيتكم وكانت دي اول مرة يقول لي بيتكم كل مرة كان بيقول بيتنا المهم الراجل طلع مفاتيح البيت من الدرج ودخل يدة في جيبة طلع لية قروش وقال لي معليش البيت محتاج لية شوية تصليح وكدة شيل القروش دي بتساعد في التصليحات وكان بيتكلم معاي بطريقة ما اظن سمعناها منو الا يوم جاء يستاجر البيت. المهم شلت المفاتيح والقروش مشيت وكل ما اتذكر الموضوع اقعد افكر فية لغاية يوم جيت ماشي جنب الشركة بتاعت الراجل دة وقررت ادخل واسالو الخلاة يفضي البيت شنو بالسرعة دي رغم انو انا حنستو كتير وبست يدة وما كان في فائدة ودخلت الشركة سالت منو قالو لي وين الراجل دة استقال وسافر اغترب ورسل ساق مرتو كمان ولحقتة. بعد فترة طويلة مشيت شغل لبورسودان وكان محمد ياسين قد تم نقلة من الدمازين لبورسودان مديرا للفرع هناك وحكيت لية الحكاية وقال لي ما قلت ليك دة فكي كارب وجيت السعودية بعد داك بفترة وكان يوجد احد الاخوة الفلسطينيين معانا في الشركة عندة مشكلة انو بيحب لية واحدة وهي بتبادلة عواطفة لكن المشكلة انو ابوها وامها ما عاوزينة ورفضوة عديل لانهم غنيانين وهو موظف ساكت ويوم كنا قاعدين نتغدي سوا ايام الجرد السنوي جات سيرة الفقراء وقال لي انو سمع انو السودانين عندهم شغل كارب واتذكرت الموضوع بتاعي مع مستاجر البيت وحكيتو لية وقعد يسال عن تفاصيلوا وفتيت لية كل التفاصيل واتغدينا وكملنا شغلنا ومشينا تاني يوم قال لي امي دايراك ضروري وقالت بكرة لازم تجي تتغدي عندناومشيت لقيت ليك الحاجة عاوزاني امشي السودان مع ولدها للفكي ابو تلفون دة عشان يخلية يعرس البت وقدر ما قلت ليها يا حاجة الموضوع دة لية سنين وما عارف الراجل دة لسة في ولا لا المهم لمن اصرت قمنا اتصلنا بواحد من الزملاء بفرع البنك بالدمازين وسالناة عن الفكي ولقيناة لسة موجود وشهرتة في اذدياد وشرحت لية الموضوع قال لي الزميل انت رسلوا لي وانا بودية وفعلا مشيت السفارة معاة وطلعنا لية تاشيرة دخول للسودان واخذ لية اجازة شهر ومشي السودان وقابل الفكي والاخوان بفرع الدمازين ما قصروا معاة ومن هناك سافر سورية عشان عندة مشكلة تجنيد في الجيش السوري لازم يحلها(الفلسطينيين حاملي الوثائق السورية بيخدمو في الجيش السوري او يدفعوا بدل اداء خدمة كالسوريين تماما في ذلك الوقت وما عارف هسي اتغيرت ولا لا) المهم الراجل دة قبل يرجع الشغل انا قدمت استقالتي لاني وجدت شغل في مدينة تانية ومن ديك ما عارف عرس البت والفكي شاف شغلة ولا الحصل شنو بالضبط لية ولم اسمع منو او بية بعد داك (عدل بواسطة الزبير صالح الزبير on 10-29-2007, 07:07 PM)

العنوان	الكاتب	Date
الفكي اب تلفون...........علي وزن الفكي اب جردل	الزبير صالح الزبير	10-28-07, 01:43 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 12:08 PM
Re: الفكي اب تلفون...........علي وزن الفكي اب جردل	هاشم أحمد خلف الله	10-29-07, 12:43 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 01:02 PM
Re: الفكي اب تلفون...........علي وزن الفكي اب جردل	هاشم أحمد خلف الله	10-29-07, 01:10 PM
Re: الفكي اب تلفون...........علي وزن الفكي اب جردل	فيصل محمد خليل	10-29-07, 01:32 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 02:18 PM
Re: الفكي اب تلفون...........علي وزن الفكي اب جردل	Ashraf el-Halabi	10-29-07, 03:15 PM
Re: الفكي اب تلفون...........علي وزن الفكي اب جردل	سلمى الشيخ سلامة	10-29-07, 03:28 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 03:35 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 03:29 PM
Re: الفكي اب تلفون...........علي وزن الفكي اب جردل	حيدر حسن ميرغني	10-29-07, 04:06 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 04:19 PM
Re: الفكي اب تلفون...........علي وزن الفكي اب جردل	محمد البشرى الخضر	10-29-07, 04:14 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 04:31 PM
Re: الفكي اب تلفون...........علي وزن الفكي اب جردل	محمد البشرى الخضر	10-29-07, 05:52 PM
Re: الفكي اب تلفون...........علي وزن الفكي اب جردل	الزبير صالح الزبير	10-29-07, 09:50 PM
Re: الفكي اب تلفون...........علي وزن الفكي اب جردل	الزبير صالح الزبير	10-30-07, 10:02 AM
Re: الفكي اب تلفون...........علي وزن الفكي اب جردل	ALazhary2	10-30-07, 10:29 AM
Re: الفكي اب تلفون...........علي وزن الفكي اب جردل	الزبير صالح الزبير	10-30-07, 10:40 AM
Re: الفكي اب تلفون...........علي وزن الفكي اب جردل	MOHAMED EL-BEELI	10-30-07, 01:16 PM
Re: الفكي اب تلفون...........علي وزن الفكي اب جردل	الزبير صالح الزبير	10-30-07, 01:45 PM
Re: الفكي اب تلفون...........علي وزن الفكي اب جردل	الزبير صالح الزبير	10-30-07, 09:26 PM
Re: الفكي اب تلفون...........علي وزن الفكي اب جردل	الزبير صالح الزبير	10-31-07, 02:40 PM
Re: الفكي اب تلفون...........علي وزن الفكي اب جردل	Ashraf el-Halabi	10-31-07, 05:54 PM
Re: الفكي اب تلفون...........علي وزن الفكي اب جردل	MOHAMED EL-BEELI	10-31-07, 08:30 PM
Re: الفكي اب تلفون...........علي وزن الفكي اب جردل	الزبير صالح الزبير	11-03-07, 02:27 PM
Re: الفكي اب تلفون...........علي وزن الفكي اب جردل	الزبير صالح الزبير	11-03-07, 01:58 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]