مناضلو الخارج .. قاعدين بره في الباردة وعايزننا في الداخل نقلبها ليهم

06:15 PM November, 25 2016

سودانيز اون لاين
محمد بشير عبادى-السودان/ولاية الخرطوم/أمبدة
مكتبتى
رابط مختصر

عشان بعدين يجوا يحكموا بمزاج بدون أي خسائر ... لا اعتقالات ولا ضرب ولا بمبان .. بس ضغطة كي بورد وشوية شمارات على تهويلات وبيانات من هنا وهناك ونحن في الداخل نروح في الكازوزة..غلاء بي جاي وحكومة قاهرة بي هنا ومعارضة كسيحة بهناك .. غايتو الله كريم علينا

يعني انت عايز تقلب الحكومة؟
طيب بنجيب ليك تعهد من ناس الخارج أنهم ما حيجوا يحكموا بمزاج و انت و من معك من الثوار
تحكموا برااااكم، هل ستعلن الثورة بمجرد ما يجيك التعهد و للا حتواصل اللولوة؟

حأواصل لولوة يا سيف النصر متل لولوتك دي..هو من متين معارضو الخارج بدوا تعهدات؟؟؟ ما شفناهم زمن نميري وزمن البشير ده ذاااااتو

الأخ عبادي تحياتي
يا أخوي ناس الجنايات لم تحدث جريمة أول حاجة بفكروا فيها منو المستفيد من الحدث؟
أها عشان نقرأ بوستك دا قراية سليمة وفي توقيته الزماني والمكاني
ببقى من الذكاء أننا نستلف هذه القاعدة الذهبية في قرايتنا للكتابات الجنائية
ليه عبادي بيكتب في هذا التوقيت الزماني الحساس هذا البوست التخذيلي؟
أي منو المستفيد من الحدث هنا؟
أقصد هذه الكتابة الجنائية.
ما بهم أنك كتبت بوست آخر غطاء لموقعك الحقيقي من المعمعة
ما كمان ما عايزة شطارة إنه الناس تتوقع هجوم مضاد للهبات الشملت الأطفال وطالبات المدارس
الحكومة لقت حشيشة الطابور الخامس وما أدراك ما أصبح تقليدي وضعيف المفعول التخذيلي
أخشى ما تخشاه الحكومة أن تتحول هذه الهبات لثورة جماهيرية
الدعاية المضادة هي الدرب الوحيد لتخذيل هذا التدافع الثوري
وهنا لازم تكون في شطارة في شكل التخذيل وعناوينه والأسماء البتتولى أمره ألخ
بس صدقني الهبات العفوية مهما رشقوها بكل المخذلات حدها تغيير النظام
عارف ليه يا عبادي أخوي
لأن ما بني على باطل مصيره الإنهيار

لا تروح فى الكازوزة و لا تزلقك موزة
خليك قاعد فى بيتك
مافى زول ح يسألك ليه ما طلعت مظاهرات
سمح
__
تبرير فطير

يا عبادي الواضح ما فاضح باعلانك مواصلة اللولوة فقد اوضحت موقفك و فرزت عيشتك
واصل يا زول اصلك ما تقيف.

يا حبيب ناس الخارج و انا منهم مكتوين بنار الداخل و ناس الداخل البقوا هبود بتعرف الهبود

ما هو انت سألتني اسي بمداخلتك دي يا جلالدونا

الكلام دا عيب والله يا أخ عبادي ..
أولا مافي فرق أو تفرقة بين السودانيين سواء في الداخل أو الخارج لإنو ببساطة الفى الخارج ديل هم الشايلين أهاليهم في الداخل وممولين الدولة ..
إذن هم فوق إنهم سودانيين أصحاب وجعة حقيقية دا لو أغفلت من كان وراء خروجهم مضطرين .

الأخ محمد علي المك .. انا بتكلم على مناضلي الكي بورد وليس كل السودانيين بالخارج فهم اهلنا ولهم افضال كثيرة على السودان واهله ولكن كلامي مصوب للذي يدعو للثورة ويخطط لها حتى يلتهم كيكتها بعد نجاحها .. لماذا لا يأتوا للمشاركة من الداخل؟؟ الجمرة بتحرق الواطيها

يا عبد الصمد اخوي حيلك حيلك مد ثوري شنو وفي ليلة وكنا حشود بنصارع عهد الظلم شنو .. يا خوي ده كان زمان الليلة الناس بتتكلم عن فقه الصبر على السلطان حتى ولو كان جائر لأن المفاسد التي تأتي بعده أكبر من المصالح .. الناس وعت يا اخونا

Quote: الليلة الناس بتتكلم عن فقه الصبر على السلطان حتى ولو كان جائر

أضحك الله سنك يا عبادي أخوي
طيب ليه بقولوا عنك كدا

فقه الصبر على السلطان و زوجتيه و اخوانه و ازواج اخواته و اقاربهم و اصهارهم و جيرانهم
لتناول المرطبات بمنزلهم الكائن في كافوري جوار مسجد النور.

Quote: فقه الصبر على السلطان و زوجتيه و اخوانه و ازواج اخواته و اقاربهم و اصهارهم و جيرانهم لتناول المرطبات بمنزلهم الكائن في كافوري جوار مسجد النور.

Oscaaaaar

هوى ما تتلولو فوقى
انا ما سألتك
انا وريتك تعمل شنو
و يا ريت كمان يكون من سكات
و بعدين صبر شنو و سلطان جاير شنو
شيخنا العارف بالله الورع التقى ازرق طيبة
اعلن عن مطالبته بالتغيير و دعا الجميع بالركون لى خيار العصيان
علماء السلطان ديلاك قول ليهم خلاص باى باى
صفرجت

!* إختيار الحاكم يتم عبر الإرادة الشعبية إنه خيار الجماهير ـ ففي نظام ديموقراطي حقيقي -تعددية وحريات عامة تفاضل الجماهير بين البرامج والمرشحيين وتختار من يمثلها !
* هذه هي قواعد الديموقراطية وأسسها التي يستوعبها كل وطني ومناضل أيا كان موقعه -بالداخل أو الخارح ! أما أنصار الشمولية فيقتصر فهمهم علي التغيير عبر الإنقلاب وإمتطاء ظهور الدبابات فلذا يتوهمون أن إسقاط نظامهم الفاشي سيتم عبر إنقلاب يقوده مناضلو الخارج !
* أصحاب الضمائير الحية والحس الإنساني والواعز الوطني الأصيل إنحيازهم لشعبهم وللحرية والقيم الوطنية أما دعاة التخذيل وأنصار الشمولية فمكانهم هو التمسح بأقدام الطغاة فكل ميسر لما خلق له !
** المجد للشعب والوطنين والخزي لكل متمسح بجو خ السلطان الجائر ـ طمعا في سلطة أو ثروة وحتما سيسقط نظام الفساد والإستبداد !!

هناك سياسى مصرى اسمه " ايمن نور " .. وانا شخصياً اُحبه كثيراً واحترمه واثمن رجاحة عقله وكاريزمته .
فى ما قبل 11 نوفمبر او ما اُطلق عليها ثورة الغلابة فى مصر , وكانت هناك ارهاصات باستخدام عنف مفرط .
قال " ايمن " انه يعيش فى الخارج آمن على نفسه , ولذا لا يستطيع ان يطلب من الناس النزول للشارع حيث لن يكون ضميره مرتاح .
قال ان النزول وعدم النزول هو سلطة تقديرية فى يد من هم فى الداخل , وهم من بيدهم تقدير الموقف , وان التواجد فى الخارج هو للاستفادة من حرية التحرك الاعلامى وتكوين الجباه .
***
وانا اقول , صحيح ان من كان فى وضع آمن هو وافراد اسرته , ويطلب من الناس الخروج للمحرقة دون ان يدفع هو شخصياً او احد ابنائه ثمن الخروج , سيخلق حالات احتقان ورفض .
الموجودين فى الخارج دورهم ينحصر فى التحرك الاعلامى بحرية , اما ان يُمارسوا استاذية انزلوا واطلعوا , فهذا استفزاز ومرفوض .
من بالداخل هو من يقرر كيفية المواجهة وساعتها وابتكار اساليب سلمية جديدة , الداخل كتلة جماهيرية واعية هى من صنعت الهبة الشعبية فى 21 اكتوبر 1964 , وهى من اطاحت بنظام مايو فى 1985 .
***
انا شخصياً لا ادعو شخص للتظاهر طالما انا عاجز عن حمايته , هناك وسائل اكثر ابداعاً , وبالتأكيد سوف يتوصل لها من هم بالداخل .

يا شيخ عبادي ....الناس الآن طلعت مظاهرات وما اتكلمت عنهم بس حرقتك بوستات ناس الخارج ديل ؟ ؟ ؟ انت الظاهر عندك غبينة مع ناس الخارج .
لو الوضع عاجبك ومبسوط ومرتاح أبقى عليه 10 بس ، أتذكر إنو في ناس ماكلا نيم ما لاقيين لا أكل لا علاج ولا تعليم ....
ناس الخارج زيهم زي ناس الداخل ، نعم قاعدين في دول مرتاحة لكن هم عقولهم شاردة مع الناس والأهل التعبانيين والمرضانيين وما لاقيين علاج ....
ما تخلي ناس الخارج هم حيطك القصيرة ...
سلام

ناس الخارج مقطوعين من شجره ماهم ونسلهم للوطن
ونسلهم قاعد جوه البلد وطالع فاتح احضان للرصاص

الدم ماببقى مويه

نسخة تانية للمعتوه وائل حمزة الزبير،
واللآ إسموا آيه مُش عارف !...

كل كم شهر كده بيكون في بوست بالمعنى ده

أو كلما تحصل زنقة:


عندما لا يخرج المناضلون رغم أنهم مرطبون (توجد نماذج) ...

يا راعي البوست
"غلاء بي جاي وحكومة قاهرة بي هنا"
لو الغلاء صحي موجعك بتطلع عشانه
مش لأنه ناس الخارج قالوا ليك أطلع
ولو الحكومة صحي قاهراك
بتطلع ضدها ولو أن كل ناس الخارج قالوا ليك أقعد وما تطلع

لكن
لو كان عندك وضع متميز بسبب الإنقاذ
(يعني إرتحت حين تعب الناس السودانيين وشبعت حين جاعوا)
فبديهي حيكون واقف وين ومع منو
أتمني أن لا نشوفك شايل كلاشنكوف وبتفرتق في المظاهرات

يا محمد بشير
اذا انتو قدرتو تقلبوها ...حتكونو انتم الامراء
ونحن الوزراء...
شنو رايك ...مش دي عدالة ...
..مناضلو الخارج ما قاعدين في الباردة. ...لانك
اذا انت عرفت المعاناة البيعانوها في الغربة والعذاب
النفسي والظلم الذي يشعرون به واضطروا بسببه
ترك الوطن الحبيب...لكنت قلت..لا بل انتم الامراء
ونحن الوزراء..
وتاكد يا محمد ان مناضلوا الخارج لا يناضلون من
اجل مناصب او سلطان او مال ولكن من اجل استعادة
عزة السودان ومجد السودان ورفاهية السودان ورخاء
السودان وسمعة السودان ..التي اصبحت ملطشة بين
شعوب العالم...
قرات في كتاب لمؤلف اجنبي ان السودان في الستينات
والسبعينات كانت دولة لها اسمها اللامع والوضاء وكان
الغريب عندما يقابل سودانيا في الغربة..يساله ::من اين
بلد انت؟ وعندما يرد السوداني::من السودان..يقول له
هذا: من بلد محمد احمد محجوب الدبلوماسي العريق.
..من بلد الازهري الرجل الشجاع النزيه...
...واين نحن الان وكل نسمع عن فضائح ونهب وسرقات
...تزكم الانوف....
والله يديك الصحة والعافية

انت خسران شنو انو المناتلين ديل يكتبو ؟!

كان السؤال وكان الجواب فقه الخروج عن الحاكم ..

ثم كان كلمة عيب بتاعت استاذنا ومولانا الملك ..
ثم عبدالصمد "ايواااا فقه الخروج
ثم اوسكار سيف ..

ساضيف قصة خيالية حقيقية من الفيسبوك بقلم احد الاصدقاء بمناسبة اوسكار سيف ..


#تناكح_الفساد_وتناسل_الاستبداد
تعالو النوريكم المحنة الواقع فيها وزير العدل السوداني عوض الحسن النور ..
قبل سنتين تلاتة ظهرت قضية ميدان في المعمورة استغلتو مدارس كامبردج والمواطنين جاطو وقالو المدارس دي بتاعة قرن كبير في الحكومة.. القرن الكبير في الحكومة انا واجهتو في صفحة السائحون وتوعدني بالملاحقة القانونية.. قال المدارس ما بتاعتو وعلاقتو بيها انو (فقط) عضو في مجلس الادارة .. المدارس بتعة خالو و دخلو في مجلس الادارة واهدى ليهو 15% من اسهم المدرسة .. وقال انا رشحت ليهو اخوي في الله السعيد عثمان محجوب يكون معاي في مجلس الادارة وبرضو اداهو نفس النسبة.
طبعا بكلام الكفار دة اسمو (تداخل المصلحة conflict of interest) و بنهج النبوة اسمو (فهلا جلس في بيت ابيه فينظر ايهدى له؟)
طيب لو وزير العدل عايز يفتح تحقيق في قصة المدارس دي واراضيها حيلقى انو المسؤول الحكومي دة هو (امين حسن عمر) .. اللي هو اخو زوجتو ... يعني خال اولااااااااااااااااادو.. حاجة محرجة موش كدة؟
نجي لقصة الادوية ..
وزير العدل قال لناس البرلمان انو في شركات و بمساعدة من موظفين في (بنك السودان) استولوا على 230 مليون دولار مخصصة للادوية .. و وزير المالية بدرالدين محمود قال (هناك ايادي خفية استولت على اموال الادوية).
وزير العدل قال انو القصة دي انتهت باتفاق مع الشركات النهبت القروش انها تتحلل وترجع القروش المنهوبة على اقساط... وذلك بالاتفاق مع القيادة السياسية ...
القيادة السياسية المفروض تكون مهتمة بالموضوع دة هي:
1- رئاسة الجمهورية
2- وزارة المالية
3- وزارة الصحة
4- جهاز الامن
ليه وزير العدل قبل بتسوية في الموضوع دة بدل تحقيقات اوسع ومحاكمات؟
انا عشان افهم القصة دي ختيت نفسي مكان وزير العدل ... فحدثتني نفسي الامارة بالخوف بالاتي:
طيب يا ود يا ابوالسعود ... تمشي تحقق في الموضوع دة و تجرجر المجرمين ديل قدام المحاكم:
فرضنا يا ابوالسعود يا وزير العدل خشيت بنك السودان قلبت عاليهو واطيهو.
ممممممممممممم... طيب قبل يومين طلع منشور من بنك السودان فيهو توقيع مديرة السياسات والتخطيط اسمها مين كدة (xxxxx عطا عباس) .... ديشااااااك .. معقول تكون اخت الفريق هناي مدير جهاز البتاع الوطني؟ .. مع الكيزان ديل مافي شي بعيد.
طيب سيبنا منها قول اختو .. اصلا المتورطين موظفين عاديين ...
اها قوووول يا وزير العدل ظهر ليك في التحقيق انو ابن السيد عوض الجاز الموظف ببنك السودان متورط... اممممممممممممك ..دي مشكلة كبيرة .. ابوهو مساعد الرئيس لشؤون الصين وروسيا .. ومن جهة تانية بينكح ابنة السيد/ بدر الدين محمود وزير المالية شخشيا ..
اوفففففففففففففففففففف
طيب ياخ هسة قول ساكت ظهرت شركة باسم الزبير بشير مثلا .. ضرب مثل ساي .. الزبير دة نعم والي سابق لكن بنتو بينكحا ودنافع علي نافع.. ايوة نعم نافع مساعد رئيس سابق لكن ما زال عندو وزن في الحزب.. غير كدة بنتو بينكحا ود الزبير محمد صالح .. ايوة نعم ابوهو نائب رئيس اسبق و استشهد لكن اختو بينكحا ودبكري حسن صالح نائب الرئيس الحالي ... اهااااااااااااااااااااااا .. دي عوجة.. شربكة شديدة.
هسة قول ظهرت شريكة بتاعة زول عندو علاقة بخليل عبدالله بتاع الاوقاف داك و والي غرب دارفور .. ولدو محمد خليل بينكح بت نافع علي نافع وبرضو نفس الشربكة.
يا ابوالسعود يا وزير العدل مشكلتك كبيرة ..
طيب تحلها كييييييييييييييييييييييييييف .
ياخ انت مالك ومال المشاكل والبهدلة والاحراج .
ياخ بلا شفافية بلا محاسبة بلا بطيخ .
نشتغل بفقه التحلل و ونتكتم على اسماء الشركات واصحابا وخلاص.
.
.
.
يا جماعة عشان نتجنب مشاكل زي دي نبعد من الاستفراد بحكم البلد ومؤسساتها لافراد تنظيم واحد وانسباءهم واقرباءهم واصهارهم .. الكفاءة فقط .. والمحاسبة والشفافية .
لانو تناكح الاستبداد يؤودي لتناسل الفساد ... او العكس
.
.
كامل التضامن مع وزير (العضل) في محنته .. انا لو مكانو بقدم اللوتري
#العصيان_المدني27نوفمبر

المناضلين والفرز جوه وبرا
ماتبقي عليك قصة لا غزيت ولا شفت الغزو
أنشالله نقدر نمرق من تحت اللوري المقلوب دا
ما هي حلم كان أتحقق حقك محفوظ دا ما تعهد بس برضو عشان الارواح الشريرة تبعد مننا
تعرفوا الجن من أفضل الخلوقات النارية لكين مزعج

Quote: تناكح_الفساد_وتناسل_الاستبداد تعالو النوريكم المحنة الواقع فيها وزير العدل السوداني عوض الحسن النور .. قبل سنتين تلاتة ظهرت قضية ميدان في المعمورة استغلتو مدارس كامبردج والمواطنين جاطو وقالو المدارس دي بتاعة قرن كبير في الحكومة.. القرن الكبير في الحكومة انا واجهتو في صفحة السائحون وتوعدني بالملاحقة القانونية.. قال المدارس ما بتاعتو وعلاقتو بيها انو (فقط) عضو في مجلس الادارة .. المدارس بتعة خالو و دخلو في مجلس الادارة واهدى ليهو 15% من اسهم المدرسة .. وقال انا رشحت ليهو اخوي في الله السعيد عثمان محجوب يكون معاي في مجلس الادارة وبرضو اداهو نفس النسبة. طبعا بكلام الكفار دة اسمو (تداخل المصلحة conflict of interest) و بنهج النبوة اسمو (فهلا جلس في بيت ابيه فينظر ايهدى له؟) طيب لو وزير العدل عايز يفتح تحقيق في قصة المدارس دي واراضيها حيلقى انو المسؤول الحكومي دة هو (امين حسن عمر) .. اللي هو اخو زوجتو ... يعني خال اولااااااااااااااااادو.. حاجة محرجة موش كدة؟ نجي لقصة الادوية .. وزير العدل قال لناس البرلمان انو في شركات و بمساعدة من موظفين في (بنك السودان) استولوا على 230 مليون دولار مخصصة للادوية .. و وزير المالية بدرالدين محمود قال (هناك ايادي خفية استولت على اموال الادوية). وزير العدل قال انو القصة دي انتهت باتفاق مع الشركات النهبت القروش انها تتحلل وترجع القروش المنهوبة على اقساط... وذلك بالاتفاق مع القيادة السياسية ... القيادة السياسية المفروض تكون مهتمة بالموضوع دة هي: 1- رئاسة الجمهورية 2- وزارة المالية 3- وزارة الصحة 4- جهاز الامن ليه وزير العدل قبل بتسوية في الموضوع دة بدل تحقيقات اوسع ومحاكمات؟ انا عشان افهم القصة دي ختيت نفسي مكان وزير العدل ... فحدثتني نفسي الامارة بالخوف بالاتي: طيب يا ود يا ابوالسعود ... تمشي تحقق في الموضوع دة و تجرجر المجرمين ديل قدام المحاكم: فرضنا يا ابوالسعود يا وزير العدل خشيت بنك السودان قلبت عاليهو واطيهو. ممممممممممممم... طيب قبل يومين طلع منشور من بنك السودان فيهو توقيع مديرة السياسات والتخطيط اسمها مين كدة (xxxxx عطا عباس) .... ديشااااااك .. معقول تكون اخت الفريق هناي مدير جهاز البتاع الوطني؟ .. مع الكيزان ديل مافي شي بعيد. طيب سيبنا منها قول اختو .. اصلا المتورطين موظفين عاديين ... اها قوووول يا وزير العدل ظهر ليك في التحقيق انو ابن السيد عوض الجاز الموظف ببنك السودان متورط... اممممممممممممك ..دي مشكلة كبيرة .. ابوهو مساعد الرئيس لشؤون الصين وروسيا .. ومن جهة تانية بينكح ابنة السيد/ بدر الدين محمود وزير المالية شخشيا .. اوفففففففففففففففففففف طيب ياخ هسة قول ساكت ظهرت شركة باسم الزبير بشير مثلا .. ضرب مثل ساي .. الزبير دة نعم والي سابق لكن بنتو بينكحا ودنافع علي نافع.. ايوة نعم نافع مساعد رئيس سابق لكن ما زال عندو وزن في الحزب.. غير كدة بنتو بينكحا ود الزبير محمد صالح .. ايوة نعم ابوهو نائب رئيس اسبق و استشهد لكن اختو بينكحا ودبكري حسن صالح نائب الرئيس الحالي ... اهااااااااااااااااااااااا .. دي عوجة.. شربكة شديدة. هسة قول ظهرت شريكة بتاعة زول عندو علاقة بخليل عبدالله بتاع الاوقاف داك و والي غرب دارفور .. ولدو محمد خليل بينكح بت نافع علي نافع وبرضو نفس الشربكة. يا ابوالسعود يا وزير العدل مشكلتك كبيرة .. طيب تحلها كييييييييييييييييييييييييييف . ياخ انت مالك ومال المشاكل والبهدلة والاحراج . ياخ بلا شفافية بلا محاسبة بلا بطيخ . نشتغل بفقه التحلل و ونتكتم على اسماء الشركات واصحابا وخلاص. . . . يا جماعة عشان نتجنب مشاكل زي دي نبعد من الاستفراد بحكم البلد ومؤسساتها لافراد تنظيم واحد وانسباءهم واقرباءهم واصهارهم .. الكفاءة فقط .. والمحاسبة والشفافية . لانو تناكح الاستبداد يؤودي لتناسل الفساد ... او العكس .

لا حول ولا قوة إلا بالله

سلام دكتور محمد وتحية لصاحب البوست رغم إختلافي معه

Quote: من بالداخل هو من يقرر كيفية المواجهة وساعتها وابتكار اساليب سلمية جديدة , الداخل كتلة جماهيرية واعية هى من صنعت الهبة الشعبية فى 21 اكتوبر 1964 , وهى من اطاحت بنظام مايو فى 1985 .

عزيزي شاهين شاهين، كلامك غير دقيق، ولو استبدلت كلمة الداخل بالخارج سيكون أكثر دقة.
هذا رأيي طبعا، ولتبريره مستعد أزور معاك المقابر لإحصاء الراحلين الذين صنعوا أكتوبر
ثم نعرج على مقابر الأحياء (جهاز المغتربين) لإحصاء أحياء ثورة أبريل العاملين بالخارج
خلاصة:
معظم الشباب القادر على إشعال الثورة الآن وقاعد في السودان، هم من عهد الإنقاذ ولا علاقة لهم بأبريل أو أكتوبر
أما الرجال والنساء الذين تخطوا الخمسين، إما هم كيزان أو استنفدوا حيلهم (حيلهم بالمعنييْن) في تدبير المعيشة
أما كون شباب اليوم قادر على اجتراح ثورته الخاصة، فهذا وصف سندخره لكتاباتنا بعد قيام ونجاح الثورة وليس قبل ذلك
ولّ شنو؟

أشكر جميع الأخوة المتداخلين الذين اتفقوا او اختلفوا معي.. الذي أريد قوله انه المحرش ما بكاتل .. وأهو شفتوا النتيجة اليوم لا عصيان مدني ولا يحزنون الداير الدواس يجي لا جوه وبلاش تحريشات ساكت من بره .. الناس هنا ادرى بمصلحتها وقيادة الناس كالقطيع من قبل الاحزاب اضحى من الماضي..توجد معاناة خانقة نتيجة الازمة السياسية والاقتصادية التي نعيشها ولكن والعلاج بالمعارضة الرشيدة الايجابية والتي اثمرت بتراجع الحكومة عن قراراتها الاخيرة بخصوص الدواء.. لا نريد احلال للنظام بقوة أو بفوضى نريد معارضة فاعلة تراعي مصلحة المواطن لا يهمنا ذهاب زيد ومجئ عمرو ما يهمنا استقرار البلد في امنه وسياسته واقتصاده.. المحافظة على الدولة وليس النظام