|
|
 غربة مستمرة
|
لما سبتك يا دياري
وسبت مرتعنا القديم
لما سبتك ورحت تايه
في دريبات السفر
كنت شافع
وكنت قايل للمراتع
تاني برجع
كنت قايل الغربة غيمة
تمر علينا تظلنا
سايقة الغمام
وتزورنا بس وقت الضحى
وعند العصير
ترحل بعيد
وشمسنا ترجع تاني تطلع
كنت قايل – من غباي –
العُمُر واقف مكانه
كنت قايل الدنيا دايمة
والزمن نفس الزمن
والأمل يصبح حقيقة
والسنين ما ظنّي تسرع
لسة فاكر يوم فراقك
في صباح الجمعة ديك
لما ساقتني الخطاوي
لي ديارا ماها متلك
لما عانيت الأسى
والعيون خليتها تدمع
أماتي في ضل الضحى
وسط الديار
واقفات هناك
لابسات تيابن بي ستر
خليتن يبكن
ومرة يرمن في الودع
يا ربي تحفظ ود حشانا
ود شقانا
يا ربي تديهو العلم
ويبقى لينا النور يضوي
ويبقى زي طلة قمر
وتاني عايد لينا يرجع
أبواتي فرسان الديار
كاتمين دموعن في ألم
جابوا القلم
جابوا الدفاتر
والهدوم
ختوها في شنطة حديد
تحت الشمس
بالبهية تلمع
قادوني بي لبسي الجديد
زي التقول زفة عريس
ودوني لي السوق الهناك
صوت المساعدين واللواري
ناس الدكاكين والسلع
وأبواتي أهل المقدرة
دفعوا الحساب
في جيبي دسوها القروش
وكت القروش كانت عزيزة ومرعبة
ربع الجنيه مبلغ كبير
خمسين قرش كانت شبع
وصوني بالصلاة والصيام
درب الرسول
حسن الأدب
قُصر الكلام
درب الصبر
حفظ العلم
والاحترام
درب الورع
ومشيت بعيد منّك هناك
وبقيت براي
جسمي النحيل
شعري الغزير
رايي القليل
يا ربي أقدر وانتصر
وللا حبل الصبر يقطع
وبقيت أقلّب في صباي
زي التقول لوحة رسم
لعبة شليل
طين الخريف
سوق الخميس
طعم الفريك
زيت المسوح
موية الترع
كرّ الجداد
شاية الحمار
دكة بقر
تِبش الجرِف
حُمبكنا داك
ضَهَر البلاد
دردور غنم
فوق الخدار راقد رتع
طعم اللبن
ريحة التبن
قش الغباش
دُك السقف
ريحة السمن
والروب كتير
شوك الزرايب
والعقارب
والدبايب واللسع
فروة صلاة
وإبريق ملان
قدح العشا
والخلوة في الفَرَقة الهناك
الليلة نايرة وفيها ضو
لمة أهل
وسط الضلام
مادح الرسول بالنور سطع
توب ود نوار
ركن البلد
قايد الحِما
وارث الكرم
ساس الديار
سيد الأصول
أهل البلاد
حارسين عروض
أهل الضرع
ومن الدغش
شفت حبوبتي بتتاتي
بين سمانا وأرضنا
حفيانة تقدل بين حمانا وعزنا
لافحة الهدم
شايلة الهموم
ست الوجع
والصرة في طرف الهدم
تمشي وتوزع في القروش
وسط الصغار
صبراً طويل
ليلاً طويل
صفاً طويل
راجية النَّفَع
ما قلت حبوبة بتفوت
ما قلت بلقى البيت خلا
وشدة غباي
مستغرب الفرع الكبير كيفن وقع
حبوبة لو تذّكري
الحزن الكبير
يوم أحمد المفقود رحل
من عندنا
من يومنا داك
وحُزُنّا أبداً ما انقشع
تذّكري ؟
كيف الكبار حضنوا الصغار
والدنيا كيف جارت علينا
وكشّرت ؟
كيف القمر من يومنا داك
تب ما طلع ؟
ناساً كتار راجين رجا
والحالة كيف اتصعبت
شالوا الأمل
ختوهو فوق كتف الوليد
حبوبة داك صبرا طويل
والليل هجع
والحاج صبور
ديوانو مفتوح ليل والنهار
ومع الرفيق
سلكوا الطريق
هزموا المحن
اتوحدوا وتيرابنا قام
والناس ربت
والنور لمع
وأنا في هواي
سرحان غريب
كايس بلاد
عارفت أجناسا كتر
شفت الشروق
شفت الغروب
صاحبت جنيات المداين
شايلين تِفَف
لابسين قميصات الدلع
لو شفتوا كيف كان الطريق
مليان وعَر
طين الوحل
والشوكة تطعن في الكبد
لو شفتوا كيف ناس المدن
قاطعين كلام
مانعين سلام
قافلين بيوت
قايلين خلاص
يا دنيا تب ما فيكِي زولا متلنا
ما شافوا حيشانّا الوساع
ما شافوا بِلداتنا وأرِضْنا
ما شافوا ديوانّا الكبير
لا عندو حد لا ينضرع
والحاجة قايداها السنين
يوم سبتها كانت بِنيّة
ولسة في عمر الشباب
بس جاتا غفلة
ولما ناظر المدرسة
خطف الوِليد
كانت بِتعدِل في الهدم
رجعت بتحسب في السنين
الليلة ما يوم الإجازة
الليلة مرت كم سنة ؟
عدد السنين زاد وارتفع
قالت كفاك يا ود حشاي
الحاج كِبر
سيب السفر
اقعد معاي
دايراك قريب
دايراك ضَهر
دايراك عريس
لي بتّ عمك
والبيت حداي
احضن جناك
تسقي البهايم والزرع
والغربة ليلاتا الطوال
شَبّن بقن زي الجبال
ما قالوا حلم الجوعة عيش
وعرجا المراح لازم تعود
والرجعة زي حلما بعيد
مرات أشوفو
ومرة يخلف كل وعود
وبقيت هناك
في غربة لا عز لا وطن
ما من فقُر
بس زي تقول
عقلي انقلع
مرات أقسّم في القروش
مرات أوزّع في الهدوم
والشيب كِتر
والهم كِبر
سنةً أجي
وسنةً أغيب
يوماً أجيب
يوماً أخيب
مرات يموت زولا عزيز
بي موتو ما بَسمع سمع
لمّن رحل زولي الكبير
في الجمعة ديك
جاني الخبر
زي التقول قوّمني زولا من قبر
ضاقت علي دنيا السفر
جاني الضلام عزّ الضهر
ياربي كيف الحاجة حالا
وكيف بنات أمي وأبوي
وكيف سعيد أصبح وحيد
يا ربي كيف أخواني في لحظة هلع
وقلعت جيت
بكن البنات
والناس معاي
بالفاتحة رافعين الكفوف
وأنا ما بشوف غير الضلام
جور الليالي
وسكة السفر الضنين
والغربة دم
محبوس يغرغر في الحلق
والغربة حنضل في اللسان
لا فات مرق لا ينبلع
شوفوا المداين كيف قست
شوفوا الطريق كيف انقفل
والدنيا كيف سايقة الشقا
سايقة الأنين
جور الزمن
جارت علِي أهلي العزاز
والناس هناك كايسة الستر
كارهة الطمع
وصبحت يوم قاعد براي
سارح أقلّب في المحن
ما شفت غير ليلي الطويل
ما شفت قمراً فيهو ضو
ودنيا بِتفرّق وِليد
من صحبتو
من عنقريبو وصُرّّتو
ترميهو بين ناساً بُعاد
لاهُن أهل لا رِفقتو
راكبين حديد
ساكنين قصور
لابسين هدوم آخر صرع
فاض الحنين
زاد اللهيب
أشواقي تاني اتمددت
وسرحت في البيت الهناك
شاهي الصباح
ضُل الضحي
ريحة المغيرب
سُترة الليل والضلام
ضي القمر ناير يشِع
ومرقت شايل بُقْجَتي
المرة دي
عفشاً كتير
مالي الشِنِط
شِنطاً كُتر
سايق الوليدات
ست الحبايب والعشم
عارف البتابت
عيبة الصقر إن وقع
حاولت في كل الدروب
عاينت في كل الوجوه
ما شفت ضو
شفت الطريق مقفول علي
كل الدروب اتسددت
ما شفت غير درب البعاد
درب المدن
درباً رهيب
قفّل علي سِكّة حنين
قطّع علي دفق النبع
وبقيت أعيش غربة أهل
وسط الأهل
لا أمي لا أختي البكر
لا عمي لا خالي الكبير
لا صُحبة لا نُددا اللعب
والهم يزيد
وسنين عمُر
أرميها في حضن الوهم
لا عشت في الغربة ورضيت
لا شفت لي دربا جديد
يرحم قليبي من الوجع
|
|
 
|
|
|
|
|
| العنوان |
الكاتب |
Date |
| غربة مستمرة | ودقاسم | 09-25-07, 12:50 PM |
 Re: غربة مستمرة | Ishraga Mustafa | 09-25-07, 12:56 PM |
| Re: غربة مستمرة | مجدي عبدالرحيم فضل | 09-25-07, 01:05 PM |
| Re: غربة مستمرة | ودقاسم | 09-29-07, 12:46 PM |
| Re: غربة مستمرة | ودقاسم | 09-25-07, 01:45 PM |
| Re: غربة مستمرة | حمزاوي | 09-25-07, 02:04 PM |
| Re: غربة مستمرة | ودقاسم | 10-02-07, 11:51 AM |
| Re: غربة مستمرة | bushra suleiman | 09-25-07, 02:46 PM |
| Re: غربة مستمرة | وليد شريف | 09-25-07, 04:40 PM |
| Re: غربة مستمرة | إيمان أحمد | 09-25-07, 08:02 PM |
| Re: غربة مستمرة | خالد العبيد | 09-29-07, 12:50 PM |
| Re: غربة مستمرة | احمد العربي | 10-03-07, 08:43 AM |
|
| |
ودقاسم
فيس بوك
تويتر
انستقرام
يوتيوب
بنتيريست