Post: #1
Title: بوست إعتذار للاستاذ الموصلي ... والله صحي !
Author: امير بوب
Date: 06-14-2017, 12:46 PM
Parent: #0
11:46 AM June, 14 2017 سودانيز اون لاين
امير بوب-UK
مكتبتى
رابط مختصر يا استاذ موصلي ياخ رغم الاشتباك الموجود
و تصاعد وتيرة النقاش في بوست كاونتربوينت
فأنا عاوز اعتزر ليك عن حاجتين !
الاولي هي ربطي ما بين غياب حاتم عن المنبر في المرة الاخيرة
و التلميح بإنه ربما كان لك يد في ذلك ، و قد تبيّن لي فيما بعد عدم صحة ذلك !
الحاجة التانية ، أعتزر لك عن المخاشنة اللفظية التي تمت بيننا ، فأنا والله ما تعوّدت ان أكون
عنيفاً مع من هم اكبر مني سناً علي الأقل ! و لذلك و خلال المشاكسات دي فربما وجدت نفسي
مضطراً لاستخدام شيء من العنف اللفظي و المخاشنة دون الإنتباه لفارق السن بيننا او المكانة التي تُحظي بها وسط معجبيك !
....
هذا بمثابة إعتزار رسمي لك عن هذين الأمرين ، ولَك العتبي حتي ترضي !
و ليبقي الوُد و الاحترام متبادل بيننا !
....
باقي الحاجات زي ما هي ... و الكوماج في محلو !😂
|
Post: #2
Title: Re: بوست إعتذار للاستاذ الموصلي ... والله صحي !
Author: معاوية المدير
Date: 06-14-2017, 01:10 PM
Parent: #1
أنا زمان ما قُتلك تعال إعتذر في البوست حقي .
بعدين يأخي إعتذار ما إعتزار، مالك دير تسوينا
في شمطة تاني كمان !؟...
|
Post: #4
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-14-2017, 01:34 PM
Parent: #2
ههههه
يا ود المدير لاكين انت عملتها شينة
قبل ما يوجهولك أي اتهام انت جرّيت واطي !
بس ياها كاد المريب ان يقول خذوني !
...
الغلاط يا صاحبي انت فتحتلو بوست كامل !!
هسي يجيك اب زمبارة يقطّعو ليك في حنانك 😂
تحياتي
|
Post: #3
Title: Re: بوست إعتذار للاستاذ الموصلي ... والله صحي !
Author: MOHAMMED ELSHEIKH
Date: 06-14-2017, 01:15 PM
Parent: #1
اتذكرت التكيلي وعنقر
وهما بصين عندنا في الحلة بين القرية وبربر
كان بيناتم مضبوح كلب وتنافس ومشاكل لا اول ولا آخر لها
يوم كدى عايزين يعدو بالبانطون بتاع الباوقة
التكيلي ضعيف جدا في السواقة وماقدر يدخل الباص البانطون
الحل الوحيد يقوم عنقر يدخل للتكيلي باصو وقد كان.
في اثناء رجوع عنقر ببص التكيلي للخلف نحو سقالة البانطون وهو منتشي
جاهو التكيلي قال ليهو:
"يازول تدخل ماتدخل شكلتنا في محلها"
تحياتي د. امير
ومثلها للاستاذ الموصلى
وعندي سؤال في بوست سعادة المستشار
|
Post: #5
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-14-2017, 01:38 PM
Parent: #3
يا ود الشيخ سلام
سؤالك دا نحولو للمستنير معاش !
منها نفتّشو شويه !
طبعاً هو ما بعرف في الآلات الموسيقية غير المندلين و البُنقز !
لاكين ندّيه شرف المحاولة !
...
مستنيركم دا تعبان شديد !
|
Post: #6
Title: Re: بوست إعتذار للاستاذ الموصلي ... والله صحي !
Author: حيدر حسن ميرغني
Date: 06-14-2017, 01:38 PM
Parent: #3
قبيل قررربت اقول لامير ماتراسل الموصلي بالايميل :))
عارف الموصلي حنكو حلو .. حايقنعوا ويضيع علينا متعة الماتش
-
بمزح يابوب
انت واحد من الناس الادت البوستات المعنية نكهتها
|
Post: #7
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-14-2017, 01:42 PM
Parent: #6
سلام يا حيدر
لا لا ما تخاف ، عارفو ليك كويس حنكو سنين !
لاكين دا براه ودا براه !
فما توصّي حريص !
....
دي اسمها سياسة الدخول للعقارب في جحورها !
هسّع بطقطقو ليك زي الترتيب 😂😂
|
Post: #8
Title: Re: بوست إعتذار للاستاذ الموصلي ... والله صحي !
Author: حيدر حسن ميرغني
Date: 06-14-2017, 03:30 PM
Parent: #7
كده طمنتني لحدي العيد الكبير :))
|
Post: #11
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-14-2017, 08:41 PM
Parent: #6
ابدا والله
يا حيدر انا زول الله ساكت في بلد الله
هسع د بوب هو الحنكني
--------------
هسع تلقى لسان حاله يقول
ما قتو نوبه
|
Post: #16
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-15-2017, 03:11 AM
Parent: #3
حبيبنا محمد نعل قريتكم
نقزو او القدواب
فزوجتي ابوها من نقزو وامها من القدواب
ديل ناس طيبين
الغريبه
محمود علي الحاج من القدواب
ومجذوب اونسه من نقزو
--------------------
تحياتي مثنى وثلاث ورباع
|
Post: #9
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-14-2017, 04:00 PM
Parent: #1
د بوب ياخي انت زول
كلك زوق في الادب
واذنك كلها تذوق في الموسيقى
اصدقك القول انا في كثير من الاحيان بعمل
كلك ل "اضف رد"
اقوم اقول لا حول ده شنو يايوسف
اعتذارك مقبول جدا ومرحب به
واسعدني جدا وابهجني جدا
اثمن فيك جدا محاولتك لم الشمل من المنظور الاجتماعي
كن والجميع بحير
اخيرا بختي لقيت لي صاحب في لندن
|
Post: #10
Title: Re: بوست إعتذار للاستاذ الموصلي ... والله صحي !
Author: جمال ود القوز
Date: 06-14-2017, 05:26 PM
Parent: #9
تسلم امير ..
ويبقى الود بيننا كأحبة وأخوة ..
ورمضان مبارك عليكم جميعا ..
ولاستاذنا موصلي التقدير والتجلة ..
وممنونين كتير لسعة صدره وتحملنا ..
|
Post: #12
Title: Re: بوست إعتذار للاستاذ الموصلي ... والله صحي !
Author: درديري كباشي
Date: 06-14-2017, 08:52 PM
Parent: #10
خلاص يا أمير مدام عقلت أوعى تجيب السوناتا هنا كمان
وتحايا لكبيرنا الموصلي
وكبير دي على بياض يا موصلي
تشمل كل شي
وشهركم مبارك
|
Post: #13
Title: Re: بوست إعتذار للاستاذ الموصلي ... والله صحي !
Author: حيدر حسن ميرغني
Date: 06-14-2017, 09:23 PM
Parent: #12
غايتو ياموصلي الكاونتربوينت ده طلع برادعي عديييل :))
هسع تطلعوا اصحاب ونحن نروح تحت الرجلين
-
المستنير الظاهر دخل الفيلم ده قبل كده
د. امير يامخرج الروائع واصل بعد المفاصلة كما وعدت
|
Post: #14
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-15-2017, 00:50 AM
Parent: #13
سلام يا موصلي
شاكر و مُقدّر دخولك البوست و شكراً لكلماتك في حقي
....
رغم اختلافي معك موسيقياً ، و لكن يبقي الوُد و الاحترام متبادل بيننا !
أبشر والله مافي مشكلة تب انت بس تعال لندن و خلي الباقي علينا !..
.تحياتي
|
Post: #20
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-16-2017, 07:44 PM
Parent: #14
حبيبنا بوب
شكرا لكرمك الحاتمي
انت في النهايه سوداني اصيل
بوست العفيص ده برغم
البرطعه الفيهو الا انه كان مفيدا
وجعل الجميع يبحثون عن معاني المصطلحات
ومحتويات السوناتات التي
تنضح بالكاونتلربوينت ههههههه
|
Post: #18
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-15-2017, 12:08 PM
Parent: #12
العزيز درديري
لك التقدير ويا اخوانا
بالله ما تزعلو لو شفتوني قمت بي نمرة واحد
ياخي المنبر ده مرات فيهو ناس بزعلو جد
انا اسف مقدما
------------
وزي ماقال امير ملعون ابو الكانتربوينت ياخ
كل التقدير
|
Post: #15
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-15-2017, 03:06 AM
Parent: #10
للقوز مانسينا وللقوز ليس نجهل
كل الود ليك ياجمال
|
Post: #17
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-15-2017, 11:18 AM
Parent: #15
سلام حيدر حسن ميرغني
| Quote: د. امير يامخرج الروائع واصل بعد المفاصلة كما وعدت |
...
يا حيدر الجماعة ديل حسمناهم زمان و بالضربة القاضية !
المستنير فعلاً طلع تعبان خالص
جندلتو من اول جولة .. و عملت ليه حقارة عمرو بن عبد وُد
بالمسلمين في معركة الخندق !
و بقيت ما سلكت انا درب بوست ، إلا سلك المستنير درب آخر 😂
...
الموصلي ، انا رخيت ليه الأبنص شوية لإعتبارات ... لاكين بلِم فيه في زقاق تاني !!
...
باقي الرشاشات ديلك حمام ميت ساي !
|
Post: #19
Title: Re: بوست إعتذار للاستاذ الموصلي ... والله صحي !
Author: Basamat Alsheikh
Date: 06-15-2017, 08:19 PM
Parent: #17
بالله ما تزعلو لو شفتوني قمت بي نمرة واحد
ياخي المنبر ده مرات فيهو ناس بزعلو جد
(QUOTE)
><><><><><><><><<
الاستاذ الفنان الموصلي
مش يزعلوا وبس!! لكن بفقعوا المرارة ويرفعوا ضغط الدم لغاية الشريان ما ينفجر...
اميرة بت السيد فقعوا مرارتها وفجروا شرايينها وهربت واشترت هدوء البال وراحة النفس
ووصلت الآن مرحلة النقاهة..
لكن نقول شنو !! راسنا قوي وبنحب البهدلة ، وفي نفس الوقت
ما بنقدر نبتعد عن الجماليات التي تعبق وتنتشر في بعض نواحي المنبر العام..
ودمت بألف خير وصحة وعافية
|
Post: #21
Title: Re: بوست إعتذار للاستاذ الموصلي ... والله صحي !
Author: Osama Mohammed
Date: 06-16-2017, 08:56 PM
Parent: #19
الصديق د. امير بوب
والاستاذ موصللي
بقية الاخوة الاكارم
سلام عليكم وكل سة وانتم طيبين
الموصللي انسان سوداني بسيط وطيب ودي من علامات المبدعين
(ولكني لم اجد نفسيرا لاستعمالك نوتة وعدم الاشارة لمصدرها ؟؟؟؟)
رغم ذلك كنت مستمتعا بالنقاش بحساب ان لي معرفة بدكتور امير واعرف انه انسان يحب المعرفة
والبحث والتقيب و( قراااااي ) وكان الاخ حاتم ( هداه الله ) يواصل اسئلته الا ان ظهر ان حاتما ( لم يأت لحوار وانما اتى لأجندة اخرى )
وفقدنا توصيل المعرفة حتى ان استاذنا موصللي قد انجر وراء الاساءات المتعمدة من حاتم
امير يا سادتي والله اسم على مسمى ( امير بالجد )
وانا ما بقول كدة عشان صاحبي لانو كل واحد مننا ممكن يدي التاني ف راسو بالحديدة ولكن هو انسان اصيل و( بني ادم في النهاية ) يزعل وينبز و( يغالط ) هههه
نصحيتي لاستاذنا الموصلي
تاني ما تتداخل مع حاتم ولو في واحد فتح بوست موسيقي قول رايك لكن ما تنجر لمنقاشات مع ناس ما بتعرفهم
ولا بتعرف قصدهم من المناقشات دي شنو لانو الحصل من حاتم دة فضيحة والله وانا متاكد يا استاذنا انك بتكون عرفت الشخصية الحقيقية.
دمتم كلكم
وايامكم بسكويت ع قول بهنس الله يرحمو...
|
Post: #24
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-17-2017, 10:49 AM
Parent: #21
عزيزي اسامه سؤالك مشروع
واحد في البوست طلب تحليل اثبت كلامي عن وجود الكاونتلابوينت في السوناتا
مشيت شلت التوته من النت لانه لاداعي لكتابة نوته لعمل توجد عشرات النسخ منه في النت
ختيتها وعملت تحليلي الخاص جدا الذي حاولت ان يكون مختلفا
وكان في اصرار من الشخص صاحب البوست انو ده ما تحليلي
قمت اتحامقت وتوسعت فيه شويه برضو اصر
واعتقد انو عارف ده تحليلي لكنه يتشفى
--------------
عموما انا وقفت نهائي منه مع انني لا احب الحقارة
ومحاوللة استغلال انو ده فنان مشهور وبخاف على اسمه
هسع بقيت ولا بفتح البوست اياه لو رد هو اورد احد المعارضين له
ونصيحتك غاليه ومحترمة وهسع لو جا رد هنا زي مارد عليك
ما حاشتغل بي ردو ولا بكلف نفسي مشقة فراءة رده
فلا جديد تحت الشمس الغرض اتضح جلياكل الود
|
Post: #25
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-17-2017, 11:03 AM
Parent: #19
بسمات لعلك طيبة
والله ماقلت الا الحق
اولا للحق فان الغالب الاعم هم من الناس الطيبين
وقلة لا تعد باصابع اليد هي تلك التي تسبب ازعاجا وغبارا خبا في الظهور فقط
عموما انا بالفعل بدات الانسحاب التكتيكي
دون الانسحاب الكامل
ساكون قارئا مشاركا في الاجتماعيات
فانا ولا فخر من الذين ساهموا في بناء هذا الصرح
الذي يرتع ويردح فيه البعض من عشاق الهوس الظهوري
تحياتي لك وللأميرة
|
Post: #22
Title: Re: بوست إعتذار للاستاذ الموصلي ... والله صحي !
Author: حاتم إبراهيم
Date: 06-16-2017, 09:29 PM
Parent: #1
Quote: نصحيتي لاستاذنا الموصلي
تاني ما تتداخل مع حاتم ولو في واحد فتح بوست موسيقي قول رايك لكن ما تنجر لمنقاشات مع ناس ما بتعرفهم |
هاهاهاهاها
وتنوم بعد صلاة العشاء طوالي
وتمسح كرعينك بزيت فرامل عشان ما تجري شديد
ولو سألوك راجع كويس قبل الرد عشان ما نخجل ليك
والموسيقى دي خليها اشتغل مع أخوات إن والأسماء الستة
حاتم الكعب الله ينعلو، الشين العاطل الحفيان.
|
Post: #23
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-16-2017, 10:14 PM
Parent: #22
الصديق Osama Mohammed
ازيك يا باز ... و كتّر خيرك ياخ علي الكلمات الرقيقة في حقي
وهي شهادة اعتز بها.
نحن يا اسامة ناس قمنا علي البحث عن المعلومة و حب الغلاط
و المشاكسة التي لا تتجاوز حدود الأدب !
فالمغالطة في حد ذاتها تعتبر اُسلوب معرفة و ادارتها نوع من الفن !
...
استاذ موصلي اختلافاتي معه فنية بحتة و لايوجد فيها ما هو شخصي !
انا لا أعادي احد يا اسامة ... و لا افجر في الخصومة !!
تحياتي
|
Post: #26
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-17-2017, 11:16 AM
Parent: #23
Quote: استاذ موصلي اختلافاتي معه فنية بحتة و لايوجد فيها ما هو شخصي !
انا لا أعادي احد يا اسامة ... و لا افجر في الخصومة !! |
د امير
ما اعتذارك هذا الا دليل على انك ابن ناس ومتربي ومن اسرة كريمة
ليس المشكلة في الخلاف فهو امر طبيعي بين البشر
اعتذارك يا سيدي
يبين الوان الخيوط ويجعل اصلك الطيب جليا فانا احترمتك جدا جدا
كن بخير وكن فخورا بصديقك باز
وان باذن الله جاي لندن
|
Post: #27
Title: Re: بوست إعتذار للاستاذ الموصلي ... والله صحي !
Author: حاتم إبراهيم
Date: 06-17-2017, 11:24 AM
Parent: #1
Quote: مشيت شلت التوته من النت لانه لاداعي لكتابة نوته لعمل توجد عشرات النسخ منه في النت
ختيتها وعملت تحليلي الخاص جدا الذي حاولت ان يكون مختلفا
وكان في اصرار من الشخص صاحب البوست انو ده ما تحليلي
قمت اتحامقت وتوسعت فيه شويه برضو اصر
واعتقد انو عارف ده تحليلي لكنه يتشفى
--------------
عموما انا وقفت نهائي منه مع انني لا احب الحقارة
ومحاوللة استغلال انو ده فنان مشهور وبخاف على اسمه
هسع بقيت ولا بفتح البوست اياه لو رد هو اورد احد المعارضين له |
هههههه
غايتو ترقعها بجاي وتمشي تقدها تاني بهناك
قال (اتحامقت) قال ههههه يا سلام!
يا راااااجل، الحماقة دي انت وقفتني بسببها مرتين
وشتمتني أكتر من عشرة مرات
وكابست ليها مواقع المبتدئين عشان تخارج روحك
+++
قلت لي بقيت بقيت ولا تفتح البوست إياه
كدي عيد النظر شوية تاني 
ماشين على (تحليل) الطير المهاجر
تعال اتحامق تاني هههه
|
Post: #28
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-18-2017, 08:50 PM
Parent: #27
كان من الاولى لك ان تحترم انسانا وقف معك وقفة رجال
برغم جهلك الفاضح
فياخي احترم د منير الراجل فتح بوست اغتذار وانت بتحاول تولع فيهو النار
شويه فكر واعقل
عندك بوستات كتيره ممكن تعمل فيها الحركات البايخة دي
احترم زميلك وصديقك ولا تحرجه
|
Post: #29
Title: Re: بوست إعتذار للاستاذ الموصلي ... والله صحي !
Author: حاتم إبراهيم
Date: 06-18-2017, 09:23 PM
Parent: #1
Quote: كان من الاولى لك ان تحترم انسانا وقف معك وقفة رجال
برغم جهلك الفاضح
فياخي احترم د منير الراجل فتح بوست اغتذار وانت بتحاول تولع فيهو النار
شويه فكر واعقل |
وأنا هنا جاي أقيف معاهو وقفة رجال
الوضع الطبيعي تشكره على الاعتذار وتتخارج
مش تعمل البوست مشكرة ومحمدة!
برغم سرقتك المخجلة وكذبك المستمر
أنا هنا عشان أضمن إنك ما حتستغل البوست
عشان بكرة تهمز وتلمز وتقول ليهو (انت شكرتني) أو (انت اعتذرت لي)
حركاتك البايخة ديك
يدق الدلجة ستة مرات ويحدثنا عن (الجهل الفاضح).
|
Post: #30
Title: Re: بوست إعتذار للاستاذ الموصلي ... والله صحي !
Author: حاتم إبراهيم
Date: 06-18-2017, 09:36 PM
Parent: #1
Quote: كان من الاولى لك ان تحترم انسانا وقف معك وقفة رجال
برغم جهلك الفاضح |
بعدين ياخي تخانة الجلد دي ما كويسة
الراجل وقف معاي أساساً ضد المكيدة والتأمر العملتو انت دا يا يوسف (أوعك تطالب بالدليل)
يعني انت وقفتني بالمؤامرة وهو ساعدني أتداخل غصباً عنك
وبعد دا نفسك مفتوحة عايز يعتذروا ليك؟؟!!
ياخي عليك جنس بجاحة وغلظة شعور.
أعوذ بالله
|
Post: #31
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-18-2017, 10:56 PM
Parent: #30
غايتو النقطة تسعه دي بتجيب جنس بلاوي
|
Post: #32
Title: Re: بوست إعتذار للاستاذ الموصلي ... والله صحي !
Author: محمد محمود محمد
Date: 06-19-2017, 01:40 AM
Parent: #31
صدقني يا أستاذ موصلي لو واصلت الرد ستكون أنت الخاسر
حتّى لو أثبت صحّة وجهة نظرك .
:
|
Post: #33
Title: Re: بوست إعتذار للاستاذ الموصلي ... والله صحي !
Author: Elmosley
Date: 06-19-2017, 09:26 AM
Parent: #32
عزيزي محمداتفق معك
مع ان هذا البوست ليس فيه موضوع حوار او خلاف في شئ نطري او اكاديمي
البوست ده صاحبه وهو د اميراعتذر لشخصي
وانا قبلت الاعتذار وهو موقف نبيل
والدنيا سمن على عسل
هل في اي داعي لدخول شخص متطفل اخر لتعكير صفو هذا التصافي ؟؟؟
عشان خاطرك كلامك المعقول سكتنا
وفعلا صاحب الاسم اذا تبادل التخاشن مع نكره فانه الخاسر
وانا اعترف بذلك ما كان يجب ان انجر واقصر قامتي ليتسلق عليها شجر اللبلاب
ويا د امير بوب ما دام انت اثرت التغاضي والسكوت على التعدي على بوست اعتذارك
فانا منسحب منه ولن اعود اليه
الا انني اشكرك على شعورك الطيب الذي
لم يطب لي الاستمتاع به
ولك الاحترام مازال
|
Post: #35
Title: Re: بوست إعتذار للاستاذ الموصلي ... والله صحي !
Author: امير بوب
Date: 06-19-2017, 10:10 AM
Parent: #33
سلام يا موصلي
...
غرض البوست عندي كان هو الاعتذار لك عن جزئيتين محددتين
و قد قمت انا بذلك ، و انت قبلت الاعتذار!
غرض البوست عندي انتهي منذ حينها ... و لم أعد اليه مرة أخري
لانه لا يوجد ما يستحق الأخذ و الرد حوله !!
....
خالص الشكر لجميع زوار البوست
|
Post: #34
Title: Re: بوست إعتذار للاستاذ الموصلي ... والله صحي !
Author: حاتم إبراهيم
Date: 06-19-2017, 10:09 AM
Parent: #1
| Quote: وانا اعترف بذلك ما كان يجب ان انجر واقصر قامتي ليتسلق عليها شجر اللبلاب |
قامتي ؟؟؟
|
|