|
|
 Re: هاشم صديق...الرائع (Re: Elkhawad)
|
العزيزة مسارات
أهنئك على الاختيار الراقى لمادة البوست الدسمة
الاعزاء جميعاً من أول اسم مشارك الى اخر اسم
المبدع هاشم صديق نموذج للمثقف المتكامل ولا يحتار فى انتقاء أى أداة مناسبة لتوصيل المضامين..مرة شاعراً ومرة مخرجاً ومرة قاصاً ومرة تشكيلياً ان اعيته الفكرة ولم يتمكن من ايصالها! اخترت لكم هذا الديالوج الملئ بالرمز ونعلم حاجز الموية والطين الذى زرع بينه وبين أجهزة الشعب
الصحافة
عدد الاتنين 4 مارس 2002 م
هاشم صديق
ديالوج:اجتماع لجنة النصوص الدوغرية للنصوص الفنية
(أعضاء اللجنة الاربعة يجلسون على مقاعد حول مائدة وضعت عليها أوراق وملف)
الاول : نشوف القصيدة الفضلت من الاجتماع الفات
الرابع : هى القصيدة دى بتاعت منو ؟
الثالث : الاستاذ أيسر مؤمن أيمن
الاول والرابع : أعوذ بالله من الشيطان الرجيم
الاول : (يرفع يده بالدعاء)اللهم أبعد عن أجهزتنا أشعار الشياطين (يرفعون أيديهم بالدعاء والثانى يبدو كا المغصوب على أمره وهو يردد معخم الدعاء)
الثلاثة : أمين
الاول : اللهم أفتح بصيرتنا على المعانى الخفية المدسوسة ضد الحكومة فى المضامين
الثلاثة :أمين
الاول : وأكشف لنا الرمز فى أشعار العملا الخائنين
الثلاثة : أمين
الاول : اللهم أنصر الشعر الجاهلى الرصين
الثلاثة : أمين
الاول : وأحمنا من فتنة الطابور الخامس والبنيويين
الثلاثة : أمين
الاول : نناقش القصيدة (للثالث ) اقرأ النص
الثالث : (يضع النص على الملف ويبدأ القراءة)أحبك و ...
الاول والرابع : (بصوت واحد) أعوذ بالله .. يخص .. بدأ بكلمة بذيئة
الثانى : (يلتفت بينهم فى حيرة )ما .. ما مجازة .. مش ؟
الاول : كدى نسمعها كلها .. واصل
الثالث : أحبك وأغرسك فى الطين
الرابع : قليل أدب ومرمغها فى الوحل كمان
الثالث : (يواصل ) تفرهدى فى الزمان الشين
الرابع : الزمان الشين؟؟
الثالث : الشين
الرابع : (كمن اكتشف سراً خطيراً) شفتو
الثانى : شنو؟
الرابع : الزمان الشين .. ده طبعاً رمز واضح
الثانى : لشنو؟؟
الثالث : (بحذلقة) يقصد زمان القبح .. زمان الدمامة
الثانى  لازال ينتظر التفسير ) أها
الرابع : أها شنو .. ما واضح ياخى؟
الثانى : (بنفس العفوية المضحكة) الواضح شنو ؟
الرابع : (بنفاد صبر) ياخى الزمان الشين.. يقصدالزمن ده (يتلفت وهو يتلجلج فى انفعاله) زمن .. زمن
الاول : (صارخاً ومحزراً بصورة مضحكة) أوعك دى تقولها
الرابع : أعمل شنو اذا كان مخو مقفول
الثانى : (بعفوية وبساطة) حسا هو القال كده .. ولا انتو القلتو كده يا جماعة مالكم طوالى عاوزين تقولو الناس حاجات ما قالوها .. تبتقى فى الزمان الشين ما معناها ..الزول دا يقصد زمن الـ..
الرابع : (وهو يكاد يشد شعر رأسه من الغيظ) ياخى انت ما بتعرف الرمز .. ما بتعرف الحاجات البدسوها فى الرمز
الثانى : أنا بعرف بس الحاجات البدسوها فى المخازن عشان يرفعوا الاسعار
الرابع : (حانقاً) فى مضمون مدسوس فى القصيدة دى
الثانى : هى لكن ما واضح انو بقصد كده .. بالقوة ياخى
الرابع : (يقفز نحوه فى غيظ شديد محاولاً خنقه) والاول والثالث يحولان بينهم والاول يعيد الرابع الى مقعده)
الاول : هدى نفسك ياخى .. سيبك منو ده أصلو كدة .. وفهمو ما شاء الله (ثم للثالث) واصل ياخى وأقرأ..ياخى .. واصل (الثالث يواصل القرأة)
الثالث : أحبك واغرسك فى الطين
تفرهدى فى الزمان الشين
أكتبك فى القلب اسمين
أشيل قافك واخت الغين
الاول : (فى حيرة)وأشيل شنو ؟
الثالث : وأشيل قافك واخت الغين
الرابع : بقصد شنو؟
الثالث : حاجة تحير
الاول: تحير وبس
( يهرشون رؤوسهم بطريقة مضحكة .. وهم يتحركون حول المقاعد فى حالة تفكير وحيرة تتابعهم الموسيقى المرحة)
(الثانى يقبع فى كرسيه وهو يتابعهم فى حيرة مضحكة)
(تخفت الموسيقى قليلاً)
الثانى : انتو .. انتو مالكم يا جماعة؟
الاول : (حانقاً) مالنا كيف ؟ .. ما شايف الرمز اللغز دا؟
الثالث : (فى غبن) ابن الايه ده باين عليهو يقصد حاجة خطيرة جداً
الرابع : مؤكد .. دى لازم تكون أخطر حاجة اتقالت ضد الحكومة (يواصلون هرش الرؤوس والحركة حول الكراسى)
(الثانى يتابعهم للحظات)
الثانى : يا جماعة الحكاية دى واضحة وما عايزة تفكير وتعب
(الثلاثة يلهثون نحوه فى لهفة ويجلسون على المقاعد)
الاول : (فى لهفة شديدة )قدرت تحلها؟
الثانى : واضحة يا جماعة
الثلاثة : (بصوت واحد)يقصد شنو؟
الثانى :يشيل حرف القاف من أول اسمها ويخت محلو غين
الثلاثة : (فى لهفة) أها
الثاانى : أها شنو ؟ ما خلاص وضحت
الاول : (يضيق) لكن يقصد شنو يشيل القاف ويبدلها لى غين
الثانى : ولا حاجة داير يغير القاف لى غين .. مش على كيفو؟
(الاول يقفز نحوه محاولاً خنقه فى انفعال مضحك)
الثالث والرابع يحولان بينهما)
الثالث : معليش خليهو
الرابع : أنا قبيل كنت عايز أخنقو.. مسكتنى ليه؟
(الاول يعود لمقعده وهو يلهث فى انفعال)
الثالث : معليش أهدا
الاول : ( وهو يحاول أن يسترد أنفاسه) كدى تم المقطع.. يمكن نفهم
الرابع : أقرأ المقطع كلو مع بعض
الثالث :أحبك واغرسك فى الطين
تفرهدى فى الزمان الشين
أكتبك فى القلب اسمين
أشيل قافك واخت الغين
وبعد الغين كمان غينين
(ينظرون الى بعضهم فى حيرة ويهرشون الرؤوس بصورة مضحكة)
الثانى : (بعفوية مضحكة) غين وبعدها غينين.. تبقى غغغ
الاول ضائقاً) ياخى انطم
الرابع : (فى حيرة) وبعدين
الثالث : الحكاية بقت معقدة أكتر
الاول : دى أصعب مضامين ضد الحكومة تمر علينا فى اللجنة دى
الرابع (محتاراً يردد لنفسه)يشيل القاف يخت الغين .. وبعد الغين كمان غينين(يهز رأسه فى حيرة مضحكة)
الاول : (مهموماً) كدى أقرأ المقطع البعدو
الثالث : أشوفك فى السما الممدود
الاول والرابع : (بصوت واحد) استغفر الله العظيم
الثانى : (بنفس العفوية) مالكم يا جماعة؟
الاول : يشوفا فى السما الممدود ؟ السما مش الذات الالهية؟
الثانى : يا جماعة انتو كم شاعر شافو حبيباتهم فى السما .. وكم حبيبة يا صوتها لما سرى..صوت السما.. وكم ضحكة شرحت قلب السما.. هى بس بقت على الشاعر ده (ثم) انتو ذاتكم مش قاعدين تقولو الاسعار وصلت السما ؟ يعنى الاسعار وصلت الـ..
الاول : هس .. براحة.. عاوز تودينا الاخرة بدرى مالك؟
الثانى : لكن يا جماعة الزول ده ما يقصد يقول..
الاول : (ضائقاً ومنفعلاً) قلت ليك انطم ياخى (ثم للثالث) اقرا واصل
الثالث : أشوفك فى السما الممدود
وأطير بيك
سواعدى حدود
الرابع : دى طبعاً واضحة جداً .. رمز تقريرى
الاول : (بلهفة) يقصد شنو؟
الرابع : يقصد يحلق بيها الى ما وراء الحدود.. الى المعارضة فى الخارج
|
|
 
|
|
|
|
|
| العنوان |
الكاتب |
Date |
| هاشم صديق...الرائع | masarat | 03-02-02, 07:56 PM |
| Re: هاشم صديق...الرائع | masarat | 03-03-02, 09:33 AM |
| Re: هاشم صديق...الرائع | masarat | 03-03-02, 09:36 AM |
| Re: هاشم صديق...الرائع | suna | 03-03-02, 09:51 AM |
| Re: هاشم صديق...الرائع | gootagood | 03-03-02, 09:55 AM |
| Re: هاشم صديق...الرائع | SILVER MOON | 03-03-02, 10:20 AM |
| Re: هاشم صديق...الرائع | bunbun | 03-03-02, 10:24 AM |
| Re: هاشم صديق...الرائع | masarat | 03-03-02, 04:28 PM |
| Re: هاشم صديق...الرائع | seventy | 03-03-02, 04:40 PM |
| Re: هاشم صديق...الرائع | bunbun | 03-03-02, 05:08 PM |
| Re: هاشم صديق...الرائع | masarat | 03-04-02, 01:24 PM |
| Re: هاشم صديق...الرائع | masarat | 03-05-02, 01:53 AM |
| Re: هاشم صديق...الرائع | Elkhawad | 03-05-02, 03:21 AM |
| Re: هاشم صديق...الرائع | MXB6N | 03-06-02, 11:10 PM |
| Re: هاشم صديق...الرائع | masarat | 03-07-02, 05:20 AM |
| Re: هاشم صديق...الرائع | suna | 03-31-02, 07:46 AM |
| هاشم صديق …دفقات صادقة | REEL | 03-07-02, 02:25 PM |
 Re: هاشم صديق …دفقات صادقة | nadus2000 | 03-31-02, 01:58 PM |
| اكب شكر كتير ليكم يا اخوك باعنا مسرات | منوت | 03-31-02, 04:33 PM |
| هاشم الرائع... مسارات المدهشة | Abulbasha | 03-31-02, 07:38 PM |
|
| |
فيس بوك
تويتر
انستقرام
يوتيوب
بنتيريست