أمونة بت الشيخ حمد كلمات الشاعر: نجم الدين عبدالله الكرفابى ..............
امونة بت الشيخ حمد ** امونة بت الشيخ حمد ابوها كان مزواج خلاص ** ناسب جميع ناس البلد ميلادها كان عرسا كبير ** هيصة وضبايح مالها حد يوم السماية اتيتمت ** حكم القدر فى الام نفد كانت شبيهة امها ** فى القدلة والعوداللبد وبقت امل كل الشباب ** وجمالها فى بت ما اتوجد فى مرة رفة قليبا يوم ** حبت قريب الشيح حمد واظن كمان حباها هو ** سوى الضلوع لى حبو سد كاتمين غرامن فى القلوب ** ولع لهيبم ما برد خايفين يصارحو يقولو ** شومال بالدايرنو ست خايفين عيون الناس ** تشوفم والخبر يملأ البلد والحب هناك عيبا كبير ** لا بت تبوحبو ولا ولد فى يوم ابوها ضحك كتير ** برم شواربو بلا الاسد ناداها امنة تعالى جاى ** فوق البرش ربع قعد قالتو هوى جاياك خلاص ** قليبة فر وما رقد حاج الخضر عارفاهو داك ** قالتلو ايوة ابو سند ؟؟ جانى الصباح طالب ايديك ** داير نسب شيخ البلد وانا قتلو اهلا بيك تعال ** يومين تلاتة تكون عقد راجلا عظيم عندو القروش ** عندوا الحرير راقد لبد هو كمان كريم واخو رجال ** ماعونو فى يوم ما برد جرن الدموع من عينا شو ** سكتت وابت تديلو رد قام مرق خلاها فات لا سبة ** لا كايس غرض عند المغيرب تانى جاها ** كدى لى محاسن الحاج سرد داير يأثر فى قليبة ** لو كان تقول تديهو رد وقتا غلب واحتار خلاص ولع ** فؤادو جمر وقد فسر سكوت البت رضا ** جهزولو لما الناس عقد والمال مخمخم والحرير ** تحت الرجول مدوهو مد يوم الصفاح والناس تجوط ** بالفرحــــة مقلوبة البلد امونة تبكى بكا السواد ** بدل الفرح جاها النكد وبشيشى قامت للمروق ** فى سرقة ما حس بيها حد كان الحبيب راقد هناك ** والصدمة قادة قليبو قد وقفت قصادو بكت كتير ** لامن دميع العين جمد قام جاها بى شوقو الكتير ** وقليبو داك انهد هد قالتلو ما بى ايدى شى ** ديل ناس ابوى وابو سند اتلملمو وسووا الكلام ** وانا لا رضيت لا جبتا رد داك عندو مالا مو قليل ** وابوى شاف المال سجد ادانى للراجل العجوز ** المن عروقو الدم شرد قايلنى بسعد بالقروش ** ولا المراح الفات ورد لكن محـال اسعد بلاك ** كان السماء ينهد هد بديك قليبى وروحى ديل ** وأعيش هناك صورة وجسد اتراجعت رجعت تصد ** لكن قليبة رجع رفض مسكت دريبا مو قريب ** كم بيهو صف بنوت ورد قاصدة البحر دايره تموت ** لا عيشة لاهم لا نكد اترددت وقفت كتير ** لامن قليبه خلاص صمد شافت مسار النيل حزين ** حتى النخيل حزنان خمد وبشيشى فكفكت الحرير ** لا زينة لا ربيط عقد ما دام حياتا بقت دموع ** وقليبة من زولا انفرد قالت اخير ارتاح خلاص ** ارسى وشقاى القالو حد فى لحظة موج النيل علا ** وفى جوفو غابت للابد
سلام يا منير وشكراً ليك كده حتخفف زعلة منك ليها طاشر سنة في صفحة نادي الطمبور القفلته
Post: #4 Title: Re: من روائـع أشــعار وغنــاء الطمبــور .. Author: كمال عباس Date: 01-16-2016, 06:22 PM Parent: #3
التحية للفنان عيسي بروي أحد الرموز الثقافية والفنية التي تجاوزت محنة السد وفوتوا الفرصة مثيري ودعاة الفتن العرقية بين المناصير والشائقية . في وقت وقع فيه البعض أسري الفتنة وبلعوا الطعم........ الأغنية جميلة بصوت عيسي بروي ولكنها أروع بصوت الراحل محمد كرم الله وبالمناسبة الأغنية تحمل نفس المضامين الإجتماعية لأغنية بت البلد(للثنائي محمد جبارة والسر عثمان الطيب)
Quote: سلام يا منير وشكراً ليك كده حتخفف زعلة منك ليها طاشر سنة في صفحة نادي الطمبور القفلته
لاحولا يا muntasir .. الظاهر عليك عداد سيئاتك كان رامى ساكت وأنا عداد حسناتى كان شغال .. :) .. يازوول يلزمك إستغفار .. ياخوى إنت أكيد ملخبطنى مع زولاً تانى، فأنا ما عندى أى علاقة بنادى الطمبور وصفحات الطمبور .. بل أنا زاتو زعلان زيك من صفحات الشوايقة الغتيتين ديل كلما تجى تسمع ليك حاجة تلقاهم قافلينه إلاّ تكون مسجّل .. شنو الحسادة دى ياخ ؟؟.. معظم المواقع مقفلة كده اللهم إلاّ موقع التوثيق الشامل، مشكورين .. أنا كان عندى صفحة انترنت زمان فى بداية التسعينات ولغاية نهاياتها وكان فيهو شوية أغانى منوعات .. طمبور وغيره .. فياريت توضح لى إنت جبت الغبينة الصعبة دى من وين؟؟ ..
سلام منير في التسعينات والزمن داك المواقع اقل من حردانات المستنير كان في موقع اسمه نادي الطمبور كنت ازوره دائماً لاستمتع باغاني الطمبور انا ما عارف لفحت من وين انه الموقع بتاعك وانت قفلته فالعذر وأمسحها لينا في وش ودالباوقة
ههه .. يامنتصر أنا صفحتى كانت صفحة شخصية وفيها عدة صور شخصية لى كمان وكانت فى سيرفر جامعة سويدية كنت فيها .. وطبعاً بعدما غادرت السويد حسابى إتقفل .. لكنها برضو كان فيها أغانى وكنت عامل ليها لستة top ten عديل .. لكين هن كلهن كانن كم أغنية؟ الشئ ماكانت قدر ده .. داك كان زمن قزقزة ساى وربما لم يكن هناك زائرين كتار لأنو قووقل ده ماكان منتشر ، بل محرك البحث الرئيسى هو ياهوو ..
مرحبتين بالأخ كمال عباس .. عيسى بروى المنصورى فنان مبدع استطاع أن يتوهط بإرتياح فى قلوب كل عشاق فن الطمبور بروحه الفرايحية الحبُوبة وصوته الشجى .. وفى إعتقادى أنه أفضل من غنى هذه الأغنية .. أنا ما لاقتنى بصوت محمدكرم الله .. لو عندك رابط أجدعه لينا ..
Quote: وبالمناسبة الأغنية تحمل نفس المضامين الإجتماعية لأغنية بت البلد(للثنائي محمد جبارة والسر عثمان الطيب)
سنأتى لأغنية بنت البلد ـــ توأم هذه الأغنية ـــ بإذن الله .. لكين كدى فى الأول نحتفى بعيسى بروى شوية..:)
Post: #9 Title: Re: من روائـع أشــعار وغنــاء الطمبــور .. Author: بريمة محمد Date: 01-17-2016, 01:34 AM Parent: #8
سلامات ول أبا منير،
والله عشت مع أمونة بت الشيخ مأساتها من أولها لنهايتها ..
لكن نسألك يا منير .. هذه ليست أغنية .. يا أخى أنا لحدي هسي، طلعت وجيت مازلت حزنان .. الأغنية لازم تجعل الزول ينبهج ويفرح .. لكن شغلكم دا بجيب حزن رهيب .. أنا أفتكر أحسن تسموه مناحة .. بدل غناء.
منتظرين يا أخي ..
بريمة
Post: #10 Title: Re: من روائـع أشــعار وغنــاء الطمبــور .. Author: انور تاج السر Date: 01-17-2016, 07:27 AM Parent: #9
يا سلام يا منير، أيوا ياخ كب السلكاية الحنينة بالله.
قال مفك قال
نخليك تمشى شوية فى البوست، و كان الله مد فى الأيام بجيك بأغنيات زمااان العجيبة لو خليت لى فرقة.
ول أبا بريمة، دى مشكلة غنا الطمبور بجرس كان فرايحى كان حزين.
Post: #11 Title: Re: من روائـع أشــعار وغنــاء الطمبــور .. Author: أحمد سيداحمد عثمان Date: 01-17-2016, 08:21 AM Parent: #10
سلام دكتور منير وضيوفه
معك في هذا البوست ، وان شاء الله كل مدة ساقدم اضافات من اغاني الطمبور القديمة والجديدة ,
والبداية بعيسى بروي
بيوت الطين القديمي
Post: #12 Title: Re: من روائـع أشــعار وغنــاء الطمبــور .. Author: أحمد سيداحمد عثمان Date: 01-17-2016, 08:27 AM Parent: #11
بلاد الريد والمحنة بيوت الطين القديـــــــــــــــــمى سلام ليك يعُم يطوفك يحلق في سماكى ديــــمى
بعيد عنك يا بلدنا مصاقر الغربة اللئيـــــــــــــــــمى معاي في البال مابتغيبي وأهيم فيكى مكان تهيمى
صور في عيني تترآئى مشاهد حلوي وعظيــــــمى تشيل من نفسي المآسي وبوآقي الذكرى الأليمى
أشوف لى جنى بى حُمارتو شادها كارب الصريمى يلكد فيها وينهر ويقشـــــــــــــــــــط فيها بى نيمى
ودآك شاقق بى هناكا طلع بى ناس ود مريـــــــمى ودآك من الصباح قايم عجلآن شايل كريـــــــــــمى
ودآكا يخُب ماشى أهلو عشان السمـــا فيهوغيمى عرش بيتو قديم مشقق على فلقاً مو نعيـــــــــــمى
ودآك يلاقيكا باسم كرم فى طبعو صار شيمى يقول لك لآ جوه قنب يكترلك فى العزيــــــــــمى
بعيــــــــــد عنك يا بلآدى حياتى أنا ما ليها قيمى دآير أرجع ليكى وأضُمك وأعيش أنا فيكى لاديمى
Post: #13 Title: Re: من روائـع أشــعار وغنــاء الطمبــور .. Author: Munir Date: 01-17-2016, 09:07 AM Parent: #12
كدى قبل ما أجيكم الـ أعتذر لأخوى muntasir ده لأنو جدد لى ذكريات صفحتى القديمة وأنا من أمبارح بالليل قعدت أجرجر فى الذكرى التى تجمدت وفعلاً تذكرت أنى فى صفحتى تلك كان عندى باقة طمبور وسميت صفحتها نادى الطمبور وكنت راسم فيها طمبور ..
يبقى يا منتصر ليك حق، وحقك علىّ ياخ .. لكين أنا زى ماقلت ليك أنا غادرت السويد من بدرى والجامعة قفلت حسابى .. بس طبعاً الصفحة ماكانت رسمية وكانت تختة للتدريب على Javascript .. ولو إنت قاصد الصفحة دى فربما تتذكر أنها كانت ذات برواز من الورود الحمراء وعندما تبدأ تشغيل الأغنية كانت هناك فراشات تطير وترقص وتحوم فى الصفحة على إيقاع الأغنية .. فأنا كنت أستمع واتفرج فى رقيص الفراشات وهى تحوم فوق الصفحة ـــ كانت برمجة Javascript منى ساى لكنها كانت تعطى الأغنية بُعد تانى ـــ ..
فعلى العموم أنا أعتذر على كلامى الأول ـــ الذاكرة بقت تعبانة ـــ وهاك وجهى أمسحها فيهو .. :)
Post: #14 Title: Re: من روائـع أشــعار وغنــاء الطمبــور .. Author: Munir Date: 01-17-2016, 09:24 AM Parent: #13
السلام مطبوق للأخ رفيق درب السلام بريمة .. :) أنا كنت عاوز أكتب : (البداية بمأساة أمونة بت الشيخ حمد) ؛ لكين عدلت عن ذلك وقلت ما أبدأ البوست بعبارة مأساة .. وخليك قريب هناك أغنية أخرى إسمها بت البلد وهى أيضاً تعكس صورة حزينة عن قهر البنات والعرس الإجبارى فى الزمن القديم .. بس الكويس فى بت البلد إنها ما وقعت البحر ..
Post: #15 Title: Re: من روائـع أشــعار وغنــاء الطمبــور .. Author: Munir Date: 01-17-2016, 09:32 AM Parent: #14
ياأنور أها نحن فى البوست ده دايرين نضرب الكف نخرش السلكايى .. استعدل الصف .. وجيب من جوة .. جيبو حى ..
Post: #16 Title: Re: من روائـع أشــعار وغنــاء الطمبــور .. Author: طلحة عبدالله Date: 01-17-2016, 10:04 AM Parent: #15
حباب السراج المنير رائد أدب البديع .. متابعين يا ملك .
Post: #17 Title: Re: من روائـع أشــعار وغنــاء الطمبــور .. Author: Munir Date: 01-17-2016, 11:35 AM Parent: #16
Quote: بعيد عنك يا بلدنا مصاقر الغربة اللئيـــــــــــــــــمى معاي في البال مابتغيبي وأهيم فيكى مكان تهيمى
الأخ أحمد سيداحمد عثمان سلام .. البوست بوستك ، أردم وأرمى قدام .. الفنان عيسى بروى بديع وهو شاعر برضو .. ومن تأثيره على الإيقاع هو أن زاد سرعته شوية .. كنت داير أفتح بوست عن عيسى براهو، لكين خفت الزمن ما يسعفنى ، فقلت خلاس نعمل بوست عام ..
شكراً على بيوت الطين القديمى ــ ختفتها من خشمى هههه .. فيها صور بلدية فى الصميم ـــ أعنى كلمات الأغنية والفيديو كمان ـــ..
طبعاً للأسف الشديد روائع الفنانين الزمان ليست موثقة بجودة عالية زى فنانى اليوم ، وذلك لعدم توفر التقانة الدقيقة آنذاك ..
Post: #18 Title: Re: من روائـع أشــعار وغنــاء الطمبــور .. Author: Munir Date: 01-17-2016, 11:43 AM Parent: #17
كيفك ياطلحة .. بوست الهوى العذرى داك ما تفك حبل القارب بتاعه .. بصراحة أنا عشان ما أغرقه بأشعار سودانية فتحت البوست ده .. لكين بهناك حنتفسح مع الأدب العربى الأصيل .. :) ..
أول مرة أستمع لعيسى بروى على الدارة live كان فى الثمانينات فى حفلة فى مقاشى ـــ بلد الحسان ـــ ومن ديك وعييك .. ثم أصبحت مولعاً بغناءه .. بالجد أنا مشفق على جمهور محمدالنصرى الخرطومى الذى ماعاش أجواء غناء الطمبور فى بيئته .. فإن التشبع بالبيئة هو الصورة الكبرى لتشجين الطمبور والدليب .. فعندما تكون شربان بالبيئة وتسمع الطمبور فيقوم طوالى يسافر بيك على جناح السرعة للبيئة والبلد والنيل والنخيل وبيوت الطين القديمى .. وأنا ما بعرفو ، لكين رغم أنو تشبعى بالبيئة شمومة ساكت حيث كنا نسافر فى إجازات المدارس .. فجمهور النصرى ده لو ذاق طعم البيئة كان بالراحة ممكن يعمل إنتفاضة .. :)
كدى خلونى من النقة الكتيرة، والنشوف كمان أداء نفس الزولى الكا ن طيب من مبدع نورى الفنان معتصم إبراهيم ـــ ده كمان كوم براهو ـــ
نسيت أذكر أن أغنية (زولى الكنت طيب) هى من كلمات وألحان عيسى بروى .. وأشير برضو أن أغنية (ليك اسبوعين ما جيتنا) وأغنية (شلت الدموع ياحبى لمن أعود و اجيك) اللتين يتغنى بهما الفنان صفوت الجيلى برضو من كلمات عيسى بروى ..
سلام يا منير وضيوفه الكرام، حاولت أشارك في البوست الرائع دا بأغنية زينوبة لعيسى بروي وفتشتها وما لقيتها ولقيتها بصوت فنان آخر في حفل تكريم عيسى بروي، ويا ريت تكون عندك يا منير بصوت عيسى بروي.
والمشاركات في البوست دا لسببين: أولهما أعجبني البوست والتوثيق لأغاني الطمبور القديمة الحنينة وثانيهما والاهم:عشان أظهر حسن النويا لمنير مافي شيء شخصي بيني وبينه واختلافي معاهو في العمل العام ومحاربة العنصرية ومافي شيء شخصي والعنصرية ما حبابها كلو كلو، كان قالوا علي معرص أو تعيريص
Post: #26 Title: Re: من روائـع أشــعار وغنــاء الطمبــور .. Author: محمد على طه الملك Date: 01-17-2016, 02:13 PM Parent: #25
تمام يامنير .. أهديك هذه .. لما لها في نفسي من ذكريات وأنا حاضر ومتابع كل لحظات ولادتها مع شاعرها وملحنها الصديق / محمد سعيد دفع الله متعه الله بالعافية. هنا باداء ود كرم الله مغنيها الأول ..
والله السبب مؤسف جداً جداً لقد قام بضربه المتضررون من سد مروي بعد تمجيد الفنان لسد مروي بالأغنية الركيكة الفتنة أدناه والتي لا تشبه أعماله، تذكرني بخاتمة المطاف للمتنبيء بآخر قصيدة ركيكة لا تشبه أعماله أيضاً وكان سبباً بموته، ونتمنى الشفاء العاجل للفنان عيسى بروي الذي أصيب بعاهة مستديمة من جراء الضرب. تحياتي
Quote: كانت بيوت الطين قديمي ، وكان الحن كذلك معتقا !!! كان كل شئ بسيطا وعفويا وساحة الطمبور تصول فيها جياد أصيلة وحرة حين جاء في أوائل الثمانينات ذلكم الشاب المنصوري في حفل عرس بجريف نوري ، صبيحة اليوم التالي ليوم العرس كان الجميع يتحدث عن أغانيه وكان أشهر ما علق منها أغنية القعود . تحدثو عن إيقاعه السريع وطربه المطبوع وهو يوقع مع فرقته المصاحبة تميزت كلمة أغانية بالبساطة والمباشرة . وفي فترة وجيزة كانت (منصوري موقد نار ) وأمونة بت الشيخ حمد والجدي الدابك رضيع وزولي الكنت طيب ورانيا عصفورا شدالي ويا خلا شفت السمحة مالت وانتنت رجفن عضاي كرعي ، وزولي الكنت طيب ، تجمل ليالي الأعراس يزينها عيسى بذلك الأداء الطروب . أصبح عيسى بروي سفير أبناء العمومة بصحبة عادل السيد وظل علما على رأسه نار المناصير لأكثر من عقد من الزمان أنتج خلاله الكثير من الأغاني الودودة. كان كغيره يحلم ببراسيم بيوضة وخضرة جبال كجبي ، لكنه في غمرة ذلك الحلم الجميل لم ينتبه لأن الأحلام المحمولة على بعير السياسة أحيانا قد تستحيل إلى كابوس لا يشفع للعاملين عليه صدق إنتمائهم للعشيرة . كانت الحكومة تقدر عيسى حق قدره كأداة من أدوات الترويج لإقتلاع أهله الضاربة جذورهم في منطقة المناصير ، لم يكن عيسى يهتم من تفاصيل التهجير إلا بما يتصل بذلك الحلم لأهله ولم يكن ليرى غير خروجهم من ضيق المنطقة وحصار الطبيعة إلى براحات وفضاءات جديدة تتسع فيها رقعة الزراعة وتطرح فيها أياديهم المجبولة على ذلك بذور مستقبل أخضر . إلا أن السياسة أفسدت على عيسى ذلك الحلم وغضب عليه أهله وعشيرته ولم يروا فيه إلا معولا يعمل على حملهم على ما يكرهون وتهجيرهم من ديار قمر ومنصور وزراعتهم بواد غير ذي زرع. فأنطبق عليه قول الشاعر : يبرون عظمي وهمّي جبر أعظمهم شتان ما بيننا في كل ما سبب تقاطعت أحلام المناصير مع مراد الحكومة فاستحال حلم عيسى إلى كابوس كما أسلفنا ، تم للحكومة ما أرادت فدفع عيسى ثمن ذلك وناصفه معجبوه ذلك الثمن . تابعت قبل قليل تكريم عيسى بعد عدة سنوات من العدوان الذي تعرض له في ديار منصور وأسفت لذلك كثيرا لفقد الساحة لفنان مثل عيسى . وتذكرت أغنيته الشهيرة : شري الغرا عشق نضارا ونسيت قلبي انا في خدارا ترى متى يدرك أبناء العمومة أن عيسى كان ضحية حلمهم ، وهل نرى "زينوبة" تصول من جديد في دارة حفل يحييه عيسى ، أم أن ذلك حلم أجهضه المناصير كما أجهضت الحكومة حلم عيسى ؟؟
Quote: فى سلك اترخى و شديتو و فى عنوان جواب رديتو"
عليك الله لو عندك تسجيل نضيف أصلى لى اغنية صباى المفضلة، طيبة القرية، نزلو هنا و بعدين نخش ليك فى الباقى.
العزيز أنور .. المرحوم عثمان اليمنى ماشين عليهو إن شاءالله .. أنا الظاهر على ما حأقدر أسوق البوست زى سواقة عمر التاج الشفت .. المادة وسيعة شديد ومتنوعة ــ هناك أغانى قديمة وأغانى جديدة وأغانى وطنية وأغانى عاطفية وهناك مختلف الفنانين قدامى وجدد ، وهناك أغانى بالطمبور ساكت وهناك أغانى مع الإيقاع والكورس وهناك حفلات ووو .. أبدأ من وين وأنتهى وين ؟ قلت أبدأ بأمونة بت الشيخ حمد وبعدها ببت البلد لكين لقينا عيسى بروى براهو محتاج عدة صفحات .. طبعاً أحاول أكتّر ليكم من الـtheory ساى والذكريات التى لا تعنيكم فى شئ ـــ حشو ساكت يعنى ــــ عشان الصفحة ما تبقى ثقيلة على المعدة ..
Quote: والمشاركات في البوست دا لسببين: أولهما أعجبني البوست والتوثيق لأغاني الطمبور القديمة الحنينة وثانيهما والاهم:عشان أظهر حسن النويا لمنير مافي شيء شخصي بيني وبينه واختلافي معاهو في العمل العام ومحاربة العنصرية ومافي شيء شخصي والعنصرية ما حبابها كلو كلو، كان قالوا علي معرص أو تعيريص
النذير حجازى .. ياخ عشان خاطر عيسى وعشان خاطر جيتك دى سأفك الصرة الكنت صاريها ليك وأتجاوز عن إساءتك وسأتناساها ..
الأخ محمدعلى طه الملك.. شكراً على تنويرك للبوست .. المرحوم محمدكرم الله ومحمدجبارة ثنائى ظهر فى فترة واحدة .. ومن الطرائف عندى ودعمتى زمان ــ ونحن صبية ـــ جبنا سيرة محمدكرم الله ومحمدجبارة وأيهما أحسن .. فقام قال لى : محمدكرم الله طبعاً .. وقام علل بأن قال لى: أسَّع أخير تقع من الحمارة وتكسر إيدك ويجبِّروها ليك، واللاّ أحسن يدوك حلاوة كرمِلَّة؟؟ منطق بسيط ومقنع، ينقل ذهنك من الكسر والجبيرة لحلاوة الكرمِلَّة اللذيذة .. فيسيل اللعاب وتختار كرمِ اللَّه :)
Post: #37 Title: Re: من روائـع أشــعار وغنــاء الطمبــور .. Author: علي عبدالوهاب عثمان Date: 01-17-2016, 03:46 PM Parent: #32
Quote: بالجد أنا مشفق على جمهور محمدالنصرى الخرطومى الذى ماعاش أجواء غناء الطمبور فى بيئته .. فإن التشبع بالبيئة هو الصورة الكبرى لتشجين الطمبور والدليب .. فعندما تكون شربان بالبيئة وتسمع الطمبور فيقوم طوالى يسافر بيك على جناح السرعة للبيئة والبلد والنيل والنخيل وبيوت الطين القديمى ..
حبيبنا منير .. هذا هو المربط الرئيسي .. بدون معرفة تفاصيل الجغرافيا بكل عمقها .. الرموز والاشخاص يعني مثلاً ( الرواس والتربال ... إلخ ) لا يمكن ان تعيش القصيدة أو اللحن بعمق .. وخاصة منطقة الممتدة من أهلنا الشايقية إلى تخوم حلفا .. تلك البلاد في غاية الجمال ورغم أنني من العمق النوبي فقد عملت في نوري معلماً في السبعينات .. أجزم لك أنها جنة الله في الأرض وكل إمتداد اهلنا البديرية والشايقية والمناصير .. كان ذلك العهد في غاية الجمال والروعة .. الناس مرتاحين والدنيا ماشة تمام التمام .. نبدأ من منطقة تناقسي ( ناس كرم الله ) وعبر جمال الشايقة حتى ( ننتهي بعيسى بروي ) عند المناصير هذا الامتداد في غابة الجمال والروعة مكاناً وزماناً بشراً .. وإلى الشمال من تخوم دنقلا تى سكوت وحلفا ( حاضنة وردي والخليل ودهب .. إلخ ) ألحان في قمة الطرب فرحاً وحزناً .. ليس فيها دعوة لأي عنصرية أو كراهية ... الخ عشق للأرض إلى الأرض والتاريخ .. حبيبنا منير صدقني التدريس كانت مهنة سياحية تعرفنا من خلالها على كل المجتمعات على ضفاف النيل من كاسينجر إلى حلفا .. عمق وجمال ونضارة وسلم وأمان وكرم .. الخ ( ما في فرق بين الناس ديل أبداً شكلاً وممارسة وسلوك وفن فقط لغة الكلام ) وما تجربة وردي وإسماعيل ببعيدة ..
مودتي واصلوا هذا الجمال ..
Post: #35 Title: Re: من روائـع أشــعار وغنــاء الطمبــور .. Author: احمد حمودى Date: 01-17-2016, 03:35 PM Parent: #30
شكرا اخوى النزير ربنا يشفيه وبروى عندنا معاه لحمة بى خالتو حرم فى مدنى جزيرة الفيل
قبل ما نمشى لقدام هاكم أغنية بت البلد كلمات : السر عثمان الطيب، ألحان وأداء وغناء محمّد جبارة .. وهى توأم لأغنية أمونة بت الشيخ حمد ..الأغنية جايبها من موقع التوثيق الشامل .. والقصيدة لافحها من منتديات الزومة منارة الفقرا..عشان بريمة يتم البكاء :)
بلا خبر طق... الخبر مالي البلد .. قالو ا العريس قام بالاحد الحلي جاطت والحريم يتهامسن .. جاي الولد... كوم من بنات للبير ورد.. يتحدثن..جاي الولد وابختها..واشوقنا نحنا اللينا جمر الشوق وقد كل الحديث الليلي فوق بت البلد
لامن خلاص الليل دخل.. وآخر شعاع من الشمس روّح نزل ضوء القميرة جاء من بعيد بهّر قدل دافر ظلام الحلي قدامو ووصل ناس البلد ..النام رقد .. والماسك السبحه وعبد مشغول هو بي خبر العريس القالوا قام يوم الاحد
وهناك بعيد بي غادي ..في آخر الديار راكوبة ضلها أحر من حر النهار كوم من بروش وجريد تمر.. عيدان صغار ودلوق هدوم موروثة من زمن الكبار وثلاث عناقريبا صغار.. كرّابا متقطّع نزل والنوم من البفوقا روّح تب جفل
راقد هناك كوم من ضياع.. مركب مسافري بلا شراع أحلام مسافري بلا وداع.. ودموع ضياع تتجارى من غير انقطاع احرف أنين ما خطتن ايد بي يراع ليلاً نجومو يودعنو خلاس مسافرات هن سراع
بت البلد عبراتا سدّت في الحلق تبكي وتنوح .. تشرب دموعا وتنشرق لمّان حسيس نقاره جاها من الشرق قامت مع الليل صنقرت وبكت بكت ..شالت طريحتها للدميعات ..كفكفت فجأة السنين الفاتو جن وأيام زمان اتلملمن اتذكرت كانت تقوم فجراً صباح لمّن يقوموا أهل الصلاح ابوها شايل السبحه صاح... يا شافعى..سوّي الشاي سريع..شدّي الملاح شيلي المناجل وامشي قدامي الجرف اتذكرت كانت تسبقو وتمشي تنزل بي تحت تمسك سبيطة التمرة بايدها وتحت تقعد تحش اللوبي للكاويق تقش تصل البحر والموج يداعبا فوق هدوما ينط يرش بعدين تشيل القش تفوت .. واليوم يفوت.. وتفوت سنين وتمر سنين يكبر عمير بت البلد .. ويكبرمعاهو كمان حنين في يوم صباح وصباح هناء واحة عبير نغمة غناء ريحة لبيني مقننه مر الجنا وسلّم علي بت البلد ذي عادتو سلّم وابتعد تابعاهو عين بت البلد بت البلد .. سمعت ضريبات القلب .. يا الله ... مالو ده ها القلب بعد الثبات كيفن خرب .. بت البلد ..عرفت...تحب
اليوما داك بت البلد ما جاها نوم ما دام خيال ود البلد يمشي ويحوم بين الخيال شافت وجيهو الهاش وباش شافت عيونو الفيها فيض احلاما عاش شافت سحاب الريده فوق واديها راش
بت البلد تاهت مع الشوق اللي ما عاد يتكتم والصورة هادي الفي قليبا بتترسم واسمو العلي نونات خديدها صبح وسم تاهت مشت سايقاها دقات الدليب لدار حبيبا ومني القليب لقعدة عصراوية فوق العنقريب للونسي والخاطر يطيب لمسكة في ايد الحبيب الوقفة قدام الجنات القرمصيص وغنا البنات يا الله ..وين تلقى الثبات والصفقة من تالا الولاد ماب تسمعها ..جاياها من آخربلاد
اتذكرت كيف حاج محمد والدها حالف يمين ود البلد ما يآخدا اتذكرت كيف حاج محمد والدها قال ليها ما عندك ادب تعبان سنين فوقك تعب وادّيك لزولا كعب ؟ تربال وعيشتو عدم عدم لا قارئ لا ماسك قلم تاخديهو تندمي صح ندم يشقيك يوريك الالم اتذكرت كيف حاج محمد والدها وصف العريس الجاي بقطر الاحد كتّر محاسنو وعددها... راجل موظف عندو مال يأويك في بيت الحلال تبقيلو لـ أم العيال اتذكرت لمان ابت قول حاج محمد والدها كيف نهّرها .. وحالف يمين بيودرها لو ما رضت بالجاي بقطر الاحد اتذكرت كيف الحبيب ود البلد في الغربة روح وابتعد وبكت بكت بت البلد .. لما الخبر ذاع في البلد انو العريس قام بي الاحد الحلي جاطت والحريم يتهامسن جاي الولد كوم من بنات للبير ورد.. يتحدثن جاي الولد و بختها..واشوقنا نحنا اللينا جمر الشوق وقد لاكنهن ماعرفن الشوق كيف وقد ماعرفن انو هى شوقا تب ما ليهو حد مو للعريس.. ليهو الحبيب ودالبلد الراح في زحمة ضياع وهو ما اتوجد يا حليلك انتي يا بت البلد .. يا حليلك انتي يا بت البلد
لا عليك يا حبيبنا الغالى منير، سوق البوست على مهلك و نحن من خلفك، بس أنا و الله متحسر على تضييع مواد عالية القيمة من جانبى و زى ما بقولو سيد الرايحة بفتح خشم البقرة عشماً فقط لا غير.
البتجيبو كلو حبابو يا جميل لو كلمات أو حتى عنوان اغنية طمبور.
أستاذنا الجليل الجميل علي عبدالوهاب عثمان تحيات معطرة وأشكرك على المداخلة الفلاش .. نعم البيئة مهمة لإستشعار روعة المشهد الريفى الشمالى .. ونحن رغم نشأتنا فى بحرى الشعبية إلاّ أننا كنا نتحرَّق شوقاً لإجازات المدارس والسفر للبلد حيث نمشى ننطلق وسط النخيل وحقول البراسيم وعوم البحر وفواكه الجروف وحش القش .. ومن بعد حفلات الصُفاح .. وغالباً طبعاً الإجازات تمتلئ بمهرجانات الفرح والأعراس المتواصلة .. وزى ماقلت أنت البيئة متشابهة من ديار المناصير وحتى ليس فقط حلفا بل أسوان .. وأنا دائماً تعجبنى صور القرى فى مناطقكم النوبية ، فأرى أنكم أكثر تذويقاً للبيوت بالجير وبوابات الحيشان تهتمون بها إهتمام خاص وراقى ..
ياأنور لو ما أخاف الكضب يخيل لى أغنية طيبة القرية موجودة فى صفحة مكتبة الإذاعة .. بإذن الله نحاول نمشى نغطس ونجيبها لا برّة ..
Post: #43 Title: Re: من روائـع أشــعار وغنــاء الطمبــور .. Author: علي عبدالوهاب عثمان Date: 01-17-2016, 04:44 PM Parent: #40
حبيبنا منير .. بوست توقيته رائع شعر أهلنا الشايقية .. عبارة عن أفلام .. ويمكن تجسيد الكلمات والعبارات إلى صور حية والدليل القصيدة التي أوردتها .. ( بت البلد ) فيلم سينمائي .. يا أخي ديل ناس مبدعين لحناً وكلمة وجغرافيا وأجمل تنغيم للمفردات العربية والنوبية أوعدك أخي منير أن أرسل لك نسخة كتابي تحت طبع (( قراءة نوبية في شعر أهلنا الشايقية )) بي دي إف فيه شرح للمفردات النوبية الزراعية وشرح للغة الرواويس والترابلة .. وقد نشرت جزء منه في هذا المنبر ( قراءة نوبية في شعر حميد ) المناطق دي في غاية الجمال النيل والجزر والشواطيء والبشر وأهم شي ( الأمان ) من تخوم الخرطوم إلى حلفا شوف جمال منطقة نوري ( الكارور والباجور والغويبة ... الخ ) جنائن ونخيل وناس جميلين اصحاب نكتة وشعر ولحن وطنابير
و بى مناسبة طلّة الجميلين هنا اسمح لى اهدى لى اخونا طارق جبريل حاجة حقتو و عبرك اهديها لكل زوار و قراء الفرجيخة الحلوة و عامرة دى لو تعرف شنو البحصلي وكت الليل يفلللو تعرف شنو البحصلي وكت الليل يفلل
Quote: شكرا اخوى النزير ربنا يشفيه وبروى عندنا معاه لحمة بى خالتو حرم فى مدنى جزيرة الفيل
حبينبا أحمد حمودي يا زول إنت شكلك قريبي تب، حبوبتي أم أبوي من جزيرة شري معقل آل بروي، ولعيسى بروي أخ شاعر اسمه محمد بروي قد كتب هذه القصيدة أدناه لمدح والدي عليه الرحمة عندما أحلت به وعكة في السوق:
قصيدة : أسد أب سباع للشاعر محمد بروي
ود حجازي الفارس الشجاع الشمس والعالم شعاع يا أسد عتباي وأب سباع التجار بي جنبك ضباع التجار رأس مالها العقول عقلك أردب وعقلهم صاع لو الرجال بأفعالهم طوال زدت فوق هاماتن ضراع أنت فيهم ملك الزمان والكبار تباع لأتباع لاهو وسواس لاهو سماع لامكر لا غش لا خداع البنازلك ناوي الصراع لي قبيلتو تجدعو أرباع رأس قبيلة وقايداً مطاع ماخلا مسكيناً فيها جاع خير بحر جاري بلا انقطاع والخلوق طامسين للنخاع الخبير الشوم لو اتزاع بكره صاد لي حلقوا بسراع ولو يميل المال جاي وجاي بكره يعرف دربوا ينصاع يا مراكب شدي الشراع وياغبش شدوهو الضراع الأسد مجروحه الكراع وأصلو لو ما هب بسراع المناصير عنوانها ضاع
حبينا علي عبد الوهاب،لافض فوك، وفعلاً مهنة التعليم والسفر والترحال بين قرى الشمالية أنتجت أعظم مبدعي الفن في السودان وعلى رأسهم الفنان القامة محمد وردي الذي جمع بين كل هذه الأشياء،فلقد كان معلماً في بداية حياته وطنباراً وكثير الأسفار في قرى السودان، وهذا لقاء جميلمع وردي نشرته صحيفة الراكوبة ولأن المقال طويل فقد اقتبست منه هذه الجزيئة، ويمكنتكمل المقال في الرابط في الأدنى:
Quote: أني تعلمت عزف العود عام 1954، عندما كنت معلماً في مدرسة قرية أشكيت. كان معي طمبور لا يفارقني. لكن لجنة المدرسة رأت أن تكرم مجهودي في مجال تلحين الأناشيد بأن تشتري عوداً وتهدينيه.قبل ذلك لم أر العود سوى مرة واحدة في الخرطوم. كان ذلك عام 1953، كنت قد أوفدت إلى العاصمة لحضور مؤتمر المعلمين الريفيين الذي عقد في (ضاحية) شمبات (الخرطوم بحري). أثناء بقائي هناك حضرت حفلة زواج ضابط (في الجيش) يسمى عبد الحميد خير السيد، أحياها أحمد المصطفى في حي الخرطوم (3). تلك كانت أول مرة أشاهد فيها إنساناً يعزف عوداً. ولشدة الازدحام لم استطع الدخول إلى مكان الحفلة نفسها، فعلوت فوق دراجة كانت متكية على الجدار، وكدت أصاب بسوء عندما طحت أرضاً، لان صاحبها سحبها لما رآني أتوسل بها لرؤية مكان الحفلة.بذلت جهداً مقدراً بعد النهوض حتى تمكنت من الدخول. ولا أزال اذكر مشهد الفرقة الموسيقية ومن بين أفرادها عبد الله عربي وكان شاباً في مقتبل العمر. وبعدما انتهت الحفلة عدت إلى حوش جدي دياب أحمد بلال حيث كنت أقيم، ففوجئت بأنه رفض أن يفتح لي الباب، ولولا عطف زوجته عليّ لكنت قضيت بقية الليل هائماً على وجهي في مدينة لا أعرف فيها شخصاً.في تلك الزيارة نفسها سهرت حتى الصباح في منزل قريبي أنور محمد صالح في حي الموردة (أم درمان)، مستمعاً للفنان الكبير إبراهيم إدريس (ودّ المقرن)، وهو مغنٍ ذائعُ الصيت، وعازفُ عود مقتدرٌ.اعتاد أهل البلد (قريتنا) أن يلتفوا حولي لسماع غنائي بمصاحبة طمبوري، وعندما عدت في عطلة عام 1954 ومعي العود كانوا يسخرون مني. لكني بقيت أحأول أن اعزف شيئاً مفهوماً من دون مساعدة تذكر. مثلاً كنت عندما أحتاج إلى دوزنته أضطر إلى دوزنته مع الموسيقى التي تبثها الإذاعة السودانية. وفي غضون 45 يوماً أضحيت قادراً على عزف أي أغنية استمع إليها جيداً. وأذكر أن قريبي محمد أمين عبد الرحمن كان قد سبقني في محاولة العزف، ففقته.لم أتعلم العزف على يد أي شخص، وربما كان لخبرتي في عزف أوتار الطمبور، وهي تفوق أوتار العود في صعوبة التعامل معها، دورٌ كبيرٌ في إتقاني عزف العود سريعاً. * الطمبور كيف ومتى تعلمت العزف عليه؟- تعلمته إلى درجة إجادة عزفه قبل دخولي المدرسة الابتدائية (الكُتّاب كما كانت تسمى). وقد تلقنت مبادئه على يد معلمي كامل البنّا حسن عبادي، وهو من أبناء قبيلة المناصير المعروفة في شمال السودان، وكان مشهوداً له في عزف الطمبور. وكان يعاقبني حين أخطئ. وكان الناظر إليه يحار من رشاقة أنامله على أوتار الطمبور، وأعتقد أنه كان أفضل كثيراً من النعام آدم عليه الرحمة. هذا الرجل دربني جيداً وأنا له مدين. كذلك لا تنس أن أخوالي كانوا "طنبارة".
وأخيراً صفوت الجيلى برضو وأغنية إشتقت ليك فى ماليزيا.. ذكرتنى الشرق الأقصى وشهرين قضيتهم فى شيانق ماى شمال تايلاند بلد السحر والجمال والبسمة الدائمة ..
مرحب مرحب بالعزيز إمبراطور التوثيق عماد أحمد .. شرفت بحضورك البوست .. وسعدت بسرورك بالبوست .. وشكراً ليك على رفدنا بأغنية عبدالرحمن بلاص ـــ يانسمة ــــ وده برضو لو الله مدّ فى العمر سآتى ببعض إبداعاته .. ما قلت ليكم أنى خشيت فى بحر بلا سواحل؟ .. هسه أنا أسوى شنو؟ أجى أكتب أى كلمة ألقاها عندها أغنية وفنان وقصة وذكريات .. وألقى نفسى دخلت بخوجلى ومرقت بحمد .. متاهات فى الإبداع السودانى .. لكنى حأعوم حأعوم ، يا غِرِقْ ياجيت حازمها ..
Post: #56 Title: Re: من روائـع أشــعار وغنــاء الطمبــور .. Author: Ahmed Yassin Date: 01-17-2016, 11:27 PM Parent: #54
منير وشركاه .. الكل مدوزن على نحو خماسي صرف الكسر ـ اللير ـ الطمبور المكان العاصمة الزمان بداية القرن العشرين طق الحدث : قدوم فتى وسيم من كبوشية مقتحما العاصمة الغارقة في الدوبيت حاملا سلاحه النووي الطمبور لم يالف مجتمع العاصمة هذا النوع من الغناء من قبل .. ولكنهم وجدوا فيه ضالتهم نزل ضيفا عند قريبه شيخ (اريزونا) زعيم الجعليين بالعاصمة .. زاع صيت الفتى مما استدعى كبار الشعراء في ذلك الوقت والزمان للالتفاف حوله .. سمع والده وهو شيخ كبير له خلاوى ومسجد فارسل المراسيل لـ (اريزونا) لتسليمه ابنه (الغناي) . وقد كان منع الوالد الشيخ او (الفكي) ابنه (محمد) من الغناء لمدة خمسة عشر عاما ولكن ود الفكي تمكن من العودة للخرطوم ليجد فيها ان الجميع يردد غناه
Post: #57 Title: Re: من روائـع أشــعار وغنــاء الطمبــور .. Author: Munir Date: 01-18-2016, 00:39 AM Parent: #56
بمناسبة مأساة أمونة بت الشيخ حمد وبت البلد تذكرت وأنا صبى صغير من حكى لى مشهد من الحياة معلق فى ذهنى منذ ذاك الزمن .. وهو عن زواج فى الشمالية حيث تم عرس بنت البلد غصباً عنها من قريبها رغم رفضها العنيف .. فقد كانت تبكى والحِلّة جايطة والسيرة والصفقة والرقيص شغال والحلاوة والكعك والبسكويت موزع .. والمطرة صابة رشاش خفيف ،، العروس الصغيرة تبكى بكاء شديد ولكن لا حياة لمن تنادى ..
ياإلهى ..المشهذ أذهلنى وأحزننى .. لكين مهما كان، نحن فى الآخر نقول شنو....؟ ... وهكذا شنو ؟؟
Post: #58 Title: Re: من روائـع أشــعار وغنــاء الطمبــور .. Author: Munir Date: 01-18-2016, 00:49 AM Parent: #57
وطبعاً أغلبنا شاهدنا الأفلام والمسلسلات المصرية حيث إجبار البنات برضو على الزواج أو رفض أبوشنب لزواج بنته من محبوبها، والبندقية تكون جاهزة للطخ إذا تمردت البنت ..
وأكتر مشهد برضو أثّر فوقى منذ كنت فى الإبتدائى .. كنا ما عندنا أى ذوق فنمشى نساهر نحضر فيلم السهرة عند الجيران زمن الناس يجوك من آخر الحلة الوراء ويقعدوا يتصبنوا قدام التلفزيون من تلاوة البداية لتلاوة النهاية .. ذلك الفلم الذى لا أذكر منه سوى هذا المشهد للأخت نشوى التى تحب أخوها حب شديد وكذلك أخوها يحبها حب شديد .. فقامت الأخت نشوى حبت ليها شاب وحباها برضو ـــ حب عذرى ساكت ؛ يعنى زى بتاع قيس وليلى .. يعنى نوع الحب الفيهو النسيم يهبهب فى الشعر والجوابات والمناديل المبللة بالدموع ـــــ أها قام أخو البنت عرف إنو أخته غرقانة فى الحب مع ذلك الشاب ، فاستشاط غضباً ـــ حقيقة أنا ماعارف تفاصيل الزعل والقصة شنو ـــ لكين الأخ قرر إنو يقتل أخته الوحيدة التى يحبها حب شديد .. فقام مشى جاب بندقية وعبأها وجاء على بيتهم القروى ونادى أخته : نشوى نشوى .. فجاءت جارية عليه بشوق ومحبة أيوة أخويا ، فقام قبل ما تصله طااااااخ طخاها ...
ياخ أنا لهسه أتذكر المشهد ده أقرب أبكى .. :(
معجزات ربنا ليست فقط فى هذا الكون المادى المنظور المحسوس، بل كذلك فى العالم المعنوى الموازى، المكمِّل للكون اللانهائى، الذى يملأ الأجساد و يكاد يمشى على قدمين ..
Post: #59 Title: Re: من روائـع أشــعار وغنــاء الطمبــور .. Author: Ahmed Yassin Date: 01-18-2016, 05:02 AM Parent: #58
وسط هذا الحنين المتدفق ... شجن يامنير وشركاه شجن نديكم نبذة بسيطة جدا عن الفرق بين (الطمبور) و (الطنبور) (الطنبرة) هو الايقاع الصادر من الحلق والحنجرة وبكون مصاحب ليهو ضرب الارض بالاقدام ومن اشهر (الطنابرة ) او الطنبارة قبل اكثر من قرن هم عبدالغفار ودراس البيت وحماد ابوكدر وحسين بيومي و اولاد ابوالجوخ وودالرومي و التوم شم العيش وآخرين ديل كانوا اسياد الرميات .. طبعا في الجانب الاخر من تطوير الغناء تمت مواجهة الطنبارة ورمياتهم من قبل الامين برهان ومحمد احمد سرور وكان قبلها في ايقاعات منتشرة بنفس النمط زي الجراري والهسيس والحومبي والكرير اما ابجابودي ايقاع مصاحب ليهو صفقة بالايدي
Post: #60 Title: Re: من روائـع أشــعار وغنــاء الطمبــور .. Author: Haytham Ghaly Date: 01-18-2016, 05:41 AM Parent: #59
سلام ومحبة للموجودين هنا كلللهم
بوست جميل ومريح ويا ريت يا منير لو وسعت الماعون شوية وعملتو بوست توثيقي لتراث جميع انحاء السودان
فانا متأكد ان هذا البورد هو عبارة عن سودان مصغر كل اثنيات تعددنا الجميل موجودة وسيرفد كل عضو ما تحتويه منطقته
من تراث وارث ثقافي نباهي به العالم اجمع
لي عودة ومشاركة باغنية غالباً ما تكون مفاجئة
لانها من اشعار شاعرنا الحبيب الراحل الخالد فينا محمد الحسن سالم حميد
وتغنى بها صديق احمد وأيضا تغنى بها محي الدين اليمني شقيق الفنان الراحل عثمان اليمني
ومستصحباً مع الطنبور الة العود والاورغ
بس الملف صوتي وحا أحاول انزلو رغم اني ضعيف في التقنية
فارجو شرح كيفية تنزيل ملف صوتي
والى حين عودة
Post: #61 Title: Re: من روائـع أشــعار وغنــاء الطمبــور .. Author: الطيب عباس Date: 01-18-2016, 05:55 AM Parent: #1
سلامات لصاحب البوست الجميل وضيوفة ..
شدني البوم حنان النيل (سابقا )ً ويسمي هدوة الريف تغنت بة وحببتني في الغناء بالطنبور
Post: #62 Title: Re: من روائـع أشــعار وغنــاء الطمبــور .. Author: طلحة عبدالله Date: 01-18-2016, 07:21 AM Parent: #61
نشارككم بالقراءة والإستمتاع مع زفرات حري مفعمة بالنوستالجيا والشجن بس في مداخلات فاتلة البوست يا ريت أصحابا يعدولها عشان المتعة تستمر بدون تشويش .
Post: #63 Title: Re: من روائـع أشــعار وغنــاء الطمبــور .. Author: Haytham Ghaly Date: 01-18-2016, 10:23 AM Parent: #62
والله باءت جميع المحاولات بالفشل
خسارة لانو الاغنية نادرة جداً وانا متأكد انو الكثيرين هنا ما سمعوها
والكثيرين لا يظنون ان حميد كتب قصيدة عاطفية وتم تلحينها وغنائها بواسطة عدة فنانين
للأسف انا حافظ منها بيت واحد او بيتين وهي بداية القصيدة وبتقول:
عابد هواك تعال شوف فيهو شن سويت
من يومو العرف دنياك صبح تائه بلا راس خيت
وحات عينيك بعز الريد معزت بلدي بيت في بيت
وحاتا بحب ترابة شديد زمان في حبها اتربيت
لحنها جميل جداً وابدع في اداءه محي الدين اليمني حيث ادخل الة العود والاورغ
مع الطمبور فاضاف تداخل هذه الآلات بعداً اخراً للحن والكلمات
Post: #64 Title: Re: من روائـع أشــعار وغنــاء الطمبــور .. Author: saidahmed shami Date: 01-18-2016, 10:32 AM Parent: #63
أرسلت لك الملف أتمنى انك تقدر تنزلو هنا عشان الناس دي تستمتع
Post: #66 Title: Re: من روائـع أشــعار وغنــاء الطمبــور .. Author: saidahmed shami Date: 01-18-2016, 11:23 AM Parent: #65
عابد ريدك كلمات : محمد الحسن سالم حميد
Post: #67 Title: Re: من روائـع أشــعار وغنــاء الطمبــور .. Author: محمد على طه الملك Date: 01-18-2016, 11:46 AM Parent: #66
عييييك يا منير .. اسبوعين دي بقت على الشيوع وأظنها وصلت حتى اسوان وتغنو بيها الأطفال هنا.. مافي شك الأخ صفوت بذل مجهود قيم نحو تطوير اللحن بادخال الآلات الحديثة واداها بصورة جيدة.. بس برضو انا شايف اللحن دا لسه ما اخد حقة .. ومتوقع لو وجد الصوت المناسب ليهو مع اآلات الحديثة ممكن ينتشر لدول أخرى.
مرحباً بالجميع مرة أخرى .. البوست لن يسع حتى فنان واحد ولا حتى شاعر واحد .. وإن جينا للصِح أقول ولا حتى أغنية واحدة ولا قصيدة واحدة .. ده لو قعدنا نفلفل ونحلل ونستبنط الصور البيانية وروعة الألحان .. لكين كدى خلونى أجدع ليكم لمحة إنطباع عن أشعار الزول العجيب السرعثمان الطيب ، والذى ظللت أسمع أغانى الطمبور التى غالباً تُدبَّج بعبارة (الأغنية من كلمات السرعثمان الطيب) .. ومن أراد الإطلاع على أشعاره يمشى موقع التوثيق الشامل عشان يشوف العجب العجيب .. وزى ما قلت إنو المساحة الوسيعى هنى دى ستضيق علينا لو حاولنا نقعد نخصصها لفنان أو شاعر ، ولذلك ما عندنا حل غير إنو نقطف من كل بستان زهيرات مختارات ..
هناك صفة لمحتها فى حياة شبابنا فى منطقة منحنى النيل، وهى أن الفن والشعر دائماً حاضر فى نقاشهم وونساتهم ، وتجدهم دائماً يستحضرون أبيات شعر من هنا وأبيات من هناك ودائماً يتمنطقون بالحِكم والأوصاف والغزل والذى يرد فى القصائد .. وتلقاهم فى مقارنات دائمة بين القصائد والشعراء والفنانين والعازفين والكورس ووو .. يعنى زمان يقولوا ليك أبرع عازف للطمبور هو النعام آدم، ثم جاء زمن محمدجبارة .. ثم سمعت من يقول أن سيداحمد عبدالحميد عجيب فى عزف الطمبور ، والآن أنا شايف إنو محمدالنصرى رهيب فى العزف .. رهيب عديل .. فعلى العموم فالحياة هناك كلها فن فى فن ومخلوطة بالفن ..
أوكى .. سرحنا بيكم شوية .. وأرجع تانى لنماذج من السرعثمان الطيب.. والذى ألاحظ أن شعر هذا المبدع دائماً عبارة عن لوحات طبيعية شربانة ورويانة من بيئة الشمالية التى من أبرز رموزها النخيل والتمر والبحر .. وألاحظ أن قصائده كلها تتصف بالحياء والعفة فى الوصف .. حقيقى زى مجنون ليلى الجابو طلحة فكاهو لينا فى البورد وترك الحبل على القارب .. سأحاول أن أجيب نماذج .. لاحقاً ..
كدى أديكم نموذج أصحح بيهو أحد المفاهيم المغلوطة لكلمة الجلابة .. فأخواننا فى غرب السودان ماسكين ضنب الككو فى عبارة جلابة دى ومفتكرين إنو قبائل الشمالية هم الجلابة .. والجلابة الغتيتين تاركين الجماعة فى حالة تسلل وعاملين نايمين والجماعة شغالين يسجلوا فى الأهداف الغلط وهم قايلين نفسهم غالبين ١٠/صفر .. هههه .. هوى ياشباب ده طبعاً مزاح ـــ لكنه حقيقى ــــ فبالله مافى زوول يَحُك الجزئية دى وتقلبوها لينا معركة جهوية .. سمح؟؟
قلت سأختار أحد نماذج السرعثمان الطيب وهى قصيدة الجلابة (وهم التجار الرُحَّل، وده فهمنا لكلمة جلابة مما الله خلقنا) ..
الجلابه يا جلابة الله .....يا جلابة الله يا جلابة جيدا جيتو ما شفتولى زول يا اخوانى ساعة للرحال شديتو *** ما شفتوه لى يا اخوانى فى حزن القرير وافراحو فى دمع المسافرين بالعتامير راحو *** ما شفتوه لى بالمرة فى عش فاضى فوق راس تمرة طار جوز قمرى منو......وفرً *** بى دوبو الوحيح والانى ما شفتوهو لى يا اخوانى فى صوت السواقى النايحة فى شوق القواديس التقالد المويةغاديةورايحة *** ما شفتوهو لى يا اخوانى؟ فى حس طار ولاد الماحى فى دمع الحجيج ينجارى بلً الدارة سال صباحى *** ما شفتوهو لى يا اخوانى؟ فى همس الحبيب وحبيبتو ساعة فى القمر يتلاقو من كتر الغرام والريدة لى عند الصباح ما فاقو *** كان فى رعدة كان فى غيم نزل نقناقو فوق نوار بريسيم رش بل اشواقو *** كوسو معايا يا جلابة ممكون قلبى شابا وشابا *** داير اعرف بكان محبوبى ان بقى فى التراب زى لوبى جيبو عروقو سووهن وسادتى وتوبى *** ساكتين ليش دحين دلونى فى بلد الحبيب دلونى وان بقى ما لقيتو اخوانى الله كمان يكون فى عونى
أنا لفحتها من موقع التوثيق الشامل كت آند بيست .. لو فى خطأ يكون ما بسببى .. :)
مشكور عزيزنا هيثم الغالى على الأغنية والشكر موصول لسيداحمد شامى .. المرحوم حميد شاعر فريد ورهافة حسه لا تقارن .. من أوائل قصائده التى تغنى بها محمدكرم أغنية شن طعم الدروس والتى تجد فيها تعابير مدهشة زى : الشوق متل شوك الكِتِر طعن الجسم لامن خدر ... والله لو ما منجبر ما كُتْ بفارقِك بي شبر .. أذكر أنى زمان وأنا فى العام كان عندى طمبور وبقعد كل مساء بعد المغرب قدام بيتنا أعزف براى لامن الليل يفلل .. وفى أحد الأيام جاء شاب مارى براس الشارع وفجأة جاء منعطف على شارعنا وأنا قاعد فوق المسطبة قدام البيت .. فالزوول سلّم على وواصل طوالى عبر الشارع لغاية نهايته .. ولكنه جاء راجع تانى وأخيراً جاء علىّ وسلّم تانى على استحياء فقلت ليهو إتفضل تمجلس .. فقعد فوق المسطبة وقال لى ياخى بصراحة أنا جيت داخل شارعكم ده جابنى طمبورك ده .. وقعد فترة طويلة يستمع للعبد لله وطقينا الحنك ولم أكن أعرف من هو .. إلى أن عرفت لاحقاً أنه حميد وكان فى زيارة لقرايبهم جيراننا فى الشارع الورا .. لكن فى تلك الجلسة عرفت أن هذا الزول مشحون بحب الطمبور ومملوء بالحياء والأدب .. رحمه الله .. قصيدة شن طعم الدروس للشاعر حميد ، قيل أنه كتبها حين إنتقل لعطبرة للدراسة:
وريني شن طعم الدروس مادام بكانا مشى قطر وكيف ذاتا ترتاح النفوس تقبل قرايتاً فى سفر يايمه حان الإمتحان من وقتو بس فاضل شهر ما اظنى من جور الزمان انجح واجيب ليكم نمر كيف ذاتى يا نبع الحنان انجح من آلام السهر عمرك سمعتيلك جبان خاض المعارك وانتصر زينوبة كل ما افتح كتاب القاك فى أول سطر القى الجداول والصحاب القى الجناين والتمر فى الحصة عقلى أنا قام سدر يمه المدرس لو فكر كان بلقى قاعد فوق ككر فى الدونكا لسع ما فطر يسمع كليمة يا عشاي وأغلى الحكم عند الضجر أنا قلبى كلو عليك جناى وقلب جناى على حجر والله موش لو كان نهر لو كالنى بي سيطان بقر مادام عقيل الجن سدر ما اظنو من عندك حضر بذاتو ابوى تلقاهو قام فاتح كتابو مع الفجر يقرأ ويرتل فى كلام ما بفهمو الناس الكُتُر زينوبة كر من حالى كر قاعد لى فوق كيمان جمر غربة وكمان حالاً فقر عذبنى قبل أصل القبر الشوق متل شوك الكتر طعن الجسم لمن خدر والله لو ما منجبر ما كان بفارقك بى شبر زينوبة دنيا الإغتراب خلتنى زي صفق الشدر اتحت من عدم الشراب عم الأراضى وانتشر الغربة اصلو طعيمها مر لكنى بقعد بالجبر لمن سنين الهم تمر يا ربى الهمنى الصبر
شوف بالله: زينوبة دنيا الإغتراب خلتنى زي صفق الشدر اتحت من عدم الشراب عم الأراضى وانتشر الغربة اصلو طعيمها مر لكنى بقعد بالجبر لمن سنين الهم تمر يا ربى الهمنى الصبر
لسه ما جينا لروائع النعام آدم.. لكين خلونى أرمى ليكم أغنية لا شوفةً تبل الشوق لا رداً يطمِّن.. أريتك تبقى طيب إنت أنا البى كله هين .. أداء يوسف كرم .. دايركم تتمعنوا فى دق الدليب الإحترافى ده .. دقات بأقل الطَرقات الأساسية .. يعنى الإيقاع جايب ليك منه رؤوس الفصلات والباقى تقدِّره إنت عشان تلقاهو ضمير مستتر تقديره ٧/٨ .. :) ..
لا شوفة تبل الشوق ولا ردا يطمّن أريتك تبقى طيب إنت أنا ألبي كلو هين *** قليبا لي رهيّف عارفو ماب يحمل حنيّن إنت ماب يغباك حالو الفيهو كل البيهو بيّن *** بقيت مالي غير أشعاري أكتبه فيك وأدوّن أقول يمكن تزيل ما بي ولاّ قليل تهوّن *** ومالكن يا قماري بتشدن إيش لازمة تغنّن نغيماتكن تهيج أشواقي للعينين يبكّن *** بدّيكن وصية أمانة لي سيد روحي طيرن ترا الحال العي شفتنو قولن ليهو أحكن *** قو ليلو السحب في روضو ما عادن يكبّن وأضحى محل خراب ما فيهو غير زهرا مضبلن *** قولن ليهو ليلو طويل .. طويل.. طولا يجنّن لا قمرا ظهر في سماهو لا نجمات يضوّن *** وكل ما ليهو يتصبّر يقول أيام يعدن يمنّي لنفسو بي لقياك ولاّ ترد لو يمكن
وهذه لاشوفة تبل الشوق من سيد الشئ زاتو .. رحم االله النعام آدم .. أعرف الإثنين على الأطراف فى الكورس ، وهما قرايبنا محى الدين عبدالوهاب ـــ على اليمين ـــ ومصطفى سعد ـــ على الشمال ـــ .. وفى الغالب فإن معظم تسجيلات أغانى الطمبور القديمة فى الإذاعة قايمة على أكتاف هؤلاء مع آخرين ..
شكر كتير للسادة أصحاب هذه الفيديوهات فى اليوتيوب وغيره .. فقد حفظوا هذا التراث ونشروه ليصلنا فى أقصاى الدنيا بجودة عالية .. ومنهم El Rasheid Zakaria و Amir Farahaddor و آخرون ..
مرحبتين حبابك دوما، نوّرت البوست .. أوع أمونة بت الشيخ حمد تكون بكّتِك .. غايتو الزوول لو عصر مشاعره واستحضر الصورة بأبعادها كلها أكيد على الأقل تخنقه العبرات .. :) مهما كان فإنها قطرة فى محيط الحياة ..
لكين بس وقعت أمونة البحر زعلتنى منها رغم أنى قادر أستشعر مدى القهر الذى انقهرنو بنات زمان .. زمان شنو..؟ لى هسه البنات مهضومات .. خياراتهن مقيدة .. :(
لكين إن جينا للصِح هسه العذاب الحاصل فى البوست ده والغناء الكله آهات وأنين ده سببه منو؟؟ مو ياهو سببه المقهورات ديل زاتهن ..
الزول الوسيم - الشاعر محمد سعيد دفع الله غناء النعام آدم الزول الوسيم فى طبــعو دايما هــادى من اوصافو قول اسكرنى هات يا شادى من حور العيون احتار غزال الوادي الخــد كا لزهــور تلــقاه دايـــما نـــادي من عينيك سيوف تقطع دوام فى فؤادي فاقـــت لــى سيوف عنتر بنـــى شدادي كل مــا مــر يوم يزداد علىّ سهــادي عينــي دمعهن بلـل فراشى و وســـادي ساقينى العذاب ما شفت يوم اسعادي ولو حنيت يوم تروى القــليب الصـادي ليه جافيتنى ليه وسمعت قول حسادي هم ديل عزالى بس قاصدين دوام ابعادي انا المسجون لديك راتل دوام فى اصفادي انــــت القـــاسى ما راعـيت يوم لودادي مظلوم ما حصل فى يوم وجدت مرادي مكتوب لى العذاب فى جبينى يوم ميلادي
Post: #91 Title: Re: من روائـع أشــعار وغنــاء الطمبــور .. Author: Munir Date: 01-19-2016, 00:39 AM Parent: #90
بعد كان بينا مافى خلاف .. ليك يومين كلامك جاف .. ليك يومين ومابتنشاف .. مالك ياقليب رجّاف .. قالى انا من عيونه بخاف .. وا نارى انا من دهب شيبون .. القمر المضوى الكون ..
Post: #92 Title: Re: من روائـع أشــعار وغنــاء الطمبــور .. Author: Munir Date: 01-19-2016, 00:42 AM Parent: #91
شكراً يحى .. مداخلة متميزة .. فى عنوان الفيديو مكتوب الشاعر محمد بشير دفع الله، ومفروض يكون محمد سعيد دفع الله ..:)
Post: #93 Title: Re: من روائـع أشــعار وغنــاء الطمبــور .. Author: يحي قباني Date: 01-19-2016, 00:55 AM Parent: #92
سلامة النظر :)
Post: #94 Title: Re: من روائـع أشــعار وغنــاء الطمبــور .. Author: Munir Date: 01-19-2016, 01:43 AM Parent: #93
هههه .. والله شككتنى فى نفسى .. لكين تلقاها عند الغافل ..
Post: #95 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-19-2016, 02:49 AM Parent: #93
لك التحية الزميل منير ولضيوفك الكرام
Post: #96 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-19-2016, 02:51 AM Parent: #95
Post: #97 Title: Re: من روائـع أشــعار وغنــاء الطمبــور .. Author: Haytham Ghaly Date: 01-19-2016, 04:38 AM Parent: #96
Quote: وهذه لاشوفة تبل الشوق من سيد الشئ زاتو .. رحم االله النعام آدم ..
منير سلاماتلا شوفةً تبل الشوق في حقيقة الامر اول من لحّنها وتغنى بها ليس النعام ادم وانما هو الأستاذ عثمان سليمان . فقد تغنى الأستاذ عثمان سليمان ولحن الكثير جداً من الاغنيات الشايقية ولكنه لم يواصل في مشواره الفني ولا ادري ما السبب ولكن هذا خياره وهو صاحب صوت جميل وأداء متميز يا ليته واصل واتحفنا بفنه الجميل الراقيكما ان لحن هذه الاغنية عند الأستاذ عثمان سليمان يختلف قليلاً وهذا لان الأستاذ النعام ادم قد عدل فيه بعض الشيئ.من اغنياته أيضا تلك الاغنية التي تغنى بها شاعرنا الكبير محمد سعيد دفع اللهاسمها تقريباً : القول البقولو الناسوتغنى بها في الفيديو المرفق وتمت أيضا الإشارة الى الأستاذ عثمان سليمان في تلك السهرة
Post: #98 Title: Re: من روائـع أشــعار وغنــاء الطمبــور .. Author: محمد الزبير محمود Date: 01-19-2016, 06:03 AM Parent: #97
Quote: مسكت دريبا مو قريب ** كم بيهو صف بنوت ورد قاصدة البحر دايره تموت ** لا عيشة لاهم لا نكد اترددت وقفت كتير ** لامن قليبه خلاص صمد شافت مسار النيل حزين ** حتى النخيل حزنان خمد وبشيشى فكفكت الحرير ** لا زينة لا ربيط عقد ما دام حياتا بقت دموع ** وقليبة من زولا انفرد قالت اخير ارتاح خلاص ** ارسى وشقاى القالو حد فى لحظة موج النيل علا ** وفى جوفو غابت للابد
الأخ منير وضيوفه لكم التحية بحكم النشأة في الشمالية والاحتكاك بالثقافة الشايقية كانت قصدية امونة من ضمن الروافد الثقافية التي حفظناها في الشباب ولكن لدي عليها ملاحظات ارجو ان تتسع لها صدوركم : لا اعرف حتما ان كانت القصة رمزية ام حقيقية ولكنها بالطبع تعبير وتسطير لحالة اجتماعية عندنا ابعد من مجرد الغناء والطرب وقد سجلت العديد من المواقف ومنها : وفاة الأم ليلة ميلاد الطفلة ولعل ذلك يسطر كثرة الوفاة عند الولادة والوقوف وهو مشهد يستحق الوقوف عنده ، الاعمار بيد الله ولكن علينا تتبع الاسباب وتحليلها وقد سمعت عن حملة توعوية في هذا الشأن ، وودت لو سلط لنا اطباء وطبيبات المنبر الضوء على هذه الظاهرة . الأيحاء بان الوضع الافتراضي للبنت بعد البلوغ هو الحب والارتباط العاطفي بشخص ما وغالبا من نفس البيئة ، وهذا الكلام ليس بالضرورة ان يكون بل الاصل في بنات القرى والارياف هو البعد عن مواطن الشبهات وانتظار الفارس وذاك وضع عايشناه بانفسنا . تقدم كبار السن لزواج الصغيرات خاصة لو كان كبير السن ذو مال وجاه ، وهذا الامر وان كان في طريقه الى الاندثار او كاد الا ان تناوله بهذه الطريقة يستوجب الوقوف عند موقف الاب الفارض وموقف البنت الرافض الصامت ، فالأب يفترض عليه شرعا ان يستوثق من موافقتها كما عليه ان يستمع لرأيها والا يرغمها على شخص لا تريده ، كما على الببت محاورة ابيها والوصول لقناعات وارضيات مشتركة . والأهم من ذلك وما دعاني للمشاركة هو ثقافة الانتحار كحل للمشاكل والتي وثق لها الشاعربقوله
Quote: مسكت دريبا مو قريب ** كم بيهو صف بنوت ورد قاصدة البحر دايره تموت ** لا عيشة لاهم لا نكد
وكأن الانتحار هو الحل والراحة !!!! وأخيرا حققت ما تعتقد انه الراحة والخروج من المأزق :
Quote: قالت اخير ارتاح خلاص ** ارسى وشقاى القالو حد فى لحظة موج النيل علا ** وفى جوفو غابت للابد
فهل الانتحار هو الحل ؟؟ وما حكم الانتحار من ناحية شرعية ؟؟؟ وأيهما اهون ، مشاكل الدنيا ام عذاب المنتحر في الآخرة ؟؟؟ نواصل بعد سماع ما ترون . تحياتي
دهب شيبون .. القمر المضوى الكون تأمّلت فى أبيات هذه الأغنية فلَم يسعنى إلاّ أن أشارككم كلماتها حسب سماعى .. كلمات بسيطة وبليغة وعفيفة ومليئة بالصور الجمالية وتزدحم فيها البيئة الشمالية من خضرة وزرع وجروف وعسل ينقط وسكّر الجنيد ، ونفور الظباء ، والتوب والعفاف، ولمع البروق تشبيهاً للبسمات .. ومع ذلك ذِكر وتوحيد لرب العالمين وإعجاب بخلقه ، وذِكر للصالحين ، وتوكُّل على الحى الدائم .. كما لم يخلى شئ من الأمكنة .. نورى والبركل والزومة وووولغاية ما مرقها فى زُحل .. !
أكتر من كده تانى النعام دى يتقطَّع ليكم يعنى؟ .. ده الخلى جيل آبائنا وأعمامنا ساعة يقولوا النعام خلاس الكلام يكمل .. أعذب بيت عجبنى فى هذه الأغنية حين يقول: مالك ياقليب رجّاف؟ وقالى انا من عيونه بخاف ..!!!
عليك الله عاين إعتراف الخواف بلا خجلة !!.. لاحظ البلاغة فى مخاطبة القلب مكمن الشجاعة .. يقوم القلب يقول ليك أنا بخاف من عيونه .. !!! ياقلب أركز .. تخاف عديل كده؟؟ آآآآآى خوّاااااااف ..
دهب شيبون .. القمر المضوى الكون وا نارى انا من دهب شيبون .. *** قادر ربنا السوّاك .. رادِك وبالجمال خصاك .. وبتوب العفاف غطّاك .. سارح ياجِدَىْ فى هواك بخاف لَكْ قبضة الشرَّاك .. *** أخضر وفى الجروف مزروع .. مشيت أنا داير أشوف النوع .. وقف حَرّاسه قال ممنوع .. غالى وفى الرفوف مرفوع لهيجه فى الجنيد مصنوع .. وا نارى انا من *** بعد كان بيننا مافى خلاف .. ليك يومين كلامك جاف .. وليك يومين ومابتنشاف .. مالك ياقليب رجّاف؟ وقالى انا من عيونه بخاف .. وا نارى انا من .. *** خدوده بتخجِل الأزهار .. من فمه العسل مطّار .. من بسماتها برقاً طار .. من نظراتها ياسّتار بتشعل فى قلوبنا النار .. وا نارى انا من.. *** عطشان ياصبايا الحى .. ضهبان ياصبايا الحى .. ماشفتوهو زولاً لى .. حميدة اخلاقه سمح الزى .. صغِّيرْ وفى نفوره جِدَىْ .. مخلِّف فوق قلوبنا الكَىْ .. وا نارى انا من.. *** ولهان ياصبايا الحى .. مرضان ياصبايا الحى .. ماشفتوهو زولاً لى .. حميدة اخلاقه سمح الزى .. صغِّيرْ وفى نفوره جِدَىْ .. مِتِل زرع الجروف النيئ .. وا نارى انا من.. *** صُلَّاح نورى والبركل .. راجل الزومة لىَّ تصل .. تشهدوا بالعلىّ حصل .. عليك ياالله بتوكل .. يقوم لى جناح ما يتعطل بصبِحْ وزولى فوق لزحل .. وا نارى انا من..
Post: #100 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-19-2016, 04:20 PM Parent: #99
أعترف ليكم وأقول ليكم سر ماحصل قلته لزوول .. من زمن الطفولة أكون قاعد بلعب كورة دافورى فى ميدان الصداقة فى حلتنا .. فأقوم أسمع رنَّة طمبور النعام فى الإذاعة ، طوالى أقوم أشوت الكورة فى الآوت وأجرى جرى على البيت أحصِّل الأغنية .. الجماعة يشوفونى طفّشت الكورة وجريت فجأة يقولوا منير اللفتاوى الحريف ده مالو؟ طبعاً مستغربين وماعارفين السبب المجرِّينى .. يكونوا قايلنى ماشى وين ياالله؟؟ :) ساعة أجى راجع ألقى الفريق بتاعى مغلوب ٩/صفر .. وبعدما أرجع للملعب حتين يادوب ندرِّن .. :):):)
الأخ عبدالمنعم سيداحمد شكراً ياملك على الحضور والمشاركة .. الفيديو بتاع عيسى ـــ أغنية حرقته حريقة ــــ كبير شوية على الصفحة .. ممكن فى الembed code تعدِّل الsize لـ 800x45٠ ..
سلامات أخ محمد الزبير محمود .. وشكراً على التعليق وفتح باب نقاش حول موضوع أمونة بت الشيخ حمد .. طبعاً معروف أن حياة مجتمعاتنا فى الشمال فيها بعض العادات التى تتجاوز الشرع ، وخاصة ما يتعلق بالمرأة .. وحسب إعتقادى أن التشدد ضد البنات سببه الخوف الشديد عليهن من جانب الأب .. فأكيد الأب لا يكره إبنته، ولكنه يخاف عليها ويحن عليها ربما أكتر من الولد .. ولذلك تجده يحيطها بسياج عالى ليحميها فى تلك الأزمان التى لم تكن للمرأة فيها حيلة للعمل والإستقلال بنفسها .. ولذلك تصل درجة الرفق والرأفة أن تُجبر على الزواج من رجل كبير مستقر أو ولد العم والسبب الرئيسى هو إعتقاد الأب أنه بذلك سيطمئن عليها وإن لم تسعد بزواج من تحب .. وزى ماعارف إنو الحب زاتو بالنسبة لجيل الآباء يصبح شئ ثانوى بعد أن ينتهى زمن الرومانسية وعنفوان الشباب .. فكأنما الأب يحكم على مستقبل إبنته حسب حاضره هو بعدما أكل العسل ووصل مرحلة البصل فى حياته.. ويتبين ذلك الحرص على البنت لدرجة منعهن من السفر للدراسة مثلاً ومنعهن من زواج الغريب من قبيلة أخرى أو بيئة أخرى و ثقافات مختلفة .. فالمحور الرئيسى فى موقف الأب هو تأمين مستقبل إبنته .. ويتضح ذلك فى موقفه من أمونة التى يريد لها الحياة المادية المريحة .. وكذلك الموقف المتشدد بتاع والد بت البلد الذى رفض ودالبلد لأنه تربال وعيشته عدم عدم بينما عاوز يزوجها للعريس الجاى بقطر الأحد لأنه موظف حكومة وعنده ماهية .. وذلك كان زمان قمة الإستقرار .. مع إنو الموظف فى عالم اليوم أكتر زول حالته تحنن .. :)
Post: #104 Title: Re: من روائـع أشــعار وغنــاء الطمبــور .. Author: علي عبدالوهاب عثمان Date: 01-19-2016, 05:49 PM Parent: #102
حبيبنا منير تحياتي .. أمس في قناة الشروق .. شاهدت حفل مكتوب على الشاشة ( مباشر) .. الحفل كان في أستاد كريمة بالفنان محمد النصري .. مئات الشباب على المدرجات في طرب خيالي .. وعجبني جداً لمن غنى أحد أغاني النعام آدم المعروف في مناطقنا في الشمال .. عندما يبلغ الطرب قمته .. الواحد ينزل يصفق .. أو يجمع زملاءه عشان يصفقوا سوا حتى لو كانت الاغنية عبر الإذاعة أو التلفزيون .. ولكن الشباب بدل الصفقة ( الدليب ) يأتون بحركات وكأن الحفلة لمحمود عبدالعزيز ( الحواته ) .. الحركات دي ما تجي مع أغاني الطنبور .. الظاهر أخي منير حصل نوع من التطور في شمالنا الحبيب والتعبير عن الطرب تغير إلى حركات جسدية أخرى .. طبعاً هي الحداثة .. التي عانى منها حتى ( أبراهيم عوض ) ولكن بصراحة مع الطنبور ما تجي ( إذا أورغن أو جيتار معليش ) محمد النصري أصبح ظاهرة .. ويقدم رسالة لكل الوطن .. زمان فنانين الطنبور كانوا محصورين في جغرافيا محددة ( ما عدا ذلك الطفل الجنوبي زمان غنى لمحمد كرم الله)
وقد فعلها وردي زمان عندما غنى أغنية نوبية بطريقة راقصة وأعجبت الناس رغم عدم فهمهم للمحتوى كانت أغنية ( إيكا آي جيلا إيكا مشكا ) بآلات حديثة ..
حبيبنا منير .. بوست دسم .. واصل ..
Post: #105 Title: Re: من روائـع أشــعار وغنــاء الطمبــور .. Author: Munir Date: 01-20-2016, 00:47 AM Parent: #104
الغالى هيثم غالى، مشكور على الإضافة ياخ ـــ فى البوست ما فى الفيس ـــ القول البقولو الناس من الأغانى المحببة لى بصوت صديق أحمد ..
Post: #106 Title: Re: من روائـع أشــعار وغنــاء الطمبــور .. Author: Munir Date: 01-20-2016, 00:51 AM Parent: #105
Quote: شدني البوم حنان النيل (سابقا )ً ويسمي هدوة الريف تغنت بة وحببتني في الغناء بالطنبور
الأخ الطيب عباس .. سعدت بمرورك واهتمامك .. حنان النيل أتقطّعت فى أغنية أحكام الزمن صِح صعبة ..
Post: #107 Title: Re: من روائـع أشــعار وغنــاء الطمبــور .. Author: Munir Date: 01-20-2016, 00:59 AM Parent: #100
Quote: طبعا صاحب ومؤسس موقع التوثيق الشامل عضو معانا في حوش بكري ( د. توفيق الطيب البشير )
حقيقة الموقع جميل ومفيد جدا بقي مرجع لينا في كتير من الحاجات نشكر القائمين علي أمرة
سيداحمد شامى كيفنك .. الشكر الجزيل لدكتور توفيق الطيب البشير ... فعلاً موقع التوثيق الشامل لفتة حريفة منه ومشروع عظيم لتجميع المعارف الفنية والشعبية .. وأتمنى له السداد .. الموقع سيصبح موسوعة معرفية للأجيال .. وأنا بعد إذن توفيق القائمين على الموقع مرة مرة سألفح منه ..
Post: #108 Title: Re: من روائـع أشــعار وغنــاء الطمبــور .. Author: Munir Date: 01-20-2016, 01:11 AM Parent: #107
Quote: الظاهر أخي منير حصل نوع من التطور في شمالنا الحبيب والتعبير عن الطرب تغير إلى حركات جسدية أخرى ..
أستاذنا المحترم علي عبدالوهاب عثمان .. غايتو الواحد شاف بوراهو الأذواق اتغيرت .. كونه شباب العاصمة والوسط يتفاعلوا مع أغانى النصرى بالشكل ده أكيد حصل إنقلاب .. أنا عهدى بالشمالية منذ زمن فيضانات سنة ٨٨ حيث جيت من هناك خائض فى السيول المشهورة بعد أن تقطعت بقطر كريمة السبل ووقف دت فى العبيدية وقال للركاب يللا دقوا الكدّارى .. الله معاكم .. ومن ديك وعيك .. :)
Post: #109 Title: Re: من روائـع أشــعار وغنــاء الطمبــور .. Author: Munir Date: 01-20-2016, 01:37 AM Parent: #108
وطبعاً يا أخواننا زى ما قلت للأخ محمد الزبير محمود أن تشدد الآباء مع البنات سببه حرصه عليها .. ونحن نعرف أن المرأة والبنت هناك تعتبر جوهرة نفيسة فيتم حجزها فى خزنة الأبوة الصارمة .. لكين كدى تعالوا شوفوا فى المقابل كمية الإحتفاء بالبنت من ما يلتوى فرعها .... شوفوا هسه كمية الشعر والغزل فى بنات الشايقية بالذات .. وشوفوا الوصف والدلع الإندلعوه والما نالته بنات فى العالم .. الشعراء بالكوم من لدن القدامى ومروراً بإسماعيل حسن وودالدابى ومحمدسعيد والسرعثمان وعبدالله محمدخير وغيرهم وغيرهم .. هسه جنون الشعر ده وشلالات العواطف المندلقة من العمالقة ديل مش تخلى الأبوات تقفل بناتها داخل حوش وجوّاهو حويش ويقفلوهن بالطبلة والمفتاح؟؟ هذه معادلة قاعدة فوق قدّوم شرك .. معادلة العاطفة الجارفة والكتمة الشديدة .. ولذلك طبيعى تحصل زى قصص أمونة وبت البلد القال تاهت مع الشوق الماعاد يتكتم والصورة هادى الفى قليبها بتترسم واسمه العلى نونات خديدها صِبِح وسِم ..
حالة بطّالة ..
Post: #110 Title: Re: من روائـع أشــعار وغنــاء الطمبــور .. Author: جمال المنصوري Date: 01-20-2016, 05:19 AM Parent: #100
منير كيفحالك انت وضويفك..والتحية الخاصة لي ود العمي (عيس بروي) ياخي والله بوست رائع جدا...بس عندي حاجة جابتني ضروري..
Quote: شكرا اخوى النزير ربنا يشفيه وبروى عندنا معاه لحمة بى خالتو حرم فى مدنى جزيرة الفيل
لا حولا....يا احمد حمودي..يعني انت كده طلعت عندك معاي لحمي..الحرم دي في الحسبي عمتي... وعيسي انا برضوا اتحسب ود (خالو)عليك الله سلم لي علي ناس خليفة محمد خير الضقولي..مع خالص المودة في القربي
الفنان الذى ظهر بأسلوب فريد فى غناء الطمبور هو العملاق صديق أحمد .. فهو قد تغنى بأسلوب لم يعتاده الناس حيث لم يتبع الألحان الدائرية الرتيبة التى يطغى فيها زخم الإيقاع ورنة الطمبورعلى تنغيم الفنان للحن ولا يبرز من الأداء إلاّ جمال صوت الفنان وقوته .. لكن صديق إختلف فى أن جعل أداءه هوما يطغى على الأغنية وعلى الإيقاع وعلى الطمبور .. فتجد المستمعين يركزون على صوت صديق و طريقته الجديدة فى تلحين الكلمات بصورة لم يعهدها أحد .. فالطمبور فى أغانى صديق شئ ثانوى .. تلقاهو ينقرشه فى خلفية الأغنية بينما تجد الكلمات واللحن متسيدان الموقف .. ثم إنك ممكن تلقى الحفلة مثلاً مولعة نار والكورس تعبان شديد وفاير فورة مليون بينما تلقى صديق يغنى بنفس رايق فكأنما الحفلة كلها واقفة لمبة وهو قاعد يغازل فى الطمبور وصوت فى المقام الخفيض ثم يرتفع فى مقام عالى فيزيد الحفلة نيران .. شوفوا المثال ده والذى يبرز روعة الصوت الجَرَسى وتنويع الأداء مابين الصوت الخفيض والعالى السَنين ..
معليش يا منير.. قلت والله ما امشي الا اسمعكم طمبور ود عطبرة حافظ موسى.. .. بوست جميل ورائع وقضينا وقت ممتع مع السودان الأصيل.. نوستالجيا مركبة.. ودمتم يخير
Post: #117 Title: Re: من روائـع أشــعار وغنــاء الطمبــور .. Author: Munir Date: 01-21-2016, 11:53 AM Parent: #116
العزيزة الفاضلة بسمات تحياتى و نوّرتى البوست .. عبدالرحيم أرقى أغانيه طريبة ومعبِّرة والأغنية الجبتيها من الروائع .. هناك أغنية 'محاسن' يشترك فى أدائها مع صديق أحمد وطلعت رهيبة .. سآتى بها لاحقاً .. طبعاً نلاحظ أن إيقاع الدليب لم ينتشر فى ديار الجعليين ــ ربما الجعليين ما دايرين يقولوا عليهم بلعوهم الشوايقة هههه .. ـــ
شكراً على الفيديوهات و التعريجة على الفن الشعبى العطبراوى ـــ لفتة تنويعية للبوست :) ـــ .. الشئ المحيرنى إنو كيف ديار المناصير اتبعوها لولاية نهر النيل بالرغم من أنهم قريبين جغرافياً وثقافياً للولاية الشمالية ؟ !! ..
ملحوظة: ألاحظ ميزة متفردة فى مداخلاتك ، وهى الختام دائماً بالدعاء بدوام الصحة والعافية للجميع .. روح مريحة ..
إن شاء أغنية شادية الشايلة صفيحها واردة تكون عجبتكم فيها الصور الجمالية .. وللناس الماعارفين شادية دى شايلة صفيحتها ماشة وين، نقول طبعاً زمان ورود البنات لجلب الموية بتكون بالصفائح ، فيردن الآبار ويتقابلن شلة جنب البئر .. وطبعاً الأولاد برضو يجو البئر للموية لكنهم طبعاً بيشتغلوا بالجوز ــ والجوز هو صفيحتين يتعلقوا فى طرفى عصاية قوية ، ويقوم الولد يشيله مليان موية للبيت فوق كتفه.. طبعاً نقل الموية للبيت كانت من المهام الشاقة ..
والحاصل أنه غالباً ما تصبح الآبار العامة مناطق لقيا ، فيتبرع الأولاد لنشل الموية من البئر للبنات .. فالبنات معروف إنهن بينشلن بالدلو الصغير، لكين الأولاد ينشلو بالصفيحة .. وطبعاً ذلك مجال لإبراز القوة والمباهاة قدّام البنات بسرعة النشل كما يبرزون القوة بالسرعة بالأضافة للتمكن من النشل بالباع .. وهو أنه فى تبديلة اليد الواحدة ترفع الدلوأو الصفيحة لأقصى إرتفاع اليد ، يعنى تجر الحبل ـــ أو السلبة ـــ لغاية ما يدك تصل أقصئ أمتداد لها للأعلى .. وكمان عشان تورى إنك عنتر تعمل الحركة دى لليدين الإتنين .. وده طبعاً عشان تبهر البنوت .. لكين أطمئنك لو كنت فظاً غليظ القلب ومعاها شناة، لو قلبت الهوبة أو وقعت فى البير زاتو زوول بيشتغل بيك مافى .. :) ..
فى الأغنية السابقة ــ شادية شايلة صفيحها واردة ــ تتجلى روعة الأداء وروعة الصوت عند صديق .. ويخيل لى أن هذا التسجيل من السبعينات فى شريط معروف .. حين كان صوت صديق فى أوج عنفوانه ..
وأشير لأنو إسم شادية ده تردد فى أغنيات عديدة .. زى أغانى عثمان اليمنى التى إحداها: "ثمارك آكله واللاّ القسمة تمنع.. يا شادية ماعارف اللت الله ترانى بزرع ".. و"الليل آبنوم آشادية شايل الليل براى .. وين ألقالى نوم آشادية " ووو .. المهم ، إسم شادية محبب عند الشوايقة :) ..
Quote: النذير حجازى .. ياخ عشان خاطر عيسى وعشان خاطر جيتك دى سأفك الصرة الكنت صاريها ليك وأتجاوز عن إساءتك وسأتناساها ..
احييك على هذا الكلام استاذ منير فالمقام مقام ابداع حقيقى وكنت بعد اذنك عايز اقترح عليك انك تقسم البوست بالشعراء مثلاً اسماعيل حسن ، عبدالله محمد خير،محمد سعيد دفع الله ، ودالدابى، السر عثمان الطيب،ود ابنعوف ،حاتم الدابي.. الخ.. بهذه الطريقه سيكون هذا البوست شامل وغير منقوص كما انه سيكون لنا بمثابة الواحة فى هذا الزمن الأغبر مع امنياتى لك بالتوفيق وتحياتى لك وضيوفك.
تحياتى عزيزى الأخ د.محمد بابكر .. شكراً على الزيارة والإقتراح البنّاء .. زى ماشايف مادة البوست مشرورة وممكن تطفِّح تملأ صفحات كما أشرت سابقاً .. إحتواء كل هذا التراث الغنى داير ليهو لياقة عالية وعمر طويل هههه .. لكن نحاول نقتطف نفحات من هنا وهناك قدر المستطاع بدون إغراق .. وعشان عدم إغراق البوست بكثرة الفيديوهات قاعد أحاول أحشو المكان ببعض الذكريات الخاصة والتعليقات الخارم بارم :) ..
وأحب أوصل الشكر لصاحب القناة التى غرفت منها أغانى صديق هذه وهو HM82TV+1 .. ـــ حسن ــــ
كتبت لكم عن أن مجتمعات المنطقة مخلوطة ومعجونة بفن الطمبور .. الونسة أشعار والنمّة نمّة طمبور.. فى الليالى المقمرة تلقى الأولاد يتجمعوا فى الخيران ويقضوا الليل صفقة وغناء .. خيران دى ما تظنوها زى خيران الخرتوم أو خور بكرى .. الخيران هناك هى مجارى السيول ، وتكون فسيحة ــــ يعنى يمكن يكون بإتساع ميدان كورة ــــ وذات رمال بيضاء نضيفة ترقش فى ضوء القمر ويحلو فيها السمر .. وبالنسبة للغناء يمكن أقول من الله خلقنى ما سمعت لى طفل أو صبى فى البلد يترنم بغناء خرطومى حديث .. أغانى طمبور بس .. ــــ هسة بصراحة ماعارف الحصل شنو مع المشروع الحضارى الحاصل ده ــــ وأحب أشير لأنو ليس الأولاد فقط هم الشبعانين بالشعر والطمبور، بل البنات ذاتهن شربانات ورويانات بالشعر والطمبور للآخر .. كيف لا وهن صاحبات الغزل ده كله .. :)
Post: #124 Title: Re: من روائـع أشــعار وغنــاء الطمبــور .. Author: Munir Date: 01-22-2016, 00:23 AM Parent: #123
من القصائد التى تشبه أغنية هاشم ميرغنى حان الزفاف وأغنية زيدان ابراهيم فى الليلة ديك .. رحمهم الله .. الأداء لصديق أحمد وعبدالرحيم أرقى ..
هل تصدقي يا محاسن لمن خبرك جاء وصلني أنا جيت طاوى جراحى تنزف لدياركم تحتضنى * بي بشيشكن يا عيوني يا دمعوع لا تفضحني طالما الأقدار بتحكم غصب عنك وغصب عني جيت في ليلة زفافك برضاي ورغبة مني أنا جيت اضم الشوق واقالد وانضم الأشعار واغني جيت في فرحك اشارك جيت اقول مبروك واهني جيت امد ايدي البترجف لي ايادي ملاني حني انا جيت اعاين واملا شوقي في العيون العذبني انا جيت اودع في خدودك البي صفاهن جرحني كان مناهن اعيش معاهن أه دا لو كان بالتمني قسمة والاقدار ارادن يبعدنك ويحرمني هدَّمن املي البنيتو حتى لي شوفتك حمني هادي حالي انا يا ليالي لي بكاي ماك دار تحني كنت في عتمت همومي اللبن ما يرحمني وانتي في عش السعادة أه انا الشوقك كتلني ابكي في زحمة سنيني في الليالي العاكسني الوداع الوداع الوداع يا نور حياتي يا امل خاب فيهو ظني بي بشيشكن يا عيوني يا دموع لا تفضحني طالما الاقدار بتحكم غصب عنك وغصب عني
Post: #125 Title: Re: من روائـع أشــعار وغنــاء الطمبــور .. Author: Munir Date: 01-22-2016, 01:20 AM Parent: #124
أريد أن أنوه إنو البوست ده عبارة عن ترويح أشجان مختلطة من ذكريات وغربة وإحتفاء بالثراث الشمالى الذى تشبعت به المسامات منذ الصغر .. ولذلك آسف على عدم الترتيب والتصنيف .. وطبعاً اليوتيوب بحرها واسع ومليئة بكل هذه الروائع التى أختار منها هذه الفيديوهات حسب تذوقى أولاً وحسب الصدف البتجيبها قدّامى .. وتلاحظوا أنى واقع ليكم بالقديم .. وده لأنو القديم يساوى ألف بالجديد .. وشايفين أنى جبت أغانى صديق بتسجيل قديم جداً وهى الفترة التى وجد فيه هذا الفن قلباً خالياً فتمكنا ..:)
Quote: بالجد أنا مشفق على جمهور محمدالنصرى الخرطومى الذى ماعاش أجواء غناء الطمبور فى بيئته .. فإن التشبع بالبيئة هو الصورة الكبرى لتشجين الطمبور والدليب .. فعندما تكون شربان بالبيئة وتسمع الطمبور فيقوم طوالى يسافر بيك على جناح السرعة للبيئة والبلد والنيل والنخيل وبيوت الطين القديمى ..
الأخ الفاضل منير لك التحية والتقدير ولكل الأخوة المتداخلين الحب والامنيات
ولتسمحوا لي إخوتي أن أسأل سؤال قد يكون مدخل لعلاقة مختلفة مع الطمبور..
هل ما يعرف بأغاني الطمبور أو الغناء المصاحب لآلة الطمبور هو مخطلت بوجدان بيئة محددة أم هو ضرب من الغناء يتطور بتطور الزمن وعلوم الموسيقى والطفرة الكبيرة في تقنية الآلات والتكنيك على العزف؟؟
أرجو أن لا يزعل مني أهلي عشاق هذا الفن، فهي وجهة نظر قد تكون خاصة بي وقد يكون لتخصصي في الموسيقى الأثر..
دعونا نناقش فقد نجد نقطة يشترك فيها إحساسنا وأذواقنا..
سأعود حتما بعد أن تتكرموا إخوتي بالرد على سؤالي من وجهة نظركم المختلفة لكي ننظر الى القادم..
دعونا من منظوم الشعر أنا أتحدث عن مصاحبة الطنبور بمكوناته ونغماته الحالية..
الأخ عزيز شكراً على الحضور ودخولك بزاوية قائمة على مناقشة الطمبور علمياً لا فنياً :) .. أخوك طبعاً زوول الله ساكت .. حسب رؤيتى أن غناء الطمبور عبارة عن حزمة مكونات حسية ومعنوية ، ويعتبر الطمبور ــــ الآلة ذاتها ــــ أحد هذه المكونات.. المكونات الحسية ـــ أو المادية ــــ هى آلة الطمبور ذاتها ، والطبلة أو النقارة أو الدلوكة أو.. أو.. أو.. .. زائداً صوت الفنان ، زائداً الصفقة والكورس .. أما المكونات المعنوية فهى متعددة .. تبدأ بالكلمات ــــ الأشعار ــــ والألحان ووو .. وهذه المكونات تختلط فى وعاء البيئة والجغرافيا والتاريخ والعنصر البشرى .. إذن هذه هى العناصر التى تحدد إنجذاب المرء لفن الطمبور .. ولذلك تعليقى الذى أتيت بإقتباس منه يشير إلى أن شباب العاصمة حتى وإن كانت أصولهم من بيئة الطمبور فإنهم يستشعرون الطمبور كجرعة ينقصها المكون المعنوى .. ولذلك أنا ذكرت أنى محتار فى إنجذاب شباب الوسط لمحمد النصرى .. فالساحة مليئة بالفنانين المتميزين ولكن ليس لهم صيت وسط الشباب .. فما هو السر؟؟ هل هو صوت محمدالنصرى؟؟ ما أظن لأن صوته عادى بكائى .. هل هو الكلمات؟؟ أظن أن لكلمات أغانى النصرى أثر كبير لأنه ينتقيها بعناية .. هل هو نغمة الطمبور ذاتها ؟؟.. ما أظن ، رغم أن النصرى عبقرى فى العزف .. هل هو إيقاع الدليب المتميز؟؟ .. إلى حدٍ ما ممكن .. وذلك لمن تصالح مع قبائل الشمال وانتزع العقدة العنصرية من نفسه .. هل هو الكورس؟؟ ربما .. رغم أنى شايف كورس الزمن ده فاقد البوصلة ... سأعلق على أداء الكورس لاحقاً .. هل لأن النصرى شاب وسيم ولِبّيس ؟؟ ده متروك للشابات .. :) إذن وياعزيزنا عزيز الطمبور هو العمود الفقرى لهذا التراث كما هو ــــ مدعوماً بجميع المكونات التى ذكرتها .. فإذا نزعته منها يصبح غريب الوجه والنغم .. وإذا نزعتها منه يصبح يتيم .. ونلاحظ ذلك فى عدة محاولات لغرس الطمبور فى أوركسترا حديثة فصار يغرد خارج السرب .. والبعض حاولوا يدفروا معاهو بعض الآلات الأخرى ولكنها لم تتناغم معه .. التطوير الوحيد الذى يمكن القيام به مع الإحتفاظ بنفس خماسية النغمة هو سر عملته أنا وما حأقوله بسهولة .. :)
Post: #129 Title: Re: من روائـع أشــعار وغنــاء الطمبــور .. Author: Munir Date: 01-23-2016, 10:59 AM Parent: #128
Post: #130 Title: Re: من روائـع أشــعار وغنــاء الطمبــور .. Author: Munir Date: 01-23-2016, 11:30 AM Parent: #129
عثمان اليمنى ذلك القامة السامقة ــــ نسأل الله أن يجعل قبره روضة من رياض الجنة ـــ ذاع صيته تبعاً للنعام آدم .. وأشعل الساحة بالألحان المتميزة المتنوعة ، وكان مفتاح إنتشاره هو الرميات التى يستهل بها فصلاته الغنائية .. وأغلبها رميات غاية فى الروعة .. وأذكر إحدى إجازات حش التمر ـــ الإجازة الصيفية ـــ كانت إجازة مشحونة بالأعراس (طبعاً للمعلومية ، كان مواعيد العِرِس تتحدد بحش التمر .. يعنى تقول ليهو يازوول عرسك ده متين؟ يقول ليك حش التمر الجاى إن شاء الله:)) .. فى الإجازة ديك بالذات حضرت عدة أعراس معظمها بعثمان اليمنى .. وكان اليمنى يتميز بأنه أخو أخوان .. فكان كثيراً يغنى بدون مقابل .. وكان مشهور أنه فقط يطلب ترامس شاى لبن أثناء الحفل .. فلم يكن يشرب الخمر .. بالرغم من إنو الشراب كان منتشر .. ــ فعثمان اليمنى كان فارس الدارة فى تلك الإجازة ينتهى من مناسبة ويمشى للأخرى .. وكان عنده معزّة خاصة لبلدنا ، الزومة، وقد تزوج منها .. ونرى أسرته فى الفيديو أعلاه ..
Post: #131 Title: Re: من روائـع أشــعار وغنــاء الطمبــور .. Author: محمد على طه الملك Date: 01-23-2016, 11:41 AM Parent: #130
Post: #132 Title: Re: من روائـع أشــعار وغنــاء الطمبــور .. Author: Munir Date: 01-23-2016, 11:41 AM Parent: #130
Post: #133 Title: Re: من روائـع أشــعار وغنــاء الطمبــور .. Author: محمد على طه الملك Date: 01-23-2016, 12:12 PM Parent: #132
عن إذنك يا منير .. هل ما يعرف بأغاني الطمبور أو الغناء المصاحب لآلة الطمبور هو مخطلت بوجدان بيئة محددة أم هو ضرب من الغناء يتطور بتطور الزمن وعلوم الموسيقى والطفرة الكبيرة في تقنية الآلات والتكنيك على العزف؟؟ سلامات عزيز العزيز .. طبعا زي ما قال أخونا منير حصيلتنا في المجال العلمي ضعيفة في هذا الجانب .. لكن بحق السؤال رائد ومحبوك تمام .. قد تكون الاجابة حاوية لشقي السؤال .. بدليل إنو اولادنا واقصد فيما وراء بلاد الشايقية استخدمو الآلات الحديثة .. وحاولوا تطويعها مع ذات التون إن صح التعبير واللحن المعزوف بالطمبور .. مثال :
نحن بالذات عزف الطمبور عندنا بعتمد على الموسيقي أكثر من الايقاع .. ولذلك يركزون على العزف بالاصابع أكثر من الريشة لأنو بستنطق اللحن .. بينما طمبور الشايقية بركز على الريشة ليفسح مساحة للايقاع ( الشتم ) والكلمات.. اعطيكم هنا مثال لعزف الاصابع طبعا ما هتفمهو الكلمات..
قلت أجيب أغنية طيبة القرية لليمنى من موقع الإذاعة للعزيز أنورتاج السر، لكين فتشت موقع الإذاعة لقيت مليون موقع يدعى الإذاعة السودانية إلى أن لميّت فى الموقع الرسمى فوجدته تحت الإنشاء .. يبدو أنهم بصدد إعادة تصميم أو يكون تعرض لهاكر دمره .. فالعذر لأنور ..
الإستماع للأغنية يبدأ مع الإنجذاب لعموم اللحن مع إيقاعه .. ثم تنبأ تأكل العنب حبة حبة .. اللحن أولاً لأنه أول ما يلامس الأحاسيس .. ثم يبدأ الإستمتاع بالصوت وروعة أداء الفنان .. وبعدها التأمل فى الكلمات .. وبعدها التركيز على الإيقاع والكورس .. كلٌّ من هذه الجزئيات لها جزيئات دقيقة من الإمتاع .. وتكتمل الصورة بإستحضار البيئة الكاملة سواءً كانت فى حفلة أو فى الجروف وسط النخيل وقرب النيل .. والأجمل طبعاً معروف، وهو إستحضار شخصية المحبوب مطبوعة على كل الأغنية، وكأنما كل بيت ومقطع من الأغنية يخاطبه ويوصفه ..
Post: #139 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-23-2016, 05:55 PM Parent: #138
Post: #140 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-23-2016, 05:56 PM Parent: #139
Post: #141 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-23-2016, 05:58 PM Parent: #140
Post: #142 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-23-2016, 05:59 PM Parent: #141
Post: #143 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-23-2016, 06:01 PM Parent: #142
الأبوك ربّاكى بالضحك وعمره ما نهرِك وزعلِك يارايقة هوى ..
أى أب لبنت سيستشعر روعة هذا البيت فى الأغنية التراثية الجابها العزيز عبدالمنعم سيداحمد .. الأغنية الجماعية فى برنامج نادى الطمبور ـ تقديم د.محمد بادى ..
المؤدون هم : ١ـ عبدالرحمن بلاص ٢ـ ..... ٣ـ محمد جبارة ٤ـ عثمان اليمنى ٥ـ عبدالرحمن أحمد محمد (عبدالرحمن الكرو) ٦ـ صالح حسين ..
زى ما قلنا القديم يساوى ألف بالجديد، فهذه أغنية القمر بوبا الشهيرة، بصوت الفنان المرحوم إدريس ابراهيم رحمه الله وغفر له وجعل الجنة مثواه .. طمبور إدريس ابراهيم عنده وزنة متميزة ، وهى أن ترخى السلكاية المسماة الحِنينة ، ترخيها سِنَّة كده فتعطيك مقام فيه إمالة حزينة مع الحفاظ على خماسية النغمات .. بصرحة الريذم وحنية الطمبور ذكرتنى برنامج ربوع السودان الخالد الذى كنا ننتظره بفارغ الصبر ..
وهذه أغنية أخرى أحبها جداً لإدريس ابراهيم : حبيبي الشادن العاجباهو روحو .. كم خُطّاب يجو وخطاب يروحو ..
وتظهر فيها بوضوح وزنة الطمبور ذات الإمالة الحنينة ..
Post: #148 Title: Re: من روائـع أشــعار وغنــاء الطمبــور .. Author: عبدالعظيم عثمان Date: 01-23-2016, 07:37 PM Parent: #145
سلامات يا منيــر
تعرف قبل اكثر من 10 سنين تقريبا في السوق العربي الخرطوم سمعت محمد النصري بيغني : رائعة خالد شقوري أم الحسن كنا بنشرب شاي لبن باللقيمات مع واحد معارض كبير(الوقت داك كان مفلس وروحه مارقه) باع القضية وبقي وزير مع ناس الحكومة دا نغم وكلام سمح ... وأغنية جميلة جدا
يا منير المجموعة قطعت مقدمة البيت .. إلا عبد الرحيم البركل جاب البيت كامل ..
طبعا لمن لا يعرف شيخ زمراوي الولي جد زملاء البورد زمراوي والشاعر مولانا عبد الإله زمراوي .. أما شيخ منور فهو جد زميلة البورد الدكتوره ندى مصطفي .. اما حمد الملك فهو جدي يعني احتمال تكون المعنية واحده من حبوباتي هههههه.
ياسلام ياملك .. ودالبركل غناها بمزاج رايق .. والظاهر الزوولة من عنديكم .. ومادام بنية حمدالملك جدكم شخصياً تبقى حبوبتك لزم .. وتحية لأولاد الشيخ زمراوى الولى ..
نلاحظ أن أغانى تلك الحقبة تتميز بمراسيل القمارى والتشبيه بنفور الظباء وكثير من مظاهر الطبيعة الشمالية ومن صميم يوميات الترابلة .. وتجد الوصف الحسى ذاته محتشم ويتكون من إشارات وترميز من بعيد لبعيد .. والأغنية دى بالذات يخيل لى منتشرة فى كل تلك المناطق ..
يُحكى أنه زمان جاء شباب من البلد للشغل فى العاصمة .. وسكنوا عزّابة فى أحد الأحياء .. فكانوا النهار كله يقضوه شغل ، ويجوا يشيلوا الليل كله سكر وغناء وصفقة .. وطبعاً الأغنية الرئيسية هى هذه الـ ليلى انا الله الليل.. الليل والليل رايقة هوى .. وغنية الله لينا وباسمة أزهار الجنينة اللــــــه ... يعنى كل الغنا الله هوى والله لينا و الله الله .. وووو .. فالجيران إنزعجوا من هؤلاء الشباب ومشوا اشتكوهم للسلطات .. فقامت السلطات قالت ليهم كويس نحن حنجى نتصنت ونشوف إزعاج الجماعة ديل ونداهمهم .. أها قام البوليس جاء وقعد عند الجيران يستمع .. لقى الجماعة الليل كله شغالين الله هوى وليلى انا والله الليل وو .. فقال لناس الحلة إزعاج شنو البتتكلوا عنه؟؟ اناس ديل الليل كله شغالين يمدحوا ويذكروا فى الله .. عملتوا لينا إزعاج ساكت .. :)
حبيبي الشادن العاجباهو روحه كم خطاب يجوا وخطاب يروحوا أنا الجيتكم عشوق داميات جروحه داووهو الجريح ردولو روحه ياحبيبي الشادن ياالضاحكات سنونه يتجلى الجمال فى نور عيونه هناك فوق الخديد شامة بتزينه يتلألأ جبينه ما أحلى لونه ياحبيبي الشادن الأسمر وسادة الكل القلوب عابداك عبادة كل يوم فى دلاله يزيد زيادة ماأحلى الدلال من أحلى غادة حبيبي الشادن ياالوارث جماله من أمه الجميلة أخد كماله عشان يرمى القلوب بسهام نباله أصابنى انا فى الوريد وجروحى سالوا حبيبي الشادن آه أنا لى مُنية فى عش الغرام تجمعنا دنيا نعيش للحب تبقى حياتنا غُنية غُنية جميلة ما أحلاها غنية حبيبي الشادن
Post: #153 Title: Re: من روائـع أشــعار وغنــاء الطمبــور .. Author: Munir Date: 01-24-2016, 01:11 AM Parent: #152
أعود لسؤال الأخ عزيز .. وأضيف .. كما قلت أن أغنية الطمبور عبارة عن حزمة من المكونات الحسية والمعنوية .. وحسب إحساسى فإن المكون المعنوى هو الأهم لأنه مرتبط بإحاسيس ووجدان متعلق بالروح التى هى متعلقة بأزمان وأماكن وظروف غالباً قد مضت .. ولذلك مثلاً حينما أتلقى حزمة الطمبور أنتقل فى الزمان والمكان والظرف المتعلق بالنغم واللحن والكلمات وهنا المكان هو بيئة الطمبور التى عشتها فى زمن معين وانتقش فى وجدانى بذكريات معينة ، وما أحلى الذكريات .. كما أنى حينما أستمع لمحمد وردى وهو يقول خاف من الله على قلبى أو مرحباً ياشوق أو إسمع عثمان حسين يقول عاهدتنى إنك تكون مخلص فى حبى فأنا هنا كذلك أتحول بوجدانى وذكرياتى للعاصمة ولأضواء خافتة وبيئة خرطومية وأناس آخرين وسينما بحرى والمحطة الوسطى وحفلات الخرطوم وأوتار الليل ووو .. وعندما أستمع لأيس أوف بيس أو روكسيت أو ريد ستيوارت أو فِل كولن أنتقل كذلك لأجواء باردة وجليد وظلام وشمس منتصف الليل وبنات شقر ودراسة شاقة ووو .. والإستنتاج هو أن التأثر بالحزمة الإبداعية الغنائية عبارة عن متغير وجدانى مرتبط كما ذكرت بذكريات ثبتت فى الوجدان فى أزمان معينة وأماكن معينة وظروف معينة .. وليست مرتبطة بالآلة وتطورها .. والدليل أنك يمكن أن تنفعل لأغنية بآلة واحدة بدون إيقاع أكثر من إنفعالك للأغنية بفرقة موسيقية مكتملة ..
أها ده تنظير آخر الليل وإجتهاد منى ساكت .. إن شاء الله ما أكون ضجرتك :):)
Post: #154 Title: Re: من روائـع أشــعار وغنــاء الطمبــور .. Author: بريمة محمد Date: 01-24-2016, 01:31 AM Parent: #153
يا سلام .. والله يا شباب رايعين روعة شمالنا وسودانا كله ..
لكن الله يعلم .. لخبتونا لخبته .. كنت أعشم مع ول أبا منير .. قلنا خلاص نطلع بنكهة الطمبور الشايقي لكن دخلتوا لينا الدرب فى ألمي دت .. كل الطنمبور يبدو عليه رائع وجميل وعذب.
واصلوا .. ومستمتعين ..
بريمة
Post: #155 Title: Re: من روائـع أشــعار وغنــاء الطمبــور .. Author: Munir Date: 01-24-2016, 02:16 AM Parent: #154
مرحباً أخى بريمة .. أنا مسرور أن وجد البوست هوىً فى نفسك .. ومادام أنا جبت ليكم سيرة وردى وعثمان حسين وأغنية عاهدتنى التى أحبها لازم أنزلها هنا لتنويع الأنغام .. وهنا أنا ذاتى الـsetting بتاعى فى اللحظة دى تغير لأجواء الخرطوم بالليل ومرطبات بحرى وحائط دعاية أفلام سينما وطنية بحرى وأنا راكب تاكسى هيلمان ٦٤ طالع على الكبرى فى سكون الليل .. ومع عثمان ـــ رحمه الله ـــ ما مشيت بيكم بعيد فعثمان حسين من مقاشى بلد حبوبتى وأعمامى وهى الملاصقة للزومة بلدنا .. لكنى ماحصل يوم سمعت عثمان حسين يذكر أنه من مقاشى ، فقد أراد أن يكون قومياً طول حياته للسودان كله..
كلمات : عبد الله التاج ألحان : معـتـصـم إبـراهـيـم
يا الله أنت براك الحاله داريبا من أهلي من خلاي طالت بنا الغيبه أهلي الحنان بالحيل ديل منبع الطيبه لي شوفتم مشتاق طولت أهاتيبا ناس ترتي للمسكين تديهو من جيبا وللجائع المحتاج تقسم قواسيبا الناس غشاها العيد تفصل جلاليبا جدعت طواقيها لبست مراكيبا مرقت على الجيران معطونه بي طيبه أتعانقت فرحه شبانا بي شيبا أنا شوقي للحله طينة لقاديبا لمتين محل الأم جرت عنيقريبا قاطوع معشش طير في كيمو قسيبا إربل قديم مهكور مدفونلو في حيبا وأنا شوقي للعازة وجلسة رواكيبا سعناً ملا النقاع لو مويتو حمريبا أتواتا أكركع زين وآخد لي قنيبا مويتاً تفك الريق للضاربا وتيبا أنا شوقي للبوقه وشتيت تواريبا جدول ملان مسروف ماخدلو سرسيبا شفع صغار يرعوا تظهر كواجنيبا سايقين قطيع أغنام صادين بها الغيبا يا الله أنت براك الحاله داريبا من أهلي من خلاي طالت بنا الغيبه
Post: #159 Title: Re: من روائـع أشــعار وغنــاء الطمبــور .. Author: عمر عثمان Date: 01-25-2016, 07:34 AM Parent: #158
أعتقد من اجمل الأغنيات ما غناه النصري ل حميد الخدير الشال وبدع
لو في قسمه ده كان خديري أصلي مما قمت بزرع ما حضن سيدابي خيري
فيها تجاوز حميد قمم ووصل إلى القيم الانسانيه العليا بانعتاقه التام عن الأنا وانحيازه للخير والصلاح
وعلى الأستاذ علي عبد الوهاب يشرح لينا سيدابي دي علاقتها شنو باللغه النوبيه مشكورا وولدنا الشامي ينزل لينا الاغنيه دي ويا منير حميد كان ساكن مع خالو أبو اسامه سليمان
مشكور كتير عزيزنا عمرعثمان على هذه الأبيات .. ملَكَة الشعر عند المرحوم حميد متفردة، وخاصة فى حياة الغبش والبلد والوطن والمحنّة ..
نعم يبدو أنه سكن لفترة فى الشعبية عند ناس أسامة سليمان .. وأنا فطِّيت جزئية أنه بعد تلك الجلسة المسائية فوق مسطبتنا إستلف منى الطمبور لعدة أيام .. وتخيل أنى أديته الطمبور حتى بدون ما أعرف هو زاتو منو ..
مداخلة كتبتها فى بوست طلحة بتاع قيس وليلى وفيها رائعة السرعثمان الطيب ــــ ياالناسينا ــــ
Quote: ما يميز شعر مجنون ليلى هو الهوى العذرى .. والعذرية شئ نادر ، ويخيل لى أن الحب العذرى يبدأ من الطفولة وبواكير المراهقة .. والهوى العذرى طبعاً هواء ساى ؛ مافيهو أشواق شهوانية .. أقصى درجات شهوانيته هى العناق البرئ .. وتبدأ عذرية الهوى فى التلاشى مع الزمن حتى تصل للصفر بعد إتصال الأجساد وبلوغ الذروة الحسية .. بعداك الله معاك .. ولذ فإن شعر قيس فى ليلى شعر نبيل معطون بالمعانى فقط وليس بالصفات الحسية كما فى أبيات الأعشى ..
فى شِعرنا المحلى أديكم قصيدة قمة فى الرومانسية يمكن تصنيفها ـــ حسب التصنيف الناجره من راسى ــ أنها هوى عذرى .. وهى قصيدة ياالناسينا للشاعر السرعثمان الطيب ..
يا الناسينا ..حبك في ربيع دنيانا شال نور تسقي الذكريات يا روحي شان يخضرّ لي يكبر همساتنا وعناقنا الحاني يا ريت ليها تتذكر لمان من جداول ريدنا كنا بنرتوي ونسكر ضل السيسبان والمنقة لافينا بوشاح أخضر فرع البرتكان متدلي فوقو كنارو يتبختر والكون كلو باسم لينا طربان غنى واستبشر لكن جار زمانّا الليلة خلى صفانا يتعكر بطراك ، وكتين الساقي التسوق فجراوي تتحسر نواحا يزيد قليبي بكا واصبّرو مابي يتصبر بطراك والقميرة معاي تشاركني الهموم تسهر نعسان انت يا محبوبي ضوها فوق وشيك نوّر بطراك وكت اشوفلي عريس فرح في صحابو قام بشر واتمناك واعيش لحظات محال يا روحي تتفســر بطراك ، يوم قمحنا سنابلو لونن يتقلب أصفر أبكي على الديون الفوقي .. والغير في الحصاد فكر بطراك ، وكتين الشخلوب سبيطتو تخافلو يتبعثر تضمو عليها بي تحنان قليب الام كمان وأكتر إلا قليبي قلبك جافا .. لي تحنانو ما قـدّر راجيك بالسنين يا روحي ضيع للشباب ودر تنساهو وبراهو تسيبو ..حبك ليهو يتغير؟ يتجرع وراك احزانو يندب حظو يتكـدر يا ريت لو تعود وتجيهو أو في مرة تتعذر شان تلقاهو قاربو وراك في لجج العذاب أبحر
لاحظ هذا الفلاش: بطراك والقميرة معاي تشاركني الهموم تسهر نعسان انت يا محبوبي ضوها فوق وشيك نوّر
شوف عذرية الأبيات وهمس الطبيعة فى عبارات.. ربيع دنيانا .. جداول ريدنا .. ضل السيسبان والمنقة .. وووكت الساقية تسوق فجراوى تتحسّر .. وووو ..
الحقيقة قلت أمشى أحوم النت أجيب لى صور من الشمالية ألوِّن بيها البوست .. لكين للأسف الناس دى تسافر وترجع وتمشى البحر والجروف والقلاع والرمال وبيوت الطين ووو ومافى زوول الله فتح عليهو صور ليهو صور عندها قيمة .. شئ مُحبِط ..
Post: #164 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-25-2016, 11:19 PM Parent: #162
طالما صور سمحة مافى أنزِّل لى لوحة لقطر الشمال فى رحلة خيالية رسمتها قبل ٢٠سنة وكنت أهديتها لصديق سويدى ، فمشيت سنة ٢٠١٣ زرته لقيته مبروزها ومعلقها فى الصالون .. أخدت منها لقطة
Post: #168 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-26-2016, 05:38 PM Parent: #167
Post: #169 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-26-2016, 05:40 PM Parent: #168
Post: #170 Title: Re: من روائـع أشــعار وغنــاء الطمبــور .. Author: علي عبدالوهاب عثمان Date: 01-26-2016, 05:53 PM Parent: #169
Quote: عتقد من اجمل الأغنيات ما غناه النصري ل حميد الخدير الشال وبدع
لو في قسمه ده كان خديري أصلي مما قمت بزرع ما حضن سيدابي خيري
فيها تجاوز حميد قمم ووصل إلى القيم الانسانيه العليا بانعتاقه التام عن الأنا وانحيازه للخير والصلاح
وعلى الأستاذ علي عبد الوهاب يشرح لينا سيدابي دي علاقتها شنو باللغه النوبيه مشكورا وولدنا الشامي ينزل لينا الاغنيه دي ويا منير حميد كان ساكن مع خالو أبو اسامه سليمان
حبيبنا عمر عثمان .. التحية لك جعلتني أغوص في كل المفردات وما زلت أبحث .. وسبب تأخيري أنني لا أريد أن أدخل في تأويل .. ولكن أهلي الشايقيه ديل هم حافظين لينا الكثير من المفردات المندثرة لدينا .. لأن الغناء والشعر يحفظ الكثير من التراث .. ومعظم مفرداتهم الزراعية هي من النوبية الدنقلاوية للقرب والجوار .. حتماً سوف آتي إليك بهذه المفردة ( سيدابي ) لأن التنغيم للمفردات النوبية لدى أهلنا الشايقية معظمها تنتهي ب ( حرف القاف ) مثال ( نوريق ، متيق ... ) او ( ووق ) مثل واسوق ، فاشوق ... الخ غرابة المفردة في ( اب ) .. الشكر كثير لصاحب البوست منير .. بوست توثيقي رائع .. ,
Post: #171 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-26-2016, 10:11 PM Parent: #170
لايمكن أن نكتب عن روائع الشعروتراث الشمال بدون أن نذكر شاعر الزومة الشخصية المشهورة بالطرفة والشعر البليغ وهو ابراهييم الزومة الذى انتقل للرفيق الأعلى قبل بضع شهور نسأل الله له الرحمة والمغفرة ..
فى هذه القصيدة فى الفيديو أعلاه نرى كيف أن ابراهيم الزومة يعدِّد الأنبياء والرسل فرداً فرداً ويذكر لكل منهم خاصيته ومعجزته كأنما هو حافظ القرآن سورة سورة .. ويمكن تصنيف هذه القصيدة من روائع المدائح وأتمنى أن يلحنها ويشدو بها أحد المادحين .. فهى درس ودعاء وتوسل فخيم ..
أنا ألاحظ أن معظم المناطق فى منحنى النيل عندها فنانها الذى إشتهر من ديار مناصيرــ عيسى بروى ـــ وتجى على كريمة والبركل فتلقى عبدالرحمن البركل وأخوه عبدالرحيم ، وتجى غاشى الكرو ومنها عبالرحمن الكرو ، ولكين تفط الزومة وحزيمة ومقاشىى وتمشى لقدام وتصل الحجير والأراك والمقل ووو كل المناطق دى عندها فنانين مشهورين لكين الزومة بس تخصصوا فى الكورس ..
وبالرغم من أن القرير هى منبع الشعراء لكين ودالزومة يساوى عشرة .. لأن شعره مباشر ويغطى كل الأذواق، ويتصف بخفة الروح والحكمة وبلاغة العبارة ..
من الطرائف أنه يوماً لاقى أخوى فى موقف البصات المسافرة الشمالية ، فقال ليهو ــــ إنت ولد عبدالرحيم؟ ـــ أأيوة .. ـــ ماشى البلد إجازة ..؟؟ ـــ أيوة، إسبوعين وراجع ـــ إسكيرت وبلوزة يعنى؟؟ ..
Post: #175 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-27-2016, 01:03 AM Parent: #174
Post: #176 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-27-2016, 01:04 AM Parent: #175
Post: #177 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 01-27-2016, 01:05 AM Parent: #176
من طرائف ابراهيم عمر التى أضحك كلما أتذكرها (أمبارح القريبة دى تذكرتها وضحكت:)) ؛ أنه حكى أن شاباً وجيهاً قاشر فى أناقة ــ واقف فى المحطة منتظر الحافلة.. وكل دقيقة يتاوق لآخر الشارع للحافلة .. والوقفة طالت .. وكانت برضو واقفة هناك بنت سمحة لابسة اسكيرت وبلوزة ومنتظرة ، وكانت ترمقه بالنظرات .. فأعجبت بالشاب وقامت نفسها حدثتها تتشجع وتفتح معاهو موضوع .. فجاءت قريبة منه على استحياء وقالت لنفسها موت موت حياة حياة .. وقالت ليهو: هاى .. فى رأيك البلوزة دى ماشة مع الإسكيرت ؟؟ فالتفت إليها وقال: هو الاسكيرت زاتو ماشى وين؟؟؟!!!
طبعاً للمعلومية فإن ابراهيم عمر هو ذاته ابراهيم الزومة ظل دائماً فى البلد معروفاً بإبراهيم عمر .. إبراهيم الزومة دى ظهرت بعد ظهوره فى الخرطوم ..
Post: #180 Title: Re: من روائـع أشــعار وغنــاء الطمبــور .. Author: Munir Date: 01-29-2016, 00:20 AM Parent: #179
ضل الغيمة كلمات السر عثمان الطيب غناء محمد جبارة
ضل الغيمه غش قليبي قال ينجمّ خت رحالو فات خلاهو للكان ظنو في عز الهجير يرتالو عاد وريني ليه يا غيمه ماك عارفي السفر وأحوالو ولا قليبي تحتك حالفي ما يطيبلو المقيل يحلالو ضلك من بعيد يا غيمه كان دايماً بيتمارالو جافل منو لكن برضو كان عاقد عليه آمالو جاييك من بعيد يا غيمه قاصدك داير يريح بالو والله لحظات بس يعيشهن هاني تحتك زي عُمر تبقالو فاكرك والهجير يا غيمه صاليهو مبشتن حالو ولا بي تحنان تحضني عليكِ تمسحي منو دمعات سالو إنتِ لو كان ليكِ قلب يا غيمه عاشقك فات رحلبو شالو كان واديك دمعك رشّ كترت عربو في حلالو مادام فُتي آه يا غيمه قصدو الدايرو ما تمالو شن الحارسو باقي وراكِ مادام غرزو تب ما نالو بالليل والنهار يا غيمه ناوي يقوم علي ترحالو وحده خلاص يواصل تاني مشواراً كتيري اهوالو قوليلو الوداع يا غيمه لو كان في الوداع يلقالو حبة زاد يشيلا معاهو في سفرو ليالي الطالو داير يوصيكِ هاك يا غيمه لي زولاً قبيل غنالو تمشيلو توصفي ليهو كيف جمر الغرام سوالو كيفن بُعدو آه يا غيمه تب في الدنيا ما خلالو غير جرحاً يزيد إيلامو كل ما صحبو قالوا وقالوا غير بيت من قصيد يا غيمه يفرِح حتى لي عُزالو مهما سو فوقو وجابو زادولو الملامه وكالو غير طيفو الحبيب يا غيمه في دنيا العذاب هلالو إتذكر زمانو الولى رقّ قليبو تب حنالو غير قيداً خلاص يا غيمه معقود وإنعدم حلالو والله رغم البيهو قولي ليهو ما فارقت لحظه خيالو
Post: #181 Title: Re: من روائـع أشــعار وغنــاء الطمبــور .. Author: Munir Date: 01-29-2016, 00:29 AM Parent: #180
إنتِ لو كان ليكِ قلب يا غيمه وعاشقك فات رحلبو شالو كان واديك دمعك رشّ كترت عربو في حلالو
من الألحان التى تشجينى .. لا راق ولادنّه بيروق .. للشاعر زاهـــر خــوجـلـي لحنها ودالعوض وغناها محمد النصرى وأيضاً بابكر البرصة ..
لا راق ولا دنُو بيروق ما بين أسى وحرقة وشجن قاصدني من دون الخلوق وين راح صوابك يازمن
وينو الزمان الكان حنين وين نجمو مالو خلاص أفل وين حين نتاوق للسنين هايمين علي كمين أمل وايه فايدة البكى والأنين غير تهت بين ياريت وهل واية من طريق الريد جنيت يامنبع الحب الحسن
هبَيتَ كايس دنيتك حين قلتي حيَّ علي الهوى ورغم ابتلاءات سكتك ما ضلَ قلبي وما غوى قابض من الريد شرعتك ولازم الصراط الاستوى ما كان جهادك فرض عين لكن قلب مليان شجن
وطبع القليب البيكي هام باقالو زاد دنيا ومتاع حاشاهو من دون الأنام ما بيعرف الزيف والخداع قلباً علي دنيا السلام حين تبقى يوم تشرى وتباع لا بدَل الريد لا أضاع كيف يبقي دون عينيك إذاً
مذهول من الواقع السواد مانوَرو القلب التقي وإيمانو بي حفظ الوداد ما خلَا ظلمك يتَقي وين الأمل نبض المداد في حضرة الود النقي وليه عملة الإخلاص بقت تصبغ علي الإيدين درن
محمدالنصرى وبابكر البرصة أدوا الأغنية أداء متمكن وكل واحد فيهم أفضل من التانى .. الكورس فى أغنية النصرى أضاف رونقاً ، بينما الإيقاع فى أغنية بابكر البرصة أقوى .. إلاّ أن بابكر البرصة أداؤه فيهو شوية سرعة .. وعموماً أنا أميل لأداء النصرى ، فأداؤه البكائى يناسب اللحن والكلمات .. صوت ود البرصة ظهرت فيهو حشرجة خفية فى البداية .. وملاحظة : البرصة إسم منطقة ـــ قرية ـــ فى الشمالية ..
Post: #189 Title: Re: من روائـع أشــعار وغنــاء الطمبــور .. Author: Haytham Ghaly Date: 02-09-2016, 06:18 AM Parent: #188
سلامات منير
طولنا الغيبة من البوست الظريف دا لكن تقول شنو بس مع العكات الحاصلة دي
حا اهدي ليكم اغنية لمعاوية المقل جميلة واعجبتني جداً كلماتها جميلة ولكن لم ابحث عن اسم شاعرها
مرحبتين يا الغالى .. إختيار حلو ياخى .. معاوية المقل له أسلوب وألحان متميزة ..
يازول خليك بجاى .. أفنينا عمرنا فى المنبر ده وغير وجع الدماغ وسوء الخلق ما كسبنا منه شئ .. وفوق ده كله مافى زول بيقتنع برأى التانى لأنو أساساً أى واحد جاى هنا عشان يقنع الآخرين وما يقتنع بالآخرين .. سودانيين إتجاه واحد ..
صابرة ومابضيق : أداء الفنان عبدالرحمن بلّاص .. أغنية قديمة عن بنت رفضت زواج ود عمها كلو كلو .. وقالتها لأبوها عديـــــــــل ..
بأمانة لمن كنا سغار أغانى بلّاص دى ما كنا بنريدها خالس ربما لأنها ما معاها طمبور ــ لكين جيل الآباء كانوا يحبوها .. بس الآن أنا وجدت أنها درر وروائع .. يكون لأننا بقيتبا جيل آباء يا الله !!؟؟؟ .. :)
نلاحظ فى الأغنية الإستخدام للإستايل القديم فى الغناء حيث الإيقاع بالنقارة وعصايتين غلاد، والنقارة تشحورت لدلوكة ومرات دلوكتين مع بعض، ومن ثَمَّ دخلنا عصر الطبلة الواحدة والآن ثلاثية الطبل .. والعصايات الغليدة استبدلت بجريدة رفيعة مع إستخدام الكف ببراعة لتنويع الإيقاع ..
لكن عموماً نرى الفرق الواضح فى أشعار الزمن القديم ذات الكلمة المباشرة، وأشعار اليوم التى بدأت تتأثر برمزيات الحداثة ...
صابرة وما بضيق .. ريده نوّر لى الطريق .. يابا صابرة ومابضيق .. قال لى باكر أهله بيجوك .. مِدْ لُو إيدك قولو مبروك .. وما تخُت فى دربنا الشوك .. مابتخاف الناس يلوموك؟ ليه جدودى لأمى أدّوك .. صابرة وما بضيق ..
Post: #194 Title: Re: من روائـع أشــعار وغنــاء الطمبــور .. Author: محمد على طه الملك Date: 02-13-2016, 05:52 PM Parent: #193
طبعا يا منير ميزة عبد الرحمن بلاص انو كان بنقل أغاني التراث بنفس ايقاعها وطريقة أداءها الشعبي .. يمكن الغنية دي كلماتا حديثة إلا هو ركبا في لحن وإيقاع وطريقة أداء تراثية .
Post: #195 Title: Re: من روائـع أشــعار وغنــاء الطمبــور .. Author: Munir Date: 02-14-2016, 01:21 AM Parent: #194
سلامات محمد على الملك .. نعم بلّاص موغل فى التراث ... وأظظن أن هذه الأغنية أقدم من البحر .. ههه .. فهى تطرق ذاكرة طفولتى فتأمّل .. :)
غايتو البوست قلنا نجمع بيهو بقايا الوجدان المتشتت والمبعثر بين القارات ..
وكدى شوف لحن وكلمات الأغنية : ما جانا قمر سماه أدناه..
Post: #196 Title: Re: من روائـع أشــعار وغنــاء الطمبــور .. Author: Munir Date: 02-14-2016, 01:29 AM Parent: #195
ما جانا قمر سماه أدناه .. عبدالرحمن بلّاص
متين نتلاقى يا السمحة ام شبابيل ومتين نتلاقى يا شتلة عجو النيل متين نتلاقى كتّرتَ المراسيل على شوقى المطوِّل شاهِد الليل .. ماجانا قمر سماه
تصدق يا المنير الاغنية دي واضعة فيني بصمات ما يعلم بيها الا الله !!!
Post: #199 Title: Re: من روائـع أشــعار وغنــاء الطمبــور .. Author: Munir Date: 02-21-2016, 00:46 AM Parent: #198
مرحبتين بالودودة منى وشكراً على سماحة الطلة ..
الأغننية رهيبة والجمهور عجيب كمان ..
ما عندك حل مع البصمات إلاّ تتصبرى بس مع المتصبرين.. :)
Post: #200 Title: Re: من روائـع أشــعار وغنــاء الطمبــور .. Author: محجوب البيلي Date: 02-21-2016, 01:37 AM Parent: #198
وبعدين معاك يا منير؟! عاجبك الشي البتسوّي فيهو دا؟ غايتو ... الله يسامحك.
Quote: هسه أنا أسوى شنو؟
وأنا أسوي شنو؟.. المصنقر الساعة 4 ونص الفجُر. أقرا وأسمع ... وتسيل دموعي أنهاراً. أي والله.
Post: #201 Title: Re: من روائـع أشــعار وغنــاء الطمبــور .. Author: محجوب البيلي Date: 02-21-2016, 01:50 AM Parent: #200
مالي لا أرى الهدهد ... عبد الرحمن محمد صالح؟
Post: #202 Title: Re: من روائـع أشــعار وغنــاء الطمبــور .. Author: محجوب البيلي Date: 02-21-2016, 01:53 AM Parent: #201
Quote: يعنى زمان يقولوا ليك أبرع عازف للطمبور هو النعام آدم، ثم جاء زمن محمد جبارة .. ثم سمعت من يقول أن سيد احمد عبد الحميد عجيب فى عزف الطمبور ، والآن أنا شايف إنو محمد النصرى رهيب فى العزف .. رهيب عديل ..
أها "مامان" دا أوديهو وين؟
Post: #203 Title: Re: من روائـع أشــعار وغنــاء الطمبــور .. Author: محجوب البيلي Date: 02-21-2016, 02:00 AM Parent: #202
أخونا عبد الرحمن محمد صالح (مامان)، عضو المنبر، من أبناء القرير وزميل دراسة في مروي الثانوية. لم يطربني أحد في الطنبور مثلما يطربني هذه المامان. الناس أذواق.. أي نعم، لاكين الزول دا شغلو كـُتـُر. وهو في التوثيق أيضاً يحتفظ بالكثير من "الأسرار" والتفاصيل وحكايات الكواليس. قطع شك ما شاف البوست دا، أو يكون قاعد يحضّر ليهو في حاجة.
Post: #204 Title: Re: من روائـع أشــعار وغنــاء الطمبــور .. Author: Haytham Ghaly Date: 02-21-2016, 08:36 AM Parent: #203
الخدير الشال وبدع
لو في قسمة دا كان خديري
Post: #206 Title: Re: من روائـع أشــعار وغنــاء الطمبــور .. Author: Munir Date: 02-21-2016, 10:33 AM Parent: #204
الخـدير الشـال وبـدع كلمات الحاضر دائماً شهيد الحق والخير والجمال والنضال: محمـد الحسـن حسن سالم حميـد النص:--
الخدير الشال وبدع لو في قسمة ده كان خديري اصلي مما قمت بزرع ما حضن سيدابي خيري ياما كم بيراً حفرتو ما حصل قت يوم ده بيري زيى زي غيم بي مطرتو ما فرز ضل من هجيري طين جروفي المني روّح شالو هدام الدميري ما بكاهو قليبي نوّح ماهو يوم بطلع جزيري كل زول من حقو يحلم حلمي يا راحة ضميري تبقى هذي الدنيا ارحم وخيره زي الغيمة ميري ريده لله ريده اكمل من جبيري وحُق ضريري القمر في سماهو اجمل ام هلالاً بين حريري.؟ ياكي دنياي وانتي ليّا مهما يبقى الليك لغيري ما يهم تعطف علي ولا ما تاخد خبيري افضل اهواك يا بنيه مهما يبقى الليك لغيري افضل اهواك يا بنيه كيف حأهرب من مصيري؟ طالما إنو الحب قضية هى هى محل تصيري اولى بيك لو بالمحبة وانتي ماكي علي كتيري بس عويدك مما شبْا والقلب مزروب لغيري لو ظروف سابتني اقنع وانسى حرثي الساقو غيري ياتو حاحايا بيمنع من يغرد فوقو طيري
Post: #205 Title: Re: من روائـع أشــعار وغنــاء الطمبــور .. Author: Munir Date: 02-21-2016, 10:27 AM Parent: #203
يامراحب بالعزيز محجوب البيلى .. شكراً على الزيارة والمتابعة ..
يا نسمه كيف أحوال اهلنا وحينا ...؟ احـــكـــيـــلــــى ... عـاد مـا باقـى طـولـوا منـنـا زى ما زمـان طارنهـن طارننـا زى ما بنشيلن فى القلـوب شايلننـا حتى البعـاد فتـق جروحـن زينـا يا نسمة مـا تدسـى المكتـم عننـا تـمـراتـنــا كــيـــف ..؟ يا نسمه عرجونا انتنى شيـلاً تقيـل فوقـوا الدبـاس رسـل غـنـا .. لملـم عويشـوا مــع الصـبـاح للعـش بـنـى حـضـن الجـنـا الـســاقــى كـــيـــف..؟ جـدولــنــا كـــيـــف..؟ الـبــوغــه كـــيـــف..؟ يــــــا نــســمـــه .. ما شفتى المتر سايقنـو صيـف ..؟ عرباً بعااد .. يا نسمـه كيـف ..؟ مـــا قــالــوا لــيــك .. بيوضـه .. رشـاهـا الخـريـف؟ يـا نسمـه قولـى بـدون بكـا .. الـمـنـقــه كـــيـــف..؟ يا نسمـه صـح شـال وانتكـى ؟ يــــــا نــســمـــه .. مالك ساكتى ؟ما قلبـى اشتكـى .. يـــا نـسـمـة قــولــى .. فـــتـــرت انــــــا .. احـــكـــيـــلــــى ... عـــن نــــاس حـيـنــا شـيــلــى الـــســـلام .. يـا نسـمـة بالـكـوم منـنـا .. وديـــهـــو لــيــهــن.. فــى الشـمـال مــن عنـدنـا وان شـــاء الله تـوصـلـى .. بالسـلامـه.. بـــدون عـنــا
غايتو السر عثمان الطيب ده عجيب .. زول شفيف ورهيف .. دائماً هائم مع الطبيعة ويكالم النسائم والقمارى والجروف والنخيل والنيل ..
Post: #210 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 02-21-2016, 06:12 PM Parent: #209
Post: #211 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 02-21-2016, 06:13 PM Parent: #210
Post: #212 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 02-21-2016, 06:15 PM Parent: #211
Post: #213 Title: Re: من روائـع أشــعار وغنــاء الطمبــور .. Author: محمد على طه الملك Date: 02-24-2016, 11:44 PM Parent: #212
عيييييييك يا منير .. كلامي جالك .. جيت داخل البيت قبل شوية لقيتم فاتحين تلفزيون السودان .. فرقة صينية بتغني .. أنقر شنو ؟ ليك اسبوعين الواااحدة بتاعة بروي .. ياريت منعم النجيض دا يقنص ليهن امكن يجيبو خبرن في اليوتيوب.
Post: #214 Title: Re: من روائـع أشــعار وغنــاء الطمبــور .. Author: Munir Date: 02-25-2016, 00:07 AM Parent: #213
هاى الملك :) .. قلت لى الشاينيز دخلوا الخط ؟ .. نحن إن بقى كدى نشوفلنا بلداً نتحشر فيها .. ما يكون فى واحد منهم شليق متابع البوست وقرأ كلامك كمان :)..
أنا لى يومين كده على سفر فى السايبر بالقطارات وما متابع تلفزيون .. فاتح بوست عن سفريات قطارات فى دول العالم الجميلة ..
Post: #215 Title: Re: من روائـع أشــعار وغنــاء الطمبــور .. Author: محمد على طه الملك Date: 02-25-2016, 01:02 AM Parent: #214
Quote: الشاينيز دخلوا الخط
ههههه .. من زمااان ياخي لي تكة سراويلنا .. قلت لي ضارب الطراوة في الاكسبريسات ,, أها القاعدة جنبك بتقرا في كتاب ولّ بتناضمك ؟ ما كان ما يبقى النصم خدرة تشوف وجه حسن ما تشوف.. سمح نمش نشوفك وصلت وين.
Post: #216 Title: Re: من روائـع أشــعار وغنــاء الطمبــور .. Author: عبد المنعم سيد احمد Date: 02-25-2016, 02:36 AM Parent: #215
اهداء للرائع محمد على طه الملك لمن نلم فى الجاينيز ديل كمان هههههه
أجمل ما فى الأغنيتين السابقتين ــــ أغنيات يوسف كرم الله ـــ هو الإيقاع العذب .. هذا أحد تجليات إيقاع الدليب الأصلى حيث عازف الإيقاع فنان مبدع ومتمكن .. فهو استخدم كل المجال الصوتى ـــ بلغة الهندسة ممكن نقول الـ dynamic range ـــ من الرفيع الحاد بالجريدة والطبلة الصغيرة، وإلى مدى العمق النهائى الغليظ للطبلة الكبرى ... ومعها تكتيم النقرات ليحصل على عمق متوسط بصوت الطبلة المكتوم .. كما نجده يوزّع الإيقاع طلوعاً ونزولاً وذلك بالإضافة للتبسيط الشديد للإيقاع ليتسق مع ريذم الأغنية متوسط السرعة .. غايتو لى زمن ما لاقانى مبدع زى ده .. وخاصة مع الأغنية الأولى التى أحبها من زمان .. وخصوصاً نغمة ياهو الموت عديل ماباقى غيرو ..
معليش المنبر خرب كتابتنا .. غيرو دى مفروض تتكتب غيره .. لكين أدغمنا الهاء مع الضمة الكانت ظاهرة وحولنا الهاء مع الضمة لـ واو .. :)
الملاحظ فى عائلة كرم الله ـــ محمدكرم الله وخاله يوسف كرم الله وإبنه أسامة محمدكرم الله ـــ عندهم الحياء والأدب الظاهر وغض البصر من الكاميرا والأداء الصوفى الرزين ..
Post: #227 Title: Re: من روائـع أشــعار وغنــاء الطمبــور .. Author: Munir Date: 03-17-2016, 00:06 AM Parent: #226
أنوِّه أن الفنان الذى يغنى مع يوسف كرم هو المبدع المرحوم عبدالرحمن عجيب وهو من كان تغنى برائعة اسماعيل حسن بلادى أهلاً يابلادى ألف تحية ليكى من الفؤاد ..
و قد انتقل للدار الآخرة قبل فترة قصيرة بعد معاناة طويلة مع الفشل الكلوى .. نسأل الله أن يغفر له وأن ينزل على قبره سحائب الرحمة والغفران ..
Post: #228 Title: Re: من روائـع أشــعار وغنــاء الطمبــور .. Author: Munir Date: 03-17-2016, 00:31 AM Parent: #227
أغنية بلادى أداء الفنان عبدالرحمن عجيب ــ رحمه الله ـــ ومجموعة نادى الطمبور ..
