حينما قدمت فرقة السمندل.. عرضها في ذلك الأسبوع الثقافي (1989).. و من ضمن المقطوعات التي قدمتها مقطوعة الكرن و اغنية ابراهيم موسى ابا ، ام روبة..من ضمن التعليقات التي خلدت بذاكرتي.. تعليق استاذي الجليل دكتور زكي عبد الرحمن ( و لناس السودان عامة ، زكي هذا كان استاذي و درسني الكثير بجامعة الخرطوم ، و هو الذي شاركه استاذه و استاذنا المرحوم زكي مصطفى ، النائب العام في منتصف سبعينات القرن الماضي ، و اللذين في عهدهما تم صياغة قوانين السودان التي نراها اليوم ، و المكضبني يسأل دكتور منصور خالد..زكي عبد الرحمن كان قاضي محكمة عليا في السودان ، و ثم فتح مكتب محاماة بالخرطوم..!!!)..حينما قدمت فرقة السمندل عرضها في ذلك الأسبوع الثقافي الغريب العجيب.. قال استاذنا زكي عبد الرحمن : اول مرة اعرف ان في السوداني فرقة ماسية بهذا المشهد و الأداء (معليش يا ناس السمندل ، لو قلنا ليكم قوالة استاذنا زكي تلك قبل تلائة و عشرين سنة.. كان ح تفيدكم كتير..لكن نسوي شنو..نحن سودانيين ياخي و ما بنفهم الإ بعد مرور تلاتين سنة..!!!!)..اما صديقتي و حبيتي ( ما ح اقول ليكم اسمها)..كانت مستغربة انو في فرقة سودانية بتؤدي اغنيات فنانة من الخليج اسمها رباب؟؟!!!..ياخي انا استغربت..و اندهشت (دهشة لن يعرف مداها الإ المدعو محسن خالد الواحد ده )..و قلت ليها غنا السمندل ده ، غنا فنان سوداني اسمو ابراهيم موسى ابا ( لم تعرف صديقتي و حبيبتي اياها ، بالمناسبة جعلية ، ابراهيم ابا.. لكنها كانت تعرف ربا و عتاب وعبد الله الرويشد و محمد عبده ذاتو.. لكن يطرشها كن سمعت بابراهيم موسى ابا..و الكلام ده سنة 1989..و ليكم تقيسوا فروق الوكت و الثقافة و الحضارة ذاتو..!!!!) و في ذلك الأسبوع الثقافي المسنوح..قدمت فرقة السمندل من ضمن اعمالها مقطوعة الكرن..و خلونا نركز في الكرن..!!!
ما يهمني كثيرا.. جرهام عبد القادر ، كباحث و ناقد موسيقى ، هو اول من قدم الكرن كعمل موسيقي و ثقافي و جمالي عبر السمندل (لاحقا صلاح بن البادية في الأفية الثالثة، اشرف على انتاج شريط للفنان جساس كليوبو ، و جساس هذا لمن لا يعرفه هو الذي غني كثير من الأغنيات ، منها الليلة جمعة بكرة الأتنين ، و التي غنتها فرقة عقد الجلاد تحت عنوان يا منى.. في مهرجان موسيقى الجاز في مدينة مونتريال في تسعينات القرن الماضي ،) ، و ذلك عبر مقطوعة الكرن التي كانت تقدمها فرقة السمندل من ضمن اعمالها.. هل لأن الكرن حاجة مفارقة.؟.. هل لأن الكرن تحتوي ثقافة انسان غنية بالأسئلة و مداخل الحوار المشرعة؟.. حينما قدم جرهام عبد القادر ، مقطوعة الكرن..لم يندهش المشهد الثقافي و الجمالي في الخرطوم..و لم يكلف نفسه مشقة السؤال (طبعا باستثاء اعضاء و عضوات فرقة السمندل رجال و نساء ، و هم الذين كانوا يشرحون و يشرحون للشعب السوداني ماذا تعني الكرن..و لهواة التصنيف العجيب اياه ، بتاع جلابة و ما ادراك ما جلابة ، ناس السمندل الجلابة اياهم هم الكانوا بيعلموا الشعب السوداني و يشرحوا ليهو الكرن..و جراهام كانت ساكت سكات السنين..و ياهو السودان كده ، و الماعاجبوا يشوف ليهو سودان تاني..!!!)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة