|
فتحية قمرية !
|
غايتو الله يخلص لينا وهمة المحاكمة الدولية ... كل شهرين تلاتة كشف جديد ... يزيد وينقص وكل (مصدر عليم ) يقول ليك اللستة دى فيها البشير وعلى عثمان وصلاح قوش وكبر والحاج عطا المنان وفتحية قمرية وحنان ام بارونالانهن بغن (جياشة والجيش نقلو فتاشة ) و(الاصفر والجيش نقلو المعسكر ) ودا خطاب جنجويدى .. نقول خلاص كويس ماشى الحال .. ناخد لينا شهر تانى تطلع لستة جديدة المرة دى فيها البشير واسحق احمد فضل الله ورجاء حسن خليفة بتاعة اتحاد المراة نقول طيب .. ناخد لينا كم شهر كدا تجيك لستة المرة دى فيها ابو سوط من ريفى الدالى والمزموم والطاهر ابو دينبو كابتن فريق حلة جوغانة والزين كرتكيلا السبابى بتاع سوق الاتنين فى ريفى الماطورى ... نقول طيب ... تانى تمرق لسته جديدة وقائمة طويلة عريضة باسماء جديدة والغريبة كل قائمة تطلع نظام ابو كيفو ما عارف مرة الهيومان واتش ومرة ما عارف منظمة كلنا ضد الجوع ومرة رابطة مشجعى البرشا فى مدريد ومرة ما عارف شنو وقائمة ترشحها ليك الواشنطن بوست ومرات (الرجل ) ومرات جرايد التسلية ... وقالو ليك ناس المحكمة الدولية زاتهم اتوهمو وراسهم ضارب وفى زول منهم قال لى زول من ناس الحركات المسلحة - طبعا شماره منقولة - شنو يا ابو الشباب انتو قايلين المحكمة الدولية دى (مؤتمر عام ) للمؤتمر الوطنى كل شوية كارين لينا لستة فيها خرطومية اسم ودلشيون متهم وبطيخ - بعد اذن ناذر ونوبى - وغايتو سوق ابو الرخا وخريف ابوسعن والاغرب من دا كلو ناس الحركات المسلحة ديل تقول ملائكة ومافى ولا زول فيهم بتاع درامات ... ولا واحد فيهم اسمو بيجى ... خليل ابراهيم طبعا (مولانا ) وشيخ مجاهد ما ممكن يكتل زول ولا يامر باعدام زول وكدا وعبد الواحد محمد نور دا زول مستنير ومحامى وبتاع قضاء واقف وقانون وكدا ودا زول بتاع اعتقد وارتبط وارى وكلام المثقفاتية ومنى اركوى دا زول شاب وعضمو طرى وفى مقتبل العمر وعريس فوقو الملائكة ما ممكن طبعا يمرق من الخمره والضريرة يقعد عشان يسك جيبو دا وامشو اربطو داك والشغل بتاع الحرابة دا ، طيب يبقى النظار والعمد والناس الماتت بتعليمات منهم ماتو ساى سمبلا .. اى سمبلا وغلطان المرحوم ... يكتلك مناضل حقك راح شمار فى مرقة نعى ساى يحرم عليك ... مافى زمان ناس ماتت وكتلوها خنق وكسر رقبة وشرف فى الكرمك مافى حقوقى سودانى قال غوغ .. يقول غوغ كيف .. ما البيكتلو ناس الحركة الشعبية فى الوكت داك زاتو ما زول ولا عندو حق وفى ناس كتلوهم برضو ناس الحركة الشعبية ويمكن جيش الفتح لمن خشو كسلا .. مافى زول جاب خبرهم وفى مزارعيه ماتو بالالغام فى خشم القربة بعاميل ناس المعارضة السودانية مافى زول ضرب فى نمرتهم ... غايتو الله يدينا خيركم وربنا يمرق القائمة دى سريع ويمشو لاهاى لانو مرات بجينى احساس انو منتهى علم وطموح ورغبة ناس الحركات المسلحة ديل بس المحاكمة يا كافى البلا لا بيطرحو حيثيات منطقية لتفاوض ولا هم زاتم عارفين عاوزين شنو ما عارف مره الشمالية قرمت مننا كم كيلو ومرة دارفور المهدى غشاهم وساقهم كتلهم ضد الانجليز ودا استغفال للاباء المؤسسين ولا زول منهم كلف نفسو يطرح ليهو مشروع كبير بتاع تعويض للناس المتضررين من الحرب والمشاكل الحاصلة ولا فى زول منهم دعا ليهو دولة ولا مؤسسة عشان بعيدن تبنى ليها مشروع للتعليم ولا الصحة فى دارفور والغريبة علاقتهم كويسة مع كم دولة بدل ما يشوفو ليهم تفاهمات لصالح المساكين القاشرين بمشكلتهم دى الواحد بس يظبط ليهو اقامة ويربط ليهو لكم منحة بتاعة دراسة وكان اتفق يتفق على سلاح ولا مؤتمر وبرنامج بتاع لمه زى مؤتمر حسكنيته القالو اخوانا فى ليبيا دفعو فيهو ربطة كبيرة ورقعة مريحة لمن القصة جاطت مروقها لينا فى شكلة منى وعبد الواحد وفلان ضربها وفلان بلعها وراحت فى حق الله ، طبعا هسة يجى زول يقول ليك الحكومة ما بتعمل زى دا برضو وديل بنقول ليهم الحكومة دى ما حرامية وبت ستين هرمة انتو الكلام ليكم لانكم قتلو ثورة وعدالة وبتاع .. ووينو دا كلو ... وقتلو دارفور الفشل فيها دريج وسيسى وعبد النبى على احمد وخليل ابراهيم زاتو وابراهيم يحيى والغالى وابارهيم سليمان وابراهيم التانى ديل كلهم فشلو لكن قلتو محجوب حسين وتقد وخليل - فى فصل الاعادة - حيخلو دارفور دى فردوس العدالة والمساواة .. مساواة وعدالة مين يا عم ... هو من هسة انتو شابكين الناس دولة الجلابة اتلحست ودولة الجنجويد قدت وحنخش الخرطوم وحنجتاح وين ووين وبراكم بالكلام دا اديتو (الاغلبية الساحقة ) من اهل السودان الضوء الاخضر والدافع عشان يقيفو ضدكم ... لانو التمييز والرغبة فى دفن الاخرين ملمح ظاهر عندكم رغم انو كل الاخرين ما كلهم مؤتمر وطنى او كيزان ويمكن شامين الوضع اكتر منكم .. مش
|
|
|
|
|
|
|
|
|