هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرطوم؟!

Quote: المشهد كالتالي للناس البتعرف منطقة الموردة .. طبعا مطعم عوضية سمك تاني ناصية من الشارع الفاصل بتاع خور أبو عنجة .. ربك رب الخير في الحلم جاب المطعم في الناصية وكمان شنو ؟! فاتح على خور أبو عنجة مباشرة .. قدام المطعم في طربيزة واحدة بس قاعدين فيها تراجي وعزام ومحمد عادل وميادة كمال بيتناقشوا ويغالطوا أنقروا في شنو ؟! في وزن وأسعار السمك وكل واحد جمبو في شبكة بتاعت صيد .. قطع الشارع طوالي قدام الخور بكري أبو بكر قاعد في مكتب وفاتح اللاب توب وكرعينو شغالة شغل نضيف .. هوزيز كدة زي الشفتوهو لمن كان في مركز الخاتم عدلان داك لمن ود الصايم علق قال لو كان تحت كرعين بكري مكنة سنجر كان حا يطلع قماش عشرين متر أو حاجة بالشكل دا .. أنا قاعد قدام بكري مباشرة .. بيني وبينو في زي سبعة أمتار كدة .. بكري بيعاين للاب توب ويتبسم وأنا متوتر جدا ما عارف الحاصل شنو (لا حظتو أنا في الأحلام طواااالي ما بكون عارف الحاصل شنو ؟!) .. بيني وبين بكري لكن في نص الشارع في خدر ماسك عود وقاشر بدلة وكرفتة زي الترتيب جمبو في ذو اليد ماسك ليهو ورقة وبيحاول يلقن خدر لحن بتاع قصيدة .. الغريبة ذو اليد جمبو في سوط عنج كبيييير لكن ما استعملو .. الا غايتو يكون استعملو بعد ما أنا صحيت من الحلم !! أنا قاعد بمحاذاة خور أبو عنجة مباشرة مرة بعاين للخور ومرة بعاين لي بكري ومرة بسمع في نهير ذو اليد لي خدر ومرة بركز مع ناس السمك ديلاك !! جوة الخور في مركب فخم جدا لونو أبيض مُبركن على شمال بكري أبو بكر .. يعني لو ساي رفع كراعو الشمال وزحاها شمال شوية حا يكون نزل جوة المركب .. انا متوتر بقول لي بكري : يا خي ما تديني المفتاح دا أمشي مشوار وأجيك .. وبكري ما بيرد علي .. مبتسم وبيعاين في اللاب توب كررتها كم مرة وأنا قاعد في مكاني لكن بكري زي الما سامعني .. عاينت على ناس ذو اليد ألقى ليك ذو اليد ماسك الورقة وبينهر في خدر وخدر ماسك العود ومصنقع بيعاين في السما بيحاول يغني الكلام البيلقنو ليو ذو اليد !! وواضح انو ذو اليد ما راضي بي أداء خدر وكل مرة بيعاين للسوط الجمبو .. أنا شخصيا ما متذكر الأغنية كانت شنو ..!! تراجي وعزام وميادة ومحمد عادل بيتناقشو في موضوع غريب .. اي واحد بيقول انو قبض أكبر سمكة من خور أبو عنجة !! محمد عادل كان لابس الجلابية الأنصارية كاملة وكمان شايل في يدو الحربة الفي نهايتا شعار حزب الامة داك !! عزام حسن فرح لا بس ليهو بنطلون وقميص شاكيهو وكمان طربوش أحمر .. ما عارف لكن في الحلم بقى زي اليشبه لي خليل فرح !! ميادة كمال لابسة نفس اللبس الظهرت بيهو قبل كدة في رحلة جبل أولياء .. تراجي مصطفى نفس اللبس والإستايل الظهرت بيهو قبل كدة في قناة العربية .. أنا بحنس في بكري يديني مفتاح المركب وهو زي الما سمعني في النهاية عاين لي كدة بي ضيق وقال لي كدي كمل القدامك دا بعد داك بديك المفتاح فجأة إنتبهت إنو قدامي في جك كبيييييير فيهو حاجة كدة سائلة لونا أخضر زي النعناع ... المهم مع زهجتي ومع عدم استيعابي للحاصل شلت الجك دا وأخدت منو جُغمة (الحلم ما فيهو كوز أو كباية قدامي) .. مع الجغمة الاخدتها حسيت كدة زي الاضنيني سلكت وبقيت أسمع كويس لي درجة اني سامع كلام ذو اليد لي خدر ونقاش ناس السمك ديلاك وكمان سمعت صوت موية الخور وهي جارية شررررررر !! إتكيفت وقمت أخدت لي جغمة تانية وقنصت في مكاني براقب الوضع ..! ذو اليد هايج في خدر هيجان السنين : أنت ما بتعرف تغني ؟! أنت ما بتحفظ لييه ؟! كرهتنا الشغل معاك يا خي .. والغريبة خدر ما شغال بيهو ماسك عودو ومصنقع في السما بيحاول يغني الكلام القالوا ليهو ذو اليد . في النهاية ذو اليد ختف العود من يد خدر وقعد يغني هو .. في الحلم والله ذو اليد عزاف خلاص وصوتو جميل لدرجة بكري طلع من برودو وقعد يسمع ذو اليد وناس السمك ديلاك كلهم بطلوا شكلتم وقعدوا يسمعوا .. أنا لقيت الجماعة ما منتبهين أخدت لي جغمة كبيرة وقعدت أسمع برضو !! بعد شوية ذو اليد رجع لي خدر العود ورجع لي نهيرو تاني وبكري رجع يعاين في اللاب توب وديلاك رجعوا لي سمكم .. ناس السمك إتغالطوا بعد شوية محمد عادل اتحامق شال شبكتو وحربتو وجرى على الخور .. رمى الشبكة وشال الحربة قعد يطعن في الموية الجارية بعد شوية جر الشبكة طلع سمكة كبيرة زي الورل جا شايلا وجا رماها في الطربيزة قدام الجماعة والجماعة ساكتين بعد شوية محمد عادل سل سكينتو من ضراعو شك السمكة نصين وقطعا سرعة سرعة وأكلا براو ما خلى فيها الا الشوك ..!! الباقين وشهم حنبك ميادة كمال لفحت شبكتا وجرت على الخور حاولت ترمي الشبكة إنزلقت ووقعت في الخور قعدت تكورك : ألحقووونيييي !! ألحقونييييييي !! أنا فت طوالي تلبت من مكاني قلت لي بكري : يا بكري أديني المفتاح سرعة أحصل ميادة قبل تغرق ! بكري ولا حت عاين لي .. بدون ما يرفع وشو من اللاب توب قال لي دي ما شغلتك أمشي كمل القدامك داك !! حنستو يا بكري عليك الله أديني المفتاح !! بكري أبى يرد علي .. أخوكم طوالي ما إتردد رجعت ورا وجيت جاري داقي راس جوة الخور (ما جعلي أحمق .. أسوي شنو عاد) !! فتشت لي ميادة لقيتا لحقت أمات طه (بالمناسبة أمات طه الأربعة شالم البحر في قصة المثل المعروف دا ) !! جيت طالع زعلان من الخور .. عاينت لقيت ناس السمك ولا هاميهم .. مشيت عليهم قلت ليهم ما عيب عليكم البت تغرق قدامكم وإنتوا قاعدين تتفرجوا ؟!!.. الجماعة هاجوا ليك فيني .. مالك ومالا ؟ إنت أساسا متلب وراها مالك ؟! مش هي معانا .. أمشي شوف شغلتك .. جيت راجع محلي زعلان أخدت لي بُقة من الجك وقعدت أراقب الجماعة بي توتر .. بكري مواصل في خياطتو وخدر المسكين ذو اليد زاريهو زرة السنين .. بعد شوية أشوف ليك تراجي شالت شبكتا وجات جارية على الخور .. قبل ما تنزل فت وقفت علي حيلي (ما جعلي أحمق أسوي شنو عاد) ؟! قلت ليو يا بكري ثبت تراجي دي قبل ما تلحق ميادة !! بكري ولا حتى عاين لي قال لي : stay away from tragie .. قلت ليهو I cant قال لي خلاص أعمل الدايرو .. قعدت أعاين لي تراجي جات بي كل ثقة رمت ليك شبكتا في الخور وأنا متوتر وجاهز ..! بعد شوية جرت الشبكة جابت ليها سمكة أكبر من سمكة محمد عادل طوالي رفعتا وجرت تكاوي في عزام ومحمد عادل .. طلعت سكين شقت السمكة وقطعتا وأكلتا براها وقشت خشما !!! بعد شوية عزام أتوتر شال شبكتو وجا على البحر متردد .. الزول داير يرمي شبكتو إنزلق ووقع جوة وقعد يكورك ..!! عاينت لي تراجي ومحمد عادل لقيتم بيعاينو من بعيد وما شغالين بالموضوع .. عاينت لي ناس خدر لقيتو لسع زارينو في الغنية وطبعا أنا أساسا قنعان من بكري طوالي جريت على الخور وتلبت (ما جعلي أحمق أسوي شنو عاد) !! جممبلغ جوة الخور وصلت قاع الخور لقيت عزام قاعد هناك حاولت أجرو يطلع يتنفس أبى جاط فيني قال لي خليني أغرق !! قلت ليهو علي بالطلاق ما تغرق وأنا قاعد . أرح لا فوق ..!! قال لي أمشي فوق عشان تراجي ومحمد عادل يشمتو فيني !! قلت ليهو هو دا كلو عشان شنو ولي شنو ؟ عشان سمك ؟! يخرب يومو السمك البيخليكم تكتلوا نفسكم كدة ..!.. قال لي يا زول أمشي خليني هنا .. قلت ليو أها أنا كمان بوريك فهمي .. أنا قاعد هنا وغرقان معاك وأصلي ما طالع .. ورقدت في قاع الخور ونفسي بقى يضيق شوية شوية .. عزام يحنسني عليك الله أطلع .. قلت ليهو والله ما أطلع إلا تطلع معاي .. قال لي والله أنا ما طالع داير أغرق .. قلت ليو وأنا برضي بغرق معاك .. بعد شوية عزام راسو لف .. ونفسو إنكتم وأنا بعاين ليهو لمن غرق ... والوكت دا أنا نفسي إنكتم وبديت أفقد الوعي وأجر نفس بي صعوبة جدا .. بعد شوية فت قمت من السرير وأنا بلهث بي صوت مسموع ونفسي داير ينقطع .. إتلفت لقيت الواطة فجر والأذان بيأذن .. مشيت التلاجة راسي لافي .. فتحت اشرب موية .. عاينت جوة التلاجة لقيت الجك الكنت بشرب منو في الحلم داك !! نفس شكل الجاك داك بس دا فيهو موية ما سائل أخضر .. إتخلعت وراسي ضرب والقصة ما وقعت لي .. في النهاية شربت منو كم جغمة كدة ورجعت تاني نمت ..!!