Post: #1
Title: يا وجع الموبااااايل ......
Author: وليد محمد المبارك
Date: 01-04-2005, 12:36 PM
Parent: #0
يا وجع الموبااااايل ......
كتر خير سوداتل الخلت التلفونات خشت البيوت قبلي الكهرباء ..... وقبلي الموية مرات ...
والشكر موصول لي بتها الكبيره موبيتل ....
عارفنهم نقلو السودان نقله كبيره جدا ... واتضح جلياً انها نقله اكبر من السودان في الوقت الراهن ... يعني نقلة تقنية لي ناس ما مؤهلين فكريا لي حاجة زي دي ...
ومع التقنية ظهرت العيوب ...
اي هي ما كبيرة...
لكنها كثيرة .. وذات تاثير
حسناً .....
المعروف انو التلفون ..ثم من بعده الموبايل ...او فلنقل كل وسائل الاتصال ... السبب الاساسي من اختراعها .. تقليل الوقت الضائع والمهدر .. عند استخدام وسائل الاتصال التقليدية...
ولان النقلة كانت اكبر من الثقافة السودانية الحالية ...
حدث العكس تماماً..
وكادت ان تصبح نعمة ثورة الاتصالات ...في السودان ...نقمة ...
اصبح الموبايل ... معطل رئيسي لدفة الحركة السودانية .. وعشان اكون دقيق .. دفة الحركة الخرطومية
كيف !!!!!؟؟؟؟؟
انا اوريكم...
زمان لو عندك ورق في الحكومة وانت متابعه .. بيتأخر للاسباب الاتية
1) المدير مافي
2) السكرتيرة في اجازة عشان اليوم الصحي بتاعها
3) الموظف مشى الفطور
4) الختم مقفول في الدرج والغفير ما جاب المفتاح
المهم في نهاية الامر ... بتلقى رد من زول ...
اي ورقك بيتاخر
لكن انت ما بتأخر... عشان بتجد من يرد عليك.. و يوريك انو الليلة مافي طريقة عشان ورقك يخلص ...
الآن....... لا..
حتى الزول البرد عليك ما بتلقاه
من ما تخش لي بتاع الاستقبال
شايل الموبايل ... ولاطعك في الباب اكتر من خمسة دقايق .. وديك يالونسة مع حبيبتو
وبعد داك يا ريت لو بدخلك طوالي ... برضو لاذم يلطعك اللطعة التقليدية.. يعني بقو لطعتين .. واحدة تقليدية والتاني استحدثت مع ظهور الموبايل..
المهم في الاخر خشيت ...
كضاب لو تلقى زول يوصف ليك .. محل انت عاوز تمشي
اي زول زي المجنون بكلم روحو براهو
تسالو .. يعاين ليك في نص عينك ويرد عليك رد غريب..
تستفسر عن ردو المقصود منو شنو!!!
تكتشف انو الرد ده ما ليك ..
صاحبنا بتكلم في الموبايل .. عن طريق السماعات .. وهو اساسا ما سامعك .. وما شايفك .. والنظرة القبيل ..دي كانت نظر في الفراغ .. وانت جزء من هذا الفراغ
يعني بس الصدفه ختتك محل مفروض يعاين الزول ده ..
المهم بالفهلوة .. بالفطرة .. بالنقر ... عرفتا وصلت للمكتب الانت عاوز تمشي ليه وتقضي غرضك..
نفس الصورة
السكرتير يا ماسكة الموبايل ولا ماسكة التلفون
وةتقول ليك اقعد هناك .. لمن اخلص المكالمة ..لوكت ما تنهي منها .. تبدا واحدة تانية .. وهكذا دواليك ..
الساعي .. قاعد والكفتيره بتصفر .. لمن قربت تتقده .. وهو ما سامعا ... عشان بتكلم في الموبايل
والعجب كان لقيت فرقة ودخلت على المسئول..
ربع ساعة عشان تديه التحية فقط.. ده لو لقيت فرقت عشان تحيه اساساً
وطبعا ده ... زائدَا التعقيدات .. والبروقراطية الاصلا كانت في زمان
حافلة مواصلات.....
وكت تنزل .. بكون اضنينك صانين ... من رنين اجراس الهواتف النقالة
ومن تداخل الردود بالصوات العالي .. ومرات بالكواريك .. عشان شباك الحافلة مفتوح .. وصاحبنا ما عاوز يقفلو..
عاوز يتمتع بالنسيم العليل .. وصوت الحبيب في انٍ واحد
وكمان في الجامع ..وفي عز ايمانك وخشوعك .. رنة جرس تقطع حبل اتصالك مع الخالق .. الا تقراء المصحف كلو عشان توصل الحبل ده من جديد
ياخي ست الشاي بقيت عاوز ليك ربع ساعة .. عشان تطلب كباية شاي .. وربع ساعة تاني عشان تجيك الكباية .. وتكون بارده ومسيخة ...
ده كلو عشان ستو .. بتتكلم مع صحبتها في المحطة التانية .. وبتشحدها حبت هبهان..
ده كلو كوم والبيت كوم
يدق الجرس يقومك من احلى نومة
المتصل صديقك فلان الفلان
سبب الاتصال ... اديني رقم تلفون فلان الفلاني التاني .. عشان انا غيرت شريحيتي حقت الموبايل
او
تلفون من صديقك اللدود
اسمع يا انت .. انا واقف جم خشم باب بيتكم ... افتح لي الباب
ياخي طيب ما تدق الباب بدل ما تضرب تلفون !!!!!!!!
او يضرب ليك صاحب اخوك ويسألك
اسمع انت قاعد في البيت ؟
عليك الله اديني فلان لو قاعد في البيت...
طيب انت لو عاوز فلان ... وعارف انو فلان في البيت ...ما تضرب في التلفون الثابت بتاع البيت ؟؟؟!!!!
او يضرب ليك صاحبك الساكن الحلة الجديدة...
ويقول ليك لازم تجي هسع ولامراً هام ...
وتتخمخم من الثورة ... وتركب تلاته مواصلات ... وتلقى الامر المهم .. قعدة كتشينة
استعمال سئ
فقد ثورة الاتصالات قيمتها
وبدل ما تكون مقلله للوقت .. اصبحت مقلقله للوقت
اصبحت مستهلك ومهدر رئيسي للوقت
عشان كده قررت اقاطع الموبايلات
حا اسوي تلفون الحبل وعلبة الزبادي الزمان داك
وبجيكم راجع
|
Post: #2
Title: Re: يا وجع الموبااااايل ......
Author: Muna Khugali
Date: 01-04-2005, 02:34 PM
يـاسـلام يـاوليد موضـوع ظـريـف وحـي
لـكـن أنـا مـا عـرفت الـناس دي بتجـيب قـروش التلفـونـات دي مـن ويـن?
Muna Khugali
|
Post: #3
Title: Re: يا وجع الموبااااايل ......
Author: عمر محمد عبد القادر
Date: 01-04-2005, 02:57 PM
Parent: #2
اخوي وليد ..طبعا الان التلفونات عمت القرى والحضر قالوا مرة سوداتل
ركبت تلفون في قرية نائية من قرى وطننا الحبيب والجماعة اول مرة يشوفو
التلفون ويسمعوا بيهو .. كان صاحب الحظ السعيد شيخ الحلة وصلوه ليهو التلفون في دكانو
وجاء وقت الفطور واغلق الشيخ الدكان وكان يجلس في البرندة القدام الدكان بتاع خضار
دق جرس التلفون فما كان من صاحب الخضار الا ان قام وقعد يدق في الباب يا زول الزول دا مشى الفطور والجرس متواصل والزول يدق في الباب .. الزول قلنا ليك مشى الفطور علك ما سمعت الكلام يا ثقليل ... ديل يا ربي هس مع الموبايل دا بقو كيف يا وليد ...
ود الباوقة
|
Post: #8
Title: Re: يا وجع الموبااااايل ......
Author: وليد محمد المبارك
Date: 01-06-2005, 01:07 AM
Parent: #3
والله ضحكتني يا ود الباوقة
لاكن انت معلوماتك قدييييييييييييييييييمه
هسع اصغر شافع في ابعد قرية
يوريك اي شي عن الموبايلات
وتقنياتها
|
Post: #7
Title: Re: يا وجع الموبااااايل ......
Author: وليد محمد المبارك
Date: 01-06-2005, 01:02 AM
Parent: #2
قروش شنو يا منى
الموبايل نوكيا 3310
جديد لنج بقى 80 الف جنية
تركب كرت من نوع 09127XXXXX برضو بي 75الف
وخلاص
اما حق المكالمات
هو القاعد يتكلم منو
كل الناس شغالة مس كول
يعني عاملين الموبايل بيجر
|
Post: #4
Title: Re: يا وجع الموبااااايل ......
Author: فريد ودالمسيد
Date: 01-05-2005, 03:42 AM
أخوي وليد
والله كلامك كلو صح
وكمان برضو علمت الناس الكذب
الواحد تلقاهو راقد في سريرو يقول ليك أنا في الطريق
وعشرة دقايق بس أكون عندك وهو في الخرطوم وإنت في أمدرمان
حيجيك في عشرة دقايق كيف .. ماعارف
ومن الطرائف عندنا في دبي واحد مديرو واقف وراهو في الإشارة
وهو ماشايف المدير .. والمدير طوالي اتصل عليهو ..وين إنت
يقوم صاحبنا يقول ليهو أنا في المكتب .. تتخيلو المدير
يضحك ويقول ليهو أنا في الإشارة وراك
|
Post: #5
Title: Re: يا وجع الموبااااايل ......
Author: khider
Date: 01-05-2005, 08:54 AM
Parent: #4
| Quote: حا اسوي تلفون الحبل وعلبة الزبادي الزمان داك |
|
Post: #6
Title: Re: يا وجع الموبااااايل ......
Author: bayan
Date: 01-05-2005, 09:16 AM
Parent: #5
بمناسبة الموبايل دا
عايزة اتبوبر انى دخلت العولمة وصار لى موبايل ملكى..
اليوم جهت الساعة 12 ظهرا بتوقيت جنوب شرق آسيا بيان
دخلت العولمة واشترت موبايل بعد طول مقاومة ورفض للحداسة
ولقد فرح الاب وقال 0 بخ بخ بخ لاننى استقبل رسائلى فى موبايله..
واتصل به 10 مرات اذا كان فى رسالة لى...
كما تتصل بى كل الصديقات فى تلفونه لان تلفون بيتنا دائما مشغول من جراء وجود اربعة (تين ادجر) فى البيت مصاحبين طلاب وطالبات اربعة فصول..غير ناس الحديقة والجالية..
كما فرح (التين ادجرز) وقالوا ييييييييييهالانه تانى ما حأنهرم لما يتكلموا فى التلفون.. وكمان لانهم ممكن يعرفوا انا وين ويشتكوا من بعض ودى العوجة الخلتنى ارفض امتلاك جوال..ودخول الحداسة
ونعلمكم ان موبايلى الماخمج نوكيا شرط حتى الارض...
نشكرك على فتح هذا البوست حتى اجد فرصة للبوبار 
وجد فى السودان الموبايل مرض شديد
قبل دقيقة بس وصلتنى اول رسالة من صاحبتى فى السودان.. غلبنى افتحا استعنت بخبراء
شكرا يا حنان يباركو ليك الحجة وفلاح العيال..
ما تنقطعى... 
يبدو انه انا حاحتل البوست دا اشكر فيهو أصحابى البيرسلو لى رسائل .. خاصة الخمسين رسالة الاولى..
|
Post: #11
Title: Re: يا وجع الموبااااايل ......
Author: وليد محمد المبارك
Date: 01-06-2005, 01:19 AM
Parent: #6
يتربى في عزك يا خالة
واخدي راحتك البوست زي حقك
بس ماتنسينا من مع كل رسالة اكتبي :
"مع الشكر لي ابننا وليد لاتاحته لنا هذه الفرصة"
هاهاهاهاهاهاهاهاه
|
Post: #10
Title: Re: يا وجع الموبااااايل ......
Author: وليد محمد المبارك
Date: 01-06-2005, 01:15 AM
Parent: #5
الكلكلك منو يا خدر
|
Post: #9
Title: Re: يا وجع الموبااااايل ......
Author: وليد محمد المبارك
Date: 01-06-2005, 01:09 AM
Parent: #4
والله كلامك صاح يا ود المسيد
لكن مالكضب بس
الكضب او الدغالة او التعب
الكضب انت ضربت مثال
الدغالة عينت البعاين للرقم بتاع المتصل
لو ما عاوزه
يخلي يضرب لمن جرس الموبايل يتبحه
وما يرفعو
وكمان لو ما اتداغلت او كضبت
ياهو التعب محمدك
|
Post: #12
Title: Re: يا وجع الموبااااايل ......
Author: غادة نصر
Date: 01-06-2005, 02:01 AM
((وجع الموبااااايل ))
وليد ازيك وين مختفي كدة ؟؟؟
والله حسع قايلة سرقو منك موبايلك لانو وجعتو حااااااااااااااااارة كيف ! قبل كدة بقت فيني
ودي
غادة
|
Post: #13
Title: Re: يا وجع الموبااااايل ......
Author: وليد محمد المبارك
Date: 01-06-2005, 04:13 AM
Parent: #12
قاعد يا غاده
ازح ليك تقعدي جمبي
وكفارة الموبايل السرقوه منك
ولا اقول ليك تلقاك ارتحتي في الايام السرقو فيهامنك
تسلمي يمه
|
Post: #14
Title: Re: يا وجع الموبااااايل ......
Author: Ismaeil H. Mohamed
Date: 01-06-2005, 06:32 AM
Parent: #13
أخي وليد
شكراً علي هذا لبوست الجميل
صراحةً أعجبني سردك
لطيف
مرح
ولكن نسيت الرسائل وما بها!!!!
أكيد تستحق موضوع آخر!!!!!!!!!
جانب آخرك
بلغ مشتركي موبي تل مليون مشترك في آخر نوفمبر الماضي!!!
كدي أضرب لي قيمة واحد كرت أسكراتش فقط في المليون دي
ونقول شهرياً؟؟؟؟؟؟؟؟
لك ودي
|
Post: #18
Title: Re: يا وجع الموبااااايل ......
Author: وليد محمد المبارك
Date: 01-08-2005, 10:26 AM
Parent: #14
اخوي اسماعيل
ياخ دي بتكون قروش كتيره خلاص
وكدي اكتب لينا انت عن الرسائل
وتسلم
|
Post: #15
Title: Re: يا وجع الموبااااايل ......
Author: ود الشيخ
Date: 01-06-2005, 06:48 AM
| Quote: قام وقعد يدق في الباب يا زول الزول دا مشى الفطور والجرس متواصل والزول يدق في الباب .. الزول قلنا ليك مشى الفطور علك ما سمعت الكلام يا ثقليل |
|
Post: #19
Title: Re: يا وجع الموبااااايل ......
Author: وليد محمد المبارك
Date: 01-08-2005, 10:35 AM
Parent: #15
ود الشيخ
انشاء الله دايما ضاحك
|
Post: #16
Title: Re: يا وجع الموبااااايل ......
Author: بلدى يا حبوب
Date: 01-06-2005, 07:20 AM
الاخ/ وليد مبارك
| Quote: ولان النقلة كانت اكبر من الثقافة السودانية الحالية |
لم تكن النقلة اكبر وشعوب اخرى سبقتنى الى هذ ه التفنية ولكن بلينا بدولاب خدمة مدنية تعتبر النقلة اكبر من ثقافتهم.
تحياتى
|
Post: #17
Title: Re: يا وجع الموبااااايل ......
Author: A.Razek Althalib
Date: 01-06-2005, 07:40 AM
Parent: #16
الأخ/ وليد المبارك
جاك الخبر
شوف جنس ده....
عجب يا رجب..!!
عليه العوض
---------------------
عبدالرازق عيسى الطالب
|
Post: #21
Title: Re: يا وجع الموبااااايل ......
Author: وليد محمد المبارك
Date: 01-08-2005, 10:44 AM
Parent: #17
عبد الرازق
عليه العوض ومنو العوض
الله يهون
|
Post: #20
Title: Re: يا وجع الموبااااايل ......
Author: وليد محمد المبارك
Date: 01-08-2005, 10:41 AM
Parent: #16
اخونا بلدي يا حبوب
اتفق معاك تمامافي حتة دولاب الخدمه التعبان
لكن تعب دولاب الخدمة ده برضو ما بوري انو ثقافتنا من ناحية العمل تعبانة شوية
وشكرا على المرور
|
Post: #22
Title: Re: يا وجع الموبااااايل ......
Author: خدر
Date: 02-18-2005, 07:52 AM
Parent: #20
ياوليد
|
Post: #23
Title: Re: يا وجع الموبااااايل ......
Author: ShiningStar
Date: 02-18-2005, 08:30 AM
الله يخربو الداهي دا ... بلله البنات قربن البسنو تووك...
|
|