فـــتـح ملف ما يسمى بــــــــــــــــ (سيارات الإسعاف الخـيـريـة) ..!!

Quote: لي تجربة مع هذه الاسعافات العام الماضي ايام حادث السيارة .. وعند خروجي من المستشفى بحثنا عن الاسعاف .. وماشاء الله لقيت ليك صف زي البكاسي الزمان ديك .. منظمة أم .... الخيرية .. ومنظمة ف .. الخيرية وعيييك الخيرية .. وشيلك ختك .. شيلك ختك .. وعليكم الله ونحنا وانتو ... السواق رضا يودينا بي 150 جنيه مشوار زي 15 كيلومتر .. اها من بره العربية تعجبك لكن من جوة انت اكيد ما شفتها .. انا طبعا شفتها .. زوووط حشروني ليك بالنقالة جوة .. اولا ظلام دامس .. والعربية ######انة .. وصندوق حديد ومغتغت .. وقام زولك دور وشغل ليك الوي وي بتاعت طبنجة .. وانا مرة اقبض في كرع اخوي .. ومرة في النقالة ,, واخوي ذااتو بفتش ليهو حاجة يقبض فيها ما لقا .. كانت رحلة عذاب .. وبتاعة طبنجة شغالة وي وي وي التقول عاملين ليها وصلة من جوة .. وطبعا انا اساسا قالو لي ما تمشي بي بوكس ولا اي عربية تانية .. بس الاسعاف لانو بتكون فيهو مرتاح .. والله اتمنيت انو اكون راكب في لوري لبن ولا بوكس .. كان ارحم مما يسمى بسيارات الاسعاف دي .. لما قربنا من الحلة قلت لي اخوي قول للزول ده يوقف البتاعة الشغالة دي لانو الواطة كانت نهار والناس احتمال تكون نايمة .. واساسا مافي داعهي ليها لانو شوارع الحلة فاضية .. زولك حلف ستين يمين ما يوقفا لغاية خشم الباب .. لما فتحوا الباب عشان ينزلوني القى ليك الحلة والحلال المجاورة كلها قدام باب الاسعاف