|
|
 تختة ضربنار !
|
مساء الخير يا جماعة عافية طيبين ... وكمان مبارك عليكم العيد مقدما والعفو والعافية .. لله والرسول والوطن .. كيفكم يطيب معناكم ...
عاوز اقول شنو .. ايوه ... شايف اولادنا (عيال دارفور ) فى القمة وشايف شمطة وشكلة ليها ضل بسبب بوست كتبو الزميل ناذر محمد الخليفة والحقيقة انا قريت البوست وصحيح ما فهمت مقصدو لانى قطعا بعيد عن بيئة النص وما هو خفى فى دوافع ناذر للكتابة لكن بصراحة وامانة عديل كدا شميت فى البوست ريحة مش كويسة وكانت فيهو رشة سخرية غير موفقة ولو كانت بريئة .. اها قوم يا الزميل محمدين احرد واتبنى ليك موقف جمعى لابناء دارفور - طبعا انا وعزت الماهرى وعبد الرازق الطالب ما فى الحسبة لانو نحنا ما بنعد من عيال دارفور نكون كروات وما عارفين - المهم محمدين طالب اولاد دارفور وناشدهم عشان يمرقو من المنبر لو ما المهندس بكرى ابوبكر قام رفد ناذر وطلع ليهو الكرت الاحمر !
دا غلط .. كلو غلط .. ناذر ما كان موفق ومحمدين برضو بالغ فوقا ... لكن يا جماعة وبقصد بالخطاب دا اولاد دارفور خاصة المناصرين للحركات المسلحة يا جماعة ممكن تختو الرحمن فى قلبكم شوية وتسمعو النصيحة دى ... بامانة خطابكم العام فى المنبر ويمكن فى منابر تانية مشكلة كبيرة والكلام دا قلناه مليون مرة فى ردود فى موضوعات مختلفة وفى بوستات عديل كدا .. يا اخوانا الانسان العندو قضية عادلة - اتفقت ام اختلفت معها - ما بيحتاج لاستعمال العنف اللفظى وما حقو زول يفترض انو موقف خير مطلق ما فيهو عيب ونواقص دا اول شى وتانى حاجة لازم الزول صاحب القضية يحترم الناس التانية كانت مساندة ليهو عن قناعة او من مدخل عدو عدوى حليفى ودا كوم ومجموعة كبيرة من المحايدين فى المنبر كانوا اعضاء او زوار ديل كلهم مفروض يتم تاسيس خطاب موضوعى ليهم وحتى انصار الحكومة فى المنبر دا ممكن برضو التاثير عليهم لكن دا كلو كيف ... ؟؟ بجنس كتابة محمد سليمان الكلها لعنات ومطاعنة ولا كتابة سيادتو بقال - دا حالتو صعبة لانو يوماتى بيخصم من قضية دارفور مئة نقطة يضيفها للفراغ العريض - ولا السيدة الفضلى تراجى والغريبة النماذج دى وحسب ما نسمع ونشوف كلها ناس قارية وفاهمة ومتحضرة لكن خطابها عصى على الفهم .
قضية دارفور فى المنبر والموقع دا لقت مساحة حقو يعينو بكرى ابوبكر بسببها فى كل مجالس قيادات الحركات المسلحة - وزى ما قال ابنوس كدى شوفو صفحة الاخبار والبيانات - دا بخلاف العضوية النشطة والنشطة جدا فى المنبر وصفحات الراى والمقالات لكن المحصلة شنو ... تعالو نحسب ..
كرهتو الناس فى مواقفكم لانكم عملتوهم كلهم ( تختة ضربنار ) اى زول ما زغاوى معناه طوالى هو ضد الثورة لو كان من اولاد دارفور ولو كانت من باقى ارجاء السودان الكبير فهو لص وسارق لتاريخ وحقوق دارفور رغم انو معظم الاعضاء والزوار للمنبر دا ناس غبش مارقين للعلم واكل العيش فى جهات الارض المختلفة وفى ناس منهم فى الخرطوم قاعدين معلمين الله من وظائف ولا جاه بتاع سلطان .
ودا كوم واستعباط الناس ووضع (القنابير ) على روؤسهم كوم تانى .. فبركة قصص - خلو الصور قلنا غلطة مطبعية وبريدية - لكن براكم اقعدو والزمو الجابرة وشوفو كم دمعة سالت من شمعة الحقيقة وحرقت القضية دى ...
مافى زول هنا عندو موقف قبيح ولا انسانى ضد دارفور وانا كاحد ابناء دارفور مثلا موقفى ما عندو علاقة بموقف الحكومة لكن موقفى متاسس على انى يوماتى بلاقى ناس من اهل دارفور - عرب وزرقة - تعرفو بيلعنو فى الحكومة صحى لكن بيلعنو اضعاف اللعنات دى فى المتمردين والبيقولو كتير ... التمرد دا عن ناس دارفور كلهم ممقوت لانو بدل ما يوجه البندقية نحو الحيكومة وجهها لصدور المساكين .. نهب .. سلب ... ودا العمود الفقرى فى تمويل الحركات بالمناسبة على الاقل للعناصر القاعدة فى الخلا والحركات دى مصنفة بانها بتاعة قبيلة معينة واى كلام غير كدا بيكون مغالطة وكشيح تراب فى العيون ورغم دا انا شخصيا ما جيت هنا وقلت بالاسم ( قبيلة فلان ) ولا بالغت فى اساءة زول من رموز الحركات المسلحة لانو عشان عين تكرم الف عين ولانى ضد فرض التعميم البقول مثلا فلان كعب وبالتالى العرق الفلانى كلو كعب .. دا ما صاح .. الصالح والطالح فى اى مجموعة وكيان موجود لكن تعالو شوفو خطابكم مثلا عبد الله على مسار الزول دا عينو مستشار بالقصر ومعاه كوتة مستشارين بدل ما يكون النقد مصوب بصورة منهجية وموضوعية لمهام المستشارين ولمقدرات الرجل جا زول محسوب على الحركات المسلحة وحامل لواء نضالها بالداخل وشبك الناس ببوست شين وبليد وغبى اى زول قراه ضرب ايد على ايد .. دا حالتو طالب جامعى وكادر بتاع منابر ومسؤول الاعلام بالطلاب ... طيب لو جا كادر عنقالى ساى ... نشرد يعنى ولا الشورة كيف ..
محمدين .. ومحمد سليمان ... وبقال .. والدكتور والسيدة الكريمة تراجى ... يا قولو خيرا ... يا اصمتو ... لانو بالطريقة ... حقو الحكومة ترسل ليكم خطابات ثناء وشكر لانكم بترمو نيران المدفعية حقتكم فى صنقور قضيتكم وبتفهقوها .. صدقونى ..
طبعا كان ممكن اسكت واقعد اتفرج لكن بامانة انا الخصم الحمام الميت والمنتهى ما بعرف انازلو عشان كدا امشو اعملو (تصحيح ) وتعالو ... سمح
|
|
 
|
|
|
|
|
| العنوان |
الكاتب |
Date |
| تختة ضربنار ! | محمد حامد جمعه | 10-23-05, 11:49 AM |
 Re: تختة ضربنار ! | محمد حامد جمعه | 10-23-05, 12:31 PM |
| Re: تختة ضربنار ! | معتز تروتسكى | 10-23-05, 12:33 PM |
| Re: تختة ضربنار ! | Mohamed Suleiman | 10-23-05, 12:32 PM |
| Re: تختة ضربنار ! | محمد حامد جمعه | 10-23-05, 12:39 PM |
| Re: تختة ضربنار ! | محمد حامد جمعه | 10-23-05, 12:45 PM |
| Re: تختة ضربنار ! | ناذر محمد الخليفة | 10-23-05, 01:12 PM |
| Re: تختة ضربنار ! | Dr.Mohammed Ali Elmusharaf | 10-23-05, 01:25 PM |
| Re: تختة ضربنار ! | ayman haroun | 10-23-05, 01:50 PM |
| Re: تختة ضربنار ! | محمد حامد جمعه | 10-23-05, 02:03 PM |
 Re: تختة ضربنار ! | munswor almophtah | 10-23-05, 02:51 PM |
| Re: تختة ضربنار ! | محمد حامد جمعه | 10-23-05, 02:56 PM |
| Re: تختة ضربنار ! | فيصل نوبي | 10-23-05, 03:27 PM |
| Re: تختة ضربنار ! | Dr.Mohammed Ali Elmusharaf | 10-23-05, 03:48 PM |
| Re: تختة ضربنار ! | munswor almophtah | 10-23-05, 07:58 PM |
| Re: تختة ضربنار ! | زول ساكت | 10-24-05, 02:41 AM |
 Re: تختة ضربنار ! | A.Razek Althalib | 10-24-05, 02:53 AM |
| Re: تختة ضربنار ! | ناذر محمد الخليفة | 10-24-05, 06:53 AM |
| Re: تختة ضربنار ! | محمد الامين محمد | 10-24-05, 06:57 AM |
| Re: تختة ضربنار ! | ناذر محمد الخليفة | 10-25-05, 06:27 AM |
| Re: تختة ضربنار ! | محمد حامد جمعه | 10-25-05, 07:20 AM |
| Re: تختة ضربنار ! | ناصر محمد خليل | 10-25-05, 01:27 PM |
|
| |
محمد حامد جمعه
فيس بوك
تويتر
انستقرام
يوتيوب
بنتيريست