Post: #2
Title: Re: اسقي الشمس شاي الصباح
Author: أبوذر بابكر
Date: 05-14-2022, 04:04 PM
Parent: #1
اسقي الشمس شاي الصباح
********************************
ساساق الروح
البين دروب الليل
وفرقان الغياب
ومن تالاهن مارق منك
عليك ديداب
مضاري من عين الضلام
والشوف مقسم
بين عيونك والدليل
وانت المخسّم
بالدرادر والعذاب
وعطشك هناك
ساكن نواحي النيل
ناشف نميمك
وين تقبل ووين تروح
راجيك سيل
اتوكل على خوفك
وليك الويل
دس يقينك فى الزحام
وليك الويل
ارميهو فى بطن الوجع تيراب
حس الوجع غلبو الكلام
والطين موسّم
بالوجوه الخايفه
من قولة تعال
ضلك معسّم
مكتوف علي وش النعال
رمش الهنا وكحل الوئام
مالي العيون النازفه
من شح الوصال
وكيف السبيل
والممكن المسكين بعيد
ما باقي ليك غير المحال
المرقة فى دربك سؤال
والرجعة زادك والجواب
ورحلك مستف بالغباين
بالمشاوير الطوال
موية شرابك
قطرة فى نية السراب
من ياتو جيهة بجيك مناك ؟
وعين الشمس مصرورة
مضاريه بي شقل السحاب
وضو الجهات مسروق
جنات عذابك باليمين
ساكنه العروق
ونيران سعادتك بالشمال
لي ياتو جيهة تسوق غناك ؟
وحس البلود مخنوق
خت الوصية قريب حداك
في ذمة الليل القديم
اسقي الشمس شاي الصباح
قبال يحين وقت المروق
قبال تداهمك
خيل مواجعك والجراح
قبال يفوت باقي الغنا
الفضل معاك
قبال تضلم
وينكسف خاطر البروق
امرق تعال
اختا الدروب الما بتحن
اضارا بي شوك الرياح
امرق تعال
قبال تجن
مسيومه روحك
وانت مافي
مربوطة بي مغس الحبال
لملم جروحك
وفي المنافي
صنقر تحت ضل المنى الممحوق
واخير تجي
امرق تعال
قبال تبور فى السوق
المرقة فى دربك سؤال
والرجعة زادك والجواب
امرق تعال
|
Post: #3
Title: Re: اسقي الشمس شاي الصباح
Author: محمد سنى دفع الله
Date: 05-14-2022, 09:39 PM
Parent: #2
اها مرقت جيت
امرق تعال انت
يا عاشق الجمال
لكم سعدت بكلماتك الشفيفة
لك التقدير والاحترام والمحبة التي تعرف
ودام صفانا
|
Post: #4
Title: Re: اسقي الشمس شاي الصباح
Author: أبوذر بابكر
Date: 05-15-2022, 07:09 AM
Parent: #3
محمد السني
حبيبنا الزول الفنان وانسان
الثمين وسمين
آنسنا نورا ونارا
عطرا وازهارا
ان شاء الله طيب ياخ وشديد وسعيد
انا مرقت وجيت
وتاني مرقت وجيت
والمره دي بإذن واحد أحد
مقيم ما أقام عجيب
الغربة اخت الموت
لو كانت امرأة لطلقتها
هههههههه
علي وزن لو كان رجلا لقتلته
سعدنا يا سني بالطلة المفرحة
|
Post: #19
Title: Re: اسقي الشمس شاي الصباح
Author: أبوذر بابكر
Date: 05-21-2022, 07:13 PM
Parent: #3
ذات شجن ممض
وغربة حارقة
قال الحلنقي:
غايب السنين الليله مالو
غنا العصافير غلبو
الناس سعيدن في الحياة
لا ضاق فراق لا جربو
|
Post: #5
Title: Re: اسقي الشمس شاي الصباح
Author: awad hassan
Date: 05-16-2022, 03:00 AM
Parent: #2
نص رائع بكل دلالات ومعني هذه الكلمة
أدهشني كثيراً
عملت ليهو copy في مذكراتي كي أستمتع بقراءته مع كوب قهوة الصباح
تحياتي وتقديري
|
Post: #7
Title: Re: اسقي الشمس شاي الصباح
Author: أبوذر بابكر
Date: 05-16-2022, 10:00 AM
Parent: #5
كل الامتنان اخانا عوض
علي تشريفنا بحضورك
مرات كتيرة النص هو البكتبك
وهنا كان رفقة ال نوستالجيا المريرة
وصحبة الحنين الساكن الروح
كل التحية والود ليك
|
Post: #9
Title: Re: اسقي الشمس شاي الصباح
Author: أبوذر بابكر
Date: 05-18-2022, 07:02 AM
Parent: #2
الشمس اجمل في بلادي من سواها والظلام
حتى الظلام هناك اجمل فهو يحتضن السودان*
بدر شاكر السياب
* فهو يحتضن العراق، زي ما قال السياب
|
Post: #6
Title: Re: اسقي الشمس شاي الصباح
Author: امير الامين حسن
Date: 05-16-2022, 09:06 AM
Parent: #1
قرأتها كوطن مهزوم ومأزوم - الحالة السودانية الحاضرة
وايضا كإنسان مأزوم يعاني ويلات اغترابه وحنينه إلى وطنه
تحياتي ابا ذر
|
Post: #8
Title: Re: اسقي الشمس شاي الصباح
Author: أبوذر بابكر
Date: 05-16-2022, 10:06 AM
Parent: #6
تحياتي يا أمير
وكل التقدير
الغربة قدر موجع
والحنين خط موازي
وبكل ابتلينا
نسأل الخالق يصلح حال وأهل بلدنا
وترجع كل الأرواح البتعاني وتشقى
|
Post: #10
Title: Re: اسقي الشمس شاي الصباح
Author: Biraima M Adam
Date: 05-18-2022, 07:58 AM
Parent: #8
رائع يا ول أبا أبو ذر .. رائع
لكن عايز أسألك ..
كلمة "ديداب" .. ماذا تعني؟ .. لو تعنى الدرب الذي يسلكه المشاة .. يمشوا به الزرع، أو الفلاة، أو ينزلوا به إلي البحر ..
لو المعانى التى أورديها صحيحة .. أري ان تحول الكلمة إلي "دوداب" .. أري إنها تعطي نبرة الصوت قوة أكثر من ديداب.
والله أعلم
بريمة
|
Post: #11
Title: Re: اسقي الشمس شاي الصباح
Author: أبوذر بابكر
Date: 05-18-2022, 08:24 AM
Parent: #10
حبيبنا البقاري
كلما اشوفك بتذكر الزول السمح
حامدين بقادي
صديقي الجميل
فعلا الديداب هو الدرب البكون غالبا وسط الزراعة او الغابة
بكون قديم ومستمر وثابت ما بتغير
في مناطقنا وبيئتنا بقولو الديداب
ودوداب بتتقال بمعنى الفعل نفسه، يعني المشي في وعبر الديداب
انت زول مثقف والله ومطلع يا بريمة
هههههه
لا بالجد والله
أكاد أجزم انه حتى معظم وغالبية ناس مناطقنا في ارياف وسط أو شمال السودان، خصوصا الاجيال الجديدة
ما بعرفو شنو يعني الديداب
شكرا يا برمة العسل
|
Post: #12
Title: Re: اسقي الشمس شاي الصباح
Author: Biraima M Adam
Date: 05-19-2022, 11:59 AM
Parent: #11
ول أبا أبو ذر
إذن متفقين في المعني .. لا بأس أن تستلف الكلمة علي طريقة حكي البقارة ..
لو لاحظت نبرة الواو قوية جداً في القصيدة .. دروب، العروق، مسروق، مخنوق، محروق .. وهكذا ..
لو كانت أكثرت من أستعمال الياء .. مثل بدلك عيونك .. عينيك .. وبدل دروب .. دريبات .. كان ديداب ... تقع في أذني.
-----------------------
طبعاً أخوك منتحل شخصية ناقد.. المافي شنو!
بريمة
|
Post: #13
Title: Re: اسقي الشمس شاي الصباح
Author: Biraima M Adam
Date: 05-19-2022, 12:08 PM
Parent: #12
تانى رجعنا ليك يا ول أبا أبو ذر
شايف التتلح دا ..
هل أنت وضعت كلمة "ديداب" لأسباب "عروضية" ..
إن كان القصة داخلة فيها العروض .. لضبط التفعيلات .. أقول دا خلقي من الموضوع.
----------------
ههههاي أخوك جرا واطي حبتين ..
بريمة
|
Post: #14
Title: Re: اسقي الشمس شاي الصباح
Author: أبوذر بابكر
Date: 05-19-2022, 12:22 PM
Parent: #13
عوافي يا بقاري
شكرا علي النقد الأدبي
ما عندك عوجه والله
ما عارف المارقين ناس الامير ودينق كاشفين حالك ليه
السبب الرئيسي لاستعمال مفردة ديداب
هي انه دا هو المسمى الحقيقي في مناطقنا للدرب البكون وسط الزراعة او بين أشجار الغابة
يعني لو انا قلت دوداب ما بتعرف المقصود شنو
بس ياهو دا السبب
|
Post: #15
Title: Re: اسقي الشمس شاي الصباح
Author: حيدر حسن ميرغني
Date: 05-19-2022, 07:32 PM
Parent: #14
سلام ابوذر
عجبتني جدا مداخلة بريمة وتفسيرك لإستخدام المفردة دي بهذا الشكل
أصلا الشعر لو ما إمتزجت فيه الذات الشاعرة بتفاصيل المكان وإستخدمت فيه مثل هذه المفردات ما ببقى شعر .. كأنها حاجة كده سكنت روح الشاعر إلى الأبد
|
Post: #16
Title: Re: اسقي الشمس شاي الصباح
Author: Biraima M Adam
Date: 05-19-2022, 07:58 PM
Parent: #15
أنت عارف يا ول أبا حيدر
طبعاً المنبر عامر جداً .. لكن أنا أحب أطلع علي الشعر والأدب من طرف خفي ..
أكتشفت ليكم ول أبا أبا ذر من زمان .. وهو ما جايب خبر ..
تخيل أنا أتذوق شعر ول أبا أبو ذر .. ويقع لي في أضانى بطرية سهلة ..
بريمة
|
Post: #18
Title: Re: اسقي الشمس شاي الصباح
Author: أبوذر بابكر
Date: 05-19-2022, 08:10 PM
Parent: #16
لقيتها والله يا بريمة
اشتهرت وبقيت نجم أدبي علي حسابنا
ههههههه
ياخ انت لو ما بقيت زول ذواق وبتفرز الحاجات كويس
ما بتكون بقاري أصلي
زي ما انا قلت قبل شويه ل حيدر
انه اصلا كل بقاري في الأساس زول جميل
بالفطرة وبالبيئة
أجمل اصحابي وزملائي بقارة
|
Post: #17
Title: Re: اسقي الشمس شاي الصباح
Author: أبوذر بابكر
Date: 05-19-2022, 08:06 PM
Parent: #15
ازيك يا حيدر
انست البكان وفرحت الزمان
بي جيتك
بريمة دا زول مطلع وملم جدا وفيه كمية من الجمال
هو اساسا اي بقاري بكون اصلا جميل
الى ان يثبت العكس
هههههههه
بريمة مشكلته الوحيدة انه مره مره بتضوق فيه طعم الكيزان
لكن ما ظنيتو كوز
زول مكاوا ساي
فعلا كلامك صحيح يا حيدر
الإنسان في المقام الأول زي ما بقولو، هو ابن بيئته
ولو انفصل عنها او ما استصحبها في كل حياته
بكون نقص فيه جزء كبير ومهم من حياته ومعناه
|
Post: #20
Title: Re: اسقي الشمس شاي الصباح
Author: أبوذر بابكر
Date: 09-10-2023, 07:28 AM
Parent: #1
إجترار تاني
وأسى متجدد
في البدء كان الوطن
سيظل ويبقى
في سرمدية المعنى
|
|