حقيقة إترددت كتير قبلما افتح البوست ده وفي ظل الوضع المزري الذي يمر به الوطن من تكالب الانتهازيين والمرتزقة والعنصريين والنطيحة وما أكل السبع على أمر البلاد نهبا على عينك يا تاجر وقتلا في الشباب. لكن قلت مرات مافي مانع نرفه عن نفسنا وذلك بقناعتي التامة بان الليل لابد أن ينجلي. ***** التقليد كان ومازال هو الطاغي للأسف ولكن بالرغم من كدة لقيت شباب جادين ومبدعين جدا يعملون تحت هذا الطقس العاصف ً وعندهم أعمال خاصة جميلة تستحق تسليط الضوء عليها بدلا من الزبد الذي يملأ حتى الإعلام الرسمي طبعا ده رأي خاص يعني في زمنا الوصول إلى أجهزة الاعلام كان بياخد وكت ، حسع المشكلة المغني بيجي نازل من التلفزيون مقلداً مشرئبا عريض المنكعين شلولخ . ************* في البوست ده حأحاول عرض بعض أعمال الشباب دييل في التنفيد الموسيقي والتوزيع وهندسة الصوت وبعض الكومنتات البسيطة وربما يساعدني الموسيقار أحمد ياسين بالتحليل الموسيقي فهو ضالع في هذا المجال أو حبيبنا الموصلي. ويلا بينا .
Post: #2 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 03:17 AM
موسيقى على نمط إيقاعات بعض الطرق الصوفية والاستفادة من الراب الامريكي بصورة جميلة وإستعمال آلات بسيطة
Post: #3 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 03:22 AM Parent: #2
أداء هادي جداً ، يعني مرتاح في الاداء ، والالات المستعملة ، فلوت ونورمال جيتار وإيقاع
Post: #4 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 03:32 AM Parent: #3
أما هذا الشاب فله مواهب متعددة ، يلحن ويغني وينفذ ، بس متشائم شوية كلمات الاغنية بتقول ، خلوهو يزعل وينحرق درب الرجوع بقى مستحيل ، وده معناهو نفسو يرجع
Post: #5 Title: Re: إبداعات موسيقية واعدة من جيل الثورة الرا� Author: MOHAMMED ELSHEIKH Date: 09-19-2022, 07:59 AM Parent: #4
اهااااااااااااااااااااااااااا
يا دوووب انا خيمت هنا
تمتلكني نوستالجيا عطبرة والدامر
Post: #6 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 10:20 AM Parent: #5
حبابك يا باشمهندس ود الشيخ يا دفعة
ودي اغنية هادئة جدا من بنت صديقنا والدفعة الورانا في كلية الموسيقى عازف الساكسفون عبد الله الشريف
Post: #7 Title: Re: إبداعات موسيقية واعدة من جيل الثورة الرا� Author: محمد صديق عبد الله Date: 09-19-2022, 10:30 AM Parent: #6
Quote: أما هذا الشاب فله مواهب متعددة ، يلحن ويغني وينفذ ، بس متشائم شويةكلمات الاغنية بتقول ، خلوهو يزعل وينحرق درب الرجوع بقى مستحيل ، وده معناهو نفسو يرجع
سلام أستاذ ترهاقا.
التقليد مقبرة الفنان، ومحاولات بعض الشباب الخروج من إساره تستحق الإشادة. ولكن عندي بعض الملاحظات على أغنية الفنان عادل حسن.
أولاً، اللحن دائري لا جديد فيه.
ثانيًا، كلمات الأغنية حزينة ولكن إيقاعها راقص. غريب أن يرقص الفنان ويبتسم وهو يغني ويصدر الكورس صيحات التعبير عن الفرح في مثل هذه الكلمات الحزينة في أغنية مصوَّرة. لما الفنان ينتج أغنية في كليب، لازم يهتم بالصورة لأنه المفروض أنه "بيمثّل" لتتطابق الكلمات مع الحركات وتنسجم مع اللحن. ربما يكون التفسير هو تلحيق لسوق العدَّادات وميل الناس للرقيص في الحفلات وعدم اهتمامهم بالكلمات. بعدين شعر شباب الأيام دي يميل إلى التصادم بين الحبيب والمحبوبة والتقريرية وواحد زايد واحد يساوي اتنين وأمسك لي وأقطع ليك. وده بيوضح أنه العلاقة بين الحبيب والمحبوبة فقدت شيئًا من طابع الرومانسية وأصبحت أكثر نديَّة ربما بسبب زيادة نسبة خروج المرأة شيئًا فشيئًا للحياة العامة. عتاب الحبيب كان قليل لكنه احتدّ شيئًا ما في مرحلة الغناء الحديث وأصبح أكثر صراحة. يعني لما إسماعيل حسن قال "بعد إيه جيت تصالحني " و"أنا أستاهل وضعتك في مكانًا ما مكانك" و"غلطة كانت غرامي ليك وا خسارة دموعي فيك" و"أكان طلعت القمرة وجيت ولو حلفت برب البيت ما بريدك مهما بقيت" كانت ثورة في الشعر وعدّها بعضهم تطاولاً على المحبوبة لأنه الصورة التي كانت راسخة عن المحبوب هي "أغلطوا إنتو يا أحباب ونجيكم نحن بالأعذار". لكن برضو عتاب إسماعيل حسن ما كان يخلو من رومانسية وتعبير عن ظلم الحبيب وليس فيه ما يوحي بأنه فراق الحبيب لا يعني للحبيب المظلوم شيئًا. في أغنية "بعد إيه" مثلاً ما حرق كل أوراقه، بل ترك الباب مواربًا بعد كل هذا العتاب بقوله "ربي يعدل ليك سبيلك وكل مناي في الكون عديلك ونهاية الخير مصيرك"، ما زي الشاعر في أغنية عادل حسن اللي مستغني خالص وبيتشفَّى في المحبوب ويقول "خلوهو يزعل وينحرق" و"الساطو يشربوا بالهنا" و"غير نفسه يبكي وينفلق" و"بنبدلك زي البرق".
بالمناسبة، أنا كان عندي رأي في تغيير إيقاع أغنية "غلطة" للأستاذ وردي لإيقاع سريع، وأرى أنه الإيقاع القديم كان أنسب مع كلمات الأغنية الحزينة.
Post: #8 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 10:31 AM Parent: #6
وخرجوا للمسابقات، بس ياريت الاغنية لو كانت سودانية
Post: #9 Title: Re: إبداعات موسيقية واعدة من جيل الثورة الرا� Author: ترهاقا Date: 09-19-2022, 08:58 PM Parent: #8
Quote: أولاً، اللحن دائري لا جديد فيه.
ثانيًا، كلمات الأغنية حزينة ولكن إيقاعها راقص. غريب أن يرقص الفنان ويبتسم وهو يغني ويصدر الكورس صيحات التعبير عن الفرح في مثل هذه الكلمات الحزينة في أغنية مصوَّرة.
حبيبنا الاديب الاريب الاستاذ محمد صديق أخبارك؟، تعرف ذكرتني في بداية التحاقي بنادي الفنانين مشيت مع المرحوم احمد المصطفي في حفلة في كلية الطب، حفلة عاملنها معجبي أحمد المصطفى ، بدأ الحفل بأغنية سفري السبب لي أزاي وتعال شوف الجماعة هاك يا رقيص قام المرحوم وقف الغناء وأداهم درس ما حينسوهو، بالتأكيد الشباب دييل دايرين شوية خبرة ، ولكن المحمدة في غناهم الخاص وكمان الاهتمام بالتورزيع وجودة الهندسة الصوتية وأتفق معاك فعلا اللحن دائري لكن نقول شنو؟ العافية درجات . ولك الود
Post: #10 Title: Re: إبداعات موسيقية واعدة من جيل الثورة الرا� Author: ترهاقا Date: 09-20-2022, 01:29 AM Parent: #9
الكنداكة انصاف فتحي ، إداء لا يشق عليه غبار
Post: #11 Title: Re: إبداعات موسيقية واعدة من جيل الثورة الرا� Author: Ahmed Yassin Date: 09-20-2022, 04:29 AM Parent: #10
استاذنا الموسيقارالكبير ترهاقا لا يفتى وترهاقا في اي عمل موسيقى استمعت لكل الاعمال المصاحبة... الامتاع انها خاصة ومبتكرة العمل الاول" اهل العمار" حقيقة العمل رغم بساطته و"سرعته" فيهو ذكاء موسيقى لان المقطع: "اهل العمار... البدقو الطار.....البقيمو الليل .. قلبوهو نهار" حييي دا مديح. والشباب اذا اعتمدوا على ايقاع الدقلاشي او المخبوت والنوبة دون تغيير انو يكون سريع وخفيف كان طلع العمل مشابه لكثير من المسموع لكن هنا ايقاع سريع واداء متوازن وفيهو متعة
Post: #12 Title: Re: إبداعات موسيقية واعدة من جيل الثورة الرا� Author: Osman Musa Date: 09-20-2022, 06:39 AM Parent: #11
اخونا الكريم استاذ ساطور كما يحلو لوردي أن يناديك يازول سلامات يا فنان. نحنا العجايز ديل لسع معشرقة لينا حلاوة القديم في حلقنا. لسع لمان نسمع مقدمة الأغنية الفارهة الحزن القديم بنقعد نبكي. تخيل بلد ينتج زي دي مقدمات موسيقية وما يقدر يطلع ليه وزير مالية زي باقي وزراء العالم. اكيد يوم من الأيام التأريخ حيذكر مجهود وردي في داك العمل الخالد . والله نحنا دايرنك انت زاتك تجي يوم وتعزف للأمة في قاعة الصداقة. لو جيت وسويت دا الشغل صدقني السودان كلو حيقيفليك على شباباتو ويصفق ليك . تحياتي
Post: #13 Title: Re: إبداعات موسيقية واعدة من جيل الثورة الرا� Author: Ahmed Yassin Date: 09-20-2022, 06:52 AM Parent: #11
المريود: انصاف فتحي جراري ضمن ايقاعات الحنجرة الاشتهرت بيهو مناطق غرب السودان..المنطقة الثرية المتنوعة الهسيس / الكرير / الحومبى/ الجرارى شاعر وملحن اغنية"المريود" اسمه سليمان عطية وبحكي فيها عن تفاصيل واحداث حقيقية وقت اتقدم لخطبة حرمه وام اولاده السيدة الفاضلة"امتثال" العمل خاص جميل وانصاف بصوتها الصافي والهادىء قدرت تطاوع الايقاع وتتفرد في الاداء الصوتي في نقطة اثناء استماع اي شخص ل" المريود " حيتذكر اغنية"اندريا" لنانسي عجاج
Post: #14 Title: Re: إبداعات موسيقية واعدة من جيل الثورة الرا� Author: tabaldy Date: 09-20-2022, 09:43 AM Parent: #13
لا لن أحيد/ مجاهد عبد الوهاب
تحياتي
Post: #15 Title: Re: إبداعات موسيقية واعدة من جيل الثورة الرا� Author: ترهاقا Date: 09-20-2022, 05:05 PM Parent: #14
Quote: لسع لمان نسمع مقدمة الأغنية الفارهة الحزن القديم بنقعد نبكي. تخيل بلد ينتج زي دي مقدمات موسيقية وما يقدر يطلع ليه وزير مالية زي باقي وزراء العالم.
أديبنا الحبيب عثمان إنت كدة شجعتني أعمل موسيقى الحزن القديم ، على الاقل حتى ولو المقدمة أما المرحلة التي نمر بها الآن يا استاذي في السودان فإنشاء الله حتكون سحابة صيف وحتعدي . بس الحاجة الكويسة إنو كل البيض الفاسد بقى في سلة واحدة يعني حيتقشوا بضربة واحدة ولك الود
Post: #16 Title: Re: إبداعات موسيقية واعدة من جيل الثورة الرا� Author: ترهاقا Date: 09-23-2022, 03:20 AM Parent: #15
الفنانة فدوى، صوت مميز ، تغنت باللغة النوبية ، بدت من قولت تيت بأغانيها الخاصة
Post: #17 Title: Re: إبداعات موسيقية واعدة من جيل الثورة الرا� Author: wedzayneb Date: 09-25-2022, 09:27 AM Parent: #8
البنت الجميلة: وئام رضوان دي صوتها فلتة.و أكاد أجزم أنها لو وجدت الرعاية الفنية الكافية لأصبحت فنانة من الدرجة الأولى هنا في أمريكا.
Post: #18 Title: Re: إبداعات موسيقية واعدة من جيل الثورة الرا� Author: ابو جهينة Date: 09-25-2022, 06:16 PM Parent: #17
تحياتي ابن العم ( ابو علاء )
بوست توثيقي هام
أما بعد
أعتقد بأن إنصاف فتحي مبدعة صوتا وأداءا تحتاج فقط إلى إختيار نصوص وملحن لتفتح صفحات لصوتها المتفرد
دمتم
Post: #20 Title: Re: إبداعات موسيقية واعدة من جيل الثورة الرا� Author: ترهاقا Date: 09-28-2022, 04:15 AM Parent: #17
Quote: لبنت السودانية الجميلة: وئام رضوان دي صوتها فلتة. و أكاد أجزم أنها لو وجدت الرعاية الفنية الكافية لأصبحت فنانة من الدرجة الأولى هنا في أمريكا.
حبيبنا ود زينب ، اخبارك حقيقة لم احظى بالاستماع إلى الفنانة وئام ، وطالما ما ده رأيك فيها اكيد بتكون في المستوى وبتغني أغانيها الخاصة ولك الود
Post: #19 Title: Re: إبداعات موسيقية واعدة من جيل الثورة الرا� Author: أبوذر بابكر Date: 09-25-2022, 07:55 PM
تحياتي موسيقارنا السمح وكل المحبة
اكتر شي بغيظني ويكرهني الغناء هو التقليد
ياخ ببساطة كدا بس انا او اي زول عنده ذرة تذوق، شنو البخليني اسمع نسخة مقلدة وشنو الداعي لي كدا طالما اني ممكن بسهولة اسمعها عند صاحبها الأصلي؟
شي بليد وكعب والله
الشماعة الماسكين فيها النقاد وغيرهم هي انهم يقولو ليك
لا اي مغني مبتدئ لازم او حتميا يبدأ باغاني غيره ويسدد أعمال مطربين تانين
مافي اي منطق في الكلام دا من اي ناحية
طالما انت فعلا زول بتعرف وتقدر وعندك امكانات تغني يعني صوتك جميل وممكن يطرب وزمنك وايقاعك الداخلي وحسك الفني موجود ومتوفر يبقى شنو المانع، ومن البداية، انك تعمل ليك أغنيات حقتك ويغنيها؟
دا كوم، والكوم الاكعب كمان هو انه المدعين المالين البلد الان زي شجر المكسيت ديل
عادي جدا يغنو اغنيات ومجهودات وتعب غيرهم في الحفلات
وياخدو عليها قروش كمان
بالله في مرض واذى اكتر من كدا؟ معليش ياخ بعتذر والله عشان الكلام الكعب دا
لكن كلو من المغسة والله
واجدد التحية والتقدير والمحبة ليك
Post: #21 Title: Re: إبداعات موسيقية واعدة من جيل الثورة الرا� Author: tabaldy Date: 09-28-2022, 08:03 PM Parent: #19
تحياتي مرة تانية الاستاذ ابوذر بابكر
Quote: ياخ ببساطة كدا بس انا او اي زول عنده ذرة تذوق، شنو البخليني اسمع نسخة مقلدة وشنو الداعي لي كدا طالما اني ممكن بسهولة اسمعها عند صاحبها الأصلي؟