التوهان في فقه الكوسان: نقد الفكر اليومي للعوام..!!!

Quote: صديقتي منى خوجلي.. حبابك كتر خيرك على المرور من هنا.. من اخترع فكرة السجن؟.. واحدة من الإشكالات.. انو نحن عارفين انو في سجن..و لكن السجن حالة ذهنية..بنقوم نتماهى معاها..و نعتبرها مسلمة و حقيقة لا يمكن تجاوزها..يعني هو حالة نفسها مصنوعة من قبل الضحية مثلها و مثل سؤال الهوية.. البنقوم نصر على تعقيدو باستمرار.. عشان شنو؟.. عشان يفضل مستمر و نقوم نلت و نعجن فيهو..! العالم الغربي يا منى ما فك اسرو باخوي و اخوك..و انما قام فكر..و حدد المشكلة.. ثم فكر في علاجها.. ثم عمل على علاجها.. الى ان وصل الحال ما وصل اليه اليوم.ز اشمعنا نحن يعني؟.. مرات قاعد اطلع على تجارب الأفارقة من حولنا..و اكتشفت انو الناس كل يوم بتمشي لي قدام.. لأنو عندها قناعة راسخة انها تمشي لي قدام (يعني توفر عنصر الإرادة)..و الناس البتتكلم في المنتديات الأفريقية.. همها تخلق مداخل للأستفادة من ثورة التواصل.. فعشان كده ما عندهم استنساخ فكرة أو بوست.. او ترديد اكليشهات جاهزة..! اتعس الناس نحن و الصوماليين.. و براك شايفة حال الصومال اليوم.. ديل في منتدياتهم يا مني الخالق الناطق.. يبمسكوا حاجة واحدة و بيدوروا فيها بالسنين..حتى حكاية شكل القبيلة الحايم عندنا في بعض منتدياتنا السودانية.. برضك موجود عند الصومالين..و بصورة مرعبة..! واحدة من فكرة السجن ، كحال ذهنية محضة.. اننا كسودانيين..و سودانيات.. دايما التغيير عندنا مربوط بتغيير النظام السياسي..و أي فكرة ايجابية اخرى دايما مؤجلة لغاية ما نسقط الحكومة..يعني حكايات تعدد الخيارات دي معدومة تب..اها نقوم نسقط الحيكومة.. عشان نتفرغ لعيوب الحكومة الجديدة..و هكذا..! اخوانا المؤتمرجية قالوا هم عارفين ليه الناس مفروضة عليها مسالة التدجين.. عشان ناس تانية (اقلية و نخبة) تستفيد من الأوضاع لتحقيق مصالحها..ده كلام فكري و سياسي.. لكن هل نحنا السودانيين ما عندها شغلة تانية غير السياسة يعني؟.. كتر خيرك يا منى..و نشوفك تاني.. كبر