Post: #1
Title: عندما دخلت محكمة النظام العام
Author: فيصل نوبي
Date: 10-23-2007, 06:35 AM
Parent: #0
طبعا يا وهم كلكم جايين جارين و قايلني مقبوض
الله يقبض شنو اقول ليكم بس
طبعا اخوكم متجدع في الخرطوم و لسه جديد كرت و الناس قاشرين بيو (شكارتها دلاكتها)
اها قام اخوكم فكاها في روحو و قال لي زول عزيز عليو شغال قاضي محكمة النظام العام ماشي معاك الليلة بعد دعوة موجهة قديمة تقول بيت عرس ولا قهوة ولا مكان ونسة ..
في الطريق الي المحكمة قال لي حقو الواحد يقفلك في الحراسة دي لحدي آخر الدوام ( صراحة لاوز بي )
المهم دخلنا المحكمة و اخوكم قاعد في كرسي جنب القاضي و عامل فيها مراقب المحكمة ..
جابو لي الجرائد و قهوة و معاها سجارة كده و هاك يا خلف الكراع و عملت فيها و لا قاضي المحكمة العليا
جا الحاجب بتاع المحكمة و سال مولانا نبداء يا مولانا نجيب الجماعة ديل ؟؟
مولانا قال ليو جيبهم .. في سري قلت ليو جيب خلينا نشوف
بدينا بي نفرين جابوهم وقفوهم مكان المتهمين و معاهم واحد شاكي ..
القاضي سال الشاكي
الاسم .. العمر .. العنوان .. الحالة الاجتماعية .. الديانة .. البلاغ ؟
الشاكي " شرطي " بعد ان ( حلف اليمين ) : أثناء الحملة تم ضبط المتهمين في حالة سُكر ( بيتمطوحو )
مولانا سال المتهمين
الاسم .. العمر .. العنوان .. الحالة الاجتماعية .. الديانة .. شارب .. شنو .. قبضوك وين ؟
آخر اجابتين : نعم .. مريسة .. في شارع .....
مولانا : 40 جلدة بالسوط حداً
و التاني نفس الاسئلة و نفس الحال ..
و بعدها بي دقيقتين .. امام المحكمة و امام القاضي .. كل واحد اخد اربعين سوط زي الترتيب و شتت
__
نواصل مع البقية ولا ما مستعدين
|
Post: #2
Title: Re: عندما دخلت محكمة النظام العام
Author: قرشـــو
Date: 10-23-2007, 07:23 AM
Parent: #1
حبيبنا فيصل نوبى
صباح الخير وكل سنة وانت طيب
والله شلنا هم ياخى من العنوان لانى عارف الجماعة ديل بقبضوا الزول حتى لو عاين ساكت ..
لكن ياخوى باقى لى محكمة النظام العام دى زى محاكم العمد فى سالف العهود ..
شغلها سكارى وطلاق وزمان طبعا كان فى صنف هسع اندثر رسميا ولكن مشاكله باقية...
يعنى فى الاجازة ما بتخلى محنك يا فردة ؟؟؟؟
يديك العافية
|
Post: #3
Title: Re: عندما دخلت محكمة النظام العام
Author: Elawad Eltayeb
Date: 10-23-2007, 07:53 AM
Parent: #2
العزيز فيصل، كل سنة وانت طيب
أعمل حسابك ما تحضر حاجات زي دي إنت ما سمعت باللعنة التي يقال أنها أصابت الناس اللي حضروا تعذيب السيد المسيح، حضرت فيلم عن هذا الموضوع. محاكم النظام العام دي جزء من نظام مشكوك في مصداقيته. ويمكن واحد من المحكومين ديل يكون مظلوم ويرسل دعوة ليس بينها وبين الله سبحانه وتعالى حجاب، ونحن بنخاف عليك يا زول ياطيب.
|
Post: #5
Title: Re: عندما دخلت محكمة النظام العام
Author: فيصل نوبي
Date: 10-23-2007, 09:25 AM
Parent: #3
مولانا "الولد الطيب" 
كل عام و انت بالف خير ..
يسعدني تواجدكـ دوما .. و و دائما ما بتقصر في مجالكـ
تعرف يا العوض .. اكتشفت انه معظم المتهمين في محاكم النظام العام (بيتكيفو) من القاضي لانه بينصرهم في معظم الاحيان و يقف في صفهم ضد الشاكي ( عسكري الشرطة ) .. ديل طبعا المترددين
لكن كمان بيخافو من زيادة العقوبة بسبب التردد المتواصل ..
مجالكم ده جميل من بعيد ..
بالضبط زي اليدو في المويه ما زي اليدو في النار
صاحبي ده قال لي مرات بتجيني قضية .. بكون مضطر لتأجيلها يوم عشان استخير ..
بالنسبة لدعوة الجماعة .. خلينا مع المكتوب علي الجبين تشوفه العين ..
أتمني ان يستمر تواجدكـ هنا ..
_____________
اها بعد ما لبعو الاتنين ديل ..
جابو ليهم زي سته كده داخلين ..
معاهم نفس الشيء واحد من ناس النظام العام
و بعد الاسئلة الروتينية .. الاسم .. العمر .. العنوان ... الوظيفة ... الحالة الاجتماعية .. الديانة ...
الاسئلة الروتينية دي للشاكي و المتهمين الاتنين طبعا ..
التهمة الموجهة لهم ( تشرد ) يعني بالدارجي كده شماشة
الحكم سريع جدا ... الافراج عن المتهمين 
__
طبعا هنا في شوية حرفنة من عساكر المحكمة ( ده استنتاج )
الحرفنة وين !!
انه العسكري ( حاجب المحكمة ) بيشكل او ينوع الاتهام عشان العسكري اللي بيجلد الجماعة ياخد راحة شوية 
__
شوية و نجيكم زنقة شغل 
|
Post: #4
Title: Re: عندما دخلت محكمة النظام العام
Author: فيصل نوبي
Date: 10-23-2007, 09:15 AM
Parent: #2
حبيبنا و عمدتنا قرشو
كل عام و انت بالف خير و ربنا يحقق أمنياتكـ ..
Quote: لكن ياخوى باقى لى محكمة النظام العام دى زى محاكم العمد فى سالف العهود ..
شغلها سكارى وطلاق وزمان طبعا كان فى صنف هسع اندثر رسميا ولكن مشاكله باقية... |
تعرف كنت مفتكرها نفس فكرتكـ دي
لكن لقيت العجب و العجاب بعد ما بقا في شرطة اسمها امن المجتمع ..
سمعت بي ناس الموبايلات و اللابتوبات و الفلاش ديسك ... عادي بيسجلو زيارة للمحكمة 
بجيك بي قصصهم واحده واحده ..
بالجد كان يوم غريب
سلامات كتار.
|
Post: #15
Title: Re: عندما دخلت محكمة النظام العام
Author: محمد زكريا
Date: 08-04-2010, 11:58 PM
Parent: #2
ياخ كان تحن عليهم وتخلى صاحبك يخفف الحكم
ولا تاخد على الاقل عشره من كل واحد......اهو تكون تضامنت
|
Post: #6
Title: Re: عندما دخلت محكمة النظام العام
Author: حمد فتح الرحمن
Date: 10-23-2007, 09:34 AM
Parent: #1
| Quote: الله يقبض شنو اقول ليكم بس |
لا قولا
قولا بلاهي
صدق يا فردة انا واحد من الناس قايلك قبضوك لما اعلمه من سؤ اخلاقك
|
Post: #9
Title: Re: عندما دخلت محكمة النظام العام
Author: فيصل نوبي
Date: 10-23-2007, 10:13 AM
Parent: #6
حمد
وين يا صديق انت !!
ولا العيد يجيبكـ ولا حتي رسالة
بس جاي للشماته مش كده
صاحبكـ الوغد ضرب لي تلفون قلت ليو في السودان شال الرقم و منتظرو يتصل ليوم الليلة
لكن برضو فيو الخير اتذكرنا مع الهيلمانت بتاعتو
--
أثناء قرائتي للجريدة و المحكمة شغالة
دخل ولد مراهق و معاه واحده في نهاية الاربعينات ان لم تكن في الخمسينات ..
و دخل الشاكي ( عسكري شرطة النظام العام )
و بداء الاسئلة الروتينية للشاكي
الاسم ... العمر .. العنوان ... المهنة ... الديانة .. الحالة الاجتماعية .. البلاغ ..
البلاغ:
أثناء تواجدنا بالمقر في المنطقة ....... ضبطنا المتهم يضع يديه علي فخذي المتهمة في مكان عام ( حديقة .... ) و عليه تم إحضارهما لمخالفتهم للمادة ... ( فعل فاحش في مكان عام )
نفس الاسئلة للمتهم
الاسم ...
العمر .. 19 سنة
العنوان ...
المهنة ... طالب
الديانة ..
الحالة الاجتماعية .. عازب
اين كنت في يوم ... الساعة .... مع من ؟
- في حديقة .... مع المتهمة ...
هل كنت تضع يديكـ علي فخذيها كما اشار الشاكي ؟
- نعم
نفس الاسئلة للمتهمة
الاسم ...
العمر .. 25 سنة ( طبعا انا قربت اقول ليها تعالي ارضعي )
العنوان ...
المهنة ... لا يوجد
الديانة ..
الحالة الاجتماعية .. بعد تفكير .... مطلقة
اين كنت في يوم ... الساعة .... مع من ؟
- في حديقة .... مع المتهم ...
هل كان يضع يديه علي فخذيكـ كما اشار الشاكي ؟
- نعم
سؤال للولد: في زول معاكـ من أهلك هنا ؟؟
الولد : ايوه "عمي"
الحكم:
الجلد 40 جلدة و الغرامة 100 جنيه ( الجديد ) ؛ في حالة العدم السجن شهرين لكل منهما .
الولية سكلبت و قالت ما عندها قروش .. قال للعسكري وديها الحراسة بعد ما تنجلد.
بعد كده نادي العسكري و قال ليو نادي عم الولد من بره..
و قال ليو بصورة شخصية .. الرجاء انكم تنتبهو للولد و تحاولو تصلحو الغلط عشان ما يمشي لحتات اكبر من كده.
الجدير بالذكر ( شديده دي عجبتني )
انه الوليه انجلدت داخل حرم المحكمة دون حضور اي شخص عدا القاضي و الجلاد و انجلدت وهي جالسة.
الولد انجلد بره قدام الناس ... و دفع الغرامة و شتت..
بعد المحكمة انتهت القاضي سال الحاجب .. الولية دفعت الغرامة فاجابه بنعم و اشار لانها اتصلت و حضر شخص و دفع ليها الغرامة .
|
Post: #7
Title: Re: عندما دخلت محكمة النظام العام
Author: تماضر الخنساء حمزه
Date: 10-23-2007, 09:38 AM
Parent: #1
إعترف
ألم تكن أحد النفرين؟
|
Post: #8
Title: Re: عندما دخلت محكمة النظام العام
Author: Ashraf El Bagir
Date: 10-23-2007, 10:05 AM
Parent: #7
نوبى سلأمات و العيد عندكم
|
Post: #11
Title: Re: عندما دخلت محكمة النظام العام
Author: خالد عبد الله محمود
Date: 08-04-2010, 05:06 PM
Parent: #10
| Quote: الجلد 40 جلدة و الغرامة 100 جنيه ( الجديد ) ؛ في حالة العدم السجن شهرين لكل منهما . |
أسه ده بياتو شريعة يا فيصل ؟؟
يعني الزول البضرب ليهو كم كأس زي الزول البخت يدو في فخذ إمرأة ؟؟
بعدين 40 جلدة ليه ياخ أصلو فخذ جنيفر لوبز ؟؟ 
|
Post: #12
Title: Re: عندما دخلت محكمة النظام العام
Author: دينا خالد
Date: 08-04-2010, 06:31 PM
Parent: #11
وووووووووووووو صاحبنا زمان !!
دا مرقتو كيف يا بكرى ؟؟ بقيت تقول للبوستات
كن فتكون ؟ بوست من 2007 ياخ ..
فيصل مشتاقين والله والللللللللا مشتاقييييييييين !!
توقيع ضد القانون
ـــــــــــــــــــ
افتقدك عندما افتقد تضامن الرجال والسند
طبت اينما كنت يا كبير .
|
Post: #13
Title: Re: عندما دخلت محكمة النظام العام
Author: طارق ميرغني
Date: 08-04-2010, 11:40 PM
Parent: #12
ابدا ما هنت يا سوداننا يوما علينا
بالذي اصبح شمسا في يدينا
وغناء عاطر تعدو به الريح
فتختال الهوينى يا بلادي
من كل قلب يا بلادي
|
Post: #14
Title: Re: عندما دخلت محكمة النظام العام
Author: اشرف السر
Date: 08-04-2010, 11:53 PM
Parent: #13
البركة في المظاهرة دي الظهرتك لينا يا نوبي
تصدق قربنا نفتح فيك بلاغ فقدان صاحب (.....)
|
|