الدكتور حسن موسى ، حقوق المؤلفين والسرقات الصحفية ..!!

Quote: متوكل توم اوجز المسالة في كلام مختصر وواضح.. بس تلقيط الاغاني بتاعة الفنانين ووضعها في متناول الجميع على النت او اي مكان اخر مازي كونك تنسب مقال لي نفسك وتقشر بيهو.. في الاولى الغنية بي صوت الفنان وبي لحنو وانتا ماسويت غير انك خليتا في متناول العامة..لن يذكرك الناس كثيرا في ذلك فانت مجرد ناقل.. وفي التانية انتا بتنسب مجهود غيرك لي نفسك..يتحدث بك من يتحدث قائلين : فلان ختاها وفلان قال واحسن القول.. صحيح انو القانون بتاع الملكية ادى الفنان والمؤلف حق انو يتصرف في اغانية ومؤلفاته اين تذهب ولمن تذهب وبكم تذهب.. بس المسالة دي في السودان ماواقعة لينا بصراحة.. ولان الديفولت في الغرب انو الاغاني ملكيات خاصة للمغنين والملحنين واصحاب الحق وانو البنقل شي لازم ياخد الاذن ابتداءا وإلا تعرض لطائلة القانون.. فالديفولت في السودان مفروض يكون انو الاغاني التي تغنى في التلفزيون والاذاعة والحفلات هي ملكية عامة .. والاستثناء في ذلك ان يقوم المغني او الملحن باعلان ان اغنتيه هي اغنية محمية بموجب قوانين الملكية الفكرية عشان الناس تاخذ حذرها وتقول ده شنو الطارش في روحو ده.. القوانين يجب ان تصاغ وفق اخلاق الشعوب وطبائعم وقيمهم وماتعارفو عليه .. موش وفق خرف العالم العام والفهم المادي المستشري .. السودانيين بي سماحة طبعهم الواحد فيهم ما بتخيل انو ممكن يخش سجن عشان انبسط يوم من الايام وقام كورك طرف البحر وقال : لو ينفع المحذور مالى ومال هواه الضامر المفزور وسمعوهو خمسة مساطيل طرف نفس البحر..