|
|
 Re: مسكييييييين يا محُسنييين يا محُسنااات (Re: الجندرية)
|
Quote: الجندرية...
سلااام
اغنية سايق البوباى للفنان محمد حسنين و ليست للفنان محمد مسكين
الاغنية من كلمات الشاعر عبد العزيز سيد احمد و من الحان الملحن
حسن بابكر..و هى فعلا اغنية شاهدة عصر تحكى عن حقبة زمنية معينة
اياامات عربات البوباى طالعة فى الكفر...ما حضرنا دا لكن قالوا لينا.. |
الأصدقاء..الجندرية..و محمد عثمان.. حبابكم
كتر خيركم..حليل زمن الجمال رأسمال..
اتفق مع الصديق محمد عثمان ..انو اغنية السايق البوباي.. تبع الفنان محمد حسنين (ابو سريع)..و الذي كان يشتهر في زمانه في العاصمة (قبل افة الغزوات و الكبوات..و الجبجهجية..الخ) بأنه اكثر من يملك احذية ناصعة في الوسط الفني..
واحدة من اغنيات محمد حسنين المشهورة.. اغنية صدرها يقول " يا سهارى تعالوا شوفوا البي.. الحبيبة كيف قست عليّ"..و اذكر ان الفنان جيلاني الواثق اول من رددها بعد سيدها (طبعا الزمن داك كل زول بيغني غناهو..و جيلاني.. اضاف فيها لونيته التي كان يقول انها جاز..)..و قبل البوباي.. الناس كانت بتغني للسايق الفيت..و التي سمعتها بصوت عبد العزيز محمد داوؤد (بالمناسبة عندي ليهو تسجيل بيغني فيهو العجب حبيبي اداني تحية..)..و بعد السايق البوباي.. الناس صارت بقت تغني للسايق العظمة (طبعا بيهئتها الأولى قبل ان يدخل عليها التحوير و اعادة انتاجها مرة تانية عشان تتماشى مع التأصيل و كده)..زمان كان بيرد ذكر نوع العربية..و بعد داك النص بيكون غنائي متكامل.. لكن اليومين دي .زصحيح الناس بتغني بسيرة العربات.. لكن القصة كلها تسميع لأنواع الغريب من العربات ..و زمان الغنا الفيهو سيرة العربات غني عاطفي ووجدان و عندو رسالة جميلة.. لكن الليلة الغناء الفيهو سيرة العربات غنا فيهو كثير من التحيز الطبقى و تمجيد للبرجوازية الطفيلية..و هي اخطر من تلك المتعفنة(امك.. انا بقيت شيوعي ولا شنو؟)..
الفنان محمد مسكين .. اغنياته نادرة جدا..و تسجيلاته في الإذاعة لا تتعدى اصابع اليد..منه .. ان لم تخني الذاكرة .. اغنية "ربي ما تحرم بيت من الأطفال"..و اغنية اولها بيقول " كانت لنا ايام سعيدة ربي مناي تعيدها"..و ان كان هذه الأغنية سمعتها اكثر من ثنائي الجزيرة..و أرجح أنها حقتهم..
الشكر لكثير من الشباب.. الذي التفت اخيرا للتوثيق.. خصوصا الإخوة في مكتبة الأغاني السودانية.. فقد بذلوا جهد كبير..و لقيت عندهم ناس .. تكون الناس نستهم كتير..مثل الفنان رمضان زايد (و هو كان ذو تطريب عالي في زمنه..و كان بتاع هجيج)..وكذلك تسجيلات امبلينا السنوسي (ياخي حتى الدويتو مع حيدر حدربي لاقاني هناك برضو)..و تسجيلات ابراهميم موسى ابا..و تسجيلات صديق عباس..و تسجيلات ثنائي النغم..و غيرهم من الذين شكلو بعض من ملامح الوجدان..
افتش كثيرا عن اغنيات الفنان محمد سلام ..الذي اشتهر بأغنية "قام اتعزز الليمون"..و الفنان " الصافي محمد احمد .. الذي اشتهر بأغنية " لون الكاكاو"..و الفنان الرشيد كسلا..صاحب الرمية المشهورة " عمري قصير و عمرك كم.. عشان نقضيهو في الآهات..و نفتش لمصير مجهول..و باب الريدة مهما ندقو نلقى حقيقتو باب مجهول.. الى أن يقول..حقو الريد لا نلاقيهو..لايلاقينا..لا نتلم"..
شكرا ليكم يا شباب..و يا محمد عثمان طمنتني كتير يا صديقي.. الواحد قايل روحو عجز خالص..
كبر
|
|
 
|
|
|
|
|
| العنوان |
الكاتب |
Date |
 مسكييييييين يا محُسنييين يا محُسنااات | الجندرية | 05-21-08, 10:00 AM |
| Re: مسكييييييين يا محُسنييين يا محُسنااات | ايهاب | 05-21-08, 10:47 AM |
| Re: مسكييييييين يا محُسنييين يا محُسنااات | الجندرية | 05-21-08, 04:06 PM |
| Re: مسكييييييين يا محُسنييين يا محُسنااات | محمد عثمان | 05-21-08, 11:08 AM |
| Re: مسكييييييين يا محُسنييين يا محُسنااات | محمد عثمان | 05-21-08, 12:47 PM |
| Re: مسكييييييين يا محُسنييين يا محُسنااات | الجندرية | 05-21-08, 04:39 PM |
| Re: مسكييييييين يا محُسنييين يا محُسنااات | محمد عثمان | 05-21-08, 09:23 PM |
| Re: مسكييييييين يا محُسنييين يا محُسنااات | Kabar | 05-21-08, 08:18 PM |
 Re: مسكييييييين يا محُسنييين يا محُسنااات | munswor almophtah | 05-21-08, 09:01 PM |
| Re: مسكييييييين يا محُسنييين يا محُسنااات | محمد عثمان | 05-21-08, 09:36 PM |
|
| |
Kabar
فيس بوك
تويتر
انستقرام
يوتيوب
بنتيريست