|
|
 Re: التأمين على سيارات الافراج المؤقت .. وظلم ذوى القربى !!! (Re: تاج السر محمد حامد)
|
السؤال اخي تاج السر هو
لماذا اصلا الامنية على سيارات الافراج المؤقت
انتا زول دافع رسوم التربتيك ودافع رسوم التامين على السيارة بغض النظر عن طريق التقييم المتبعة للتامين ورسوم محلية سواكن ان صح الرسم الاخير..
الامنية المستردة دي شنو؟؟
مصرحين ليك بي تلاتة شهور او شهر او ما اتفق عليه عشان تكون داخل السودان بي عربيتك..
بنهاية الفترة لو مارجعتا بي العربية او جمركتها انتا بتكون غرضة لقانون مكافحة التهريب
ده المفترض يحصل..المسالة تبقى مسالة قانون..
موش تبقى المسالة مسالة امنيات و افتراض مسبق لي سوء النوايا..
يعني مافي داعي للامنية دي طالما اصلا في قانون بحكم المسائل بتاعة عدم رجعة العربية ..
او كمان ما ينطبق القانون بتاع التهريب ويكتفو بي الامنية كجمرك لي العربية..
ماهو كمان ما ممكن يختوها ليك من عدة جهات لذات الغرض
الغرض من الامنية هو انو يكون تمن عدم رجوع السيارة
والغرض من قانون ناس مكافحة التهريب انو برضو يدفعوك تمن عدم رجوع السيارة ..
يعني نحنا مامفترض نناقش ليه تُفرض من قبل هيئة المواني او من قبل وزارة الامنيات
ونقعد نقول دخل الهيئة شنو في امنية عربية ..
اصلا البلد فيها تداخل اختصاصات غير مسبوق
واذكر في الاجازة الفاتت كان بتاع المرور وقفني في تقاطع واحد وستين مع محمد نجيب وقال لي : اوراق العربية يا بتاع اللوحات السعودية
قمتا اديتو ورقة المرور الفيها اذن لمدة تلاتة شهور..
لامن لقاها نظامية عاين لي وقال لي وين التامين؟؟
اقوم اديهو ليهو لامن لقاها نظامية قام قال لي طيب وين ورقة الجمارك؟
قتا ليهو وانا زهجتا من التعطيلة: لي شنو عايزها ؟؟
قال لي ده شغلنا
قتا ليهو انتا شغال في المرور ولا في المكافحة بتاعة التهريب؟
قوم يقول لي ياخينا وين الورقة قتا ليك ده شغلي وانا عارفو..انتا عايز توريني ليهو؟؟
رديت عليهو : ياخوي ده ماشغلك انتا شغلك لحدي ورقة المرور والتامين انتهى..
وكتاسيس مني لنهج استعلائي جديد في التعامل معاو وفي محاولة لتحجيم العسكري الجواهو المليان رغبات قمع وتعالي واحساس فخيم بي الكاكي اللابسو مديت ليهو بطاقة محامي ...
قائلا: شغلك انا موش اوريك ليهو درستو في خمسة سنين وفي معهد التدريب والاصلاح القانوني موش في الاحتايطي المركزي ستة شهور..
وقتا ليهو بي زعلة باينة ورحكاكا نيابة الخرطوم وسط هسي عشان نشوف مسالة اختصاصك دي..
ود الذين رجع لي الورق وقال لي بس نحنا بنحب الاوراق تكون نظامية..
شلتا ورقي من يدو وقتا ليهو : ماشغلتك ..
نحنا بصراحة معرفتنا بي حقوقنا لاتتعدى ما يُـمليه الاخرون علينا من خيارات..
وقناعتنا بيها نتاج رؤية الكاكي والسلاح وما ُيعرف بهيبة الدولة.... موش نتاج قراءات لتواريخ الحقوق والعقد الاجتماعي
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست