Post: #1
Title: خلعوك خلعوك ولا حمدوك حمدوك ... ( 1 ):بهاء جميل
Author: بهاء جميل
Date: 12-30-2021, 01:15 PM
12:15 PM December, 30 2021 سودانيز اون لاين
بهاء جميل-السودان
مكتبتى
رابط مختصر
للناس الما حايفهمو وللما عايزين يفهمو وللمفاهمين اي شيء
اول شيء السودان ده ما حق زول علشان يقفل شارع والله يكسر ممتلكات .. اذا انت ديمقراطي زي ما بتدعي وبتعتبر انو من حقك تتظاهر .. انا من حقي ما اتظاهر ومن حقي القى الشارع مفتوح ... ومن حقي تحافظ على ممتلكاتي .. انت من حقك تتظاهر اذا كنت بتتظاهر بصورة حضارية بتتجمع وتهتف من دون ما تقفل طريق .. ومن دون ما تعتدي على احد ... ومن دون ما تكسر ممتلكات الدولة اللي نحنا كلنا فيها شركاء - ده طبعا اذا انت معترف بي كدة - ... ومن دون ما تعطل الحياة للناس ... من حقك تتظاهر وتعبر عن رايك طالما كان ده بي احترام ولي وقت محدود .. وفي اماكن محدودة التجمع فيها ما بسبب ضرر او تاخير او مضايقة لاي زووووووووووووووووووووووول ..
......
غير كدة الناس عايزة تعرف المتظاهرين ديل قاعدين ياكلوا ويصرفوا على اهاليهم من وين ؟ يا اما هم اصلا عطالة وما عندهم مسئوليات ... يا اما في جهات قاعد تمولهم وتصرف عليهم ..... طيب هو معطل الحياة لانو عاطل وما فاااارقة معاهو او لانو عندو جهة بتصرف عيلهو .. انحنا العندنا مسئوليات والما عندنا حد بصرف علينا ... وما عارفين نمشي امورنا كيف نسوي شنو ؟؟؟
.......
يا اخوانا انحنا عندنا طلاب في اولى جامعة ليهم تلاتة سنين تلاتة سنين كاملات في سنة اولى هسة ديل البعوضهم منو ؟؟؟؟
......
ثاني شيء يجب ان يفهموه الما فاهمين انو حمدوك ده جايبنو الجماعة البرة ومصرين عليهو لي سبب واااااااحد بس لانو هو الشخص البيسمع كلامهم .. لانهم مجربنو وعارفنو وعارفين شخصيتو المطيعة .. وواثقين تماما انو حا يطبق كل السياسات الاقتصادية العايزنها زي سياسات صندوق النقد الدولي .. والبنك الدولي .. الخ ( حمدوك ممكن يطبق سياسات وخطط ابراهومة زاتها لو حبو ) ، لانو ده الطريق الوحيد للسيطرة على الاقتصاد السوداني ونهب ثرواته من خلال شركاتهم الحا تسمح ليها تلك السياسات بالدخول للسودان وبالتالي السيطرة على المجتمع السوداني نفسه لتطبيع باقي المخطط ... ولانو حمدوك ما بعرف يقول للناس ديل لا ولانهم ماسكنو من لغاليغو علشان كدة تم اختياره
يعني عايزين من خلال حمدوك يمسكوا البلد كها زي ما حاصل هسة في العراق ، امشو شوفو الشعب العراقي مشرد كيف وبيعاني كيف .. وشوفوا الشركات الامريكة والبريطانية عاملة في ثروات العراق شنو ؟؟ طبعا ( النص كم ) ما ناقشين اي شيء ( النص كم ده مصطلحنا الجديد ومفهوم مقصود منو شنو )
...........
طبعا يا نص الكم حمدوك ده هو اصلا زول عادي و موظف مطيع في منظمات معروف سمعتها شنو .. وكانو خاتنو في افريقيا الما بحبوا كل الناس يقعدوا فيها لانو بيغض الطرف وبمشي الامور .. هسة حمدوك ده ورونا ليهو انجاز واااااحد بس في كل سيرتو العملية ورونوا اسس شنو ؟؟ وعبر بي منو ؟؟ ياخ ده متخصص ليهو في قشة ، اي بتعرفوا القشة او النبتة او الزرعة هسة القش علاقتو شنو بالسياسة ؟؟؟ اكان شغلة السياسة شغلة تخصصات وبس
.........
طبعا الما عارفنو الناس القاعدين يضحكوا ان اي زووول في مجالوا ممكن يتخصص ويعمل دكتوراة لو عايز .. كلها سنتين ماجستير .. وبعدها سنتين وانتهى الموضوع لكن طبعا نحن شعب مندهش شديد الاندهاش والانخلاع باي شيء عادي .... ياخ انا مرة في بورتسودان في البص جا بنغالي لابس له بدلة سفاري زي حقت امن نميري وممسح شعرو بزيت سمسم ركب في البص عشرة انفار قاموا ليهو من كراسيهم في وقت واااحد ، وانا مرة مشمع من بورتسودان لي كسلا ... وكنت بمسح شعري بي بريل كريم ..
وطبعا لانو نحن شعب مندهش مما قالوا حمدوك شغال في مؤسسة دولية المخلوعين ديمة ديك انخلعوا خلعتهم البنعرفها ديك ،، لانهم طبعا ما عارفين انو المؤسسات دي الناس قاعدين يشتغلوا فيها متطوعين اااااي متطوعييين سااااي ... وشوية شوية ييقوا موظفين وهي طبعا اصلا مؤسسات مسيسة و مشبوهة وفيها فسااااد عجيب و كلام كتييير وطبعا دي ماكلامي انا ده كلام الخواجات زاتم علشان مايجي واحد مسطح يضحك طبعا في ناس عندهم كلام الخواجات ده قران منزل .
......
هسة ياخوانا حتى لو صدقنا انو الزول دي اسطوري زي ما قلتم ( قبل ما تغيرو رايكم وتنبزوه وتتهموه طبعا ) في انسان وااااحد بيقدر يغير مصير امة ؟؟ ما تراجعوا حساباتكم شوية وتخليكم منطقين حبببببة وتخلوا الانخلاع والاندهاش الفايت حدو ده علشان تمشوا لي قدام ..
ده دور حمدوك المرسوم ومعاهو طبعا ادوار تانية للتلاتة الرئيسين الباقين اللي هم القراي وعبد الباري .... ومفرح ..... القراي طبعا طلبع برة الخط .. ولقو انو طريقتو الماشي بيها جايبة نتائج سلبية ... لانو ما قاعد يقدر يسكت زي عبد الباري ومفرح ... قاموا سحبوه علشان ما يفشل الخطة كلها اما عبد الباري فمهمته الاساسية هي حذف كل ما يتعلق بالاسلام من القوانين والتشريعات .... واما مفرح له دور متكامل مع دور القراي وعبد الباري .... وهو تغييير ثقافة وتركيب المجتمع السوداني فعلشان كدة الناس ما تطلع ساي .. وتصدق اي شيء عليييكم الله خلو الانخلاع ده ..خلوه شوية بس
هسة عارفين منو القاعد يفشل في خطط الناس ديل وواقف قدامها ؟؟؟ والله العظيم انتوا عارفين لكن كان قلنا ليكم نحنا الخلعة بتكتلكم علشان كدة احسن ما تعرفوا ..
والى خلعة جاية نترككم في امان الله
والله لا يخلعنا زي خلعتكم العجيبة دي ..
وخلعوك خلعوك ولا حمدوك حمدوك
بهاء جميل
عناوين الاخبار بسودانيزاونلاين SudaneseOnline اليوم الموافق 12/29/2021
عناوين المواضيع المنبر العام بسودانيزاونلاين SudaneseOnline اليوم الموافق 12/29/2021
عناوين المقالات بسودانيزاونلاينSudaneseOnline اليوم الموافق 12/29/2021
|
|