الكباري دي نعمل ليها سوسته ،،،،،،

Post: #1
Title: الكباري دي نعمل ليها سوسته ،،،،،،
Author: علوبه
Date: 12-25-2021, 02:36 PM

01:36 PM December, 25 2021
سودانيز اون لاين
علوبه-KSA - Sudan
مكتبتى
رابط مختصر

*بي📝 الحنين،، ،، ،،*
*د. علي الشيخ،، ،،،،،*

*الكباري دي نعمل ليها سوسته،،، ،،،*
اقفل،،،،
افتح،،،،
افتح،،،،
اقفل،،،،
الكورونا دي في الأول جات بي نوع واحد،،،،
و كت غلبتهم،،، قالوا اتحووووووورت،،،
*ياها دي المليونيات،،، ،،،*
كل مليونيه بي فهم جديد،،،،
الكورونا،،،،، قالوا للناس تقعد تتحبس في بيوتها،،،،
المليونيات دي ،،،،، حيرت العالم،،،،
و دخلت الديموقراطيات فيهو في فتيل،،،،
في زول و لا زوله شارك في المليونيات دي جاته كورونا،،،،
للأسف،،،،
جاتهم قنابل بمبان،،، 💣
*البمبان* بخور المليونيات،،،
جاتهم طلقات 🔫 ذخيره حيه،،،،
جاتهم سياط و عكاكيز للدق،،
و جاتهم،،، زرزره و تليب في البيوت،،،،
و ده كله حاصل،،،،
والعالم واقف بصور و بتفرج و عاجلا،،،، و مراسلنا،،،، و الثوره مدوره،،،
الناس الماسكه في أمور البلد نست الكورونا،،، بقت تراجع في جداول المليونيات،،،
نست التطعيم و بقت تقفل في الكباري،،،،
نست مراكز العزل و بقت تحضر مراكز الضرب و الاعتقالات،،،،
نست توفير الأوكسجين و بقت تحضر في البمبان،،،
و يأتوا أخطر نوع،،،، ياريت لو بتصنع محلي،،،، اتخيلوا مستورد وبي قروشنا،،، ،،،
*المليونيات*،،، دي،،،
زي الزول الداير حقه،،،، و مابرضي بالحقاره ،،،،،
زي الزول كايس بيته،،،،
و بيته مؤجر ،،،، و المؤجر ،،،، مأجور،،،،
بي بساطه اطلعوا ليهم من وطنهم ،،،، خليهم يبنوه،،،

*المليونيات*،،،،، دي تقوم و تقع،،،،
و تتفرتق،،، و تتلملم ،،، و تتجدول تاني،،،،
يا ها هي السم الهاري،،،
يا ها هي سلاح الثوار السلمي،،،،
يا هي الترياق،،، و الدواء،،،،
لو كان فشلت،،،،
كانت وقفت،،،،
لو مابتخدم غرض،،،
ما كانت استمرت،،،
لو ما منظمه،،،،
ما كانت سلميه لي هسه و لي بكره،،، ولي قداااااام،،،

بتعرفوا سهر الجداد🐓🐓🐓 ،،، ولا نوموا،،،،
بتعرفوا الزول اللايوق،،،
بتعرفوا المطره 💧💧💧النقناقه،،،،،

*ديل زي المليونيات،،،*
الجداد كان ساهر بيك،،، بحميك النوم،،،،
كررررر ما بتطرده،،،
و الزول اللايوق كان اتلحك،،، يحلك الحل بله،،،
تمشي منه بي جاي،،،، بجيك بي هناك،،،،
و المطره كان بدأت تنقنق،،، لا بتعرف تدخل لحافك و لا بتقدر تنوم تحتها،،،
المليونيات دي حاتغير التاريخ،،، حايتكتب مستقبل جديد،،،، حايترسم طريق ،،،، بي رؤى جديده،،،،
معبد بالمبادئ،،،، و حب الوطن،،،،

*المليونيات دي،،،*
أسست لي فهم جديد،،،
ما مهم منو السايقه هسي،،،
و ما في خوف انها بدون قيادة،،،،
ليه نفرض عليهم الوصايا و القيادات القديمه،،،،
نطرح برنامج،،،،
نناقش فكره،،، نتشاكل لمصلحة البلد و ترابه و نعز الشهداء،،،،
كده ممكن نساعد و ندى المليونيات دي روح جديد و ندفق فيها دماء نقيه،،،، تشمل كل فصائل و قبائل و أهل السودان،،،،

زول مقتنع بي فكرته،،،،
زول بموت عشان بلده،،،،
زول خاتي السودان قدامه،،،،

*ده زولنا،،، بنحبه ،،،*
*و ندعمه ،،، و نمشي وراهو،،،*

*د. علي الشيخ*
*الحنين*
*ينبع البحر - السعوديه*
*٢٥ ديسمبر ٢٠٢١*

Post: #2
Title: Re: الكباري دي نعمل ليها سوسته ،،،،،،
Author: اخلاص عبدالرحمن المشرف
Date: 12-25-2021, 02:48 PM
Parent: #1

ما ينوم
الليلة سوو له ( وخلف الكي )
طبقوها له في قصرو
قلنا لك شباب ما بتلاوي
لايوووق ما بعد الويكة
وبربكوك ، ربكة عدوك
الاول في محل واحد يومين ما بتنوم
اسع نوم ذاتو ما بتنوم
وبفتشو لك وينو وينو
احترم الكاكي ولم عدتك
والا بتبقي فيك ال بقت
علي غردون
وسلم تسلم

Post: #3
Title: Re: الكباري دي نعمل ليها سوسته ،،،،،،
Author: يحي قباني
Date: 12-25-2021, 03:44 PM
Parent: #2

سلامات علوبه

د الشيخ ده في ينبع ؟
الدنيا اجازات و صينية القهوة قدامه و قام كتب مقال السوسته ..؟

سبحان الله .. و ما اسهل الكتابة من على البعد ..

Post: #4
Title: Re: الكباري دي نعمل ليها سوسته ،،،،،،
Author: صديق مهدى على
Date: 12-25-2021, 04:49 PM
Parent: #3

سلام بروف علوبة
الشعوب اصبحت
على امورها مغلوبة
عملت العليها
تبنى فى جدار الحرية
طوبة طوبة
كل يوم حقوقها
مسلوبة
مع انو الوقفة مطلوبة
وزى ما بقول المثل
السكران ليهو حوبة
والمجنون ليهو حوبة
ربنا يستر يابروف علوبة
ما تبقى علينا حكاية
عجوبة

Post: #6
Title: Re: الكباري دي نعمل ليها سوسته ،،،،،،
Author: علوبه
Date: 12-25-2021, 06:06 PM
Parent: #4

صديق،،،
صدق قولك،،،،
وسمح ردك،،،،

لا،،، ولن يتكرر سيناريو
عجوبه،،، لأنه التاريخ اتغير

للشباب مطالب،،، ونحن معاهم

مشكور يا غالي

Post: #5
Title: Re: الكباري دي نعمل ليها سوسته ،،،،،،
Author: محمد الطيب
Date: 12-25-2021, 05:36 PM
Parent: #1

كل مليونيه بي فهم جديد،،،
الجماعة لو فهموها صح يفتحو الكباري
للشعب لممارسة حرياته حتي يسقطو ويريحونا لانو كده كده
هم ماشين ماشين مسالة وقت ليس الا
لا ولم يتمكنو من تكوين حكومة كفاءات مستقلة كما يحلم
البرهان وحميدتي وحمدوك
لا احد ينوي مشاركة الانقلابين في انقلابهم

Post: #7
Title: Re: الكباري دي نعمل ليها سوسته ،،،،،،
Author: tabaldy
Date: 12-25-2021, 10:10 PM
Parent: #5

علموهم تتريس الشوارع سبقوا الثوار علي الكباري وبي حاويات كمان...

تحياتي

Post: #8
Title: Re: الكباري دي نعمل ليها سوسته ،،،،،،
Author: Hatim Alhwary
Date: 12-26-2021, 06:26 AM
Parent: #7

Quote: المليونيات دي حاتغير التاريخ،،، حايتكتب مستقبل جديد،،،، حايترسم طريق ،،،، بي رؤى جديده،،،،
معبد بالمبادئ،،،، و حب الوطن،،،،