مقتطفات من الماضي على صدى الذكرى

07:41 AM January, 11 2017

سودانيز اون لاين
درديري كباشي-
مكتبتى
رابط مختصر

مقتطفات من الماضي التليد
النيفة والكاوبوي
تجيب كرتونة فاضية وتصنع منها كاستكة مثل رعاة البقر الأمريكان ( الكاوبوي ) وحبذا لو وجدت فك خروف ابو ضروس داك من مخلفات النيفة ( لحمة الرأس) شكله يشبه المسدس المحشو بالطلقات ..تضعه على جنب في حافة الشورط ( الردا ) وتمشي متقدلا تحكي صولة الكاوبوي ..
وتنطلق بعد العصر تحاكي جرية الحصان وتدعمها بصوت من فمك ( كربتك كربتك كربتك كرتبك ) وهكذا . ولها جرية معينة كأن تقدم رجل على الأخرى بصورة ثابته حتى تشبه جرية الحصان تماما. ونجري في الحارة نقلد أفلام الكاوبوي أول ما يظهر لك أحد الأصدقاء تبادره قبل أن يسبقك تخرج عظمة الفك من رداك وتبادره ( تيشن تيشن تيشن ) ويبدأ الغلاط في ( كتلتك ما كتلتني أنا كتلتك أول والله أنا الكتلتك .. يا حليلنا لم نكن نتصور أن يأتي زمان يكون القتل فيه لا يحتاج غلاطا .).
وتكتمل معالم فلمنا الذي لا يسجله أحد وتكتمل الصورة أكثر إذا كان في الحلة بيت جديد تحت التشييد فإن سقالات البناء والسلالم تصنع لنا ديكورا لا يقل شبها من أستديوهات التصوير . نتجارى على الجدران المبنية والسقالات ونتخبى متربصين لبعض .
كانت أفلام رعاة البقر الكاوبويات في أوج عظمتها ( دجانقوا وترسانة وأميقو وترنتي ) أصحابنا .. لا نعرف نقرا ترجمة ولا نعرف انجليزي وهم أصلا قليلي الكلام .. جملة جملتين وتبدأ المسدسات تنطلق ..
ورغما عن ذلك نفهم قصة الفلم ونعود نحكيها لمن لم يشاهده .. أن نكون صريحين كل واحد يحكيها بفهمه هو ولا ضير في ذلك .
ومرات تلاقي السينما صامتة تماما مركزين في أحد يراقب آخر .. كأنهم لا يريدون أن يلفتوا نظر العدو .. وبعض مرات واحد غتيت من المشاهدين واقف في صف الخيانة في حالات نادرة فينبهه ( وراك يا اميقو) ويصادف يتلفت المقصود وتدور شكله من أحد قاصري الفهم ياخ مكلمه مالك أنت ياخ الراجل طلع عينا من قبيل هسع فوت الفرصة . وقد يتطور الجدل الى مضاربة ( دكشومان ) غير حق الشاشة .

زمن يا عجلة
شوفوا العجلات وصلت وين لا بدال لا سداري ولا قومة نفس تقعد بس
أذكر أول عجلة أمتلكتها كانت عجلة أخي الأكبر .. بعد ما دخل المرحلة المتوسطة اشترى عجلة جديدة وأنا ورثت القديمة وكانت حالتها بائسة جدا
قصيرة القامة ملحمة في ( الكدر) أي الهيكل العظمي بتاعها في عدة أماكن .
لكن رغما عن ذلك فرحي بيها سال ملا حتى الخوابي .
أول خطوة سلمناها جارنا في المكتبة بالسوق العجلاتي ( تكر) فرتكها وشحمها ..
وأنا جالس قربه أراقب بشوق وشغف .
في النهاية تكر قال لي ( نصلح لك الفرامل ؟ )
قلت له لا ما يحتاج .أصلا هي كانت قصيرة القامة يعني ممكن (أحك فرملة برجلي أذا أحتجت )... هذا لأني ضايق عاوز أصل البيت بسرعة واتباهى بها مع أصحابي ..
استلمتها بكل فرح وشوق وسقتها متجها الى البيت بشارع المربعات
لأنها هي كانت مشحمة جديد مرنة وسريعة جدا .
أول ما نزلت من كبري المربعات متجها ناحية البيت .و لأنه الكبري عالي جدا .
نزلت متدحرجة بسرعة وبدون بدال ( تشبه العجلة صاحبة الصورة )
وانا في سرعتي هذه تجاوزت كل العجلات التي تسبقني .
في شاب يسوق عجلة أفتكرني أنا في سباق معه .
أول ما حس بي أقتربت منه زاد في سرعته وأصبحنا متوازيين .
أنا ليس لدي خيار ما عندي فرامل ليس امامي حل سوى الاسراع أكثر .
لكن كل ما أزيد في السرعة هو كذلك يزيد أكثر .
وأنا كنت من الناحية الداخلية للشارع يعني في مرمى العربات عاوز أفوته حتى أخرج من شارع الأسفلت لأنه العربات أصبحت واحدة من خلفي وعربات جاية من الأمام ( زنقه ما يعلم بها الا الله )..
أخيرا أنا اسب واسخط من الناحية اليسار لاحظت لكوم رمل قطعت الشارع يسارا ولبست في كوم الرمل وسقطت مبتلعا قدرا لأ بأس به من الرمال .. الحمد لله الأصابات خفيفة مقارنة بما كان ممكن أن يحدث لو واجهت سيارة قادمة . لكنت الآن نسيا منسيا .
قضيت مع تلك العجلة الصف السادس الابتدائي
مع عدة مواقف بعدها
حتى أراحها الله مني وأراحني منها
وبقيت الذكرى

الشفيف الرهيف درديري براااك عارف وبي ادرى سنين راااحو والحال ياااهو زاااتو الحال وفي جواي صدى الذكرى ...
عد بينا للنيل يا حبيب فمعين الذكريات لا ينضب ابدا ,,, واصل يا حبيب
ياخي والله مشتاقين من سماية ناس عبس ديك وعيك ههههههههههههههه .

تحياتي : ياسر العيلفون ....

لشفيف الرهيف درديري براااك عارف وبي ادرى سنين راااحو والحال ياااهو زاااتو الحال وفي جواي صدى الذكرى ...
عد بينا للنيل يا حبيب فمعين الذكريات لا ينضب ابدا ,,, واصل يا حبيب
ياخي والله مشتاقين من سماية ناس عبس ديك وعيك ههههههههههههههه .

تحياتي : ياسر العيلفون ....

يا سلام عليك يا فنان يا أجمل والله مشتاقين لصوتك الندي

تتذكر لامن كنت تدندن لينا في البريك في شركة ايتكس

كان في واحد اسمه حاتم ما بيطلع للغداء بس يقعد يسمع فيك .. وين راح حاتم داك تاني ما لاقاني ابدا

الذكريات صااادقة وجميلة مهما تجافينا بنقول حليلا ااا .
ابو الدر يا حبيب يا حليلنا فيها كانت ايام سعيده وربي مناي تعيدا نسعد فيها تاني ونعيد فيها الاماني ... تلك ايام مضت وفعلا كانت حلوة بالجد لا هم لا غم
ياخي فعلا حاتم داك انا نفسي ما شفتو من ايام شركة ايتكس ديك والله حقو الواحد ينزل ليهو بوست ويسال عنو امكن نلقى اخبارو ،، حاتم كان مستمع جيد ياخي مش زي صاحبك الما بجيب اسمو داااك ههههههههههههههههه ،،، لكن الحق يقال صابحك عيني فنان للاسرة الكريمه من ايام ايتكس ديك وللان واحتمال لي بكره لو ربنا حيانا والخروج النهائي خلانا ههههههههههههههههه .
تحياتي ليك ولي حاتم اين ما كان ولي صاحبنا الما بجيب اسمو دااااك ... وكاااك ...
واصل يا حبيب في هذا الابداع ...


ياسر العيلفون .......

اولاد المدن ديل حكاياتم لذيذة خلاس
على بجملة الايمان كان حكيت ليك حكايات ناس صقيعة سلامة في ذااااااك الزمن التليد
علا اطلعك حنكوشة كلو كلو
قال شارع زلط قال هههههههههههه
وهذا مع التحية والشوق وقطع شك بجيك صاد
كونك وقعت لي في ود اب تشتي

اولاد المدن ديل حكاياتم لذيذة خلاس
على بجملة الايمان كان حكيت ليك حكايات ناس صقيعة سلامة في ذااااااك الزمن التليد
علا اطلعك حنكوشة كلو كلو
قال شارع زلط قال هههههههههههه
وهذا مع التحية والشوق وقطع شك بجيك صاد
كونك وقعت لي في ود اب تشتي
------------------------------

هههههههههههههههههههههههه

في انتظارك يا جميل