حفل دعم الجالية السودانية بمنطقة واشنطن الكبري بالفنان عمر احساس

01:10 AM September, 17 2018

سودانيز اون لاين
اعلانات سودانيزاونلاين-Phoenix Arizona USA
مكتبتى
رابط مختصر

حفل دعم الجالية السودانية بمنطقة واشنطن الكبري بالفنان عمر احساس

الفنان عمر إحساس

استطاع الفنان عمر إحساس ، أن يدخل في لفافة الثقافات للشعوب السودانية ،
فنظم أغنيات بالرزم واللحون التي توافق وسط السودان ، مما سطع نجمه في الثقافات السودانيين .
وتلك إمكانية متقدمة في فهم كيفية تطور النجم المطرب ( عمر إحساس ) ،
وتلك محمدة في نقل الغناء إلى ساحات ثقافية متنوعة . تماماً كما عدّل المطرب الفنان " أبو عبيدة حسن "
في إيقاعات الشايقية وقد استبدلها بإقاعات موجودة وسط السودان.

*

بختكم
خاصة معاكم ولد نيالا استاذنا/ ابراهيم محمد الحسن ففضل المولى عبدالله
يا سلام الانسان الخلوق والجميل والمبدع افنان .. ممكن يدرسك آلات النفخ زي الاكورديون
وبنفس المهارة والعلم يدرسك (شيلو) ..
لزول دا امسكوا فيهو قوي .. موش بقولوا (عضوا عليه بالنواجذ)
ماتنسوا خلوا يسمعكم مجموعة من مقطوعاته الشجية زي
اترشرشي - زهرة الحب - ام زمام
او مقطوعات ومؤلفات وطنية زي : فجر بعيد
بالتوفيق

يا إعلانات سودانيز اون لاين هل جالية و أشنطون عندي بعض التساؤلات :-
هل جالية و أشنطون دي نفس الجالية الاتقدمت ضدها طعونات بأن في مجلسها المنتخب من لم يدفع الاشتراكات؟ لو نعم فهل انتهى هذا الأمر وتم الإثبات بأنهم دافعين اشتراكهم؟
هل جالية و أشنطون هذه هي نفس الجالية التي ظهرت لها أوراق شكاوى و محاكم من أفراد في مكتب الجالية القيادي ضد أفراد آخرين في الجالية؟ لو نعم ماذا حدث في هذا الملف.
أمر اخير :-
أتمنى قبل الحفل و قبل البحث عن الدعم أن يسعى الجميع لحل كل الخلافات الشخصية و يبقى مابين الناس صافي حتى يسير الجميع للإمام و لدعم الجالية حقاً لكن إقامة حفل في وسط كل هذه الصراعات و الخلافات ماهي إلا خسارة مالية جاهزة.

سلام للجميع
نرحب بالفنان الزائر الكريم عمــــر إحساس، ونتمني له إقامة سعيدة في زيارته القصيرة لأمريكا. أأمل أن يكون الترحيب به بحضور أكبر عدد منَا فهو مطرب مهتم ومجتهد ومجود لأعماله وهو شخص متفاعل ومتواصل مع معجبيه الخاصيين ومستمعيه ومتابعي أعماله بصورة عامة

Quote: نرحب بالفنان الزائر الكريم عمــــر إحساس، ونتمني له إقامة سعيدة في زيارته القصيرة لأمريكا. أأمل أن يكون الترحيب به بحضور أكبر عدد منَا فهو مطرب مهتم ومجتهد ومجود لأعماله وهو شخص متفاعل ومتواصل مع معجبيه الخاصيين ومستمعيه ومتابعي أعماله بصورة عامة

سلامات يا طيفور...
و الله عمر راجل فنان و يستاهل لكن منظمي الحفلة(الجالية السودانية بواشنطن) لسه الناس ما اتفقت حولها ولسه في قصص و حاجات عالقة لم يتم البت فيها و الحاجات دي ينتظرها عدد مهول من عضوية الجالية فكيف ممكن حفل زي دا ينجح جماهيرياً و انت جماهيرك بتاعين اللجنة العمومية لسه عندهم تساؤلات حول شرعية جسمك؟!
عشان برامج الدعم للجالية تنجح لازم حسم الخلافات و التوحد حول جسم الجالية اولا.

مرحب سفيان
كيف الحال الناس في ولاية واحدة وما بتتقابل
الاهتمام بالزاير و بالضيف شيء هام يا سفيان و لمن يعرف الفنان المبدع -في نظري- و لمن لا يعرفه هو رجل شهم و اخو اخوان, يحكي لي احد الاصحاب انا عمر احساس تكفل بكل الفنانين في ليلة عرسه يحكي اخر انه تنازل عن سياوته ليتحرك الضيف الجاي من امريكا و يمشي عمر احساس كداري و تصلك رسايل عمر احساس لمواسة او مباركة العيد و تعجب لذاكرة و اهتمام هذا الرجل بالتواصل و قايمة اصدقاءه و معارفه الاقربين بالالاف اضافة لجمهوره و معجبيه الكثر
لو انا مكانك و مكان المتغقين او المختلفين علي امر الجالية لحضرت الحفل تشجيعا للفنون و اهتماما بالمبدعين عمر و سوناتا

عن الجالية و الاختلاف الموجود يراه البعض معقد و يراه البعض و انا منهم بسيط و قابل للحل بمجهود متجرد وصادق اصل المشكلة و بدايتها معروفة تبدا من هناك و بتصل لحل ان وجدت بين الناس الرغبة في ذلك

اقنعتك,,,,, ي الله تعال الحفلة ههههههه

Quote: اقنعتك,,,,, ي الله تعال الحفلة ههههههه

ههههههههههههه لو الحفلة حقت الفنان الرائع عمر احساس كنت ح أسعى لتشجيع الجميع على الحضور يا كمال لكن!!! و لكن هذه تفسيرها أسئلتي في المداخلات السابقة.
تحياتي لك.

الشكر لك يا نصر
عمر احساس نقل للسودان و العالم كثير كتير من الانغام الشيقة من الغرب الغني الحبيب اي وقت تستمع لعمر تسعد بلحظات ممتعة
نال اداءه في تونس و النمسا و امريكا اعجاب الكثيرين
حضور حفله غدا مظلوب فتفضلوا

يرفع، للآتي هههههها
٠-٠) نرحب بالزول الفنان عمر احساس ونشكرو.
١-١) ونسلم على كمال وجميع الواشنطوناب.
١-٢) ونرفع الفاتحة أن يصلح الله ما بين الجالية (كمنظمة) وما بين العمدة كوستاوي. ولّا يا ربي انصلحت من ورانا وما كلمتونا ههههها؟؟
٢-١) أما الفاتحة لسفيان والمرشحين الما دافعين ديل، ممكن نأجلها شوية لغاية الدورة الجاية. الله يحيينا.
٣-١) نطلب من كوستاوي أن ينتبه لجودة الصوت في بعض تسجيلاتو، الحالة السمعية هنا متأخرة شوية.

٤) لقيت كلام حبيبنا الباشمهندس الشقليني الفوق، والمقتبس تحت هنا دا، قام ذكّرني بي كلام أولاد قلبا.. بعمل لي ارتكاريا اقليمية..

كتب شقليني:

Quote: أغنيات بالرزم واللحون التي توافق وسط السودان ، مما سطع نجمه في الثقافات السودانيين . وتلك إمكانية متقدمة في فهم كيفية تطور النجم المطرب ( عمر إحساس ) ، وتلك محمدة في نقل الغناء إلى ساحات ثقافية متنوعة. تماماً كما عدّل المطرب الفنان " أبو عبيدة حسن " في إيقاعات الشايقية وقد استبدلها بإقاعات موجودة وسط السودان.

يا باشمهندس والله إنا نحبك ونحب غنا وموسيقى هنا أم درمان حبا جما وزيكم واحد ويمكن زيادة.. وعارف كلامك دا وارد من باب الثناء على ما طوره وقدمه عمر احساس وأبوعبيدة وآخرون من موسيقا وغنا الأطراف وتقريبها من ذائقة الوسط.. كلام سمح وكل حاجة لكن، لكن كلمتينك ديل (توافق) و(يستبدلها)، خلوني أحس وكأنك بتتكلم من موقع قوميسار المركز الفني الذي يشرح للآخرين مطلوبات النجاح والمرور عبر (هنا أم درمان) وملحقاتها.. وطبعا انت عندنا كبير وحبنا ليك كتير وكلاماتك ما بتمر بدون تأثير وقد وجب أن نكشف الغطاء عن البير.. وعشان كدا الواحد حقو يقول الصراحة، وبي كل صراحة..
بي صراحة حكاية إنو غنا وفنون الضهاري يجب عليها، أو إلا تتوافق، مع ذائقة (الوسط) المركزية عشان تمر إلى الذائقة العمومية؛ الحكاية دي عملت لينا شوية تحسس كدي وارتكاريا وبارانويا كمان.. حقو تراعونا شوية ياخي والله.. نحنا ناس الربوع (الما) ناس الوسط، وعلى اختلافاتنا، محتاجين للغنا بتاعنا دا، غنااانا.. انتو يا ناس الوسط استمتعموا بي غناكم ونحنا مستمتعين معاكم، لكن أدونا فرصة عشان نسمع غنانا بي طريقتنا وخلونا نسمتع بيهو برانا في الأول، وبعدين كان عجبكم فخير وبركة وكان ما عجبكم فتراهو نحنا كلنا اخوان وطالما أخوانكم مبسوطين فانتو حتنبسطوا برضو..

يمين بالله قتلتنا وقتلت فنوننا هذه المركزية ودفنتنا بالحياة .. لم تعد هناك أي فرصة حقيقية لأن تتطور بقية موسيقانا بطريقة علمية وأن تتبادل الإثراء عبر تنوعها الثر فعلا، إلا أن تتسلل مسارقة بين أغنيات (الوسط) وبقبول وتأشيرات من متنفذي الوسط الفني.. كدا ما كويس والله.. بعد شوية أنا خايف إيقاع الوسط يبقا هو ايقاع (الزنق) ويصبح على الباقين أن يقاربوه ويرقصوهو برضو!! لا يمكن أن ترتهن كل موسقتنا لـ (تخت) الفرقة (الرسمية) ولو كسر رقبة وقد لأضان المستمع بي ألات نفخ وأورغنات ما أنزل أبولو الطرب السوداني بها من سلطان وزاتو ما أظن صانعيها فكروا في السودان لما صنعوها..
ياخي بالجد ما ممكن نتجاهل أكثر من (مليون*) طريقة للغناء في كردفان براها، ودي حالتا ٨٠٠ ألف منها بالعربي.. بالله ما مفروض يكون في كلية موسيقا في غبيش؟ هسّع لو ما عمر احساس دا ما كنا مفتكرين إنو السلم السباعي دا مستورد وما من عندينا إلا جابوهو ناس خليل فرح (أعبدة) واسمعيل عبد المعين (التاكا) معاهم من مصر ثم قالولنا خنقته خماسية التم تم خنقا (طبيعيا!)؟ طلع يا هو داك عايش في دارفور!! ما ممكن ياخي موسيقا البجا الوحيدة البعرفوها السودانيين هي لسّع موسيقا أغنية (يا بنية فندان دبنة بي شمالو) الدب الياكل اذاعة أم درمان وتلفزيونها وكلية الموسيقا وأساتذتها!! يبدو انها مرت إلى الذائقة العامة عبر ما قدمت من الرشاوي اللغوية ولا تزال تقدم لهم في الرشاوى الفكاهية.. أو كفولكلور!!
بي صراحة وبالله، ناس غنا وموسيقى (الربوع) ديل أظنهم قدموا ما يكفي من هدايا ورشاوي ومن صبر ومن غيرو.. خلاص كفاية.. مامفروض يكون في هوامش موسيقية تاني، الاذاعات الاف ام والفل اوبشن والمذيعات السمحات على قفا من يشيل.. محمد النصري براهو يساوي ٥٠٠ من ناس أغاني وأغاني، تاني ما عايزين زول يستبدل ايقاعات أي قوم لتناسب مزاج وإيقاعات أي قوم تانيين مولودين وقاعدين في داونتاونات الخرطوم القديمة .. الما عاجبو يقلب الموجة طوالي..
ومن هنا نحي عمر احساس طالما حافظ على أصل أغنيته وإيقاعها ورقصتها وطالما طورها وبا ريت بعيدا عن تخت الاذاعة والكلية.. كما ونصفق لبطولات عبد القادر سالم ولعاصم الطيب وتاني منو؟ حافظ عبدالرحمن والباقين ما بعرفهم، لا أحد.. لا موسيقا لا كدنداية لا كول لا سلات لا ربابة لا لا لا.. ياخي محتاجين الفرصة لكي يمكن لأي موسيقى وغنا موجود لأن تتطور لأهلها أولا وثم فليعرفها الأخرون لو رغبوا، لكن عن اصالة وكما هي، وليست كمنحة تستوجب الرشوة أو الشكر.. والأهم، لأن أهلها موجودين وعايشين، فليست بعدها فولكلور، أوعا من الفلكرة..
يا (أولاد قلبا) المرة الجاية حنطلع مظاهرات من (جابريات) الهوامش الموسيقية والغنائية، وبدل (دايرين بوسطة ومدرسة وسطى والشفخانة وسوق منضبطة) حنهتف (دايرين كليات موسيقا محطتين إذاعة وتلفزيون وحديقة).. ما معقول يا ناس هنا أم درمان ياخي، هناك آخرون!!

هذا، مع أكيد محبتي وتقديري..

* مليون دي مبالغة حسنة النية.. فوجاج ناس الأقاليم.. :)

فاطنة سيدي غالي: جماليات النشاز..!فاطنة سيدي غالي: جماليات النشاز..!

كم هو جميل انةيشارك في هذا البوست شقليني احمد امين سفيان كوستاوي و هاشم الحسن ،،،، تنوع في الافكار الموقع الجغرافي من خرطة العالم و يشترك الجميع في الاحتفاء التقدير و الاحترام لتجربة الفنان عمر احساس

يا ناس واشنطن لا تدعوا الفرصة تفوتكم استمتعوا بشغل عمر و سوناتا المميز و الزول الجاكم قاطع البحار و الاف الاميال اصلوه علي بعد عدة اميال بعرباتكم الشديدة و سمحة

لم نتمكن من الحضور للمشاركه رغم تشوقنا للإستماع للفنان الرائع
عمر إحساس , التحيه له وعلى المشرفين على ذلك الحفل .
رغم موقفى وتعارض قناعاتى من سياسات اللجان التنفيذيه الحاليه للجاليه
إلا أن ذلك لم يكن السبب لعدم حضورى لكن ما الحكمه لحفله لفنان
كبير كعمر إحساس فى واشنطن أن تقام يوم الجمعه بدل السبت ؟