هي وليمة..و لكنها ..De Facto..يا صديقي محسن خالد

Quote: فكرة العزل..أم جوهر الموقف؟ صديقي محمد حسبو..حبابك كتر خيرك على الرد.. استوقفتني فكرة العزل التي استخلصتها من القراءة هنا و هناك..و كأنما المنتقدين جوهر فكرتهم هو حردتهم على عزلهم من التوقيع على بيان بعد الشجب و الإدانة .. دعى الى تطوير ضمانة تحمى حرية التعبير كحق طبيعي لأي انسان/ة.. لا اعتقد أن المسألة هي مجرد حردة و بس..و لو الإخوة الكتاب مثلا.. كتبوا بيان يخص مصادرة الصحف..و جعلوه في منبر مغلق..بولوك اسبوت.. او فيس بوك.. او ايميل جماعي..مافي زول /ة ح يناقشهم في خيارهم.. ولو الإخوة الكتاب كتبوا بيان يخص مسألة من مسائل اتحاد الكتاب..و برضك ناقشوا الأمر في منبر مغلق .. لن يعتب عليهم احد و لن يسألهم..و كذا الإخوة الفنانين و الفنانات..و المطربين و المطربات..و المسرحيين و المسرحيات..و الرياضيين و الرياضيات..و لكن..! حينما يتم وضع بيان في منبر عام مثل سودانيز اونلاين..و في قضية عامة تخص كل عضو/ة قارئ/ة.. في سودانيز اونلاين.. فهذه مسألة كل فرد يظن أنها تمسه و أن له دور فيها حتى لو كان هذا الدور في اطار المجاهرة بالرأي ووسيلة الكلمة.. خطورة الأمر أن دعاة النظرية النقدية و التجاوز..باتوا مثل غيرهم.. يضيقون ذرعا بالمساءلة و المواجبة.. و مثلما قلت.. السودان ده من سنة حفروا البحر فيهو ما يسمى بهيئة علماء السودان.. مافي زول عتب عليها..و كلامك صحيح.. لأنو هيئة علماء السودان..و احترم فيها ذلك..هي صفوة موظفين و عمال حكومة..و عازلين روحهم بعيد من الناس.. و كل البيسوا فيهو قاعدين يسوهو في الخفاء و المكاتب المغلقة..عشان كده لمن يطلعوا ليهم بيان ما قاعدين يقولوا لينا تعالوا شوفوا البيان ده و ادونا رأيكم فيهو..ولا قاعدين يرسلوا لينا و يقولوا لينا يا اخوانا عندنا بيان حول تثبيت هلال العيد.. عشان كده تعالوا وقعوا معانا عشان ..لأننا دايرين نسوى عيد في اليوم السابع و العشرين من رمضان.. المثقفين و المثقفات..و الناشطين و الناشطات.. امرهم مختلف للغاية..لأنهم بعكس صفوة علماء هيئة العلماء.. ماهم موظفين و عمال دولة..و عندهم ادعاء كبير انهم شغالين للمواطن و بالمواطن و من اجل المواطن..و لأنو عندهم ادعاء بالشفافية و ترسيخ قيم المساواة و الديموقراطية.. لمن تكون عندهم قضية محتاجة للتضامن.. بنزلوا للناس بيان و بيقولوا ليهم تعالوا اقيفوا معانا.. وخلاصة النقطة دي.. لو الإخوة الكتاب و الصحفيين و الفنانين و المبدعين.. دايرين يبقوا صفوة زي صفوة ناس هيئة علماء السودان..حلال عليهم..و من هسع ده يمشوا يركبوا صف التوظيف.. و يبقوا حكومة و جناب دولة عالي ..عشان يبعدوا روحهم من الهوام و الرجرجة و الدهماء و الهمجيين و الهمجيات.. الخ.. لمن يكون عندك ادعاء كبير يا صديقي انك..بتعمل للناس و بتشاورهم في امورهم..و داير تعلمهم المشاركة في تقرير شئونهم..وتجي تجليهم و تحصر روحك في ركن ضيق.. هنا بتكون في مشكلة كبيرة.. لأنو بيظهر التناقض بين النظرية و الممارسة.. الناحية التانية.. مثلما ذكرت سابقا.. اهلنا بيقولوا بيت المشارة ما بيخرب..و دي قاعدة ديموقراطية ذهبية.. يعني لو الشباب الهناك ديل .. من اول لحظة عملوا خطوة بسيطة للغاية..نزلوا البيان منفصل..و نزلوا توقيعات النخبة العلية البهية..و بعد داك طالبوا انو الناس توقع معاهم.. ما كان حدث ما حدث..ولا كان جاهم زول قال ليهم عينكم في راسكم..لأنو الأمر حينها سيغدو خيار شخص و تقدير الفرد.. من اراد أن يوقع سيوقع و من لا يريد سهز اكتافهم و يمضي.. و زي ما ناس كتير بتقول ليك ما شفنا علان/ة او فلان/ة قاعدة ت / يكتب معانا هنا.. فدي اشارة مفروض تتفهم كويس.. لأنو في حقارة..و في ناس افتكرت و بتفتكر.. سودانيز اونلاين ده بيتها و عرضها و شرفها.. ككيف يجوا التانيين يدافعوا ليك عنو..و انت قاعد مربع يديينك..مفارقة غريبة لكنها واقع.. المأساة يا صديقي .. أن القدوة لا تختار اتباعها..و الناس الهناك ديل فيهم ناس كتير بتشكل قدوة للكثيرين و الكثيرات..و النقد و التريقة و المعاندة المستمرة.. هي من باب أنو الناس صحيح بتعترف بالغلط..و انو كل زول ممكن يغلط.. لكن غلط القدوة صعب..و الأصعب منو المعاندة و المكابرة في عدم تصحيحه..و هنا تبدو مشكلة تانية كمان.. صحيح اتفق معاك.. انو واحدة من صفات الشخصية السودانية من خلال مصاقرتي (ممكن تسميها متابعة و تأمل برضك) لمنابر النقاش الإسفيرية.. انها عاطفية..والإستفزاز بيلمها زي الما حاصل شئ..و هنا يستحضرني قول مأثور يقوله لي صديقي محمد عثمان باستمرار..و هو ما تخلى الأزمة تحتويك..و عليك باحتواء الأزمة..و هو قول يطابق كتير قول لأبوالقاسم حاج حمد..و هو أن أزمتنا هي أزمة وعي بالمأزق..لا اطالب بتصحيح أو اصلاح.. لكن كمان النخبة حقو تعترف بزلاتها كمان..فاذا كانت الناس ما قادرة تؤثر في الأخرين..و تحدث التغيير.. يبقى تبطل ادعاء و مكابرة.. نشوفك تاني.. كبر * غايتو البيان بتاع حركة تحرير الشعر.زقاعد فكرة و خطوط عامة..لأنو في شعر خلانا نعيد حساب محبتنا للشعر.. المهم الموضوع ده لسع فكرة و ح تخرج قريب..