Post: #1
Title: جمعة مُباركة
Author: أبوبكر عباس
Date: 09-13-2016, 01:12 AM
01:12 AM September, 13 2016 سودانيز اون لاين
أبوبكر عباس-الإمارات
مكتبتى
رابط مختصر معقول بس أنا زول مستنير كبير، وعلاقتي بالفيسبوك والواتساب تكون ضعيفة كدا؟!
لوهلة ظنيت يكون فاتني الكثير عبر وش الكتاب والواتس، وحسيت انو استنارتي ممكن تكون مهددة بالجهل؟!
أها قلت ما أسمع كلام الكافر عبد اللطيف دا، وأمشي أنشط الحسابين.
في يوم واحد رفعت عدد اصدقاء الوش من ١٧ إلى ٧١٨ صديق وصديقة، مع متابعة أصدقاء الاصدقاء والصديقات.
أها بالواتس:
انضميت ل ٢٣ مجموعة ما خليت دفعة ولا فروع عائلة:
بلي ظل ناس حسن يوسف ١٩٧٨
دفعة مسيد ود البابور ١٩٧٢
رواد قهاوي السوق الجديد ١٩٨٨
أحفاد عباس التامرابي
أولاد الجيران ١٩٨٣
دافوري السرابات ١٩٩٠
طلايع مايو ١٩٧٧
الناس الوحيدين الرفضوا عضويتي هم نسابتي؟؟
قالوا لي:
كفاية المحنة النحنا اتورطنا فيها
ما بنكررش الغلطة تاني
كتبوها لي كدا بالمصري
|
Post: #2
Title: Re: جمعة مُباركة
Author: أبوبكر عباس
Date: 09-13-2016, 01:58 AM
Parent: #1
أول مرّة أشوف فليم عباد الشمس كان سنة ٨٤ بسينما ال BN من فوق داخلية النشر، كان معاي زول اسمو السماني من قرية جنب تندلتي اسمها كدايس
قعدنا نبكي بعد الفيلم، تاني يوم دخلناها بالدرب وبرضو بكينا!!
فكرت أعمل معاهو قروب واتس اسميهو:
الحزن النبيل
|
Post: #3
Title: Re: جمعة مُباركة
Author: معاوية الزبير
Date: 09-13-2016, 03:00 AM
Parent: #2
Quote: الناس الوحيدين الرفضوا عضويتي هم نسابتي؟؟
قالوا لي:
كفاية المحنة النحنا اتورطنا فيها |
أنا لو محل نسابتك بقول ليك
لو بي مرادنا فيسك العديل دا حق الله والرسول ما عايزين نشوفو
بمناسبة الحزن النبيل، أولريدي فتحت لي قروب في المنبر دا اسمو: الحزن العيد
أي والله من غير "سين" زاتو
|
Post: #4
Title: Re: جمعة مُباركة
Author: يحي قباني
Date: 09-13-2016, 03:28 AM
Parent: #2
عيدكم سعيد بكور و مِعا ...
يا ابوبكر ... عباد الشمس ده حق صوفيا لورين و مارسيلو ماسترياني و لا واحد تاني ؟
انا شفته في سينما غرب و انا شافع في بداية السبعينات ؟
الجابو البي ان سنة 84 شنو ؟
ما تسرح بينا يا حبيب ... البي ان ما كانت بتعيد أفلام زاتو ...
قول شفته في سينما الخواجة معليش ...
و لا تفتكر ما ادقق في التفاصيل واركز في المضمون ؟ 
|
Post: #5
Title: Re: جمعة مُباركة
Author: أبوبكر عباس
Date: 09-13-2016, 11:52 AM
Parent: #4
ناس الشمالية (من الجيلي لحدي بحيرة السد العالي) كان حضور نشرة تمانية بتاعت اذاعة ام در في مجموعة، لا يقل عن حضور صلاة العشا.
عقلهم الباطن يتمنى سماع خبر وفاة لواحد من أهلهم بالصعيد (الخرطوم لحدي سنار وكوستي)، بلغة معارضة دارفور، سمعة الغالي وم س؛ مثلث حمدي.
لو لاقيت واحد منهم بعد النشرة، قول هو من ريفي دنقلا ومشتهي الشجرة وباسطة اللاماب وقلت ليهو:
ايش يا مهمد ساله، كيف النشرة؟
م صالح: إن نشرات وان دنيات دهن ملي
ترجمة:
نشرة مأفن ودنيا ذاتو معفن
|
Post: #6
Title: Re: جمعة مُباركة
Author: مني عمسيب
Date: 09-13-2016, 12:08 PM
Parent: #5
حبيبنا .. ابكرونا ..
كل عام وانت والاسرة الحبيبة بالف خير ..
ومعاك بالمرة اسلم علي الاصلي ومشتاقة ليك يا اصلي .
والتحية موصولة لي صديقي المفضل ود الزبير ..
وبعدين شنو السلفية الانت فيها دي مستنير ؟ انت العيد عيدت علي
الناس عشان تبارك ليك الجمعة الكل اسبوع ؟
عمومآ العنوان مضلل هههههههههههههههه .
ولكم جزيل الود ,,,
|
Post: #7
Title: Re: جمعة مُباركة
Author: أبوبكر عباس
Date: 09-13-2016, 12:30 PM
Parent: #6
ابدا بالرد على المداخلة الفيها غلاط وبعدين أرجع أبارك العيد لمعاوية ومنى وبعد قباني يقتنع نبارك ليهو برضو.
في سنة اربعة وتمانين كان في اسبوع أو شهو عرضت فيه البي إن عدة افلام لجيلة الجميلات صوفيا لورين، على ما أذكر عرضت فلم الاوسكار الستيني امرأتان، عباد الشمس وجسر الكسندرا
لو مغالطني ارجع لارشيف السينما وممكن حسما للغلاط نكلف خرطومي للذهاب للسينما ومراجعة الملفات
المهزوم يتكفل بمصاريف الخرطومي من تاكسي، عشا وشاي في شارع النيل ومصاريف جيب
|
Post: #8
Title: Re: جمعة مُباركة
Author: أبوبكر عباس
Date: 09-13-2016, 01:17 PM
Parent: #7
تنشيط حساب الوش قادمي لمتابعة أهم أربعة نجوم بالفيس:
دينا خالد
حسين ملاسي
البروف أمين
"الصدوق" جادات
صحيت يوم الجمعة القبل العيد لقيت عندي ٨١٢ رسالة واتسابية تهنأني بالجمعة المباركة
١٠١ صورة لملاح نعيمية
١١١ صورة لشعيرية
١٣ صورة لصحن شيّة جنبو سلطة وشطّة
|
Post: #9
Title: Re: جمعة مُباركة
Author: يحي قباني
Date: 09-13-2016, 03:10 PM
Parent: #8
بعدين
قصة جمعه مباركة دي زاتها عندي فوقها راي !!!
انتو قصة ( جُمعه مباركه ) دي شنو ؟ انتو قصة ( جُمعه مباركه ) دي شنو ؟
|
Post: #10
Title: Re: جمعة مُباركة
Author: أبوبكر عباس
Date: 09-14-2016, 12:48 PM
Parent: #9
يا قباني، وحات منو داك، نسيت البوست بتاعك دا!
الغريبة مداخلة سيف النصر في بالي بتاعت انو جمعة مباركة دي ممكن تكون جات من السعودية.
عموما حقوق الاسم ليك، لكن الموضوعين مختلفات خالص.
أنا ساخر من ونسة الواتساب والفيسبوك وممكن تكون اهدار موارد وزمن ساكت
اليوم ح الغي حسابي بالفيس وسوف احتفظ بالواتس، لأنو بعمل بيهو بعض البزينس
|
Post: #11
Title: Re: جمعة مُباركة
Author: Muhib
Date: 09-14-2016, 12:58 PM
Parent: #10
انت عارف ... الجمعه فعلا مباركه لانها قبل السبت ... يوم الراحه مع الاهل والاصدقاء بعد اسبوع من العمل الشاق
|
|